ಚೊಚ್ಚಲ ಪಂದ್ಯದಲ್ಲೇ 7 ವಿಕೆಟ್ ಉರುಳಿಸಿದ ಪಾಕ್ ಸ್ಪಿನ್ನರ್ ಅಬ್ರಾರ್ ಅಹ್ಮದ್

ಮುಲ್ತಾನ್ (ಪಾಕಿಸ್ತಾನ), ಡಿ. 9: ತನ್ನ ಚೊಚ್ಚಲ ಟೆಸ್ಟ್ ಆಡಿದ ಪಾಕಿಸ್ತಾನದ ಲೆಗ್ ಸ್ಪಿನ್ನರ್ ಅಬ್ರಾರ್ ಅಹ್ಮದ್ ಶುಕ್ರವಾರ ತನ್ನ ಅಮೋಘ ಪ್ರದರ್ಶನದ ಮೂಲಕ ಇಂಗ್ಲೆಂಡ್ನ ಏಳು ವಿಕೆಟ್ ಗಳನ್ನು ಉರುಳಿಸಿದ್ದಾರೆ. ಇದರೊಂದಿಗೆ ಚೊಚ್ಚಲ ಟೆಸ್ಟ್ ನಲ್ಲೇ ಏಳು ವಿಕೆಟ್ ಗಳನ್ನು ಗಳಿಸಿದ ಪಾಕಿಸ್ತಾನದ ಮೂರನೇ ಆಟಗಾರ ಅವರಾಗಿದ್ದಾರೆ.

ಮುಲ್ತಾನ್ನಲ್ಲಿ ನಡೆದ ಎರಡನೇ ಟೆಸ್ಟ್ ನ  ಆರಂಭಿಕ ದಿನವಾದ ಶುಕ್ರವಾರ ಅಬ್ರಾರ್ ಅಹ್ಮದ್ರ ಮಾರಕ ಬೌಲಿಂಗ್ ನಿಂದಾಗಿ ಇಂಗ್ಲೆಂಡ್ 281 ರನ್ಗಳಿಗೆ ತನ್ನ ಮೊದಲ ಇನಿಂಗ್ಸ್ ಮುಗಿಸಿತು. ಅಬ್ರಾರ್ 7 ವಿಕೆಟ್ಗಳನ್ನು ಪಡೆಯಲು 114 ರನ್ಗಳನ್ನು ನೀಡಿದರು.

ಬಳಿಕ ಪಾಕಿಸ್ತಾನವು ತನ್ನ ಮೊದಲ ಇನಿಂಗ್ಸ್ ನಲ್ಲಿ 2 ವಿಕೆಟ್ ಗಳ ನಷ್ಟಕ್ಕೆ 107 ರನ್ಗಳನ್ನು ಗಳಿಸಿದೆ. ಆರಂಭಿಕರಾದ ಅಬ್ದುಲ್ಲಾ ಶಫೀಕ್ (14) ಮತ್ತು ಇಮಾಮ್ ಉಲ್ ಹಕ್ (0) ಬೇಗನೇ ನಿರ್ಗಮಿಸಿದರು. ನಾಯಕ ಬಾಬರ್ ಆಝಮ್ (61) ಮತ್ತು ಸೌದ್ ಶಕೀಲ್ (32) ದಿನದಾಟದ ಕೊನೆಯ ವೇಳೆಗೆ ಕ್ರೀಸ್ನಲ್ಲಿ ಉಳಿದಿದ್ದಾರೆ.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಗೆ  ಇಳಿದ ಇಂಗ್ಲೆಂಡ್ ಪರವಾಗಿ ಬೆನ್ ಡಕೆಟ್ (63) ಮತ್ತು ಓಲೀ ಪೋಪ್ (60) ಅರ್ಧ ಶತಕಗಳನ್ನು ಬಾರಿಸಿದರು.

ನಾಯಕ ಬಾಬರ್ ಆಝಮ್ ಇನಿಂಗ್ಸ್ ನ ಒಂಭತ್ತನೇ ಓವರ್ನಲ್ಲೇ ನಿಗೂಢ ಸ್ಪಿನ್ನರ್ನನ್ನು ದಾಳಿಗಿಳಿಸಿದರು. ಅಬ್ರಾರ್ ನಿರಾಶೆಗೊಳಿಸಲಿಲ್ಲ. ಐದನೇ ಎಸೆತದಲ್ಲೇ ಎದುರಾಳಿಗೆ ಆಘಾತ ನೀಡಿದರು. ಆರಂಭದಿಂದಲೇ ಸ್ಪಿನ್ನರ್ಗಳಿಗೆ ನೆರವು ನೀಡಲು ಆರಂಭಿಸಿದ ಪಿಚ್ಚನ್ನು ಸರಿಯಾಗಿ ಬಳಸಿಕೊಂಡ ಲೆಗ್ ಸ್ಪಿನ್ನರ್ ವೈವಿಧ್ಯಮಯ ಬೌಲಿಂಗ್ ಮೂಲಕ ಎದುರಾಳಿ ಬ್ಯಾಟರ್ಗಳನ್ನು ಕಾಡಿದರು.

ಮೂರು ಪಂದ್ಯಗಳ ಸರಣಿಯ ಮೊದಲ ಪಂದ್ಯವನ್ನು ಗೆದ್ದಿರುವ ಇಂಗ್ಲೆಂಡ್ ಸರಣಿಯಲ್ಲಿ 1-0ಯಿಂದ ಮುಂದಿದೆ. ರಾವಲ್ಪಿಂಡಿಯಲ್ಲಿ ನಡೆದಿರುವ ಮೊದಲ ಟೆಸ್ಟನ್ನು ಅದು 74 ರನ್ ಗಳಿಂದ ಗೆದ್ದಿದೆ. 

ತಂಡವು 2005ರ ಬಳಿಕ ಪಾಕಿಸ್ತಾನಕ್ಕೆ ಮೊದಲ ಟೆಸ್ಟ್ ಪ್ರವಾಸವನ್ನು ಕೈಗೊಂಡಿದೆ. ಅಬ್ರಾರ್ ಅವರು ಝಾಕ್ ಕ್ರಾಲಿ (19), ಡಕೆಟ್, ಜೋ ರೂಟ್ (8), ಪೋಪ್, ಹ್ಯಾರಿ ಬ್ರೂಕ್ (9), ನಾಯಕ ಬೆನ್ ಸ್ಟೋಕ್ಸ್ (30) ಮತ್ತು ವಿಲ್ ಜಾಕ್ಸ್ (31)ರ ವಿಕೆಟ್ಗಳನ್ನು ಒಂದರ ನಂತರ ಒಂದರಂತೆ ಉರುಳಿಸಿದರು.

ಡಕೆಟ್ ಮತ್ತು ಪೋಪ್ 61 ಎಸೆತಗಳಲ್ಲಿ 79 ರನ್ಗಳ ಭಾಗೀದಾರಿಕೆ ನಿಭಾಯಿಸಿದರು. ಇದು ಇಂಗ್ಲೆಂಡ್ ಇನಿಂಗ್ಸ್ ನ ಪ್ರಮುಖ ಅಂಶವಾಯಿತು. ಒಂದು ಹಂತದಲ್ಲಿ ಅವರು ತಮ್ಮ ರಿವರ್ಸ್ ಸ್ವೀಪ್ ಶಾಟ್ಗಳ ಮೂಲಕ ಅಬ್ರಾರ್ ಅಹ್ಮದ್ ಸೇರಿದಂತೆ ಎದುರಾಳಿ ಬೌಲರ್ಗಳ ಮೇಲೆ ಪ್ರಾಬಲ್ಯ ಸಾಧಿಸಿದರು.