ಐಪಿಎಲ್: ಹೈದರಾಬಾದ್ ಮಣಿಸಿದ ಮುಂಬೈ ಇಂಡಿಯನ್ಸ್

 ಹೈದರಾಬಾದ್, ಎ.18: ಆಲ್ರೌಂಡರ್ ಕ್ಯಾಮರೂನ್ ಗ್ರೀನ್ (64 ರನ್,40 ಎಸೆತ)ಅರ್ಧಶತಕ, ರಿಲೆ ಮೆರೆಡಿತ್(2-33)ನೇತೃತ್ವದ ಬೌಲರ್ಗಳ ಸಾಂಘಿಕ ಪ್ರದರ್ಶನದ ನೆರವಿನಿಂದ ಮುಂಬೈ ಇಂಡಿಯನ್ಸ್ ತಂಡ ಸನ್ರೈಸರ್ಸ್ ಹೈದರಾಬಾದ್ ತಂಡವನ್ನು 14 ರನ್ ಅಂತರದಿಂದ ಮಣಿಸಿತು.

ಮಂಗಳವಾರ ನಡೆದ ಐಪಿಎಲ್ನ 25ನೇ ಪಂದ್ಯದಲ್ಲಿ ಗೆಲ್ಲಲು 193 ರನ್ ಗುರಿ ಪಡೆದ ಹೈದರಾಬಾದ್ 19.5 ಓವರ್ಗಳಲ್ಲಿ 178 ರನ್ಗೆ ಆಲೌಟಾಯಿತು.
 ಹೈದರಾಬಾದ್ ಪರ ಆರಂಭಿಕ ಬ್ಯಾಟರ್ ಮಯಾಂಕ್ ಅಗರ್ವಾಲ್(48 ರನ್, 41 ಎಸೆತ)ಸರ್ವಾಧಿಕ ಸ್ಕೋರ್ ಗಳಿಸಿದರು. ಹೆನ್ರಿಕ್ ಕ್ಲಾಸೆನ್(36 ರನ್, 16 ಎಸೆತ) ಹಾಗೂ ನಾಯಕ ಏಡೆನ್ ಮರ್ಕ್ರಮ್(22 ರನ್, 17 ಎಸೆತ)ಎರಡಂಕೆಯ ಸ್ಕೋರ್ ಗಳಿಸಿದರು.

 ಮುಂಬೈ ಪರ ರಿಲೆ ಮೆರೆಡೆತ್(2-33), ಜೇಸನ್ ಬೆಹ್ರೆನ್ಡಾರ್ಫ್(2-37) ಹಾಗೂ ಪಿಯೂಷ್ ಚಾವ್ಲಾ(2-43)ತಲಾ ಎರಡು ವಿಕೆಟ್ ಪಡೆದರು. ಮಾಸ್ಟರ್ ಬ್ಲಾಸ್ಟರ್ ಸಚಿನ್  ತೆಂಡುಲ್ಕರ್ ಪುತ್ರ ಅರ್ಜುನ್ ತೆಂಡುಲ್ಕರ್(1-18)ಭುವನೇಶ್ವರ ಕುಮಾರ್ ವಿಕೆಟ್ ಪಡೆಯುವ ಮೂಲಕ ಐಪಿಎಲ್ನಲ್ಲಿ ತನ್ನ ವಿಕೆಟ್ ಖಾತೆ ತೆರೆದರು. ಹೈದರಾಬಾದ್ ಇನಿಂಗ್ಸ್ಗೆ ತೆರೆ ಎಳೆದರು. 

ಇದಕ್ಕೂ ಮೊದಲು ಟಾಸ್ ಸೋತು ಬ್ಯಾಟಿಂಗ್ ಇಳಿಸಲ್ಪಟ್ಟಿದ್ದ ಮುಂಬೈ ತಂಡ ನಿಗದಿತ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 192 ರನ್ ಗಳಿಸಿತು.