ಇಂಡೋನೇಷ್ಯಾದ ಕಾರ್ಖಾನೆಯಲ್ಲಿ ಬೆಂಕಿ ಅವಘಡ: 3 ಮೃತ್ಯು
Photo Credit : AP
ಜಕಾರ್ತ, ನ.22: ಇಂಡೋನೇಷ್ಯಾದ ಬಾಂಟೆನ್ ಪ್ರಾಂತ್ಯದ ಸೆರಾಂಗ್ ಜಿಲ್ಲೆಯ ಮಿಠಾಯಿ ಕಾರ್ಖಾನೆಯೊಂದರಲ್ಲಿ ಶನಿವಾರ ಸಂಭವಿಸಿದ ಭಾರಿ ಬೆಂಕಿ ಅವಘಡದಲ್ಲಿ ಮೂವರು ಮೃತಪಟ್ಟಿದ್ದು, 36 ಮಂದಿ ನಾಪತ್ತೆಯಾಗಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
‘ಪಿಟಿ ಫೋನುಸಾ ಅಗುಂಗ್ ಮುಲಿಯಾ’ ಕಾರ್ಖಾನೆಯಲ್ಲಿ ಈ ಬೆಂಕಿ ಕಾಣಿಸಿಕೊಂಡಿದೆ. ಇದು ಇಂಡೋನೇಷ್ಯಾದ ಜನಪ್ರಿಯ ಹಾಲಿನ ಮಿಠಾಯಿ ಮತ್ತು ತಿಂಡಿಗಳ ಬ್ರಾಂಡ್ ‘ಮಿಲ್ಕಿಟಾ’ ಉತ್ಪನ್ನಗಳನ್ನು ತಯಾರಿಸುತ್ತದೆ. ಕಾರ್ಖಾನೆಯ ಮೂರನೇ ಮಹಡಿಯ ಶೀತಲೀಕರಣ ಘಟಕದ ಬಳಿ ಬೆಂಕಿ ಆರಂಭವಾಗಿರಬಹುದು ಎಂದು ಪ್ರಾಥಮಿಕ ಮಾಹಿತಿ ತಿಳಿಸಿದೆ.
ಒಟ್ಟು 15 ಮಂದಿಯನ್ನು ರಕ್ಷಿಸಲಾಗಿದ್ದು, ಅವರಲ್ಲಿ ನಾಲ್ವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ರಾಷ್ಟ್ರೀಯ ಶೋಧ ಮತ್ತು ರಕ್ಷಣಾ ಸಂಸ್ಥೆ ತಿಳಿಸಿದೆ. ಬೆಂಕಿಯ ಕಾರಣದ ಬಗ್ಗೆ ತನಿಖೆ ನಡೆಯುತ್ತಿದೆ.