ಸಿರಿಯಾ ಭೂಕಂಪಪೀಡಿತ ಪ್ರದೇಶದಿಂದ ಒಂದೇ ಕುಟುಂಬದ ಐವರ ರಕ್ಷಣೆ: ಗೋಗರೆತದ ನಡುವೆ ಆನಂದ ಕಣ್ಣೀರು

ಇದ್ಲಿಬ್: ಸಿರಿಯಾ ಮತ್ತು ಟರ್ಕಿಯಲ್ಲಿ ಸಂಭವಿಸಿದ ಭಾರಿ ಭೂಕಂಪದಿಂದ ಧರೆಗುರುಳಿರುವ ಕಟ್ಟಡಗಳ ಅವಶೇಷಗಳಡಿ ಸಿಲುಕಿರುವ ಸಂತ್ರಸ್ತರನ್ನು ರಕ್ಷಿಸುವ ಕಾರ್ಯಾಚರಣೆಯಲ್ಲಿ ಸಾವಿರಾರು ರಕ್ಷಣಾ ಸಿಬ್ಬಂದಿ ಭಾಗವಹಿಸಿದ್ದು, ಈ ನಡುವೆ ಪವಾಡಸದೃಶವಾಗಿ ಪಾರಾಗಿರುವ ಪ್ರಕರಣಗಳು ವರದಿಯಾಗತೊಡಗಿವೆ. ಇಂತಹುದೇ ಒಂದು ಪ್ರಕರಣದಲ್ಲಿ ಪಶ್ಚಿಮ ಸಿರಿಯಾದ ಇದ್ಲಿಬ್ ಪ್ರಾಂತ್ಯದಲ್ಲಿ ಒಂದೇ ಕುಟುಂಬದ ಎಲ್ಲ ಸದಸ್ಯರನ್ನು ರಕ್ಷಿಸಿರುವ ಘಟನೆ ಈ ವಾರಾರಂಭದಲ್ಲಿ ನಡೆದಿದೆ ಎಂದು ndtv.com ವರದಿ ಮಾಡಿದೆ.

ಈ ರಕ್ಷಣಾ ಕಾರ್ಯಾಚರಣೆಯಲ್ಲಿ ಒಂದೇ ಕುಟುಂಬದ ಮೂವರು ಮಕ್ಕಳು ಹಾಗೂ ಇಬ್ಬರು ವಯಸ್ಕರನ್ನು ರಕ್ಷಿಸಲಾಗಿದ್ದು, ಈ ಸಂದರ್ಭದಲ್ಲಿ ರಕ್ಷಣಾ ಕಾರ್ಯಾಚರಣೆ ಪ್ರದೇಶದಲ್ಲಿ ನೆರೆದಿದ್ದ ಜನಸಮೂಹವು ಸಂಭ್ರಮ ವ್ಯಕ್ತಪಡಿಸಿ, "ದೇವರು ದೊಡ್ಡವನು" ಎಂಬ ಘೋಷಣೆ ಕೂಗಿತು. ಈ ವಿಡಿಯೊವನ್ನು ಸಿರಿಯಾ ನಾಗರಿಕ ರಕ್ಷಣಾ ಸ್ವಯಂಸೇವಕರ ಸಂಘಟನೆಯಾದ 'The White Helmets' ಹಂಚಿಕೊಂಡಿದೆ.

ಈ ಕುರಿತು, "ನಿಜವಾದ ಪವಾಡ.. ಸಂತಸದ ಧ್ವನಿಗಳು ಆಕಾಶವನ್ನು ಮುಟ್ಟುತ್ತಿವೆ.. ನಂಬಿಕೆಯನ್ನೂ ಮೀರಿದ ಸಂತಸ. ಫೆಬ್ರವರಿ 7, ಮಂಗಳವಾರ ಮಧ್ಯಾಹ್ನದಂದು ಸಿರಿಯಾದ ಪಶ್ಚಿಮ ಇದ್ಲಿಬ್‌ನ ಬಿಸ್ನಿಯಾ ಗ್ರಾಮದಲ್ಲಿನ ಮನೆಯ ಅವಶೇಷಗಳಡಿಯಲ್ಲಿ ಸಿಲುಕಿದ್ದ ಸಂಪೂರ್ಣ ಕುಟುಂಬವನ್ನು ರಕ್ಷಿಸಲಾಗಿದೆ" ಎಂದು #Idlib, #Syria, #earthquake ಹ್ಯಾಶ್ ಟ್ಯಾಗ್ ಬಳಸಿ The White Helmet ಟ್ವೀಟ್ ಮಾಡಿದೆ.

ಈ ವಿಡಿಯೊದಲ್ಲಿ ರಕ್ಷಣಾ ಕಾರ್ಯಕರ್ತರು ಮಕ್ಕಳನ್ನು ಆ್ಯಂಬುಲೆನ್ಸ್ ಒಂದಕ್ಕೆ ಕರೆ ತರುತ್ತಿದ್ದಾರೆ. ಹಾಗೆಯೇ ವಯಸ್ಕರನ್ನು ಪತನಗೊಂಡಿರುವ ಕಟ್ಟಡದಡಿಯಿಂದ ಸ್ಟ್ರೆಚರ್‌ಗಳಲ್ಲಿ ಹೊರ ತರುತ್ತಿರುವುದು ಸೆರೆಯಾಗಿದೆ. ಈ ರಕ್ಷಣಾ ಕಾರ್ಯಾಚರಣೆಯು ನೆರೆದಿದ್ದ ಜನಸಮೂಹದಲ್ಲಿ ಭಾರಿ ಸಂಭ್ರಮಕ್ಕೆ ಕಾರಣವಾಯಿತು. ಕಳೆದ ಸೋಮವಾರ 7.8  ಕಂಪನಾಂಕ ತೀವ್ರತೆಯೊಂದಿಗೆ ಸಂಭವಿಸಿದ್ದ ಭೂಕಂಪದಲ್ಲಿ ಈವರೆಗೆ 28,000 ಮಂದಿ ಮೃತಪಟ್ಟಿದ್ದು, ಲಕ್ಷಾಂತರ ಮಂದಿ ನಿರ್ವಸತಿಗರಾಗಿದ್ದಾರೆ.

A true miracle...the sounds of joy embrace the sky... joy beyond belief.
An entire family was rescued from under the rubble of their house this afternoon, Tuesday, February 7, in the village of Bisnia, west of #Idlib.#Syria #earthquake pic.twitter.com/Cb7kXLiMjT

— The White Helmets (@SyriaCivilDef) February 7, 2023