ಸಾಂದರ್ಭಿಕ ಚಿತ್ರ (Photo: PTI)

ಪ್ರಸಕ್ತ ಆರ್ಥಿಕ ವರ್ಷದ ಮೊದಲ ಏಳು ತಿಂಗಳಲ್ಲಿ ಭಾರತದ ಕಚ್ಚಾ ತೈಲ ಆಮದು ವೆಚ್ಚವು ಕಳೆದ ವರ್ಷಕ್ಕಿಂತ ಸುಮಾರು ಶೇ. 54ರಷ್ಟು ಹೆಚ್ಚಾಗಿದೆ. ಪಶ್ಚಿಮ ಏಷ್ಯಾದ ಸಂಘರ್ಷ ಮತ್ತು ಹಾರ್ಮುಜ್ ಜಲಸಂಧಿಯ ಬಿಕ್ಕಟ್ಟಿನಿಂದಾಗಿ ಪೂರೈಕೆಯಲ್ಲಿ ವ್ಯತ್ಯಯವಾಗಿ ಬೆಲೆಗಳು ಗಗನಕ್ಕೇರಿವೆ. ಇದರಿಂದಾಗಿ ಆಮದು ಪ್ರಮಾಣದಲ್ಲಿ ಅಲ್ಪ ಏರಿಕೆಯಾಗಿದ್ದರೂ, ವೆಚ್ಚ ಮಾತ್ರ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದೆ ಎಂದು ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ ತಾತ್ಕಾಲಿಕ ಅಂಕಿಅಂಶಗಳಿಂದ ತಿಳಿದುಬಂದಿದೆ.

ತೈಲ ಬೆಲೆ ಏರಿಕೆಯಿಂದಾಗಿ ಎಲ್‌ಎನ್‌ಜಿ ಆಮದು ವೆಚ್ಚ ಮತ್ತು ಇಂಧನ ರಫ್ತು ಮೌಲ್ಯವೂ ಹೆಚ್ಚಾಗಿದೆ. ತೈಲ, ನೈಸರ್ಗಿಕ ಅನಿಲ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳ ಒಟ್ಟು ಆಮದಿನಲ್ಲಿ, ಪೆಟ್ರೋಲಿಯಂ ಉತ್ಪನ್ನಗಳ ರಫ್ತನ್ನು ಕಳೆದಾಗ ಸಿಗುವ ನಿವ್ವಳ ತೈಲ ಮತ್ತು ಅನಿಲ ಆಮದು ಮೌಲ್ಯವು ಕಳೆದ ವರ್ಷಕ್ಕಿಂತ ಸುಮಾರು ಶೇ. 40ರಷ್ಟು ಏರಿಕೆಯಾಗಿದೆ. ಇಂಧನ ಆಮದನ್ನೇ ಅವಲಂಬಿಸಿರುವ ಭಾರತದ ಆರ್ಥಿಕತೆಯ ಮೇಲೆ ಪಶ್ಚಿಮ ಏಷ್ಯಾ ಬಿಕ್ಕಟ್ಟು ಎಷ್ಟು ಪ್ರತಿಕೂಲ ಪರಿಣಾಮ ಬೀರಿದೆ ಎಂಬುದನ್ನು ಇದು ತೋರಿಸುತ್ತದೆ.

ಭಾರತವು ತನ್ನ ಕಚ್ಚಾ ತೈಲದ ಅಗತ್ಯದಲ್ಲಿ ಶೇ. 88ಕ್ಕಿಂತ ಹೆಚ್ಚು ಪಾಲನ್ನು ಆಮದಿನ ಮೂಲಕವೇ ಪೂರೈಸಿಕೊಳ್ಳುತ್ತದೆ. ಅಲ್ಲದೆ, ತನ್ನ ಒಟ್ಟು ನೈಸರ್ಗಿಕ ಅನಿಲ ಬಳಕೆಯ ಅರ್ಧದಷ್ಟನ್ನು ಎಲ್‌ಎನ್‌ಜಿ ರೂಪದಲ್ಲಿ ವಿದೇಶದಿಂದ ತರಿಸಿಕೊಳ್ಳುತ್ತದೆ.

ಆಮದು ತೈಲ ಮತ್ತು ಅನಿಲವನ್ನೇ ಅವಲಂಬಿಸಿದ್ದರೂ, ತನ್ನ ಬೃಹತ್ ತೈಲ ಶುದ್ಧೀಕರಣ ಸಾಮರ್ಥ್ಯದಿಂದಾಗಿ ಭಾರತವು ಪೆಟ್ರೋಲಿಯಂ ಉತ್ಪನ್ನಗಳ ಪ್ರಮುಖ ರಫ್ತುದಾರ ದೇಶವಾಗಿದೆ. ಇದರ ಜೊತೆಗೆ, ಅಡುಗೆ ಅನಿಲದಂತಹ (LPG) ಕೆಲವು ಪೆಟ್ರೋಲಿಯಂ ಉತ್ಪನ್ನಗಳನ್ನು ಭಾರತ ಆಮದು ಕೂಡ ಮಾಡಿಕೊಳ್ಳುತ್ತದೆ.

ಕಳೆದ ಫೆಬ್ರವರಿ ಅಂತ್ಯದಲ್ಲಿ ಪಶ್ಚಿಮ ಏಷ್ಯಾ ಯುದ್ಧ ಆರಂಭವಾಗುವ ಮುನ್ನ, ಭಾರತದ ಒಟ್ಟು ಕಚ್ಚಾ ತೈಲ ಆಮದಿನಲ್ಲಿ ಶೇ. 40ರಷ್ಟು, ಎಲ್‌ಎನ್‌ಜಿ ಆಮದಿನಲ್ಲಿ ಶೇ. 60ರಷ್ಟು ಹಾಗೂ ಎಲ್‌ಪಿಜಿ ಆಮದಿನಲ್ಲಿ ಬರೋಬ್ಬರಿ ಶೇ. 90ರಷ್ಟು ಪಾಲು ಪರ್ಷಿಯನ್ ಕೊಲ್ಲಿಯಿಂದ ಹಾರ್ಮುಝ್ ಜಲಸಂಧಿಯ ಮೂಲಕವೇ ಬರುತ್ತಿತ್ತು.

ಯುದ್ಧದ ಆರಂಭಿಕ ತಿಂಗಳುಗಳಲ್ಲಿ ಪ್ರಮುಖ ಆತಂಕವಾಗಿದ್ದ ತೈಲ ಪೂರೈಕೆಯ ಕೊರತೆ ಈಗ ಬಹುತೇಕ ಕಡಿಮೆಯಾಗಿದೆ. ಆದರೆ, ಯುದ್ಧದ ಅಪಾಯದ ವಿಮಾ ಕಂತುಗಳು (ವಾರ್ ರಿಸ್ಕ್ ಪ್ರೀಮಿಯಂ) ಮತ್ತು ಸಾಗಣೆ ವೆಚ್ಚ ಗಗನಕ್ಕೇರಿರುವುದರಿಂದ ಇಂಧನ ಬೆಲೆಗಳು ಇನ್ನೂ ಹೆಚ್ಚಿನ ಮಟ್ಟದಲ್ಲೇ ಏರಿಳಿತ ಕಾಣುತ್ತಿವೆ.

ಜೂನ್‌ನಿಂದ ಆಗಸ್ಟ್‌ವರೆಗೆ ತೈಲ ಬೆಲೆ ಸ್ವಲ್ಪ ಮಟ್ಟಿಗೆ ಇಳಿಕೆಯಾಗಿತ್ತು. ನಂತರ, ಪಶ್ಚಿಮ ಏಷ್ಯಾದಲ್ಲಿ ಮತ್ತೆ ಸಂಘರ್ಷ ಹೆಚ್ಚಾದ ಕಾರಣ ಮತ್ತು ಸಾಗಣೆ ವೆಚ್ಚ ಏರಿಕೆಯಾದ್ದರಿಂದ ಸೆಪ್ಟೆಂಬರ್-ಅಕ್ಟೋಬರ್‌ನಲ್ಲಿ ಬೆಲೆಗಳು ಮತ್ತೆ ಜಿಗಿದಿವೆ. ಅಕ್ಟೋಬರ್ ಒಂದೇ ತಿಂಗಳಲ್ಲಿ ದೇಶದ ತೈಲ ಆಮದು ವೆಚ್ಚವು ಕಳೆದ ವರ್ಷಕ್ಕಿಂತ ಸುಮಾರು ಶೇ. 88ರಷ್ಟು ಹೆಚ್ಚಾಗಿದೆ.

ಭಾರತವು ತೈಲ ಆಮದನ್ನೇ ಹೆಚ್ಚಾಗಿ ಅವಲಂಬಿಸಿದೆ ಮತ್ತು ದೇಶದಲ್ಲಿ ಇಂಧನ ಬೇಡಿಕೆ ನಿರಂತರವಾಗಿ ಇರುತ್ತದೆ. ಹೀಗಾಗಿ, ಬೆಲೆಗಿಂತ ಹೆಚ್ಚಾಗಿ ಪೂರೈಕೆಯ ಭದ್ರತೆಗೆ ಆದ್ಯತೆ ನೀಡುತ್ತಿರುವುದರಿಂದ, ಭಾರತವು ಅತ್ಯಂತ ದುಬಾರಿ ದರದಲ್ಲಿ ತೈಲ ಮತ್ತು ಅನಿಲವನ್ನು ಆಮದು ಮಾಡಿಕೊಳ್ಳುವುದು ಅನಿವಾರ್ಯವಾಗಿದೆ.

ಭಾರತದ ತೈಲ ಮತ್ತು ಅನಿಲ ವಹಿವಾಟಿನ ಲೆಕ್ಕಾಚಾರ:

ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ ಪೆಟ್ರೋಲಿಯಂ ಯೋಜನೆ ಮತ್ತು ವಿಶ್ಲೇಷಣಾ ಘಟಕ (PPAC) ಬಿಡುಗಡೆ ಮಾಡಿರುವ ಇತ್ತೀಚಿನ ತಾತ್ಕಾಲಿಕ ಅಂಕಿಅಂಶಗಳ ಪ್ರಕಾರ, ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ಕಚ್ಚಾ ತೈಲ ಆಮದು ಪ್ರಮಾಣ ಕೇವಲ ಶೇ. 2.7ರಷ್ಟು ಹೆಚ್ಚಾಗಿ 146.6 ಮಿಲಿಯನ್ ಟನ್‌ಗಳಿಗೆ (ಸುಮಾರು 1.08 ಬಿಲಿಯನ್ ಬ್ಯಾರೆಲ್) ತಲುಪಿದೆ. ಆದರೆ, ಆಮದು ವೆಚ್ಚ ಮಾತ್ರ ಕಳೆದ ವರ್ಷಕ್ಕಿಂತ ಶೇ. 53.5ರಷ್ಟು ಜಿಗಿದು 111 ಬಿಲಿಯನ್ ಡಾಲರ್‌ಗೆ ಮುಟ್ಟಿದೆ.

ಅಂದರೆ, ಈ ಏಳು ತಿಂಗಳ ಅವಧಿಯಲ್ಲಿ ಆಮದು ಮಾಡಿಕೊಂಡ ಕಚ್ಚಾ ತೈಲದ ಸರಾಸರಿ ಬೆಲೆ ಪ್ರತಿ ಬ್ಯಾರೆಲ್‌ಗೆ ಸುಮಾರು 103.3 ಡಾಲರ್ ಆಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಈ ದರ ಸುಮಾರು 69 ಡಾಲರ್ ಇತ್ತು. ಏಪ್ರಿಲ್-ಅಕ್ಟೋಬರ್ ಅವಧಿಯ ತೈಲ ಆಮದು ವೆಚ್ಚವು ಈಗಾಗಲೇ 2025-26ರ ಇಡೀ ಆರ್ಥಿಕ ವರ್ಷದ ಒಟ್ಟು ಆಮದು ಮೌಲ್ಯದ ಶೇ. 88ರಷ್ಟನ್ನು ತಲುಪಿದೆ. ಪ್ರಸಕ್ತ ಆರ್ಥಿಕ ವರ್ಷ ಮುಗಿಯಲು ಇನ್ನೂ ಐದು ತಿಂಗಳು ಬಾಕಿ ಇದೆ.

ಲಭ್ಯವಿರುವ ಮಾಹಿತಿಯ ಪ್ರಕಾರ, ಕಳೆದ ಅಕ್ಟೋಬರ್ ತಿಂಗಳಲ್ಲಿ ತೈಲ ಆಮದು ವೆಚ್ಚವು ಕಳೆದ ವರ್ಷಕ್ಕಿಂತ ಶೇ. 87.5ರಷ್ಟು ಏರಿಕೆಯಾಗಿ 19.5 ಬಿಲಿಯನ್ ಡಾಲರ್ ತಲುಪಿದೆ. ಭಾರತ ಖರೀದಿಸುವ ಕಚ್ಚಾ ತೈಲದ ಸರಾಸರಿ ಬೆಲೆ ಸೆಪ್ಟೆಂಬರ್‌ನಲ್ಲಿ ಪ್ರತಿ ಬ್ಯಾರೆಲ್‌ಗೆ 116.1 ಡಾಲರ್ ಮತ್ತು ಅಕ್ಟೋಬರ್‌ನಲ್ಲಿ 119.9 ಡಾಲರ್ ಇತ್ತು. ಇದಕ್ಕೂ ಮುನ್ನ ಏಪ್ರಿಲ್‌ನಲ್ಲಿ 114.48 ಡಾಲರ್, ಮೇನಲ್ಲಿ 106.2 ಡಾಲರ್, ಜೂನ್‌ನಲ್ಲಿ 83.2 ಡಾಲರ್, ಜುಲೈನಲ್ಲಿ 82 ಡಾಲರ್ ಹಾಗೂ ಆಗಸ್ಟ್‌ನಲ್ಲಿ 90.2 ಡಾಲರ್ ದಾಖಲಾಗಿತ್ತು.

ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ಎಲ್‌ಎನ್‌ಜಿ ಆಮದು ಪ್ರಮಾಣ ಶೇ. 7.4ರಷ್ಟು ಹೆಚ್ಚಾಗಿ 22,175 ಮಿಲಿಯನ್ ಸ್ಟ್ಯಾಂಡರ್ಡ್ ಕ್ಯೂಬಿಕ್ ಮೀಟರ್‌ಗೆ ತಲುಪಿದೆ. ಆದರೆ, ಬೆಲೆ ಏರಿಕೆಯ ಕಾರಣದಿಂದ ಎಲ್‌ಎನ್‌ಜಿ ಆಮದು ವೆಚ್ಚ ಶೇ. 35.8ರಷ್ಟು ಜಿಗಿದು 11 ಬಿಲಿಯನ್ ಡಾಲರ್‌ಗೆ ಮುಟ್ಟಿದೆ. ಯುದ್ಧದಿಂದಾಗಿ ಎಲ್‌ಪಿಜಿಯಂತಹ ಪ್ರಮುಖ ಪೆಟ್ರೋಲಿಯಂ ಉತ್ಪನ್ನಗಳ ಪೂರೈಕೆಗೆ ಅಡ್ಡಿಯಾಗಿದೆ. ಇದರಿಂದ ಪೆಟ್ರೋಲಿಯಂ ಉತ್ಪನ್ನಗಳ ಆಮದು ಪ್ರಮಾಣ 29.8 ಮಿಲಿಯನ್ ಟನ್‌ಗಳಿಂದ 15.1 ಮಿಲಿಯನ್ ಟನ್‌ಗಳಿಗೆ, ಅಂದರೆ ಸುಮಾರು ಅರ್ಧದಷ್ಟು ಇಳಿಕೆಯಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬೆಲೆಗಳು ವಿಪರೀತ ಹೆಚ್ಚಿರುವುದರಿಂದ, ಮೌಲ್ಯದ ಲೆಕ್ಕದಲ್ಲಿ ಈ ಆಮದು ಇಳಿಕೆ ಶೇ. 25ರಷ್ಟು ಮಾತ್ರ ಇದ್ದು, 9.9 ಬಿಲಿಯನ್ ಡಾಲರ್ ದಾಖಲಾಗಿದೆ.

ಜಾಗತಿಕ ಪೂರೈಕೆ ಕೊರತೆಯ ನಡುವೆ ದೇಶೀಯ ಇಂಧನ ಪೂರೈಕೆಗೆ ಮೊದಲ ಆದ್ಯತೆ ನೀಡಲಾಗಿದೆ. ಹೀಗಾಗಿ, ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ದೇಶದ ಪೆಟ್ರೋಲಿಯಂ ಉತ್ಪನ್ನಗಳ ರಫ್ತು ಪ್ರಮಾಣ ಶೇ. 13.5ರಷ್ಟು ಇಳಿಕೆಯಾಗಿ 32.1 ಮಿಲಿಯನ್ ಟನ್‌ಗಳಿಗೆ ತಲುಪಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇಂಧನ ಬೆಲೆಗಳು ಭಾರೀ ಪ್ರಮಾಣದಲ್ಲಿ ಏರಿಕೆಯಾಗಿರುವುದರಿಂದ, ರಫ್ತು ಪ್ರಮಾಣ ಕಡಿಮೆಯಾಗಿದ್ದರೂ ಮೌಲ್ಯದ ಲೆಕ್ಕದಲ್ಲಿ ಶೇ. 47ರಷ್ಟು ಹೆಚ್ಚಾಗಿ 34.1 ಬಿಲಿಯನ್ ಡಾಲರ್‌ಗೆ ಏರಿದೆ.

ಒಟ್ಟಾರೆ ತೈಲ, ಎಲ್‌ಎನ್‌ಜಿ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳ ಆಮದು ಹಾಗೂ ಇಂಧನ ರಫ್ತನ್ನು ಲೆಕ್ಕಹಾಕಿದರೆ, ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ದೇಶದ ನಿವ್ವಳ ತೈಲ ಮತ್ತು ಅನಿಲ ಆಮದು ವೆಚ್ಚ ಕಳೆದ ವರ್ಷಕ್ಕಿಂತ ಶೇ. 39ರಷ್ಟು ಹೆಚ್ಚಾಗಿ 97.7 ಬಿಲಿಯನ್ ಡಾಲರ್‌ಗೆ ತಲುಪಿದೆ ಎಂದು ಪಿಪಿಎಸಿ ಅಂಕಿಅಂಶಗಳು ತಿಳಿಸಿವೆ.

ಭಾರತದ ಒಟ್ಟು ಆಮದಿನಲ್ಲಿ ಇಂಧನ ಆಮದು ಪ್ರಮುಖ ಪಾಲು ಹೊಂದಿದೆ. ಇದರಲ್ಲಿ ಯಾವುದೇ ಗಮನಾರ್ಹ ಏರಿಕೆಯಾದರೂ ಅದು ವ್ಯಾಪಾರ ಸಮತೋಲನ, ಚಾಲ್ತಿ ಖಾತೆ, ಹಣದುಬ್ಬರ ಮತ್ತು ರೂಪಾಯಿ ವಿನಿಮಯ ದರದ ಮೇಲೆ ಪರಿಣಾಮ ಬೀರುತ್ತದೆ. ಉದಾಹರಣೆಗೆ, ಸರ್ಕಾರದ ಅಂಕಿಅಂಶಗಳ ಪ್ರಕಾರ ಭಾರತದ ಸಗಟು ಇಂಧನ ಮತ್ತು ವಿದ್ಯುತ್ ಹಣದುಬ್ಬರವು ಆಗಸ್ಟ್‌ನಲ್ಲಿ ಶೇ. 23.2, ಸೆಪ್ಟೆಂಬರ್‌ನಲ್ಲಿ ಶೇ. 25.9 ಮತ್ತು ಅಕ್ಟೋಬರ್‌ನಲ್ಲಿ ಶೇ. 32.8ಕ್ಕೆ ಏರಿಕೆಯಾಗಿದೆ.

ಕೃಪೆ: indianexpress.com

Tags:    

Writer - ವಾರ್ತಾಭಾರತಿ

contributor

Editor - ವಾರ್ತಾಭಾರತಿ

contributor

Byline - ರಶ್ಮಿ ಕಾಸರಗೋಡು

contributor

ರಶ್ಮಿ ಕಾಸರಗೋಡು ಅವರು ಡಿಜಿಟಲ್ ಮಾಧ್ಯಮ ಕ್ಷೇತ್ರದಲ್ಲಿ 17 ವರ್ಷಗಳ ಸುದೀರ್ಘ ಅನುಭವ ಹೊಂದಿರುವ ಮಾಧ್ಯಮ ವೃತ್ತಿಪರರು. ಪಬ್ಲಿಕ್ ಅಡ್ಮಿನಿಸ್ಟ್ರೇಷನ್ ಮತ್ತು ಇಂಗ್ಲಿಷ್ ವಿಷಯಗಳಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಸುದ್ದಿ ವಿಶ್ಲೇಷಣೆಯಲ್ಲಿ ಪರಿಣತಿ ಹೊಂದಿದ್ದಾರೆ. ಇಮೇಲ್ id :kasaragod10rashmi@gmail.com