ಎ.23ರಂದು ಮಂಗಳೂರಿನಲ್ಲಿ 'ನೋವಿಗೋ ಸೊಲ್ಯೂಷನ್ಸ್' ನೂತನ ಆಫ್ ಶೋರ್ ಡೆಲಿವರಿ ಸೆಂಟರ್ ಉದ್ಘಾಟನೆ

ಮಂಗಳೂರು, ಎ.22: 2012 ರಲ್ಲಿ ಮಂಗಳೂರು, ಬೆಂಗಳೂರು ನಗರದಲ್ಲಿ ಆರಂಭಗೊಂಡು ಇದೀಗ ರಾಜ್ಯದ ಪ್ರತಿಷ್ಠಿತ ಐಟಿ ಕಂಪೆನಿಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿರುವ  ನೋವಿಗೋ ಸೊಲ್ಯೂಷನ್ಸ್ ನ ನೂತನ ಆಫ್ ಶೋರ್ ಡೆಲಿವರ್ ಸೆಂಟರ್ ಮಂಗಳೂರು ನಗರದ ಫಳ್ನೀರ್ ನ ಕರುಣಾ ಪ್ರೈಡ್ ಕಟ್ಟಡದಲ್ಲಿ ಎ.23ರಂದು ಸಂಜೆ 5 ಗಂಟೆಗೆ  ಉದ್ಘಾಟನೆಗೊಳ್ಳಲಿದೆ.

ಉದ್ಘಾಟನಾ ಸಮಾರಂಭದಲ್ಲಿ ಇನ್ಫೋಸಿಸ್ ಬಿಪಿಎಮ್ ಲಿ. ನ  ಸಿಇಒ ,ಎಂ.ಡಿ ಹಾಗು  ಎಕ್ಸಿಕ್ಯೂಟೀವ್ ಉಪಾಧ್ಯಕ್ಷರಾದ ಅನಂತ ರಾಧಾಕೃಷ್ಣನ್‌ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ಜೊತೆಗೆ ವಿವಿಧ ಗಣ್ಯರು ಉಪಸ್ಥಿತರಿರಲಿದ್ದಾರೆ' ಎಂದು ನೋವಿಗೋ ಸೊಲ್ಯೂಷನ್ಸ್ ನ ಸಹ  ಸ್ಥಾಪಕ ಹಾಗೂ ಚೀಫ್ ಕಸ್ಟಮರ್ ಆಫೀಸರ್ ಶಿಹಾಬ್ ಕಲಂದರ್ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.  

'ಮಂಗಳೂರಿನಲ್ಲಿ ನೋವಿಗೋ ಸೊಲ್ಯೂಷನ್ಸ್ ಕಂಪೆನಿ ಅಲ್ಪಾವಧಿಯಲ್ಲೇ ವೇಗವಾಗಿ  ಬೆಳೆದಿದ್ದು, ಮೂರು ವರ್ಷಗಳಲ್ಲಿ ನಿರಂತರ ಶ್ರೇಷ್ಠ ಬೆಳವಣಿಗೆಯನ್ನು ದಾಖಲಿಸಿದೆ. ದುಬೈ, ಯುಎಇ, ಯುಕೆ, ಸಿಂಗಾಪುರದಲ್ಲಿ ಶಾಖೆಗಳಿದ್ದು ಡಲ್ಲಾಸ್ ಟೆಕ್ಸಾಸ್‌ನಲ್ಲಿ ಪ್ರಧಾನ ಕಚೇರಿ ಹೊಂದಿದೆ. ಮಂಗಳೂರು, ಬೆಂಗಳೂರು, ಚೆನ್ನೈ ಮತ್ತು ಕೊಚ್ಚಿಯಲ್ಲಿ ಶಾಖೆ ವಿಸ್ತರಿಸುತ್ತಿದ್ದು, ಮುಂದಿನ ವರ್ಷದಲ್ಲಿ ಕೆನಡಾ, ಖತರ್, ನೆದರ್‌ಲ್ಯಾಂಡ್ ದೇಶಗಳಲ್ಲಿ  ಹೊಸ ಶಾಖೆಗಳು ಕಾರ್ಯಾಚರಿಸಲಿವೆ. 2025ರ ವೇಳೆಗೆ 1,500ಕ್ಕೂ ಹೆಚ್ಚು ಉದ್ಯೋಗಿಗಳಿಗೆ ಅವಕಾಶ ನೀಡುವ ಯೋಜನೆ ಹೊಂದಿದೆ' ಎಂದು ವಿವರಿಸಿದರು.

'ಕಂಪೆನಿಯಲ್ಲಿ 700ಕ್ಕೂ ಅಧಿಕ ಐಟಿ ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇದೀಗ ಮಂಗಳೂರು ನಗರದ ಫಳ್ನೀರ್ ನ  ಕರುಣಾ ಪ್ರೈಡ್  ಸೆಂಟರಿನ ಐದನೇ ಮಹಡಿಯಲ್ಲಿ ಹೊಸ ಆಫ್ ಶೋರ್ ಡೆಲಿವರ್ ಸೆಂಟರ್  ಆರಂಭಿಸುತ್ತಿದೆ' ಎಂದು ತಿಳಿಸಿದರು.

ನೊವಿಗೋ ಸೊಲ್ಯುಶನ್ಸ್ ಕಂಪನಿಯ ಆಡಳಿತ ನಿರ್ದೇಶಕ ಮತ್ತು ಸಿಇಓ ಪ್ರವೀಣ್ ಕುಮಾರ್ ಕಲ್ಬಾವಿ, ಸಹ- ಸ್ಥಾಪಕ ಮತ್ತು ಮುಖ್ಯ ತಂತ್ರಜ್ಞಾನ ಅಧಿಕಾರಿ  ಮುಹಮ್ಮದ್ ಹನೀಫ್, ಸಹ- ಸ್ಥಾಪಕ ಮತ್ತು ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮೊಹಮ್ಮದ್ ಜರೂದ್ ಪತ್ರಿಕಾಗೋಷ್ಠಿಯಲ್ಲಿ ಹಾಜರಿದ್ದರು.