FIFA World Cup 2026 | ಫೈನಲ್ ಸೋಲಿನ ಬಳಿಕವೂ ಅರ್ಜೆಂಟೀನಾಗೆ ಆಘಾತ; ಪರೆಡೆಸ್‌ಗೂ ರೆಡ್ ಕಾರ್ಡ್

ನ್ಯೂಜೆರ್ಸಿ: ಫಿಫಾ ವಿಶ್ವಕಪ್ ಫೈನಲ್‌ ನಲ್ಲಿ ಸ್ಪೇನ್ ವಿರುದ್ಧ 0–1 ಗೋಲುಗಳ ಸೋಲು ಕಂಡ ಅರ್ಜೆಂಟೀನಾಗೆ ಪಂದ್ಯ ಮುಗಿದ ಬಳಿಕವೂ ಮತ್ತೊಂದು ಆಘಾತ ಎದುರಾಯಿತು. ಹೆಚ್ಚುವರಿ ಸಮಯದಲ್ಲಿ ಎಂಜೊ ಫೆರ್ನಾಂಡಿಸ್ ರೆಡ್ ಕಾರ್ಡ್ ಪಡೆದಿದ್ದರೆ, ಅಂತಿಮ ವಿಸಿಲ್ ನಂತರ ನಡೆದ ಗಲಾಟೆಯಲ್ಲಿ ಲಿಯಾಂಡ್ರೊ ಪರೆಡೆಸ್‌ ಗೂ ರೆಫರಿ ರೆಡ್ ಕಾರ್ಡ್ ತೋರಿಸಿದರು.

ಪಂದ್ಯದ ನಂತರ ನೀಡಲಾದ ಈ ಎರಡನೇ ರೆಡ್ ಕಾರ್ಡ್ ಸಂಭ್ರಮದ ನಡುವೆಯೇ ಅನೇಕರ ಗಮನಕ್ಕೆ ಬಂದಿರಲಿಲ್ಲ.

ಮೆಟ್‌ಲೈಫ್ ಕ್ರೀಡಾಂಗಣದಲ್ಲಿ ರವಿವಾರ ನಡೆದ ಫೈನಲ್‌ ನಲ್ಲಿ ಹೆಚ್ಚುವರಿ ಸಮಯದ 106ನೇ ನಿಮಿಷದಲ್ಲಿ ಫೆರಾನ್ ಟೊರೆಸ್ ಗಳಿಸಿದ ಗೋಲಿನ ನೆರವಿನಿಂದ ಸ್ಪೇನ್ 1–0 ಅಂತರದಲ್ಲಿ ಅರ್ಜೆಂಟೀನಾವನ್ನು ಮಣಿಸಿ ಎರಡನೇ ಬಾರಿಗೆ ವಿಶ್ವಕಪ್ ಟ್ರೋಫಿಗೆ ಮುತ್ತಿಕ್ಕಿತು. ಇದರೊಂದಿಗೆ ಲಿಯೋನೆಲ್ ಮೆಸ್ಸಿ ತಮ್ಮ ವೃತ್ತಿಜೀವನವನ್ನು ಎರಡನೇ ವಿಶ್ವಕಪ್ ಪ್ರಶಸ್ತಿಯೊಂದಿಗೆ ಮುಕ್ತಾಯಗೊಳಿಸುವ ಕನಸು ಭಗ್ನಗೊಂಡಿತು.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೇರಿದಂತೆ 80,663 ಪ್ರೇಕ್ಷಕರು ಪಂದ್ಯ ವೀಕ್ಷಿಸಿದರು. 39 ವರ್ಷದ ಮೆಸ್ಸಿ ತಮ್ಮ ಕೊನೆಯ ವಿಶ್ವಕಪ್ ಪಂದ್ಯವನ್ನೇ ಆಡುತ್ತಿರುವ ಸಾಧ್ಯತೆ ಇದ್ದ ಕಾರಣ ಪಂದ್ಯಕ್ಕೆ ವಿಶೇಷ ಮಹತ್ವ ಲಭಿಸಿತ್ತು. ಆದರೆ ಆರಂಭದಿಂದಲೇ ಸ್ಪೇನ್ ಪಂದ್ಯದ ಮೇಲೆ ಹಿಡಿತ ಸಾಧಿಸಿತು. 120 ನಿಮಿಷಗಳ ಆಟದಲ್ಲಿ ಅರ್ಜೆಂಟೀನಾ ಗುರಿಯತ್ತ ಒಂದೇ ಒಂದು ಶಾಟ್ ಕೂಡ ದಾಖಲಿಸಲು ವಿಫಲವಾಯಿತು.

ಅರ್ಜೆಂಟೀನಾ ಆಟಗಾರರ ಕಠಿಣ ಆಟ ಪಂದ್ಯದ ಕೊನೆಯ ಕ್ಷಣಗಳಲ್ಲಿ ಮತ್ತಷ್ಟು ಹೆಚ್ಚಾಯಿತು. ಸ್ಟಾಪೇಜ್ ಸಮಯದಲ್ಲಿ ಸ್ಪೇನ್‌ ನ ಪೌ ಕ್ಯೂಬಾರ್ಸಿ ಮೇಲೆ ಅಪಾಯಕಾರಿ ಟ್ಯಾಕಲ್ ನಡೆಸಿದ ಎಂಜೊ ಫೆರ್ನಾಂಡಿಸ್‌ಗೆ ರೆಫರಿ ನೇರ ರೆಡ್ ಕಾರ್ಡ್ ತೋರಿಸಿದರು.

ಅಂತಿಮ ವಿಸಿಲ್ ಬಳಿಕ ಸ್ಪೇನ್ ಆಟಗಾರರು ಸಂಭ್ರಮಾಚರಣೆಯಲ್ಲಿ ತೊಡಗಿದ್ದರೆ, ನಿರಾಸೆಯಿಂದ ಮೈದಾನದಲ್ಲಿ ಕುಳಿತಿದ್ದ ಮೆಸ್ಸಿ ಅವರ ಬಳಿಗೆ 19 ವರ್ಷದ ಲ್ಯಾಮಿನ್ ಯಮಲ್ ತೆರಳಿ ಕೈಕುಲುಕಿ ಅಪ್ಪಿಕೊಂಡು ಗೌರವ ಸೂಚಿಸಿದರು.

ಇದೇ ವೇಳೆ ಎರಡೂ ತಂಡಗಳ ಆಟಗಾರರ ನಡುವೆ ವಾಗ್ವಾದ ಉಂಟಾಯಿತು. ಅರ್ಜೆಂಟೀನಾ ಕೋಚ್ ಲಿಯೋನೆಲ್ ಸ್ಕಾಲೋನಿ ಅವರನ್ನು ಸ್ಪೇನ್ ತಂಡದ ಆಟಗಾರನೊಬ್ಬ ತಡೆದು ಮಾತನಾಡಿದ ದೃಶ್ಯವೂ ಕಂಡುಬಂತು. ಮತ್ತೊಂದೆಡೆ ಲಿಯಾಂಡ್ರೊ ಪರೆಡೆಸ್ ಸ್ಪೇನ್‌ ನ ಎರಿಕ್ ಗಾರ್ಸಿಯಾ ಮತ್ತು ಗವಿ ಅವರನ್ನು ತಳ್ಳಿದರೆ, ನಿಕೋಲಸ್ ಒಟಮೆಂಡಿ ಸೇರಿದಂತೆ ಕೆಲ ಅರ್ಜೆಂಟೀನಾ ಆಟಗಾರರು ಸ್ಪೇನ್ ಆಟಗಾರರೊಂದಿಗೆ ಮಾತಿನ ಚಕಮಕಿ ನಡೆಸಿದರು. ಪರಿಸ್ಥಿತಿ ಉಲ್ಬಣಗೊಂಡ ಹಿನ್ನೆಲೆಯಲ್ಲಿ ಪರೆಡೆಸ್‌ ಗೂ ರೆಫರಿ ರೆಡ್ ಕಾರ್ಡ್ ತೋರಿಸಿದರು. ಇದರೊಂದಿಗೆ ಫೈನಲ್‌ ನಲ್ಲಿ ಅರ್ಜೆಂಟೀನಾ ಇಬ್ಬರು ಆಟಗಾರರನ್ನು ರೆಡ್ ಕಾರ್ಡ್‌ನಿಂದ ಕಳೆದುಕೊಂಡಿತು.

ಪಂದ್ಯದಲ್ಲಿ ದೀರ್ಘಕಾಲ ಗೋಲುರಹಿತ ಸಮಬಲ ಮುಂದುವರಿದಿತ್ತು. ಅರ್ಜೆಂಟೀನಾ ಪೆನಾಲ್ಟಿ ಶೂಟೌಟ್‌ ವರೆಗೆ ಪಂದ್ಯವನ್ನು ಕೊಂಡೊಯ್ಯುವ ಸಾಧ್ಯತೆ ಕಂಡುಬಂದಿತ್ತು. ಹೆಚ್ಚುವರಿ ಸಮಯದಲ್ಲಿ ನಿಕೊ ವಿಲಿಯಮ್ಸ್ ಗಳಿಸಿದ ಗೋಲನ್ನು ವಿವಾದಾತ್ಮಕವಾಗಿ ರದ್ದುಗೊಳಿಸಲಾಯಿತು. ಆದರೂ ಸ್ಪೇನ್ ದಾಳಿಯ ತೀವ್ರತೆಯನ್ನು ಕಡಿಮೆ ಮಾಡಲಿಲ್ಲ.

106ನೇ ನಿಮಿಷದಲ್ಲಿ ಪೆಡ್ರೊ ಪೊರೊ ನೀಡಿದ ಕ್ರಾಸ್ ಅನ್ನು ನಿಕೊ ವಿಲಿಯಮ್ಸ್ ಹೆಡರ್ ಮೂಲಕ ಫೆರಾನ್ ಟೊರೆಸ್ ಅವರತ್ತ ತಳ್ಳಿದರು. ದೊರೆತ ಅವಕಾಶವನ್ನು ಸದುಪಯೋಗಪಡಿಸಿಕೊಂಡ ಟೊರೆಸ್ ಚೆಂಡನ್ನು ಗೋಲಾಗಿ ಪರಿವರ್ತಿಸಿ, 2010ರ ಬಳಿಕ ಸ್ಪೇನ್‌ ಗೆ ಎರಡನೇ ವಿಶ್ವಕಪ್ ಪ್ರಶಸ್ತಿಯನ್ನು ತಂದುಕೊಟ್ಟರು.

ಗೆಲುವಿನ ಬಳಿಕ ಪ್ರತಿಕ್ರಿಯಿಸಿದ ಟೊರೆಸ್, ‘ಈ ಗೋಲು ನನ್ನದಾಗಲಿ ಅಥವಾ 26 ಆಟಗಾರರದ್ದಾಗಲಿ ಅಲ್ಲ. ಇದು ಸ್ಪೇನ್‌ ನ 47 ಮಿಲಿಯನ್ ಜನರದ್ದು. ಪ್ರತಿಯೊಂದು ಫೈನಲ್ ಕಠಿಣವೇ. ಮೆಸ್ಸಿಯಂತಹ ಆಟಗಾರನ ವಿರುದ್ಧ ಆಡಿದಾಗ ಒತ್ತಡ ಇರುತ್ತದೆ. ಆದರೂ ನಮ್ಮ ಆಟ ಮತ್ತು ನಮ್ಮ ಸಾಮರ್ಥ್ಯದ ಮೇಲಿನ ನಂಬಿಕೆಯನ್ನು ನಾವು ಕಳೆದುಕೊಳ್ಳಲಿಲ್ಲ’ ಎಂದು ಹೇಳಿದರು.