ಅತಿಯಾದ ತೇಗಿನ ಸಮಸ್ಯೆಗೆ ಅಸಲಿ ಕಾರಣವೇನು? ವೈದ್ಯರ ಸಲಹೆ ಇಲ್ಲಿದೆ
Photo Credit : Pexel
ಜಠರ–ಕರುಳುರೋಗ ತಜ್ಞರಾದ ಡಾ. ವಿನೀತ್ ಕುಮಾರ್ ಗುಪ್ತಾ ಅವರು ಹೇಳುವ ಪ್ರಕಾರ, ಪದೇಪದೆ ತೇಗುವಿಕೆಗೆ ‘ಏರೋಫೇಜಿಯಾ’ ಅಥವಾ ಅತಿಯಾಗಿ ಗಾಳಿ ನುಂಗುವುದು ಕಾರಣವಾಗಿರಬಹುದು.
ತೇಗುವುದು ಒಂದು ಸಹಜ ದೈಹಿಕ ಕ್ರಿಯೆಯಾಗಿದ್ದು, ಇದು ಜೀರ್ಣಾಂಗ ವ್ಯವಸ್ಥೆಯು ನುಂಗಲಾಗದ ಗಾಳಿಯನ್ನು ಹೊರಹಾಕಲು ಸಹಾಯ ಮಾಡುತ್ತದೆ. ಸಾಮಾನ್ಯವಾಗಿ ಹೆಚ್ಚು ಊಟ ಮಾಡಿದಾಗ ಅಥವಾ ಕಾರ್ಬೋನೇಟೆಡ್ ಪಾನೀಯಗಳನ್ನು ಸೇವಿಸುವಾಗ ಕಂಡುಬರುತ್ತದೆ. ಆದರೆ, ತೇಗುವುದು ಪದೇಪದೆ ಅಥವಾ ಅತಿಯಾಗಿ ಸಂಭವಿಸಿದರೆ, ವ್ಯಕ್ತಿ ವಾಡಿಕೆಗಿಂತ ಹೆಚ್ಚು ಗಾಳಿ ನುಂಗುತ್ತಿರಬಹುದು ಅಥವಾ ಗಮನಹರಿಸಬೇಕಾದ ಜೀರ್ಣಕ್ರಿಯೆಗೆ ಸಂಬಂಧಿಸಿದ ಸಮಸ್ಯೆಯ ಸಂಕೇತವಾಗಿರಬಹುದು!
ಈ ಬಗ್ಗೆ ಅಭಿಪ್ರಾಯ ವ್ಯಕ್ತಪಡಿಸಿರುವ ಜಠರ–ಕರುಳುರೋಗ ತಜ್ಞರಾದ ಡಾ. ವಿನೀತ್ ಕುಮಾರ್ ಗುಪ್ತಾ ಅವರ ಪ್ರಕಾರ, ಪದೇಪದೆ ತೇಗುವಿಕೆಗೆ ‘ಏರೋಫೇಜಿಯಾ’ ಅಥವಾ ಅತಿಯಾಗಿ ಗಾಳಿ ನುಂಗುವುದು ಕಾರಣವಾಗಿರಬಹುದು. “ಜನರು ತುಂಬಾ ವೇಗವಾಗಿ ತಿನ್ನುವಾಗ, ಮಾತನಾಡುತ್ತಾ ತಿನ್ನುವಾಗ, ಚೂಯಿಂಗ್ ಗಮ್ ಜಗಿಯುವಾಗ, ಸ್ಟ್ರಾ ಮೂಲಕ ಪಾನೀಯ ಕುಡಿಯುವಾಗ, ಧೂಮಪಾನ ಮಾಡುವಾಗ ಅಥವಾ ಕಾರ್ಬೋನೇಟೆಡ್ ಪಾನೀಯಗಳನ್ನು ಸೇವಿಸುವಾಗ ಹೀಗಾಗಬಹುದು” ಎಂದು ಅವರು ತಿಳಿಸಿದ್ದಾರೆ.
ಆಹಾರ ಸೇವನೆಯ ಅಭ್ಯಾಸದಲ್ಲಿ ಸರಳ ಬದಲಾವಣೆಗಳಿಂದ ಇದನ್ನು ತಪ್ಪಿಸಬಹುದು. ಅಂದರೆ,
* ನಿಧಾನವಾಗಿ ತಿನ್ನುವುದು
* ಸಣ್ಣ ಭಾಗಗಳಲ್ಲಿ ತಿನ್ನುವುದು
* ಆಹಾರವನ್ನು ಸರಿಯಾಗಿ ಜಗಿಯುವುದು
* ಗುಳ್ಳೆಗಳಿರುವ ಪಾನೀಯಗಳನ್ನು ತಪ್ಪಿಸುವುದು
ಇದರಿಂದ ಉಬ್ಬುವುದು ಅಥವಾ ಅಸ್ವಸ್ಥತೆ ಉಂಟುಮಾಡುವ ನಿರ್ದಿಷ್ಟ ಆಹಾರಗಳನ್ನು ಗುರುತಿಸಲು ಮತ್ತು ಅಗತ್ಯವಿದ್ದರೆ ಮಿತಿಗೊಳಿಸಲು ಸಹಾಯವಾಗುತ್ತದೆ.
ತೇಗುವಿಕೆಗೆ ಇತರ ಕಾರಣಗಳೇನು?
ಪದೇಪದೆ ತೇಗು ಬರುವುದು ಆಸಿಡ್ ರಿಫ್ಲೆಕ್ಸ್ ಅಥವಾ ಗ್ಯಾಸ್ಟ್ರೋಈಸೊಫೇಜಿಯಲ್ ರಿಫ್ಲಕ್ಸ್ ಕಾಯಿಲೆಗೆ (GERD) ಸಂಬಂಧಿಸಿರಬಹುದು. ಹೊಟ್ಟೆಯ ಅಂಶಗಳು ಪದೇಪದೆ ಅನ್ನನಾಳಕ್ಕೆ ಹಿಮ್ಮುಖವಾಗಿ ಹರಿದಾಗ, ವ್ಯಕ್ತಿ ತೇಗಿನ ಜೊತೆಗೆ ಎದೆಯುರಿ, ಬಾಯಿಯಲ್ಲಿ ಹುಳಿ ಅಥವಾ ಕಹಿ ರುಚಿ, ಆಹಾರ ಬಾಯಿಗೆ ಮರಳಿ ಬರುವುದು ಅಥವಾ ಊಟದ ನಂತರ ಅಸ್ವಸ್ಥತೆ ಅನುಭವಿಸಬಹುದು.
ಊಟದ ನಂತರ ಮಲಗಿದಾಗ ಅಥವಾ ಬಾಗಿ ಕುಳಿತಾಗ ಈ ಲಕ್ಷಣಗಳು ಹೆಚ್ಚು ಎದ್ದು ಕಾಣಬಹುದು. ರಿಫ್ಲೆಕ್ಸ್ ನಲ್ಲಿ ಎದೆಯುರಿ ಸಾಮಾನ್ಯ ಲಕ್ಷಣವಾಗಿದ್ದರೂ, ಕೆಲವರಲ್ಲಿ ಮುಖ್ಯವಾಗಿ ಅತಿಯಾದ ತೇಗು ಕಾಣಿಸಿಕೊಳ್ಳಬಹುದು ಎಂದು ಜಠರ–ಕರುಳು ತಜ್ಞರು ಎಚ್ಚರಿಸಿದ್ದಾರೆ.
ಜೀರ್ಣಕ್ರಿಯೆಗೆ ಸಂಬಂಧಿಸಿದ ಇತರ ಸಮಸ್ಯೆಗಳಾದ ಅಜೀರ್ಣ, ಗ್ಯಾಸ್ಟ್ರೈಟಿಸ್ ಮತ್ತು ಕೆಲವು ಆಹಾರಗಳ ಅಸಹಿಷ್ಣುತೆಯಂತಹ ಜೀರ್ಣಕ್ರಿಯೆ ಸಮಸ್ಯೆಗಳು ಕೂಡ ಪದೇಪದೆ ತೇಗು ಬರಲು ಮುಖ್ಯ ಕಾರಣಗಳಾಗಿವೆ. “ಮಲಬದ್ಧತೆ ಮತ್ತು ಹೊಟ್ಟೆ ಉಬ್ಬರವು ಹೊಟ್ಟೆಯ ಭಾಗದಲ್ಲಿ ಒತ್ತಡ ಮತ್ತು ಅಸ್ವಸ್ಥತೆಯನ್ನು ಹೆಚ್ಚಿಸುವ ಮೂಲಕ ಈ ಸಮಸ್ಯೆಯನ್ನು ಇನ್ನಷ್ಟು ಹೆಚ್ಚಿಸಬಹುದು” ಎನ್ನುತ್ತಾರೆ ವೈದ್ಯರು.
ಒಬ್ಬ ವ್ಯಕ್ತಿಯು ಆತಂಕ ಮತ್ತು ಒತ್ತಡದಲ್ಲಿದ್ದಾಗ, ಅವರು ಅರಿವಿಲ್ಲದೆಯೇ ಹೆಚ್ಚು ಗಾಳಿ ನುಂಗಬಹುದು ಅಥವಾ ಪದೇಪದೆ ನುಂಗಬಹುದು. ಇದು ತೇಗು ಮತ್ತು ಹೊಟ್ಟೆ ಉಬ್ಬರಕ್ಕೆ ಕಾರಣವಾಗಬಹುದು. ಮೆದುಳು ಮತ್ತು ಜೀರ್ಣಾಂಗ ವ್ಯವಸ್ಥೆಯ ನಡುವಿನ ಸಂಪರ್ಕದಿಂದಾಗಿ, ಭಾವನಾತ್ಮಕ ಒತ್ತಡವು ದೈಹಿಕ ಲಕ್ಷಣಗಳ ಮೇಲೆ ಪ್ರಭಾವ ಬೀರಬಹುದು.
ಯಾವಾಗ ವೈದ್ಯಕೀಯ ಸಹಾಯ ಪಡೆಯಬೇಕು?
“ಸಾಂದರ್ಭಿಕವಾಗಿ ತೇಗು ಬರುವುದರಿಂದ ಸಾಮಾನ್ಯವಾಗಿ ಆತಂಕಪಡುವ ವಿಷಯವಲ್ಲ. ಆದರೆ ಆಹಾರ ಪದ್ಧತಿಯಲ್ಲಿ ಬದಲಾವಣೆಗಳನ್ನು ಮಾಡಿಕೊಂಡರೂ ನಿರಂತರವಾಗಿ ಮುಂದುವರಿದರೆ ಅಥವಾ ದೈನಂದಿನ ಜೀವನಕ್ಕೆ ಅಡ್ಡಿಯಾದರೆ, ವೈದ್ಯರೊಂದಿಗೆ ಸಮಾಲೋಚಿಸುವುದು ಸೂಕ್ತ” ಎನ್ನುತ್ತಾರೆ ತಜ್ಞರು.
ಮುಖ್ಯವಾಗಿ ಈ ಕೆಳಗಿನ ಲಕ್ಷಣಗಳತ್ತ ಗಮನಹರಿಸಬೇಕು:
* ಆಹಾರ ನುಂಗಲು ತೊಂದರೆ
* ನಿರಂತರ ಅಜೀರ್ಣ
* ಕಾರಣವಿಲ್ಲದ ತೂಕ ನಷ್ಟ
* ಹಸಿವಾಗದಿರುವುದು
* ಪದೇಪದೆ ವಾಂತಿ ಬರುವುದು
* ಮಲವಿಸರ್ಜನೆಯ ಅಭ್ಯಾಸಗಳಲ್ಲಿ ಬದಲಾವಣೆ
* ಮಲದಲ್ಲಿ ರಕ್ತ ಕಂಡುಬರುವುದು
ತೀವ್ರವಾದ ಅಥವಾ ಕಾರಣವಿಲ್ಲದ ಎದೆನೋವು, ಉಸಿರಾಟದಲ್ಲಿ ತೊಂದರೆ, ತಲೆತಿರುಗುವಿಕೆ, ಬೆದರುವಿಕೆ, ವಾಕರಿಕೆ ಅಥವಾ ತೋಳು, ದವಡೆ ಅಥವಾ ಬೆನ್ನಿಗೆ ಹರಡುವ ನೋವಿನೊಂದಿಗೆ ಕೂಡಿದ್ದರೆ ತುರ್ತು ವೈದ್ಯಕೀಯ ಚಿಕಿತ್ಸೆಯ ಅಗತ್ಯವಿರುತ್ತದೆ.
ಸೂಚನೆ: ಈ ಲೇಖನವನ್ನು ಮಾಧ್ಯಮದ ಮೂಲಗಳಿಂದ ಮಾಹಿತಿ ನೀಡುವ ಉದ್ದೇಶಕ್ಕಾಗಿ ನೀಡಲಾಗಿದೆ. ಇದು ವೈದ್ಯರ ಸಲಹೆಗಳಿಗೆ ಪರ್ಯಾಯವಲ್ಲ. ವೈದ್ಯಕೀಯ ಸಮಸ್ಯೆಗಳಿಗೆ ವೃತ್ತಿಪರ ಸಲಹೆಗಾಗಿ ವಿಶ್ವಾಸಾರ್ಹ ವೈದ್ಯರನ್ನು ಭೇಟಿ ಮಾಡಿ.
--
ಸೌಜನ್ಯ: ಹಿಂದುಸ್ತಾನ್ ಟೈಮ್ಸ್