ಸಿಂಧನೂರು | ದಿಲ್ಲಿಯಲ್ಲಿ ಹೋರಾಟಗಾರರ ಮೇಲಿನ ದೌರ್ಜನ್ಯ ಖಂಡಿಸಿ ಎಡ ಪಕ್ಷಗಳಿಂದ ಪ್ರತಿಭಟನೆ

ಸಿಂಧನೂರು: ಮುಖ್ಯ ಚುನಾವಣೆ ಆಯುಕ್ತ ಜ್ಞಾನೇಶ್ ಕುಮಾರ್ ರಾಜೀನಾಮೆಗೆ ಆಗ್ರಹಿಸಿ ದಿಲ್ಲಿಯಲ್ಲಿ ಶಾಂತಿಯುತವಾಗಿ ಹೋರಾಟನಿರತ ಎಡ ಪಕ್ಷಗಳ ಮುಖಂಡರು, ಸಿಜೆಪಿ ನಾಯಕರು ಹಾಗೂ ವಿದ್ಯಾರ್ಥಿ-ಯುವಜನರನ್ನು ಕೇಂದ್ರದ ಬಿಜೆಪಿ ಸರಕಾರದ ಅಣತಿಯಂತೆ ದಿಲ್ಲಿ ಪೊಲೀಸರು ದೌರ್ಜನ್ಯ ನಡೆಸಿ, ಬಲವಂತವಾಗಿ ಬಂಧಿಸಿದ್ದಾರೆ. ಈ ಕೂಡಲೇ ಬಂಧಿತರನ್ನು ಬಿಡುಗಡೆಗೊಳಿಸಬೇಕು ಹಾಗೂ ಜ್ಞಾನೇಶ್ ಕುಮಾರ್ ಕೂಡಲೇ ರಾಜೀನಾಮೆ ನೀಡಬೇಕು ಎಂದು ಆಗ್ರಹಿಸಿ  ಎಡ ಪಕ್ಷಗಳ ವತಿಯಿಂದ ನಗರದ ಗಾಂಧಿ ಸರ್ಕಲ್‌ನಲ್ಲಿ ಶನಿವಾರ ಸಂಜೆ ಪ್ರತಿಭಟನೆ ನಡೆಯಿತು. 

ಭಾರತ ಕಮ್ಯುನಿಸ್ಟ್ ಪಕ್ಷದ ಮುಖಂಡ ಭಾಷುಮಿಯಾ ಮಾತನಾಡಿ, “ಕೇಂದ್ರದ ಬಿಜೆಪಿ ಸರಕಾರ ಮತ ಕಳ್ಳತನದ ಮೂಲಕ ಅಧಿಕಾರದ ಚುಕ್ಕಾಣಿ ಹಿಡಿದಿದೆ. ಮುಖ್ಯ ಚುನಾವಣಾ ಆಯುಕ್ತನನ್ನಾಗಿ ಜ್ಞಾನೇಶ್ ಕುಮಾರ್‌ನನ್ನು ನೇಮಕ ಮಾಡಿದ್ದೇ ಬಿಜೆಪಿ ಆಗಿದ್ದರಿಂದ ಎಸ್‌ಐಆರ್ ಮೂಲಕ ಬಹಿರಂಗವಾಗಿ ಈ ದೇಶದ ಸಂವಿಧಾನಬದ್ಧ ಹಕ್ಕನ್ನು ಕಸಿದುಕೊಳ್ಳಲು ಮುಂದಾಗಿದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಸಿಪಿಐ(ಎಂ) ತಾಲೂಕು ಕಾರ್ಯದರ್ಶಿ ಬಸವಂತರಾಯಗೌಡ ಮಾತನಾಡಿ, “ಜ್ಞಾನೇಶ್‌ಕುಮಾರ್ ಮುಖ್ಯ ಚುನಾವಣೆ ಆಯುಕ್ತರಾಗಿರಲು ಯೋಗ್ಯರಲ್ಲ. ಈ ಕ್ಷಣವೇ ರಾಜೀನಾಮೆ ನೀಡಿ ತೊಲಗಬೇಕು. 2014ಕ್ಕಿಂತಲೂ ಮೊದಲು ಸಾವಿರಾರು ಸುಳ್ಳುಗಳನ್ನು ಹೇಳಿ ಅಧಿಕಾರಕ್ಕೆ ಬಂದ ಬಿಜೆಪಿ ಆ ನಂತರ ಇಡೀ ದೇಶ ಪ್ರಜಾಪ್ರಭುತ್ವವವನ್ನೇ ಹೊಸಕಿಹಾಕಲು ಹೊರಟಿದೆ” ಎಂದು ಹೇಳಿದರು.

ಸಿಪಿಐ(ಎಂಎಲ್) ಲಿಬರೇಶನ್ ಜಿಲ್ಲಾ ಕಾರ್ಯದರ್ಶಿ ನಾಗರಾಜ್ ಪೂಜಾರ್ ಮಾತನಾಡಿ, “ಎಸ್‌ಐಆರ್ ಮೂಲಕ ಬಿಜೆಪಿ ಅಲ್ಪಸಂಖ್ಯಾತರು, ದಲಿತರು, ಶೋಷಿತರು, ಆದಿವಾಸಿ ಸಮುದಾಯಗಳ ಜನರ ಮತಗಳನ್ನು ಮತಪಟ್ಟಿಯಿಂದ ತೆಗೆದುಹಾಕಿದೆ. ಇದನ್ನು ಖಂಡಿಸಿ ದಿಲ್ಲಿಯಲ್ಲಿ ಹೋರಾಟ ನಡೆಸಿದ ಸಿಜೆಪಿ ನಾಯಕರು, ಎಡಪಕ್ಷಗಳು, ವಿದ್ಯಾರ್ಥಿ-ಯುವಜನರ ಮೇಲೆ ಪೊಲೀಸರ ಮೂಲಕ ಕೇಂದ್ರದ ಬಿಜೆಪಿ ಸರಕಾರ ಬರ್ಬರವಾಗಿ ದೌರ್ಜನ್ಯ ನಡೆಸಿದೆ. ಇದು ಮೋದಿ ಸರಕಾರದ ಸರ್ವಾಧಿಕಾರಕ್ಕೆ ಜ್ವಲಂತ ಸಾಕ್ಷಿಯಾಗಿದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಪ್ರಗತಿಪರ ಸಂಘಟನೆಗಳ ಒಕ್ಕೂಟದ ಸಂಚಾಲಕ ಚಂದ್ರಶೇಖರ ಗೊರಬಾಳ ಮಾತನಾಡಿ, “ಶನಿವಾರ ಬೆಳಿಗ್ಗೆಯಿಂದಲೇ ಕೇಂದ್ರದ ಬಿಜೆಪಿ ಸರಕಾರ ದಿಲ್ಲಿಯನ್ನು ರಣಾಂಗಣವನ್ನಾಗಿ ಮಾಡಿದೆ. ಸಾವಿರಾರು ಪೊಲೀಸರು, ಹೋರಾಟ ನಿರತರ ಮೇಲೆ ಮನಬಂದಂತೆ ದಾಳಿ ಮಾಡುವ ಮೂಲಕ ಸರಕಾರದ ಅಣತಿಯಂತೆ ವರ್ತಿಸುತ್ತಿದ್ದಾರೆ. ಬಿಜೆಪಿ ಸರಕಾರ ಕಳೆದ 2-3 ವರ್ಷಗಳಿಂದ ಚುನಾವಣೆಯನ್ನು ದುರ್ಬಳಕೆ ಮಾಡಿಕೊಳ್ಳುವ ಮೂಲಕ ದೇಶದ ಸಂವಿಧಾನ, ಪ್ರಜಾತಂತ್ರವನ್ನು ಬುಡಮೇಲುಗೊಳಿಸಲು ಹೊರಟಿದೆ. ಇಂತಹ ಸಂದರ್ಭದಲ್ಲಿ ವಿದ್ಯಾರ್ಥಿ-ಯುವಜನರು ಪ್ರಜಾಪ್ರಭುತ್ವ ಉಳಿಸಲು ದಿಲ್ಲಿಯಲ್ಲಿ ಚಳವಳಿಯನ್ನು ನಡೆಸುತ್ತಿರುವುದು ಅವರ ತಾಳ್ಮೆ ಮೆಚ್ಚುವಂತದ್ದು” ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಎಡ ಪಕ್ಷಗಳ ಚಂದ್ರಶೇಖರ ಕ್ಯಾತ್ನಟ್ಟಿ, ಶಕುಂತಲಾ ಪಾಟೀಲ್, ಎನ್.ಗೋಪಾಲಕೃಷ್ಣ, ಅಪ್ಪಣ್ಣ ಕಾಂಬ್ಳೆ, ಬಸವರಾಜ ಕೊಂಡೆ, ಎಂ.ಲಿಂಗಪ್ಪ, ಡಿ.ಎಚ್.ಕಂಬಳಿ, ಎಸ್.ದೇವೇಂದ್ರಗೌಡ, ಬಸವರಾಜ, ಗಂಜ್ ಹಮಾಲರ ಸಂಘದ ಹನುಮಂತಪ್ಪ ಹಂಚಿನಾಳ, ಗಂಗಪ್ಪ, ಪ್ರಕಾಶ್, ಮೂರ್ತೆಪ್ಪ, ಸುಭಾನ್ ಇನ್ನಿತರರಿದ್ದರು.