ಅಮೆರಿಕ–ಇರಾನ್ ಮಾತುಕತೆಯಲ್ಲಿ 'ಸಕಾರಾತ್ಮಕ ಪ್ರಗತಿ'; ಸಂವಹನ ಮಾರ್ಗ ಸ್ಥಾಪನೆಗೆ ಒಪ್ಪಿಗೆ

ದೋಹಾ: ಜೂನ್ 17ರಂದು ಸಹಿ ಮಾಡಲಾದ ತಿಳುವಳಿಕೆ ಒಪ್ಪಂದಕ್ಕೆ (ಎಂಒಯು) ಸಂಬಂಧಿಸಿದ ವಿಷಯಗಳ ಕುರಿತು ಖತರ್ ನ ದೋಹಾದಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ನಡೆದ ಪರೋಕ್ಷ ತಾಂತ್ರಿಕ ಮಾತುಕತೆಯಲ್ಲಿ "ಸಕಾರಾತ್ಮಕ ಪ್ರಗತಿ" ಸಾಧನೆಯಾಗಿದೆ ಎಂದು ಖತರ್ ತಿಳಿಸಿದೆ. ಇದೇ ವೇಳೆ, ಒಪ್ಪಂದದ ಉಲ್ಲಂಘನೆಗಳನ್ನು ವರದಿ ಮಾಡಲು ಮತ್ತು ಚರ್ಚಿಸಲು ವಾಷಿಂಗ್ಟನ್‌ನೊಂದಿಗೆ ವಿಶೇಷ "ಸಂವಹನ ಮಾರ್ಗ"ವನ್ನು ಸ್ಥಾಪಿಸಲಾಗುವುದು ಎಂದು ಟೆಹ್ರಾನ್ ಘೋಷಿಸಿದೆ.

ಇರಾನ್ ವಿರುದ್ಧದ ಅಮೆರಿಕ-ಇಸ್ರೇಲ್ ಯುದ್ಧವನ್ನು ಕೊನೆಗೊಳಿಸುವ ಉದ್ದೇಶದಿಂದ ಎರಡು ವಾರಗಳ ಹಿಂದೆ ಉಭಯ ದೇಶಗಳ ನಡುವೆ ಸಹಿ ಮಾಡಲಾದ ತಿಳುವಳಿಕೆ ಒಪ್ಪಂದದ ಅನುಷ್ಠಾನಕ್ಕೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಬುಧವಾರ ದೋಹಾದಲ್ಲಿ ಪರೋಕ್ಷ ತಾಂತ್ರಿಕ ಮಟ್ಟದ ಮಾತುಕತೆಗಳು ನಡೆದವು. ಇತ್ತೀಚಿನ ದಾಳಿಯ ಬಳಿಕ ಉಭಯ ದೇಶಗಳ ನಡುವಿನ ಉದ್ವಿಗ್ನತೆಯನ್ನು ತಗ್ಗಿಸುವ ಹಾಗೂ ರಾಜತಾಂತ್ರಿಕ ಸಂವಾದವನ್ನು ಮುಂದುವರಿಸುವ ಪ್ರಯತ್ನಗಳ ಭಾಗವಾಗಿ ಈ ಮಾತುಕತೆಗಳು ನಡೆದಿವೆ.

ಮಾತುಕತೆಗಳ ಬಳಿಕ ಮಾತನಾಡಿದ ಇರಾನ್ ಉಪ ವಿದೇಶಾಂಗ ಸಚಿವ ಕಜೆಮ್ ಘರಿಬಾಬಾದಿ, ಒಪ್ಪಂದದ ಯಾವುದೇ ಉಲ್ಲಂಘನೆಗಳನ್ನು ವರದಿ ಮಾಡಲು ಮತ್ತು ಅವುಗಳ ಕುರಿತು ಚರ್ಚಿಸಲು ಅಮೆರಿಕದೊಂದಿಗೆ ಪ್ರತ್ಯೇಕ ಸಂವಹನ ವ್ಯವಸ್ಥೆಯನ್ನು ಸ್ಥಾಪಿಸಲು ಒಪ್ಪಿಗೆ ನೀಡಲಾಗಿದೆ ಎಂದು ತಿಳಿಸಿದ್ದಾರೆ.

ಟೆಹ್ರಾನ್ ಮತ್ತು ವಾಷಿಂಗ್ಟನ್ ನಡುವಿನ ನೇರ ಮಾತುಕತೆಗಳನ್ನು ಪುನರಾರಂಭಿಸುವ ಪ್ರಯತ್ನಗಳು ನಡೆಯುತ್ತಿರುವ ಸಂದರ್ಭದಲ್ಲೇ, ಖತರ್ ಪ್ರಧಾನಿ ಹಾಗೂ ವಿದೇಶಾಂಗ ಸಚಿವ ಶೇಖ್ ಮೊಹಮ್ಮದ್ ಬಿನ್ ಅಬ್ದುಲ್‌ರಹಮಾನ್ ಬಿನ್ ಜಾಸಿಮ್ ಅಲ್ ಥಾನಿ ಅವರು ದೋಹಾದಲ್ಲಿ ಅಮೆರಿಕದ ವಿಶೇಷ ರಾಯಭಾರಿ ಸ್ಟೀವ್ ವಿಟ್ಕಾಫ್ ಹಾಗೂ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಳಿಯ ಜೇರೆಡ್ ಕುಶ್ನರ್ ಅವರನ್ನು ಭೇಟಿ ಮಾಡಿದ್ದಾರೆ.

ಜೂನ್ 17ರಂದು ಅಮೆರಿಕ ಮತ್ತು ಇರಾನ್ ಸಹಿ ಮಾಡಿದ್ದ ತಿಳುವಳಿಕೆ ಒಪ್ಪಂದದಡಿ, ಉಭಯ ದೇಶಗಳು ಕದನ ವಿರಾಮವನ್ನು 60 ದಿನಗಳವರೆಗೆ ವಿಸ್ತರಿಸಲು ಒಪ್ಪಿಕೊಂಡಿವೆ. ಈ ಅವಧಿಯಲ್ಲಿ ಹಾರ್ಮುಝ್ ಜಲಸಂಧಿಯ ಭವಿಷ್ಯ, ಇರಾನ್‌ನ ಫ್ರೀಝ್ ಮಾಡಿರುವ ಆಸ್ತಿಗಳ ಬಿಡುಗಡೆ, ದೀರ್ಘಾವಧಿಯ ಆರ್ಥಿಕ ನಿರ್ಬಂಧಗಳ ಸಡಿಲಿಕೆ ಹಾಗೂ ಟೆಹ್ರಾನ್‌ನ ಪರಮಾಣು ಕಾರ್ಯಕ್ರಮ ಸೇರಿದಂತೆ ಹಲವು ಪ್ರಮುಖ ವಿಷಯಗಳ ಕುರಿತು ಸವಿವರ ಮಾತುಕತೆಗಳನ್ನು ಮುಂದುವರಿಸಲು ಉಭಯ ದೇಶಗಳು ಸಮ್ಮತಿಸಿವೆ.

ಇದೇ ವೇಳೆ, ಹೆಪ್ಪುಗಟ್ಟಿರುವ ಇರಾನಿನ ಆಸ್ತಿಗಳಲ್ಲಿನ 6 ಬಿಲಿಯನ್ ಡಾಲರ್ ಮೊತ್ತದ ಒಂದು ಭಾಗವನ್ನು ಅಗತ್ಯ ಸರಕುಗಳ ಖರೀದಿಗೆ ಬಳಸಲು ಅನುಮತಿಸಲಾಗುವುದು ಎಂದು ಘರಿಬಾಬಾದಿ ತಿಳಿಸಿದ್ದಾರೆ. ಈ ಹಿಂದೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಈ ಹಣವನ್ನು ಇರಾನ್ ಅಮೆರಿಕದ ಉತ್ಪನ್ನಗಳ ಖರೀದಿಗೆ ಮಾತ್ರ ಬಳಸಲಿದೆ ಎಂದು ಹೇಳಿದ್ದರು.

"ಕೇಂದ್ರ ಬ್ಯಾಂಕ್ ಸೇರಿದಂತೆ ಖತರ್ ಅಧಿಕಾರಿಗಳೊಂದಿಗೆ ನಡೆದ ಸಭೆಗಳಲ್ಲಿ ಆರಂಭಿಕ 6 ಬಿಲಿಯನ್ ಡಾಲರ್ ಮೊತ್ತದ ಒಂದು ಭಾಗದ ಬಳಕೆಗೆ ಸಂಬಂಧಿಸಿದ ಹಲವು ವಿಷಯಗಳನ್ನು ಪರಿಶೀಲಿಸಲಾಗಿದೆ" ಎಂದು ಘರಿಬಾಬಾದಿ ಹೇಳಿದ್ದಾರೆ.

"ನಮ್ಮ ದೇಶವು ತಿಳಿಸುವ ಅಗತ್ಯಗಳ ಆಧಾರದ ಮೇಲೆ ಅಗತ್ಯ ಸರಕುಗಳನ್ನು ಖರೀದಿಸಿ, ಅವುಗಳನ್ನು ಇರಾನ್‌ಗೆ ಲಭ್ಯವಾಗುವಂತೆ ಮಾಡಲು ಒಪ್ಪಿಗೆ ನೀಡಲಾಗಿದೆ" ಎಂದು ಅವರು ತಿಳಿಸಿದ್ದಾರೆ.