Kanakagiri | ಬೈಕ್‌ ಢಿಕ್ಕಿ: ಯುವಕ ಮೃತ್ಯು

ಕನಕಗಿರಿ: ತಾವರಗೇರಾದಿಂದ ಹುಲಿಹೈದರ, ಕನಕಗಿರಿ ಮಾರ್ಗವಾಗಿ ಗಂಗಾವತಿಗೆ ಬೈಕ್‌ನಲ್ಲಿ ತಂದೆಯನ್ನು ಕರೆದುಕೊಂಡು ಹೋಗುತ್ತಿದ್ದ ವೇಳೆ ಮತ್ತೊಂದು ದ್ವಿಚಕ್ರ ವಾಹನ ಢಿಕ್ಕಿ ಹೊಡೆದ ಪರಿಣಾಮ ಬೈಕ್ ಸವಾರ ಮೃತಪಟ್ಟ ಘಟನೆ ಭಾನುವಾರ ನಸುಕಿನ ಜಾವ ನಡೆದಿದೆ.

ಮೃತರನ್ನು ಸಿಂಧನೂರು ತಾಲೂಕಿನ ಕರಡಚಿಲುಮಿ ಗ್ರಾಮದ ಯಮನೂರಪ್ಪ (22) ಎಂದು ಗುರುತಿಸಲಾಗಿದೆ. ಅವರ ತಂದೆ ಹುಸೇನಗೌಡ ಅವರಿಗೆ ಗಂಭೀರ ಗಾಯಗಳಾಗಿದ್ದು, ಗಂಗಾವತಿಯ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಢಿಕ್ಕಿ ಹೊಡೆದ ಮತ್ತೊಂದು ದ್ವಿಚಕ್ರ ವಾಹನವನ್ನು ತಾಲೂಕಿನ ವರ್ನ್ ಖೇಡ ಗ್ರಾಮದ ಹನುಮಪ್ಪ ಚಲಾಯಿಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ತಾಲೂಕಿನ ಹನುಮನಾಳ ಗ್ರಾಮದ ಕರಿಯಪ್ಪ ಅವರ ಹೊಲದ ಬಳಿ ಈ ಅಪಘಾತ ಸಂಭವಿಸಿದೆ. ಮೃತರ ಸಂಬಂಧಿ ರಾಮನಗೌಡ ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಪಿಐ ಶಿವರಾಜ ಇಂಗಳೆ ತಿಳಿಸಿದ್ದಾರೆ.