FIFA 2026 | ಕೇಪ್ ವರ್ಡ್ ತಂಡಕ್ಕೆ ತಾಯ್ನಾಡಿನಲ್ಲಿ ವೀರೋಚಿತ ಸ್ವಾಗತ

ಲಂಡನ್, ಜು.5: ಈಗ ನಡೆಯುತ್ತಿರುವ ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಐತಿಹಾಸಿಕ ಸಾಧನೆಗೈದಿರುವ ಕೇಪ್ ವರ್ಡ್ ರಾಷ್ಟ್ರೀಯ ಫುಟ್ಬಾಲ್ ತಂಡವು ಸ್ವದೇಶಕ್ಕೆ ವಾಪಸಾದಾಗ ವಿಮಾನ ನಿಲ್ದಾಣದಲ್ಲಿ ವೀರೋಚಿಸ ಸ್ವಾಗತ ನೀಡಲಾಯಿತು. ಸಾವಿರಾರು ಬೆಂಬಲಿಗರು ತಮ್ಮ ತಂಡದ ಸಾಧನೆಯನ್ನು ಸಂಭ್ರಮಿಸಿದರು.

ಫಿಫಾ ವಿಶ್ವಕಪ್‌ನ ನಾಕೌಟ್ ಹಂತಕ್ಕೇರಿರುವ ಜನಸಂಖ್ಯೆಯಲ್ಲಿ ಅತ್ಯಂತ ಪುಟ್ಟ ರಾಷ್ಟ್ರವಾಗಿರುವ ಕೇಪ್ ವಡ್‌ರ್ ತಂಡದ ಯಶಸ್ವಿ ವಿಶ್ವಕಪ್ ಪಯಣವು ಹಾಲಿ ಚಾಂಪಿಯನ್ ಅರ್ಜೆಂಟೀನದ ವಿರುದ್ಧ 32ರ ಸುತ್ತಿನ ಪಂದ್ಯದಲ್ಲಿ 2-3 ಅಂತರದಿಂದ ಸೋಲುವ ಮೂಲಕ ಅಂತ್ಯವಾಗಿದೆ.

ಕೇಪ್ ವರ್ಡ್‌ನ 51ನೇ ಸ್ವಾತಂತ್ರ್ಯ ದಿನದಂದೇ ಫುಟ್ಬಾಲ್ ತಂಡವು ತನ್ನ ದೇಶಕ್ಕೆ ಆಗಮಿಸಿದೆ. ರಾಷ್ಟ್ರದಾದ್ಯಂತ ಫುಟ್ಬಾಲ್ ಹಬ್ಬವನ್ನು ಆಚರಿಸಲಾಗುತ್ತಿದ್ದು, ಸಾವಿರಾರು ಜನರು ದೇಶದ ನೀಲಿ, ಕೆಂಪು ಹಾಗೂ ಬಿಳಿ ಬಣ್ಣದ ಉಡುಪು ಧರಿಸಿ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದರು. ಕೆಲವರು ಧ್ವಜವನ್ನು ಬೀಸುತ್ತಾ, ಹಾಡುಗಳನ್ನು ಹಾಡುತ್ತಾ, ನೃತ್ಯ ಮಾಡುತ್ತಾ ಆಟಗಾರರನ್ನು ಸ್ವದೇಶಕ್ಕೆ ಸ್ವಾಗತಿಸಿದರು. ವಿಶ್ವಕಪ್‌ನಲ್ಲಿ ಸ್ಮರಣೀಯ ಚೊಚ್ಚಲ ಪಂದ್ಯವನ್ನಾಡಿದ ಕೇಪ್ ವರ್ಡ್ ದೇಶದಲ್ಲಿ ಸಂಭ್ರಮ ಮುಗಿಲು ಮುಟ್ಟಿತು.