2021-22 ರಲ್ಲಿ 20 ಸಾವಿರಕ್ಕೂ ಅಧಿಕ ಶಾಲೆಗಳು ಮುಚ್ಚಿವೆ: ಕೇಂದ್ರ ಸರ್ಕಾರ ಮಾಹಿತಿ

ಹೊಸದಿಲ್ಲಿ: 2021-22ರಲ್ಲಿ ಸುಮಾರು 20,000 ಶಾಲೆಗಳನ್ನು ಮುಚ್ಚಲಾಗಿದೆ ಮತ್ತು ಸುಮಾರು 1.9 ಲಕ್ಷ ಶಿಕ್ಷಕರ ಸಂಖ್ಯೆಯಲ್ಲಿ ಕುಸಿತವಾಗಿದೆ ಎಂದು ಕೇಂದ್ರ ಸರ್ಕಾರ ಈ ತಿಂಗಳ ಆರಂಭದಲ್ಲಿ ರಾಜ್ಯಸಭೆಗೆ ತಿಳಿಸಿದೆ.

ಕಾಂಗ್ರೆಸ್ ರಾಜ್ಯಸಭಾ ಸದಸ್ಯ ರಾಜೀವ್ ಶುಕ್ಲಾ ಅವರ ಪ್ರಶ್ನೆಗೆ ಉತ್ತರವಾಗಿ ಶಿಕ್ಷಣ ಖಾತೆ ರಾಜ್ಯ ಸಚಿವೆ ಅನ್ನಪೂರ್ಣ ದೇವಿ ಅವರು ಅಂಕಿಅಂಶಗಳನ್ನು ಹಂಚಿಕೊಂಡಿದ್ದಾರೆ.

2020-21ರಲ್ಲಿ ಖಾಸಗಿ ಮತ್ತು ಸರ್ಕಾರಿ ಅನುದಾನಿತ ಸಂಸ್ಥೆಗಳು ಸೇರಿದಂತೆ ದೇಶದಲ್ಲಿ 15,09,136 ಶಾಲೆಗಳಿದ್ದವು. 2021-22ರಲ್ಲಿ ಈ ಸಂಖ್ಯೆ 14,89,115ಕ್ಕೆ ಇಳಿದಿದೆ. ಇದೇ ಅವಧಿಯಲ್ಲಿ ಶಿಕ್ಷಕರ ಸಂಖ್ಯೆ 96,96,425 ರಿಂದ 95,07,123ಕ್ಕೆ ಇಳಿಕೆಯಾಗಿದೆ.

ಸರ್ಕಾರವು ತನ್ನ ಯುನೈಟೆಡ್ ಡಿಸ್ಟ್ರಿಕ್ಟ್ ಇನ್ಫರ್ಮೇಷನ್ ಸಿಸ್ಟಮ್ ಫಾರ್ ಎಜುಕೇಶನ್ ಪ್ಲಸ್ (UDISE+) ಅಡಿಯಲ್ಲಿ ಶಾಲೆಗಳ ಡೇಟಾವನ್ನು ಸಂಗ್ರಹಿಸುತ್ತದೆ. UDISE+ ಡೇಟಾ ಪ್ರಕಾರ, 2020-21ರಲ್ಲಿ 10,32,049 ಸರ್ಕಾರಿ ಶಾಲೆಗಳಿದ್ದು, 2019-20ರಲ್ಲಿ 10,32,570 ಮತ್ತು 2018-19ರಲ್ಲಿ 10,83,678 ಶಾಲೆಗಳಿದ್ದವು.

"ಸಾಂಕ್ರಾಮಿಕ ಹಿನ್ನೆಲೆ ಹಾಗೂ ಇತರೆ ಕಾರಣಗಳಿಂದ ಖಾಸಗಿ ಮತ್ತು ಇತರ ನಿರ್ವಹಣೆಯ ಅಡಿಯಲ್ಲಿರುವ ಶಾಲೆಗಳು ಮುಚ್ಚಲ್ಪಟ್ಟ ಕಾರಣದಿಂದಾಗಿ 2021-22 ರಲ್ಲಿ ಒಟ್ಟು ಶಾಲೆಗಳ ಸಂಖ್ಯೆಯಲ್ಲಿ ಕುಸಿತವಾಗಿದೆ” ಎಂದು ಸಚಿವರು ಸಂಸತ್ತಿಗೆ ತಿಳಿಸಿದ್ದಾರೆ. 

“ಹಾಗೆಯೇ, ಸಾಂಕ್ರಾಮಿಕ ಸಮಯದಲ್ಲಿ ಶಾಲೆಗಳು ಆನ್‌ಲೈನ್ ಮೋಡ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾಗ ಖಾಸಗಿ ಶಾಲೆಗಳಲ್ಲಿ ಕಡಿಮೆ ಶಿಕ್ಷಕರನ್ನು ನಿಯೋಜಿಸಿರುವುದು ಶಿಕ್ಷಕರ ಸಂಖ್ಯೆಯಲ್ಲಿ ಕುಸಿತಕ್ಕೆ ಮುಖ್ಯ ಕಾರಣವಾಗಿದೆ" ಎಂದು ಅವರು ಹೇಳಿದ್ದಾರೆ. 

ಅದೇ ವೇಳೆ, ಕೋವಿಡ್‌ ಅವಧಿಯಲ್ಲಿ ಸರ್ಕಾರಿ ಶಾಲೆಗಳಲ್ಲಿ ದಾಖಲಾತಿ ಸಂಖ್ಯೆ ಏರಿಕೆಯಾಗಿದೆ. UDISE+ ನಲ್ಲಿ ದಾಖಲಾದ ಮಾಹಿತಿಯ ಪ್ರಕಾರ, 2019-20ರಲ್ಲಿ ಸರ್ಕಾರಿ ಶಾಲೆಗಳಲ್ಲಿ ದಾಖಲಾತಿ 13.09 ಕೋಟಿ ಆಗಿತ್ತು. ಇದು 2020-21ರಲ್ಲಿ 13.49 ಕೋಟಿಗೆ ಮತ್ತು 2021-22ರಲ್ಲಿ 14.32 ಕೋಟಿಗೆ ಏರಿದೆ. ಖಾಸಗಿ ಶಾಲೆಗಳಲ್ಲಿನ ದಾಖಲಾತಿಯು 2019-20 ರಲ್ಲಿ 9.82 ಕೋಟಿ ಇತ್ತು. ಈ ಸಂಖ್ಯೆ 2020-21ರಲ್ಲಿ 9.51 ಕೋಟಿ ಇಳಿದಿದೆ.  ಇದು 2021-22ರ ಅವಧಿಯಲ್ಲಿ 8.82 ಕೋಟಿಗೆ ಕುಸಿದಿದೆ.

2016ರಲ್ಲಿ, ಸರ್ಕಾರಿ ಕಾರ್ಯದರ್ಶಿಗಳ ಗುಂಪು ಕಡಿಮೆ ದಾಖಲಾತಿ ಹೊಂದಿರುವ ಶಾಲೆಗಳ ಏಕೀಕರಣ ಅಥವಾ ವಿಲೀನಕ್ಕೆ ಶಿಫಾರಸು ಮಾಡಿತ್ತು. ಮುಂದಿನ ವರ್ಷ ನೀತಿ ಆಯೋಗವು ಈ ಪ್ರಸ್ತಾವನೆಯನ್ನು ಬೆಂಬಲಿಸಿತ್ತು. ರಾಜ್ಯಗಳೊಂದಿಗಿನ ಸಭೆಗಳಲ್ಲಿ, ಅಂದಿನ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯವು ಸಣ್ಣ ಶಾಲೆಗಳನ್ನು ಹತ್ತಿರದ ಶಾಲೆಗಳೊಂದಿಗೆ ವಿಲೀನಗೊಳಿಸುವಂತೆ ಪ್ರೋತ್ಸಾಹಿಸಿತ್ತು.

ಶಿಕ್ಷಣ ಹಕ್ಕು ಕಾಯ್ದೆಯಡಿ ಪಡೆದ ಮಾಹಿತಿ ಪ್ರಕಾರ, ಪ್ರತಿ ತರಗತಿಗೂ ಒಬ್ಬ ಶಿಕ್ಷಕರಿರಬೇಕು. ಒಂದು ಪ್ರಾಥಮಿಕ ಶಾಲೆಯಲ್ಲಿ ಐದು ತರಗತಿಗಳಲ್ಲಿ 50 ಕ್ಕಿಂತ ಕಡಿಮೆ ಮಕ್ಕಳಿದ್ದರೆ, ಐದು ಸಾಮಾನ್ಯ ಶಿಕ್ಷಕರನ್ನು ಹೊಂದಿರುವ ಅಂತಹ ಶಾಲೆಗಳ ನಿರ್ವಹಣೆಯು ಸರ್ಕಾರಕ್ಕೆ ದುಬಾರಿಯಾಗುತ್ತದೆ. 

ಇದೇ ವೇಳೆ, 15ಕ್ಕಿಂತ ಕಡಿಮೆ ವಿದ್ಯಾರ್ಥಿಗಳಿರುವ ಶಾಲೆಗಳನ್ನು ಮುಚ್ಚಲು ಒಡಿಶಾ ನಿರ್ಧರಿಸಿದೆ ಮತ್ತು ಅಂತಹ ಸುಮಾರು 14,000 ಶಾಲೆಗಳನ್ನು ಹತ್ತಿರದ ಶಾಲೆಗಳೊಂದಿಗೆ ವಿಲೀನಗೊಳಿಸಲು ನಿರ್ಧರಿಸಿದೆ. ಇಲ್ಲಿಯವರೆಗೆ, ಇದು ಸುಮಾರು 5,000 ಶಾಲೆಗಳನ್ನು ಒಡಿಶಾದಲ್ಲಿ ಮುಚ್ಚಲಾಗಿದೆ.