ನಾನು ವಿಶ್ವ ಚಾಂಪಿಯನ್ ಆಗಿ ಇನ್ನೂ ಕೆಲವು ಪಂದ್ಯಗಳನ್ನು ಆಡಲು ಬಯಸುತ್ತೇನೆ ಎಂದ ಮೆಸ್ಸಿ

ದೋಹಾ: ಅರ್ಜೆಂಟೀನದ ಸೂಪರ್ ಸ್ಟಾರ್ ಲಿಯೊನೆಲ್ ಮೆಸ್ಸಿ ರವಿವಾರ ವಿಶ್ವಕಪ್ ಗೆಲ್ಲುವ ತನ್ನ ಜೀವಮಾನದ ಮಹತ್ವಾಕಾಂಕ್ಷೆಯನ್ನು ಈಡೇರಿಸಿಕೊಂಡರೂ ತಾನು ದೇಶಕ್ಕಾಗಿ ಆಡುವುದನ್ನು ಮುಂದುವರಿಸುವುದಾಗಿ ಪ್ರತಿಜ್ಞೆ ಮಾಡಿದ್ದಾರೆ.

 "ನಾನು ವಿಶ್ವ ಚಾಂಪಿಯನ್ ಆಗಿ ಇನ್ನೂ ಕೆಲವು ಪಂದ್ಯಗಳನ್ನು ಆಡಲು ಬಯಸುತ್ತೇನೆ" ಎಂದು ದೋಹಾದಲ್ಲಿ ನಡೆದ ವಿಶ್ವಕಪ್ ಫೈನಲ್‌ನಲ್ಲಿ ಫ್ರಾನ್ಸ್ ವಿರುದ್ಧ  ಪೆನಾಲ್ಟಿ ಶೂಟ್-ಔಟ್ ವಿಜಯದ ನಂತರ 35 ವರ್ಷದ ಮೆಸ್ಸಿ ಅರ್ಜೆಂಟೀನದ ದೂರದರ್ಶನಕ್ಕೆ  ಹೇಳಿದರು.

ಆದರೆ ಅರ್ಜೆಂಟೀನ ನಾಯಕ ತನ್ನ ಸುದೀರ್ಘ ವೃತ್ತಿಜೀವನದಲ್ಲಿ  ಒಂದು ಪ್ರಮುಖ ಅಂತಾರಾಷ್ಟ್ರೀಯ ಟ್ರೋಫಿಯನ್ನು ಗೆದ್ದುಕೊಂಡ ನಂತರ ತನ್ನ ವೃತ್ತಿಜೀವನವು ಬಹುತೇಕ ಮುಗಿದಿದೆ ಎಂಬ ಸತ್ಯವನ್ನು ಒಪ್ಪಿಕೊಂಡರು.

ಪ್ಯಾರಿಸ್ ಸೇಂಟ್-ಜರ್ಮೈನ್ ಫಾರ್ವರ್ಡ್ ಆಟಗಾರ ಮೆಸ್ಸಿ  120  ನಿಮಿಷಗಳ ಹೋರಾಟದ ನಂತರ 3-3 ರಲ್ಲಿ ಕೊನೆಗೊಂಡ ಅದ್ಭುತ ಫೈನಲ್‌ನಲ್ಲಿ ಎರಡು ಗೋಲುಗಳನ್ನು ಗಳಿಸಿದರು, ಏಳು ಬಾರಿ ಬ್ಯಾಲನ್ ಡಿ'ಓರ್ ವಿಜೇತ ಮೆಸ್ಸಿ ಶೂಟ್-ಔಟ್‌ನಲ್ಲಿ ತಮ್ಮ ಸ್ಪಾಟ್-ಕಿಕ್ ಅನ್ನು ಗಳಿಸಿ ಅರ್ಜೆಂಟೀನಕ್ಕೆ 4-2 ಅಂತರದ ಗೆಲುವು ತಂದುಕೊಟ್ಟರು.

"ನಿಸ್ಸಂಶಯವಾಗಿ ನಾನು ನನ್ನ ವೃತ್ತಿಜೀವನವನ್ನು ಇದರೊಂದಿಗೆ ಕೊನೆಗೊಳಿಸಲು ಬಯಸುತ್ತೇನೆ, ನಾನು ಹೆಚ್ಚಿನದನ್ನು ಕೇಳಲು ಸಾಧ್ಯವಿಲ್ಲ. ನನ್ನ ವೃತ್ತಿಜೀವನವು ಬಹುತೇಕ ಮುಗಿದಿದೆ ಏಕೆಂದರೆ ಇದು ನನ್ನ ಕೊನೆಯ ವರ್ಷಗಳಾಗಿವೆ'' ಎಂದು ಮೆಸ್ಸಿ ಹೇಳಿದರು.

ಮೆಸ್ಸಿ ಅರ್ಜೆಂಟೀನದ  ಪರ 172  ಪಂದ್ಯಗಳನ್ನು ಆಡಿದ್ದಾರೆ, 2005 ರಲ್ಲಿ ಪಾದಾರ್ಪಣೆ ಮಾಡಿದ ನಂತರ 98 ಗೋಲುಗಳನ್ನು ಗಳಿಸಿದ್ದಾರೆ.