ವೆಡ್ಡಿಂಗ್ ಕಾರ್ಡ್‌ನಲ್ಲಿ ಎಂ.ಎಸ್. ಧೋನಿ ಫೋಟೊ ಮುದ್ರಿಸಿದ ಅಭಿಮಾನಿ; ಫೋಟೊ ವೈರಲ್
ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಪ್ರಪಂಚದಾದ್ಯಂತ ಅಪಾರ ಅಭಿಮಾನಿಗಳನ್ನು ಹೊಂದಿದ್ದಾರೆಂದು ಪ್ರತ್ಯೇಕವಾಗಿ ಹೇಳಬೇಕಾಗಿಲ್ಲ. ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್‌ಗಾಗಿ ಆಡುವುದನ್ನು ಮುಂದುವರೆಸುತ್ತಿರುವ ಧೋನಿ ಲೀಗ್‌ನಲ್ಲಿ ಹೆಚ್ಚು ಜನರನ್ನು ತನ್ನತ್ತ ಸೆಳೆಯಬಲ್ಲ ಆಟಗಾರರಲ್ಲಿ ಒಬ್ಬರಾಗಿದ್ದಾರೆ. ಶಾಂತ ವ್ಯಕ್ತಿತ್ವ, ಅಸಾಧಾರಣ ವಿಕೆಟ್ ಕೀಪಿಂಗ್ ಹಾಗೂ ನಾಯಕತ್ವದ ಕೌಶಲ್ಯಗಳಿಗೆ ಹೆಸರುವಾಸಿಯಾದ ಎಂಎಸ್ ಧೋನಿ ಎಲ್ಲರಿಗೂ ಅಚ್ಚುಮೆಚ್ಚು ಹಾಗೂ ಅವರ ಅಭಿಮಾನಿಗಳಿಗೆ ಯಾವುದೇ ಮಿತಿಯಿಲ್ಲ.
ಇದೀಗ, ಛತ್ತೀಸ್‌ಗಢದ ವ್ಯಕ್ತಿಯೊಬ್ಬರು ತಮ್ಮ ಮದುವೆ ಕಾರ್ಡ್‌ನಲ್ಲಿ ಸಿಎಸ್‌ಕೆ ನಾಯಕನ ಫೋಟೊ ಹಾಗೂ ಅವರ ಐಕಾನಿಕ್ ಜೆರ್ಸಿ ಸಂಖ್ಯೆ 7 ಅನ್ನು ಮುದ್ರಿಸುವ ಮೂಲಕ ಎಂ.ಎಸ್. ಧೋನಿಯ ಮೇಲಿನ ಪ್ರೀತಿ ಹಾಗೂ ಅಭಿಮಾನವನ್ನು ತೋರಿಸಿದ್ದಾರೆ.
ಕಟ್ಟಾ ಅಭಿಮಾನಿಯೊಬ್ಬರು ತನ್ನ ಮದುವೆಯ ಕಾರ್ಡ್‌ನ ಎರಡೂ ಬದಿಗಳಲ್ಲಿ ಕ್ರಿಕೆಟಿಗನ ಹೆಸರನ್ನು 'ಥಾಲಾ' ಎಂಬ ಪದದೊಂದಿಗೆ ಮುದ್ರಿಸಿದ್ದಾರೆ. ಎಂ.ಎಸ್. ಧೋನಿಗೆ ತನ್ನ ಮದುವೆಗೆ ಆಹ್ವಾನಿಸಿ ಕಾರ್ಡ್ ಕಳುಹಿಸಿದ್ದಾರೆ.
ಟ್ವಿಟರ್ ಬಳಕೆದಾರರು ಕಾರ್ಡ್‌ನ ಚಿತ್ರವನ್ನು ಹಂಚಿಕೊಂಡಿದ್ದಾರೆ ಹಾಗೂ ''CSK #yellowlove ಇನ್ನೂ ಮುಗಿದಿಲ್ಲ. #ಛತ್ತೀಸ್‌ಗಢದ @msdhoni ಅವರ ಅಭಿಮಾನಿಯೊಬ್ಬರು ಧೋನಿ ಅವರ ಮುಖವನ್ನು #ಜೆರ್ಸಿ ಸಂಖ್ಯೆ 7 ಅನ್ನು ಅವರ ಮದುವೆಯ ಕಾರ್ಡ್‌ನಲ್ಲಿ ಮುದ್ರಿಸಿದ್ದಾರೆ ಹಾಗೂ #ಚೆನ್ನೈ ಸೂಪರ್ ಕಿಂಗ್ಸ್ ನಾಯಕನನ್ನು ಮದುವೆ ಆಹ್ವಾನಿಸಿದ್ದಾರೆ'' ಎಂದು ಬರೆದಿದ್ದಾರೆ.