ಪರವಾನಗೆ ಇಲ್ಲದೇ ಇಟ್ಟುಕೊಂಡಿರುವ ಬಂದೂಕುಗಳನ್ನು ನ.1 ರೊಳಗೆ ಪೊಲೀಸ್ ವಶಕ್ಕೆ ನೀಡಿ : ಸಿಎಂ

ಬೆಂಗಳೂರು : ಪರವಾನಗೆ ಇಲ್ಲದೆ ಬಂದೂಕು ಹೊಂದಿರುವವರು ತಮ್ಮ ವ್ಯಾಪಿಗೆ ಬರುವ ಪೊಲೀಸ್ ಠಾಣೆಗೆ ನವೆಂಬರ್ 1 ರೊಳಗೆ ಬಂದೂಕನ್ನು ವಶಕ್ಕೆ ನೀಡಬೇಕು ಎಂದು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್, ಅರಣ್ಯದಂಚಿನಲ್ಲಿ ವಾಸಿಸುತ್ತಿರುವವರಿಗೆ ಜನರಿಗೆ ಮನವಿ ಮಾಡಿದ್ದಾರೆ.

ಮಂಗಳವಾರ ವಿಧಾನಸಭೆಯಲ್ಲಿ ಭೋಜನ ವಿರಾಮದ ಬಳಿಕ ವಿಷಯ ಪ್ರಸ್ತಾಪಿಸಿದ ಅವರು, ಅರಣ್ಯದಂಚಿನಲ್ಲಿ ವಾಸಿಸುವ ಜನರಲ್ಲಿ ಕೆಲವರು ಪರವಾನಗೆ ಇಲ್ಲದೇ ಬಂದೂಕು ಇಟ್ಟುಕೊಂಡು ಕಾಡು ಪ್ರಾಣೆಗಳನ್ನು ಭೇಟೆ ಆಡುತ್ತಿರುವುದು ಕಂಡುಬರುತ್ತಿದೆ. ಈಗ ಹೊಸ ತಂತ್ರಜ್ಞಾನದಿಂದ ಕಾಡಿನಲ್ಲಿ ಸಾವಿರಾರು ಕ್ಯಾಮೆರಾಗಳನ್ನು ಅರಣ್ಯ ಮತ್ತು ಪ್ರಾಣಿಗಳ ರಕ್ಷಣೆಗಾಗಿ ಅಳವಡಿಸಲಾಗಿದೆ ಎಂದರು.

ಆದುದರಿಂದ ಸುಮ್ಮನೆ ಯಾರೋ ಹೇಳಿದರೆಂದು ಕಾಡಿಗೆ ಹೋಗಿ ವನ್ಯಪ್ರಾಣಿಗಳ ಬೇಟೆಯಾಡಬೇಡಿ. ಬೇಟೆಗೆ ನಿಮ್ಮನ್ನು ಪ್ರಚೋದಿಸುವವರಿದ್ದರೆ, ಇನ್ನು ಕೆಲವರು ನಿಮ್ಮನ್ನು ಇದರಲ್ಲಿ ಸಿಲುಕಿಸುವವರು ಇರುತ್ತಾರೆ. ಆದುದರಿಂದ ಯಾರೂ ವನ್ಯಪ್ರಾಣಿಗಳ ಬೇಟೆಯಾಡಬೇಡಿ ಎಂದು ಸದನದ ಮೂಲಕ ನಿಮ್ಮಲ್ಲಿ ಮನವಿ ಮಾಡುತ್ತೇನೆ ಎಂದು ಅವರು ತಿಳಿಸಿದರು.

ಅರಣ್ಯದಂಚಿನ ವ್ಯಾಪ್ತಿಯಲ್ಲಿನ ಎಲ್ಲ ಜನಪ್ರತಿನಿಧಿಗಳು ತಮ್ಮ ಕ್ಷೇತ್ರದ ಜನರಿಗೆ ಈ ಬಗ್ಗೆ ಅರಿವು ಮೂಡಿಸಬೇಕು. ಬಂದೂಕಿನ ಅವಶ್ಯಕತೆ ಇರುವವರಿಗೆ ಸರಕಾರದಿಂದ ಪರವಾನಗೆ ನೀಡಲಾಗುವುದು. ಯಾವುದೇ ಕಾರಣಕ್ಕೂ ಪರವಾನಗೆ ಇಲ್ಲದ ಬಂದೂಕುಗಳನ್ನು ಜನರು ತಮ್ಮ ಬಳಿ ಇಟ್ಟುಕೊಳ್ಳಬಾರದು ಎಂದು ಅವರು ತಿಳಿಸಿದರು.