ವಿದ್ಯಾರ್ಥಿನಿಯನ್ನು ಮದುವೆಯಾಗಲು ಲಿಂಗ ಪರಿವರ್ತನೆ ಶಸ್ತ್ರಚಿಕಿತ್ಸೆಗೆ ಒಳಗಾದ ಶಿಕ್ಷಕಿ!

ಜೈಪುರ: ರಾಜಸ್ಥಾನದ ಭರತ್‌ಪುರದಲ್ಲಿ 29 ವರ್ಷದ ದೈಹಿಕ ತರಬೇತಿ ಶಿಕ್ಷಕಿಯೋರ್ವರು ತಮ್ಮ ವಿದ್ಯಾರ್ಥಿನಿಯನ್ನು ಮದುವೆಯಾಗಲು ಲಿಂಗ ಪರಿವರ್ತನೆ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ.

ಮೀರಾ ಎಂಬವರು ತಮ್ಮ ತರಗತಿಯೊಂದರಲ್ಲಿ ಭೇಟಿಯಾದ ಕಲ್ಪನಾರೊಂದಿಗೆ ಮದುವೆಯಾಗುವ ಸಲುವಾಗಿ ಲಿಂಗ ಪರಿವರ್ತನೆ ಮಾಡಿಕೊಂಡಿದ್ದು, ಆರವ್ ಕುಂತಲ್ ಎಂದು ತಮ್ಮ ಹೆಸರು ಬದಲಾಯಿಸಿಕೊಂಡಿದ್ದಾರೆ. ಐದು ವರ್ಷಗಳಿಂದ ಸಂಬಂಧ ಹೊಂದಿದ್ದ ಅವರು ಕೊನೆಗೂ ಕುಟುಂಬದವರ ಒಪ್ಪಿಗೆ ಮೇರೆಗೆ ರವಿವಾರ ವಿವಾಹವಾದರು ಎಂದು ವರದಿಯಾಗಿದೆ.

"ನನ್ನ ದೇಹವನ್ನು ಒಪ್ಪಿಕೊಳ್ಳುವುದು ನನಗೆ ಕಷ್ಟಕರವಾದ ಕಾರಣ ನಾನು ನನ್ನ ಲಿಂಗವನ್ನು ಬದಲಾಯಿಸಲು ಬಯಸಿದ್ದೇನೆ. ನಾನು 2010 ರಲ್ಲಿ ಲಿಂಗ ಬದಲಾವಣೆಯ ಕುರಿತು ಲೇಖನವನ್ನು ಓದಿದ್ದೇನೆ. ಅಂದಿನಿಂದ, ನಾನು ನನ್ನ ಲಿಂಗವನ್ನು ಬದಲಾಯಿಸುವ ಮಾರ್ಗಗಳನ್ನು ಹುಡುಕಲು ಪ್ರಾರಂಭಿಸಿದೆ ಮತ್ತು ಶಸ್ತ್ರಚಿಕಿತ್ಸೆಗೆ ಒಳಗಾಗಲು ನನ್ನ ಮನಸ್ಸನ್ನು ಸಿದ್ಧಪಡಿಸಿದೆ" ಆರವ್ ಹೇಳಿದ್ದಾರೆ.

ಯೂಟ್ಯೂಬ್ ಮೂಲಕ ಆರವ್ ತನಗೆ ಶಸ್ತ್ರಚಿಕಿತ್ಸೆ ಮಾಡಿದ ದಿಲ್ಲಿ ಮೂಲದ ವೈದ್ಯರ ಬಗ್ಗೆ ಅರಿತುಕೊಂಡಿದ್ದಾರೆ.

"ನಾನು ವೈದ್ಯರನ್ನು ಸಂಪರ್ಕಿಸಿದೆ, ಬಳಿಕ ಚಿಕಿತ್ಸೆ ಪ್ರಾರಂಭವಾಯಿತು. ಮೊದಲ ಪರೀಕ್ಷೆಯನ್ನು ಡಿಸೆಂಬರ್ 25, 2019 ರಂದು ಮಾಡಲಾಯಿತು. ಅಂತಿಮ ಶಸ್ತ್ರಚಿಕಿತ್ಸೆಯನ್ನು 2021 ರ ಡಿಸೆಂಬರ್ ನಲ್ಲಿ ನಡೆಸಲಾಯಿತು" ಎಂದು ಅವರು ಹೇಳಿದ್ದಾರೆ.

ನಮ್ಮ ಸಂಬಂಧದ ಬಗ್ಗೆ ಕಲ್ಪನಾ ತನ್ನ ಕುಟುಂಬಕ್ಕೆ ತಿಳಿಸಿದಳು. ಆಕೆಯ ಕುಟುಂಬವು ತಕ್ಷಣವೇ ಪ್ರಸ್ತಾಪವನ್ನು ಒಪ್ಪಿಕೊಂಡಿತು ಎಂದು ಆರವ್‌ ತಿಳಿಸಿದ್ದಾರೆ

ಕಬಡ್ಡಿ ಆಟಗಾರ್ತಿಯಾಗಿರುವ ಕಲ್ಪನಾ, ಕ್ರೀಡೆಯಲ್ಲಿ ತಾನು ಮಾಡಿದ ಎಲ್ಲಾ ಸಾಧನೆಗಳು ಆರವ್‌ಗೆ ಸಲ್ಲುತ್ತದೆ ಎಂದಿದ್ದಾರೆ. ಅವರ ಬೆಂಬಲವೇ ತನಗೆ ಮೂರು ರಾಜ್ಯ ಮಟ್ಟದ ಮತ್ತು ಒಂದು ರಾಷ್ಟ್ರ ಮಟ್ಟದ ಆಟವನ್ನು ಆಡಲು ಅವಕಾಶ ಮಾಡಿಕೊಟ್ಟಿತು ಎಂದು ಅವರು ಹೇಳಿದ್ದಾರೆ.

ಆರವ್ ಚಿಕ್ಕಂದಿನಿಂದಲೂ ಹುಡುಗನಂತೆ ಬದುಕುತ್ತಿದ್ದ ಎಂದು ಆರವ್ ತಂದೆ ಬಿರಿ ಸಿಂಗ್ ಹೇಳಿದ್ದಾರೆ.