ಉತ್ಪಾದನ ವೆಚ್ಚ ಹೆಚ್ಚಳದಿಂದ ವಿದ್ಯುತ್ ಸರಬರಾಜು ಕಂಪೆನಿಗಳ ಸ್ಥಿತಿ ದುಸ್ಥರ: ವಿತ್ತೀಯ ನಿರ್ವಹಣೆಯ ಪರಿಶೀಲನಾ ಸಮಿತಿ

ಬೆಳಗಾವಿ: ತೀವ್ರ ಬರ ಮತ್ತು ಹೆಚ್ಚಿದ ವಿದ್ಯುತ್ ಉತ್ಪಾದನ ವೆಚ್ಚದಿಂದಾಗಿ ರಾಜ್ಯ ವಿದ್ಯುತ್ ಸರಬರಾಜು ಕಂಪೆನಿಗಳ ಹಾಗೂ ಕೆಪಿಸಿಎಲ್‍ನ ಆರ್ಥಿಕ ಸ್ಥಿತಿ ದುಸ್ಥರವಾಗಿದೆ ಎಂದು ಸರಕಾರದ ಮುಖ್ಯ ಕಾರ್ಯದರ್ಶಿ ನೇತೃತ್ವದ ವಿತ್ತೀಯ ನಿರ್ವಹಣೆಯ ಪರಿಶೀಲನಾ ಸಮಿತಿ(ಎಫ್‍ಎಂಆರ್ ಸಿ) ಕಳವಳ ವ್ಯಕ್ತಪಡಿಸಿದೆ.

ಗುರುವಾರ ವಿಧಾನಸಭೆಯಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಪರವಾಗಿ ಕಾನೂನು ಸಚಿವ ಎಚ್.ಕೆ. ಪಾಟೀಲ್ ವರದಿ ಮಂಡಿಸಿದ 2023-24ನೆ ಸಾಲಿನ ಎರಡನೇ ತ್ರೈಮಾಸಿಕದ ಅಂತ್ಯಕ್ಕೆ ಆಯವ್ಯಯದ ಅಂದಾಜುಗಳಿಗೆ ಪ್ರತಿಯಾಗಿ ಜಮೆ ಮತ್ತು ವೆಚ್ಚ ಪ್ರವೃತ್ತಿಯ ವಿಶ್ಲೇಷಣೆ ವರದಿಯಲ್ಲಿ ಈ ಅಂಶವನ್ನು ಉಲ್ಲೇಖಿಸಲಾಗಿದೆ.

ಇದು ರಾಜ್ಯದ ಹಣಕಾಸಿನ ಸ್ಥಿತಿಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುವುದರಿಂದ ಅಗತ್ಯ ಸುಧಾರಣೆಗಳನ್ನು ಕೈಗೊಳ್ಳಬೇಕು. ಅಲ್ಲದೆ, ಇಂಧನ ಇಲಾಖೆಯು ವಿದ್ಯುತ್ ಸರಬರಾಜು ಕಂಪೆನಿಗಳಿಂದ ಉಳಿದಿರುವ ಬಾಕಿಯನ್ನು ಹಿಂಪಡೆಯಲು ತ್ವರಿತ ಕ್ರಮಗಳನ್ನು ಕೈಗೊಳ್ಳುವಂತೆ ಸಮಿತಿಯು ಸೂಚಿಸಿದೆ.

ಆಸ್ತಿ ನಗದೀಕರಣದಿಂದ ಸರಕಾರಕ್ಕೆ ಹೆಚ್ಚುವರಿ ಆದಾಯ ಬರುವುದರಿಂದ ಹಾಗೂ ರಾಜ್ಯದಲ್ಲಿ ಹೂಡಿಕೆಯು ಹೆಚ್ಚಾಗುವುದರಿಂದ ಆಸ್ತಿ ನಗದೀಕರಣದ ಪ್ರಕ್ರಿಯೆಯನ್ನು ತ್ವರಿತಗೊಳಿಸಬೇಕು. ರಾಜ್ಯದ ತೆರಿಗೆ ಆದಾಯವನ್ನು ಹೆಚ್ಚಿಸಲು ಇನ್ನೂ ಸಾಕಷ್ಟು ಅವಕಾಶವಿದೆ. ವಾಣಿಜ್ಯ ತೆರಿಗೆ ಇಲಾಖೆಯು ಜಾರಿ ವಿಭಾಗದ ಕಾರ್ಯಗಳನ್ನು ಮತ್ತಷ್ಟು ಹೆಚ್ಚಿಸಲು ಹಾಗೂ ಅಡಿಕೆ, ಲೋಹದ ಅವಶೇಷ, ಇತ್ಯಾದಿಗಳನ್ನು ತೆರಿಗೆ ವ್ಯಾಪ್ತಿಯೊಳಗೆ ತರುವಂತೆ ಸಮಿತಿಯು ಶಿಫಾರಸ್ಸು ಮಾಡಿದೆ.

ನೋಂದಣಿ-ಮುದ್ರಾಂಕ: ಜನರ ಭೌತಿಕ ಉಪಸ್ಥಿತಿಯಿಲ್ಲದೆ ಕಡ್ಡಾಯವಾಗಿ ನೋಂದಾಯಿಸಬೇಕಾಗಿರುವ ದಾಖಲೆಗಳನ್ನು ವರ್ಚುಯಲ್ ರಿಜಿಸ್ಟ್ರೇಷನ್ ವ್ಯವಸ್ಥೆಯ ಮೂಲಕ ನೋಂದಾಯಿಸಲು ಅನ್ವೇಷಿಸಬೇಕು. ನೋಂದಣೇತರ ದಾಖಲೆಗಳಿಗೆ ಸಂಬಂಧಿಸಿದಂತೆ ಸೂಕ್ತ ಮುದ್ರಾಂಕ ಶುಲ್ಕಗಳನ್ನು ಸಂದಾಯ ಮಾಡಲು ಜಾರಿ ವ್ಯವಸ್ಥೆಯನ್ನು ಉನ್ನತೀಕರಿಸಲು ಕ್ರಮ ಕೈಗೊಳ್ಳಬೇಕು.

ಬ್ಯಾಂಕಿಂಗ್ ವಲಯಕ್ಕೆ ಸಂಬಂಧಿಸಿದ ನೋಂದಣೇತರ ದಾಖಲಗಳು ಮತ್ತು ಸರಕಾರ ಹಾಗೂ ಉದ್ಯಮಗಳ ನಡುವೆ ಮತ್ತು ಸರಕಾರ ಹಾಗೂ ನಾಗರಿಕರ ನಡುವಿನ ಎಲ್ಲ ವಹಿವಾಟುಗಳಿಗೆ ಸಂಬಂಧಿಸಿದಂತೆ ಸ್ವಯಂ ಕ್ಯಾಲ್ಕುಲೇಟರ್ ಬಳಕೆಯೊಂದಿಗೆ ‘ಇ-ಸ್ಟಾಂಪಿಂಗ್/ಡಿಜಿಟಲ್ ಸ್ಟ್ಯಾಂಪಿಂಗ್’ನ ಕಡ್ಡಾಯ ಬಳಕೆ ಪದ್ಧತಿಯ ಬಗ್ಗೆ ಪರ್ಯಾಲೋಚಿಸಬೇಕು.

ನೋಂದಣೇತರ ದಾಖಲೆಗಳಿಗೆ ವಿಧಿಸುವ ಮುದ್ರಾಂಕ ಶುಲ್ಕವನ್ನು ನೆರೆಯ ರಾಜ್ಯಗಳಲ್ಲಿ ವಿಧಿಸುವ ಶುಲ್ಕದೊಂದಿಗೆ ಪರಿಶೀಲಿಸಿ ಸಂಬಂಧಿಸಿದ ಕಾನೂನುಗಳಿಗೆ ಅಗತ್ಯ ತಿದ್ದುಪಡಿ ತರಬೇಕು. ಮಹಾರಾಷ್ಟ್ರ ಮಾದರಿಯಂತೆ ಕಸ್ಟಮ್ ಅಧಿಕಾರಿಗಳೊಂದಿಗೆ ಸಮನ್ವಯ ಸಾಧಿಸುವ ಮೂಲಕ ಆಮದುಗಳ ವಿತರಣಾ ಆದೇಶದ ಮೇಲೆ ಮುದ್ರಾಂಕ ಶುಲ್ಕದ ಸಂಗ್ರಹವನ್ನು ಸುಧಾರಿಸುವ ಆಯ್ಕೆಯನ್ನು ಪರಿಶೋಧಿಸಬೇಕು.

ಹಲವು ವರ್ಷಗಳಿಂದ ಪರಿಷ್ಕರಿಸದೆ ಇರುವ ಸಾರ್ವಜನಿಕ ಸೇವೆಗಳಿಗೆ ನಿಗದಿಪಡಿಸಿರುವ ಬಳಕೆದಾರ ಶುಲ್ಕಗಳನ್ನು ಪರಿಷ್ಕರಿಸಬೇಕು. ಗಣಿಗಾರಿಕೆ ಗುತ್ತಿಗೆದಾರರಿಗೆ ಇ-ಹರಾಜು ನಂತರದ ಪ್ರಕ್ರಿಯೆಗಳನ್ನು ಸುಗಮಗೊಳಿಸಬೇಕು. ಬಿಲ್ಡಿಂಗ್ ಸ್ಟೋನ್, ಗ್ರಾನೈಟ್ ಮುಂತಾದ ಉಪಖನಿಜಗಳ ಗಣಿಗಾರಿಕೆಯ ಮೌಲ್ಯಮಾಪನ ಮಾಡಲು ಡ್ರೋನ್, ಉಪಗ್ರಹ ದತ್ತಾಂಶಗಳನ್ನು ಉಪಯೋಗಿಸಬೇಕು.

ಸ್ವಾಮ್ಯತೆ ಇರುವ ರಾಜ್ಯಗಳ ಮಾನದಂಡಗಳನ್ನು ಅನುಸರಿಸಿ ಖನಿಜಗಳ ಮೇಲಿನ ರಾಜಧನವನ್ನು ಪರಿಷ್ಕರಿಸುವಂತೆ ಸಮಿತಿ ಸಲಹೆ ನೀಡಿದೆ. ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ಬಿಡುಗಡೆಯಾಗಿರುವ ಅನುದಾನವನ್ನು ತ್ವರಿತವಾಗಿ ಬಳಕೆ ಮಾಡಿಕೊಂಡು, ಮುಂದಿನ ಕಂತುಗಳನ್ನು ಪಡೆದುಕೊಳ್ಳಬೇಕು. ರಾಜ್ಯದಲ್ಲಿ ಬಂಡವಾಳ ಯೋಜನೆಗಳನ್ನು ಕೈಗೊಳ್ಳಲು ವಿಶೇಷ ಬಂಡವಾಳ ನೆರವು ಯೋಜನೆಯಡಿ ಅನುಮೋದಿಸಿರುವ 4175 ಕೋಟಿ ರೂ.ಗಳನ್ನು ಪ್ರಸಕ್ತ ಆರ್ಥಿಕ ವರ್ಷದಲ್ಲಿಯೆ ಪೂರ್ಣ ಬಳಕೆ ಮಾಡುವಂತೆ ಸಮಿತಿ ಸಲಹೆ ನೀಡಿದೆ.

ರಾಜ್ಯದ ಅಭಿವೃದ್ಧಿ ಮತ್ತು ಕಲ್ಯಾಣ ಕಾರ್ಯಕ್ರಮಗಳಿಗೆ ಹಣವನ್ನು ಕ್ರೋಢೀಕರಿಸಲು ಅನುತ್ಪಾದಕ ಆಡಳಿತಾತ್ಮಕ ವೆಚ್ಚವನ್ನು ಕಡಿಮೆ ಮಾಡುವ ತುರ್ತು ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಎರಡನೆ ಆಡಳಿತ ಸುಧಾರಣಾ ಆಯೋಗದ ಶಿಫಾರಸ್ಸುಗಳ ತ್ವರಿತ ಅನುಷ್ಠಾನಕ್ಕೆ ಒತ್ತು ನೀಡಬೇಕು. ಇಲಾಖೆಗಳಲ್ಲಿನ ವೇತನ ಮತ್ತು ಪಿಂಚಣಿಗಳ ಮೇಲಿನ ವೆಚ್ಚವನ್ನು ಕಡಿಮೆ ಮಾಡಲು ಅನಗತ್ಯವಾದ ಹುದ್ದೆಗಳನ್ನು ಗುರುತಿಸುವುದು ಅವಶ್ಯಕ ಎಂದು ಸಮಿತಿ ತಿಳಿಸಿದೆ.

ಅನರ್ಹ ಕುಟುಂಬಗಳನ್ನು ಬಿಪಿಎಲ್ ವ್ಯಾಪ್ತಿಯಿಂದ ಬೇರ್ಪಡಿಸಲು ಸಮಿತಿಯು ಶಿಫಾರಸ್ಸು ಮಾಡಿದೆ. ಇದರಿಂದಾಗಿ ಅರ್ಹ ಕುಟುಂಬಗಳಿಗೆ ಪ್ರಯೋಜನಗಳನ್ನು ಒದಗಿಸಿದಂತಾಗುತ್ತದೆ ಮತ್ತು ಸಹಾಯಧನದ ಹೊರೆ ಕಡಿಮೆಯಾಗುತ್ತದೆ ಎಂದು ಸಮಿತಿಯು ಸಲಹೆ ನೀಡಿದೆ.