​ಐಎಸ್ ಎಲ್: ಬೆಂಗಳೂರಿಗೆ ಸೋಲು, ಮೋಹನ್ ಬಗಾನ್ ಗೆ ಚೊಚ್ಚಲ ಪ್ರಶಸ್ತಿ

ಹೊಸದಿಲ್ಲಿ, ಮಾ.18: ರವಿವಾರ ರೋಚಕವಾಗಿ ಸಾಗಿದ ಇಂಡಿಯನ್ ಸೂಪರ್ ಲೀಗ್ (ಐಎಸ್ ಎಲ್) ಫೈನಲ್ ನಲ್ಲಿ ಬೆಂಗಳೂರು ಎಫ್ ಸಿಯನ್ನು ಪೆನಾಲ್ಟಿ ಶೂಟೌಟ್ ನಲ್ಲಿ 4-3 ಅಂತರದಿಂದ ಮಣಿಸಿದ ಎಟಿಕೆ ಮೋಹನ್ ಬಗಾನ್ ಮೊದಲ ಬಾರಿ ಪ್ರಶಸ್ತಿಯನ್ನು ಎತ್ತಿ ಹಿಡಿದಿದೆ.

ಮೋಹನ್ ಬಗಾನ್ 6 ಕೋ.ರೂ. ಬಹುಮಾನ ಗೆದ್ದುಕೊಂಡಿದ್ದು, ರನ್ನರ್ಸ್ ಅಪ್ ಬೆಂಗಳೂರು ಎಫ್ ಸಿ 2.5 ಕೋ.ರೂ. ಬಹುಮಾನಕ್ಕೆ ತೃಪ್ತಿಪಟ್ಟುಕೊಂಡಿದೆ.
ನಿಗದಿತ ಸಮಯದಲ್ಲಿ ಪಂದ್ಯವು 2-2ರಿಂದ ಸಮಬಲಗೊಂಡ  ಕಾರಣ ಪಂದ್ಯದ ಫಲಿತಾಂಶವನ್ನು ಪೆನಾಲ್ಟಿ ಶೂಟೌಟ್ ನಲ್ಲಿ ನಿರ್ಧರಿಸಲಾಯಿತು. ಮೋಹನ್ ಬಗಾನ್ ನ ಡಿಮಿಟ್ರಿ ಪೆಟ್ರಾಟೊಸ್ ಎಲ್ಲ 3 ಪೆನಾಲ್ಟಿ ಗಳಿಸಿದರು.

ನಿಗದಿತ ಸಮಯದ ಆಟದಲ್ಲಿ ಪೆಟ್ರಾಟೊಸ್ 14ನೇ ಹಾಗೂ 85ನೇ ನಿಮಿಷದಲ್ಲಿ ಪೆನಾಲ್ಟಿಯಲ್ಲಿ ಗೋಲು ಗಳಿಸಿದರೆ, ಬೆಂಗಳೂರು ಪರ ನಾಯಕ ಸುನೀಲ್ ಚೆಟ್ರಿ ಪೆನಾಲ್ಟಿಯಲ್ಲಿ 45ನೇ ನಿಮಷದಲ್ಲಿ ಗೋಲು ಗಳಿಸಿದರೆ, ರಾಯ್ ಕೃಷ್ಣ 78ನೇ ನಿಮಿಷದಲ್ಲಿ ಗೋಲು ಗಳಿಸಿದರು.