SIR | ʼಎಎಸ್‍ಡಿಡಿಓʼ ಪಟ್ಟಿಯಿಂದ 2.41 ಲಕ್ಷ ಮತದಾರರು ಹೊರಕ್ಕೆ : ಮುಖ್ಯ ಚುನಾವಣಾಧಿಕಾರಿ

ಬೆಂಗಳೂ : ರಾಜ್ಯದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ (ಎಸ್‍ಐಆರ್) ಪ್ರಕ್ರಿಯೆಯಲ್ಲಿ ಎಎಸ್‍ಡಿಡಿಒ(ಗೈರು, ಶಾಶ್ವತ ಸ್ಥಳಾಂತರ, ಮೃತಪಟ್ಟವರು, ಈಗಾಗಲೆ ಬೇರೆ ಕಡೆ ಹೆಸರು ನೋಂದಣಿ ಮಾಡಿಸಿಕೊಂಡಿರುವ ಹಾಗೂ ಇತರೆ) ಎಂದು ಗುರುತಿಸಲಾಗಿದ್ದ 2,41,082 ಮಂದಿಯನ್ನು ಪಟ್ಟಿಯಿಂದ ಕೈಬಿಡಲಾಗಿದೆ ಎಂದು ಮುಖ್ಯ ಚುನಾವಣಾಧಿಕಾರಿ ವಿ.ಅನ್ಬುಕುಮಾರ್ ತಿಳಿಸಿದರು.

ಬುಧವಾರ ನಗರದ ಅರಮನೆ ರಸ್ತೆಯಲ್ಲಿರುವ ಮುಖ್ಯ ಚುನಾವಣಾಧಿಕಾರಿ ಕಚೇರಿಯಲ್ಲಿ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಅವರು, ಆ.5ರಂದು ಪ್ರಕಟಿಸಲಾಗಿದ್ದ ಎಎಸ್‍ಡಿಡಿಓ ಪಟ್ಟಿಯಲ್ಲಿ 1,11,16,386 ಮತದಾರರನ್ನು ಗುರುತಿಸಲಾಗಿತ್ತು. ಆ ಪಟ್ಟಿಯನ್ನು ಬಿಎಲ್‍ಎಗಳು, ಮತದಾರರು ಪರಿಶೀಲಿಸಿದ ಬಳಿಕ ತಪ್ಪಾಗಿ ಗುರುತಿಸಲ್ಪಟ್ಟಿದ್ದ 2,41,082 ಮತದಾರರನ್ನು ಎಎಸ್‍ಡಿಡಿಓ ಪಟ್ಟಿಯಿಂದ ಕೈ ಬಿಡಲಾಗಿದೆ ಎಂದು ಹೇಳಿದರು.

ಈ ಪೈಕಿ ಗೈರು ಹಾಜರು ಎಂದು ಗುರುತಿಸಲಾಗಿದ್ದ 85,267, ಶಾಶ್ವತ ಸ್ಥಳಾಂತರ ಎಂದು ಗುರುತಿಸಲಾಗಿದ್ದ 95,037 ಹಾಗೂ ಇತರೆ ಎಂದು ಗುರುತಿಸಲಾಗಿದ್ದ 80,492 ಮತದಾರರಿದ್ದಾರೆ. ಮೃತಪಟ್ಟವರು ಎಂದು ಗುರುತಿಸಲ್ಪಟ್ಟಿರುವ ಮತದಾರರ ಮನೆಗಳಿಗೆ ಬಿಎಲ್‍ಒಗಳು ಭೇಟಿ ಮಾಡಿ ಮಹಜರು ಮಾಡಿದ ಬಳಿಕವೇ ಆ್ಯಪ್‍ನಲ್ಲಿ ಮಾಹಿತಿ ನಮೂದು ಮಾಡಿರುತ್ತಾರೆ ಎಂದು ಅನ್ಬುಕುಮಾರ್ ತಿಳಿಸಿದರು.

ಎಸ್‍ಐಆರ್ ಪ್ರಕ್ರಿಯೆ ಆರಂಭಿಸಿದಾಗ ರಾಜ್ಯದಲ್ಲಿ 5,54,32,314 ಮತದಾರರಿದ್ದರು. ಇದೀಗ, ಎಎಸ್‍ಡಿಡಿಒ ಎಂದು ಗುರುತಿಸಲ್ಪಟ್ಟಿರುವ 1,08,75,304 ಮತದಾರರನ್ನು ಹೊರತುಪಡಿಸಿ, 4,45,57,010 ಮತದಾರರ ಹೆಸರು ಕರಡು ಪಟ್ಟಿಯಲ್ಲಿ ಪ್ರಕಟವಾಗಲಿದೆ. ಎಎಸ್‍ಡಿಡಿಒ ಪಟ್ಟಿಯನ್ನು ನಮ್ಮ ವೆಬ್‍ಸೈಟ್ www.ceo.karnataka.gov.in  ನಲ್ಲಿ ಆ.5ರಂದು ಪ್ರಕಟಿಸಲಾಗಿದೆ. ಅಲ್ಲದೇ, ಬಿಎಲ್‍ಒ, ಚುನಾವಣಾ ನೋಂದಣಾಧಿಕಾರಿ, ಮಾನ್ಯತೆ ಪಡೆದ ರಾಜಕೀಯ ಪಕ್ಷಗಳಿಗೆ, ನಗರ ಸ್ಥಳೀಯ ಸಂಸ್ಥೆಗಳ ಕಚೇರಿಗಳಿಗೆ ಪಟ್ಟಿಯನ್ನು ಕಳುಹಿಸಲಾಗಿದೆ ಎಂದು ಅವರು ಹೇಳಿದರು.

ಮತದಾರರು ಎಎಸ್‍ಡಿಡಿಒ ಪಟ್ಟಿಯನ್ನು ನಮ್ಮ ಅಧಿಕೃತ ವೆಬ್‍ಸೈಟ್‍ನಲ್ಲಿ ಮಾತ್ರ ಪರಿಶೀಲಿಸಬೇಕು ಎಂದು ಮನವಿ ಮಾಡಿದ ಮುಖ್ಯ ಚುನಾವಣಾಧಿಕಾರಿ, ಆ.17ರವರೆಗೆ ಈ ಪಟ್ಟಿಯಲ್ಲಿ ತಪ್ಪುಗಳಿದ್ದರೆ ಸರಿಪಡಿಸಲು ಅವಕಾಶವಿದೆ. ಆದುದರಿಂದ, ಪ್ರತಿಯೊಬ್ಬ ಮತದಾರರು ಎಎಸ್‍ಡಿಡಿಒ ಪಟ್ಟಿಯನ್ನು ಪರಿಶೀಲಿಸಿ, ತಪ್ಪುಗಳಿದ್ದರೆ ಅದನ್ನು ಬಿಎಲ್‍ಒ ಗಮನಕ್ಕೆ ತಂದು ಸರಿಪಡಿಸಿಕೊಳ್ಳಬೇಕು ಎಂದು ಕೋರಿದರು.

ಭಾರತ ಚುನಾವಣಾ ಆಯೋಗವು ಒಂದು ಮತಗಟ್ಟೆಯಲ್ಲಿ 1200ಕ್ಕಿಂತ ಹೆಚ್ಚಿನ ಮತದಾರರು ಇರಬಾರದು ಎಂದು ಸೂಚಿಸಿದೆ. ನಮ್ಮ ರಾಜ್ಯದಲ್ಲಿ ಒಟ್ಟು 59,050 ಮತಗಟ್ಟೆಗಳಿವೆ. ಇದರಲ್ಲಿ 1200ಕ್ಕಿಂತ ಹೆಚ್ಚಿನ ಮತದಾರರು ಇರುವಂತಹ 1803 ಮತಗಟ್ಟೆಗಳಿವೆ. ಈಗಿರುವ ಮತಗಟ್ಟೆಗಳನ್ನು 60,898ಕ್ಕೆ ಹೆಚ್ಚಿಸಬೇಕು. ಅದಕ್ಕಾಗಿ 1848 ಮತಗಟ್ಟೆಗಳನ್ನು ರಚಿಸಲು ಭಾರತ ಚುನಾವಣಾ ಆಯೋಗಕ್ಕೆ ಕೋರಲಾಗುವುದು ಎಂದು ಅನ್ಬುಕುಮಾರ್ ತಿಳಿಸಿದರು.

ಆ.17ರಂದು ಮತಗಟ್ಟೆಗಳನ್ನು ತರ್ಕಬದ್ಧಗೊಳಿಸಲಾಗುವುದು. ಆ.24ರಂದು ಕರಡು ಮತದಾರರ ಪಟ್ಟಿಯನ್ನು ಪ್ರಕಟಿಸಲಾಗುವುದು. ಆ.24 ರಿಂದ ಸೆ.29ರವರೆಗೆ ಕ್ಲೇಮು ಮತ್ತು ಆಕ್ಷೇಪಣೆಗಳಿಗೆ ಅವಕಾಶ ಕಲ್ಪಿಸಲಾಗಿದೆ. ಆ.24 ರಿಂದ ಅ.22ರವರೆಗೆ ನೋಟಿಸ್ ಹಂತ ಹಾಗೂ ಕ್ಲೇಮು ಮತ್ತು ಆಕ್ಷೇಪಣೆಗಳ ವಿಲೇವಾರಿ ಮಾಡಲಾಗುವುದು. ಅ.27ರಂದು ಅಂತಿಮ ಮತದಾರರ ಪಟ್ಟಿಯನ್ನು ಪ್ರಕಟಿಸಲಾಗುವುದು ಎಂದು ಅವರು ಹೇಳಿದರು.