ಟರ್ಕಿ, ಸಿರಿಯಾದಲ್ಲಿ ಪ್ರಬಲ ಭೂಕಂಪ: 100 ಕ್ಕೂ ಅಧಿಕ ಮಂದಿ ಮೃತ್ಯು

ಇಸ್ತಾಂಬುಲ್ :‌ ಸೋಮವಾರ ಟರ್ಕಿ ಮತ್ತು ಸಿರಿಯಾದಲ್ಲಿ ( Turkey and Syria ) ಸಂಭವಿಸಿದ ಪ್ರಬಲ ಭೂಕಂಪದಲ್ಲಿ 100 ಕ್ಕೂ ಅಧಿಕ ಮಂದಿ ಸಾವಿಗೀಡಾಗಿದ್ದು ಇನ್ನೂ ಹಲವಾರು ಮಂದಿ ಗಾಯಗೊಂಡಿದ್ದಾರೆ.  ರಿಕ್ಟರ್‌ ಮಾಪಕದಲ್ಲಿ ಭೂಕಂಪನದ ತೀವ್ರತೆ 7.8 ಎಂದು ದಾಖಲಾಗಿದ್ದು ಹಲವಾರು ಕಟ್ಟಡಗಳು ನೆಲಸಮಗೊಂಡಿವೆ.

ಜನರು ನಿದ್ದೆಯಲ್ಲಿದ್ದಾಗ  ಸಂಭವಿಸಿದ ಈ ಭೂಕಂಪನದ ಕಂಪನಗಳು ದೂರದ ಸಿಪ್ರಸ್‌ ದ್ವೀಪದಲ್ಲೂ ಅನುಭವವಾಗಿದೆ. ಭೂಕಂಪ ಸ್ಥಳೀಯ ಕಾಲಮಾನ 04:07 ಕ್ಕೆ ಸಂಭವಿಸಿತ್ತು. ನಂತರದ ಕಂಪನಗಳು 15 ನಿಮಿಷಗಳ ನಂತರ ಸಂಭವಿಸಿದ್ದರೆ ಅವುಗಳ ತೀವ್ರತೆ 6.7 ಆಗಿತ್ತು.

ಭೂಕಂಪ ಸಂಭವಿಸಿದಾಗ ಹೆಚ್ಚಿನ ಜನರು ನಿದ್ರಿಸುತ್ತಿದ್ದುದರಿಂದ ಸಾವಿನ ಸಂಖ್ಯೆ ಇನ್ನಷ್ಟು ಏರಿಕೆಯಾಗುವ ಭೀತಿಯಿದೆ. ಸುಮಾರು 42 ಜನರು ಸಿರಿಯಾದ ಸರಕಾರ ನಿಯಂತ್ರಿತ ಪ್ರದೇಶಗಳಲ್ಲಿ ಭೂಕಂಪಕ್ಕೆ ಬಲಿಯಾದರೆ ಇನ್ನೂ ಎಂಟು ಮಂದಿ ಟರ್ಕಿ ಪರ ಗುಂಪುಗಳ ನಿಯಂತ್ರಣದಲ್ಲಿರುವ ಉತ್ತರದ ಭಾಗಗಳಲ್ಲಿ ಮೃತಪಟ್ಟಿದ್ದಾರೆ.

ಅಲೆಪ್ಪೋ, ಹಮಾ ಮತ್ತು ಲಟಾಕಿಯಾ ಪ್ರದೇಶದಲ್ಲಿ 42 ಮಂದಿ ಮೃತಪಟ್ಟು 200 ಮಂದಿ ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.

ಭೂಕಂಪದ ಪ್ರಬಲತೆಗೆ ಹಾಗೂ ಅದು ಉಂಟುಮಾಡಿರುವ ಸಾವುನೋವುಗಳಿಂದ ಆಘಾತಗೊಂಡ ಟರ್ಕಿಯ ಜನರು ತಮ್ಮ ಮನೆಗಳಿಂದ ಹೊರಬಂದು ನಿಂತಿರುವ ದೃಶ್ಯಗಳು ಕಂಡು ಬಂದಿವೆ. ರಕ್ಷಣಾ ತಂಡಗಳು ಮನೆಗಳ ಅವಶೇಷಗಳಡಿಯಲ್ಲಿ ಸಿಲುಕಿಕೊಂಡವರಿಗಾಗಿ ಶೋಧಿಸುತ್ತಿವೆ.

ಕಳೆದೊಂದು ಶತಮಾನದ ಅವಧಿಯಲ್ಲಿ ಟರ್ಕಿಯಲ್ಲಿ ಸಂಭವಿಸಿದ ಮೊದಲ ಪ್ರಬಲ ಭೂಕಂಪನ ಇದಾಗಿದೆ.