ಪತ್ನಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದರೂ ತಡೆಯದೆ ವೀಡಿಯೊ ಚಿತ್ರೀಕರಣ ಮಾಡಿದ ಪತಿ

ಕಾನ್ಪುರ, ಅ. 27: ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದ ಪತ್ನಿಯನ್ನು ತಡೆಯದ ಪತಿ ಆ ಘಟನೆಯನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸಿರುವ ಆಘಾತಕಾರಿ ಘಟನೆ ಉತ್ತರಪ್ರದೇಶದ ಕಾನ್ಪುರದಲ್ಲಿ ನಡೆದಿದೆ. ಐದು ವರ್ಷಗಳ ಹಿಂದೆ ವಿವಾಹವಾಗಿದ್ದ ಶೋಬಿತಾ ಗುಪ್ತಾ ಮಂಗಳವಾರ ಪತಿಯೊಂದಿಗೆ ಜಗಳ ಮಾಡಿಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾಳೆ ಎಂದು ಪತಿಯ ವಿಚಾರಣೆ ವೇಳೆ ತಿಳಿದು ಬಂದಿದೆ. 

ಪತಿ ಸಂಜಯ್ ಗುಪ್ತಾ ಚಿತ್ರೀಕರಿಸಿದ ಮೊಬೈಲ್ ವೀಡಿಯೊದಲ್ಲಿ ಶೋಬಿತಾ ಗುಪ್ತಾ ಬೆಡ್ ಮೇಲೆ ನಿಂತು ಸ್ಕಾರ್ಫ್ ಅನ್ನು ತನ್ನ ಕುತ್ತಿಗೆಗೆ ಸುತ್ತಿಕೊಂಡು ಫ್ಯಾನ್‌ಗೆ ನೇಣು ಹಾಕಿಕೊಳ್ಳಲು ಪ್ರಯತ್ನಿಸುತ್ತಿರುವುದು  ಕಂಡು ಬಂದಿದೆ. ಆದರೆ, ಈ ಸಂದರ್ಭ ಆಕೆಯನ್ನು ತಡೆಯಲು ಪತಿ ಸಂಜಯ್ ಯಾವುದೇ ಪ್ರಯತ್ನ ಮಾಡಿಲ್ಲ. ಅದರ ಬದಲು, ‘‘ಗ್ರೇಟ್ ಇದು ನಿನ್ನ ಮನಸ್ಥಿತಿ. ನಿನಗೆ ತುಂಬಾ ಕೆಟ್ಟ ಮನಸ್ಥಿತಿ ಇದೆ’’ ಎಂದು ಹೇಳುತ್ತಿರುವುದು ವೀಡಿಯೊದಲ್ಲಿ ಕೇಳಿ ಬಂದಿದೆ. ಶೋಬಿತಾ ತಾನು ಹಾಕಿಕೊಂಡಿದ್ದ ನೇಣನ್ನು ಬಿಚ್ಚಿ ಹಾಸಿಗೆ ಮೇಲೆ ನಿಂತಿದ್ದಾಳೆ. ರಕ್ಷಣೆಗೆ ಬಾರದ ಗಂಡನತ್ತ ದೃಷ್ಟಿ ಹಾಯಿಸಿದ್ದಾಳೆ. ಅಲ್ಲಿಗೆ ವೀಡಿಯೊ ಕೊನೆಗೊಳ್ಳುತ್ತದೆ. 
ಪುತ್ರಿ ಶೋಬಿತಾ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ತಾನು ಅಳಿಯನಿಂದ ಮಂಗಳವಾರ ಅಪರಾಹ್ನ ಕರೆ ಸ್ವೀಕರಿಸಿದೆ. ನಾವು ಮನೆಗೆ ಬಂದಾಗ ಆಕೆಯ ಮೃತದೇಹ ಬೆಡ್ ಮೇಲಿತ್ತು. ಅಳಿಯ ಎದೆ ಒತ್ತುವ ಮೂಲಕ ಶ್ವಾಸಕೋಶ ಕಾರ್ಯ ನಿರ್ವಹಿಸುವಂತೆ ಮಾಡುತ್ತಿದ್ದ ಎಂದು ಶೋಭಿತ್ ಅವರ ತಂದೆ ರಾಜ್ ಕಿಶೋರ್ ಗುಪ್ತಾ ಹೇಳಿದ್ದಾರೆ. 

‘‘ಆಕೆಯನ್ನು ಆಸ್ಪತ್ರೆಗೆ ಕೊಂಡೊಯ್ಯುವ ಬದಲು ಆತ ಆಕೆಯ ಶ್ವಾಸಕೋಶ ಕಾರ್ಯ ನಿರ್ವಹಿಸುವಂತೆ  ಮಾಡುತ್ತಿದ್ದ. ಈ ಹಿಂದೆ ಕೂಡ ಆಕೆ ಆತ್ಮಹತ್ಯೆಗೆ ಪ್ರಯತ್ನಿಸಿದ್ದಳು ಎಂದು ಹೇಳಿ ವೀಡಿಯೊ ತೋರಿಸಿದ. ಆದರೆ, ಆಕೆಯನ್ನು ತಡೆದಿಲ್ಲ, ಬದಲಾಗಿ ವೀಡಿಯೊ ಮಾಡಿದ್ದಾನೆ. ಅಪರಾಹ್ನ 12.30ಕ್ಕೆ ಈ ಘಟನೆ ನಡೆದಿದೆ. ಸ್ಪಲ್ಪ ಸಮಯದ ಬಳಿಕ ಆಕೆ ಮೃತಪಟ್ಟಿರುವುದು ಅನುಮಾನ ಮೂಡಿಸಿದೆ’’ ಎಂದು ಅವರು ಹೇಳಿದ್ದಾರೆ. 
ಶೋಬಿತಾಳನ್ನು ಆಕೆಯ ಕುಟುಂಬ ಆಸ್ಪತ್ರೆಗೆ ಕರೆದೊಯ್ದಿದೆ. ಆದರೆ, ಅಲ್ಲಿ ಆಕೆ ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದ್ದಾರೆ. ‘‘ತನ್ನ ಪುತ್ರಿಯನ್ನು ರಕ್ಷಿಸಬಹುದಿತ್ತು. ಆದರೆ, ನನ್ನ ಅಳಿಯ ಅದನ್ನು ಮಾಡಲಿಲ್ಲ. ನಮಗೆ ನ್ಯಾಯ ಬೇಕು’’ ಎಂದು ಕುಟುಂಬ ಹೇಳಿದೆ. 
ಶೋಭಿತಾರ ಆತ್ಮಹತ್ಯೆಯಲ್ಲಿ ಸಂಜಯ್ ಗುಪ್ತಾ ಅವರ ಪಾತ್ರದ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

WARNING: Disturbing video.#Shobhita of #KidwaiNagar, #Kanpur kept trying to hang herself after failing in the first attempt while her husband #Sanjeev were filming the incident.#UttarPradesh #ViralVideo pic.twitter.com/bCmHIytJaD

— Hate Detector (@HateDetectors) October 27, 2022