ಅ.27 ರಂದು ಇಸ್ರೇಲ್ ಚುನಾವಣೆ: ನೆತನ್ಯಾಹುಗೆ ಕಠಿಣ ಸವಾಲು
ಬೆಂಜಮಿನ್ ನೆತನ್ಯಾಹು | Photo Credit : PTI
ಟೆಲ್ ಅವೀವ್, ಅ.26: ಮೂರು ವರ್ಷಗಳ ಕಾಲ ಯುದ್ಧ, ಬಿಕ್ಕಟ್ಟು ಮತ್ತು ಜಾಗತಿಕ ಪ್ರತಿಭಟನೆಗಳನ್ನು ಎದುರಿಸಿದ ಬಳಿಕ, ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ತಮ್ಮ ದಶಕಗಳ ಸುದೀರ್ಘ ರಾಜಕೀಯ ಜೀವನದ ಅತ್ಯಂತ ಪ್ರಮುಖ ಚುನಾವಣಾ ಸವಾಲುಗಳಲ್ಲಿ ಒಂದನ್ನು ಎದುರಿಸುತ್ತಿದ್ದಾರೆ.
ಮಂಗಳವಾರ (ಅಕ್ಟೋಬರ್ 27) ಇಸ್ರೇಲ್ ನಲ್ಲಿ ಮತದಾನ ನಡೆಯಲಿದ್ದು, ನೆತನ್ಯಾಹು ಅವರ ಪಕ್ಷವು ಇಸ್ರೇಲ್ ರಕ್ಷಣಾ ಪಡೆಗಳ ಮಾಜಿ ಮುಖ್ಯಸ್ಥ ಗಾಡಿ ಐಸೆನ್‌ಕೋಟ್ ಅವರ ‘ಯಶರ್’ ಪಕ್ಷದೊಂದಿಗೆ ತೀವ್ರ ಸ್ಪರ್ಧೆಯಲ್ಲಿದೆ.
ಅಕ್ಟೋಬರ್ 7, 2023ರಂದು ಹಮಾಸ್ ನಡೆಸಿದ ದಾಳಿಯ ಬಳಿಕ ಇಸ್ರೇಲ್‌ನಲ್ಲಿ ನಡೆಯುತ್ತಿರುವ ಮೊದಲ ದೇಶವ್ಯಾಪಿ ಚುನಾವಣೆ ಇದಾಗಿದೆ. ಈ ದಾಳಿಗೆ ಕಾರಣವಾದ ಗುಪ್ತಚರ ಇಲಾಖೆಯ ವೈಫಲ್ಯಗಳು ಮತ್ತು ಭದ್ರತಾ ಪಡೆಗಳ ಅಪೂರ್ಣ ಪ್ರತಿಕ್ರಿಯೆಯ ಜವಾಬ್ದಾರಿಯಿಂದ ನೆತನ್ಯಾಹು ಪದೇ ಪದೇ ತಪ್ಪಿಸಿಕೊಂಡಿದ್ದಾರೆ ಎಂಬ ಆರೋಪ ವ್ಯಕ್ತವಾಗಿದೆ.
ಅಭಿಪ್ರಾಯ ಸಂಗ್ರಹಣೆಗಳ ಪ್ರಕಾರ, ನೆತನ್ಯಾಹು ನೇತೃತ್ವದ ಲಿಕ್ಯುಡ್ ಮೈತ್ರಿಕೂಟವಾಗಲಿ ಅಥವಾ ವಿಪಕ್ಷಗಳ ಮೈತ್ರಿಕೂಟವಾಗಲಿ ಸಂಸತ್ತಿನಲ್ಲಿ ಬಹುಮತಕ್ಕೆ ಅಗತ್ಯವಿರುವ 61 ಸ್ಥಾನಗಳ ಗಡಿಯನ್ನು ಸ್ಪಷ್ಟವಾಗಿ ದಾಟುವ ಸ್ಥಿತಿಯಲ್ಲಿಲ್ಲ. ಅರಬ್ ಪಕ್ಷಗಳು ಗಮನಾರ್ಹ ನಿರ್ಣಾಯಕ ಪ್ರಭಾವವನ್ನು ಹೊಂದುವ ಸಾಧ್ಯತೆಯಿದೆ.