FIFA ವಿಶ್ವಕಪ್ : ಪನಾಮ ವಿರುದ್ಧ ಇಂಗ್ಲೆಂಡ್‌ ಗೆ 2-0 ಅಂತರದ ಗೆಲುವು

ನ್ಯೂಜೆರ್ಸಿ: ಇಂಗ್ಲೆಂಡ್ ತಂಡವು ಆರಂಭಿಕ ಮೊದಲಾರ್ಧದ ಮಂದಗತಿಯ ಆಟವನ್ನು ಮೆಟ್ಟಿ ನಿಂತು ಪನಾಮ ವಿರುದ್ಧ 2-0 ಗೋಲುಗಳ ಭರ್ಜರಿ ಜಯ ಸಾಧಿಸಿದೆ. . ಈ ಗೆಲುವಿನೊಂದಿಗೆ ಇಂಗ್ಲೆಂಡ್ ಎಲ್ ಗುಂಪಿನಲ್ಲಿ ಅಗ್ರಸ್ಥಾನ ಪಡೆದಿದ್ದು, 32ರ ಘಟ್ಟದಲ್ಲಿ ಡಿಆರ್ ಕಾಂಗೋ ತಂಡವನ್ನು ಎದುರಿಸಲಿದೆ.

ಪಂದ್ಯದ ಮೊದಲಾರ್ಧದಲ್ಲಿ ಇಂಗ್ಲೆಂಡ್ ಮಂದಗತಿಯ ಆಟ ಪ್ರದರ್ಶಿಸಿತು. ಈ ವೇಳೆ ಪನಾಮ ತಂಡವು ಇಂಗ್ಲೆಂಡ್ಗೆ ಸಾಕಷ್ಟು ಸವಾಲುಗಳನ್ನು ಒಡ್ಡಿತು. ಆದರೆ ಆ ಬಳಿಕ ಪಂದ್ಯದ ಮೇಲಿನ ಹಿಡಿತ ಸಾಧಿಸಿದ ಇಂಗ್ಲೆಂಡ್ ದ್ವಿತೀಯಾರ್ಧದಲ್ಲಿ ಮೊದಲ ಗೋಲು ಗಳಿಸಿತು.

ಬೆಲ್ಲಿಂಗ್ಹ್ಯಾಮ್ 62ನೇ ನಿಮಿಷದಲ್ಲಿ ಚತುರತೆಯಿಂದ ಗೋಲು ಬಾರಿಸಿ ತಂಡಕ್ಕೆ ಮೊದಲ ಯಶಸ್ಸು ತಂದುಕೊಟ್ಟರು. ಬಳಿಕ ಕೆಲವೇ ನಿಮಿಷಗಳಲ್ಲಿ ಹ್ಯಾರಿ ಕೇನ್ ಗೆ ಗೋಲು ಗಳಿಸಲು ನೆರವಾಗುವ ಮೂಲಕ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

67ನೇ ನಿಮಿಷದಲ್ಲಿ ತಂಡದ ಎರಡನೇ ಗೋಲು ಗಳಿಸುವ ಮೂಲಕ ಹ್ಯಾರಿ ಕೇನ್ ವೈಯಕ್ತಿಕ ದಾಖಲೆಯನ್ನೂ ಮಾಡಿದರು. ಈ ಗೋಲು ವಿಶ್ವಕಪ್ ಇತಿಹಾಸದಲ್ಲಿ ಇಂಗ್ಲೆಂಡ್ ಪರ ಅತಿ ಹೆಚ್ಚು ಗೋಲು ಗಳಿಸಿದ ಏಕೈಕ ಆಟಗಾರನಾಗಿ ಹೊರಹೊಮ್ಮಲು ಕಾರಣವಾಯಿತು.

ಕೊನೆಯಲ್ಲಿ ಪನಾಮಾ ತಂಡವು ಗೋಲು ಗಳಿಸಲು ಪ್ರಬಲ ಹೋರಾಟ ನಡೆಸಿತು. ಆದರೆ ಯಾವುದೇ ಸಫಲತೆಯಿಲ್ಲದೆ 0-2 ಅಂತರದ ಸೋಲಿಗೆ ಶರಣಾಯಿತು.

ಪಂದ್ಯದಲ್ಲಿ ಇಂಗ್ಲೆಂಡ್‌ ತಂಡವು 6 ನೇರ ಗುರಿಯೊಂದಿಗೆ 17 ಬಾರಿ ಗೋಲು ಪ್ರಯತ್ನ ನಡೆಸಿದರೆ, ಪನಾಮ ತಂಡವು 2 ನೇರ ಗುರಿಯೊಂದಿಗೆ 13 ಬಾರಿ ಗೋಲು ಪ್ರಯತ್ನ ನಡೆಸಿತು.