ಭಾರತದಲ್ಲಿ ಬೇಸಿಗೆ ಕಾಲದ ವಿದ್ಯುತ್ ಕಡಿತದ ಸಮಸ್ಯೆ: ಕಾರಣಗಳು ಮತ್ತು ಪರಿಹಾರೋಪಾಯಗಳು

ಬೇಸಿಗೆಯ ತಿಂಗಳುಗಳು ವಿದ್ಯುತ್ ಪೂರೈಕೆಯ ಕುರಿತಾದ ಗ್ರಹಿಕೆಗಳಲ್ಲಿ ತೀವ್ರ ವ್ಯತ್ಯಾಸಗಳನ್ನು ತೋರಿಸಿವೆ. ರಾಷ್ಟ್ರೀಯ ಗರಿಷ್ಠ ಬೇಡಿಕೆಯು ದಾಖಲೆಯ ಮಟ್ಟವನ್ನು ತಲುಪಿತು ಮತ್ತು ಅದನ್ನು ಈಡೇರಿಸುವಲ್ಲಿ ಸಾಧನೆಯ ಭಾವವಿತ್ತು. ಆದರೂ, ಗುರುಗ್ರಾಮ್ ನ ಅತ್ಯಂತ ಶ್ರೀಮಂತ ಅಪಾರ್ಟ್ಮೆಂಟ್ ಗಳ ನಿವಾಸಿಗಳು ಆಗಾಗ್ಗೆ ವಿದ್ಯುತ್ ವ್ಯತ್ಯಯಗಳನ್ನು ಅನುಭವಿಸಿದರು ಮತ್ತು ಬ್ಯಾಕಪ್ ಡೀಸೆಲ್ ಜನರೇಟರ್ ಗಳನ್ನು ಆಶ್ರಯಿಸಬೇಕಾಯಿತು. ಇದರಿಂದ ಸ್ಥಳೀಯವಾಗಿ ವಾಯು ಹಾಗೂ ಶಬ್ದ ಮಾಲಿನ್ಯ ಉಂಟಾಯಿತು.

ಇದಕ್ಕೆ ತದ್ವಿರುದ್ಧವಾಗಿ, ನೆರೆಯ ದಿಲ್ಲಿಯಲ್ಲಿ ಬಹುತೇಕ ವಿದ್ಯುತ್ ಕಡಿತವಿಲ್ಲದೆ ಇತ್ತು. ಈ ವ್ಯತ್ಯಾಸವು ಪಕ್ಕಪಕ್ಕದ ವಿದ್ಯುತ್ ವಿತರಣಾ ಕಂಪೆನಿಗಳ (ಡಿಸ್ಕಾಮ್ ಗಳ) ಕಾರ್ಯಕ್ಷಮತೆಯಲ್ಲಿರುವ ಅಗಾಧ ವ್ಯತ್ಯಾಸವನ್ನು ತೋರಿಸುತ್ತದೆ. ವಿದ್ಯುತ್ ವಿತರಣಾ ಸಮಸ್ಯೆಯ ಕಠಿಣ ಪರಾಮರ್ಶೆ ನಡೆಸಲು ಮತ್ತು ಅದನ್ನು ಹೇಗೆ ಸರಿಪಡಿಸಬೇಕು ಎಂದು ಯೋಚಿಸಲು ಇದು ಸರಿಯಾದ ಸಮಯ.

► ಗ್ರಾಹಕರಿಗೆ ಹೆಚ್ಚಿನ ಆಯ್ಕೆ

ವಿದ್ಯುತ್ ವಲಯದಲ್ಲಿ ಡಿಸ್ಕಾಮ್ ಗಳು ಕೊನೆಯ ಹಂತದ ಸಂಪರ್ಕ ಕಲ್ಪಿಸುವ ಪೂರೈಕೆದಾರರಾಗಿ ಕಾರ್ಯನಿರ್ವಹಿಸುತ್ತವೆ. ವಿದ್ಯುತ್ ಸ್ಥಾವರಗಳು ವಿದ್ಯುತ್ ಉತ್ಪಾದಿಸುತ್ತವೆ ಮತ್ತು ಹೈ-ವೋಲ್ಟೇಜ್ ಟವರ್ ಗಳು ಅದನ್ನು ದೂರದ ಪ್ರದೇಶಗಳಿಗೆ ಸಾಗಿಸುತ್ತವೆ. ಆದರೆ ಡಿಸ್ಕಾಮ್ ಗಳು ಈ ಹೈ-ವೋಲ್ಟೇಜ್ ವಿದ್ಯುತ್ ಅನ್ನು ಪಡೆದುಕೊಂಡು, ಬಳಸಬಹುದಾದ ವೋಲ್ಟೇಜ್ ಮಟ್ಟದಲ್ಲಿ ಅಂತಿಮ ಗ್ರಾಹಕರಿಗೆ ವಿತರಿಸುತ್ತವೆ.

2003ರ ವಿದ್ಯುತ್ ಕಾಯಿದೆಯು ಗ್ರಾಹಕರಿಗೆ ಡಿಸ್ಕಾಮ್ ನಿಂದ ವಿಶ್ವಾಸಾರ್ಹ ಮತ್ತು ಗುಣಮಟ್ಟದ ವಿದ್ಯುತ್ ಪೂರೈಕೆಯನ್ನು ಪಡೆಯುವ ಹಕ್ಕನ್ನು ನೀಡುತ್ತದೆ. ಅಲ್ಲದೆ, ದರಗಳನ್ನು ನಿಗದಿಪಡಿಸಲು ಮತ್ತು ಡಿಸ್ಕಾಮ್ ಅನ್ನು ಮೇಲ್ವಿಚಾರಣೆ ಮಾಡಲು ಸ್ವತಂತ್ರ ಹಾಗೂ ಅಧಿಕಾರಯುತ ನಿಯಂತ್ರಕ ಆಯೋಗವನ್ನು ಹೊಂದಿದೆ. ನೀತಿಗಳನ್ನು ರೂಪಿಸುವುದು, ಯಾವ ಗ್ರಾಹಕ ವರ್ಗಗಳಿಗೆ, ಉದಾಹರಣೆಗೆ ರೈತರಿಗೆ ಉಚಿತ ಅಥವಾ ಬಹುತೇಕ ಉಚಿತ ವಿದ್ಯುತ್ ನೀಡಬೇಕು ಎಂಬುದನ್ನು ನಿರ್ಧರಿಸುವುದು ಮತ್ತು ಅದಕ್ಕೆ ಅಗತ್ಯವಿರುವ ಸಬ್ಸಿಡಿಯನ್ನು ಡಿಸ್ಕಾಮ್ ಗೆ ಒದಗಿಸುವುದಕ್ಕೆ ಮಾತ್ರ ಈ ಕಾಯಿದೆಯು ರಾಜ್ಯ ಸರ್ಕಾರದ ಪಾತ್ರವನ್ನು ಸೀಮಿತಗೊಳಿಸುತ್ತದೆ.

ಮುಂಬೈ ನಗರದಲ್ಲಿ ಕಳೆದ ಸುಮಾರು ಎರಡು ದಶಕಗಳಿಂದ ಸಮಾನಾಂತರ ವಿದ್ಯುತ್ ವಿತರಣಾ ಪರವಾನಗಿ ಪಡೆದ ಸಂಸ್ಥೆಗಳಿಗೆ (ಟಾಟಾ ಪವರ್, ಬೆಸ್ಟ್ ಮತ್ತು ಅದಾನಿ ಎಲೆಕ್ಟ್ರಿಸಿಟಿ ಮುಂತಾದವು) ಒಂದೇ ಪ್ರದೇಶದಲ್ಲಿ ಕಾರ್ಯನಿರ್ವಹಿಸಲು ಅವಕಾಶ ನೀಡಲಾಗಿದೆ. ಅಲ್ಲಿನ ಗ್ರಾಹಕರು ತಮ್ಮ ಇಷ್ಟದ ಪೂರೈಕೆದಾರರನ್ನು ಆಯ್ಕೆ ಮಾಡಿಕೊಳ್ಳುವ ನೈಜ ಸ್ವಾತಂತ್ರ್ಯವನ್ನು ಹೊಂದಿದ್ದಾರೆ. ಇದು ಯಶಸ್ವಿಯಾಗಿ ಕೆಲಸ ಮಾಡಿದೆ. ಅದೇ ರೀತಿ, ಆಡಳಿತದ ರಾಜಕೀಯ ಅರ್ಥವ್ಯವಸ್ಥೆ ಮತ್ತು ವಿದ್ಯುತ್ ವಿತರಣೆಯಲ್ಲಿ ‘ಬಾಡಿಗೆ-ಆಧಾರಿತ ಲಾಭ ಗಳಿಕೆ’ ಸಮಸ್ಯೆಗಳು ಬಗೆಹರಿಯದಂತೆ ಕಾಣುವ ರಾಜ್ಯಗಳಲ್ಲೂ ಹೊಸ ಪರವಾನಗಿದಾರರ ಪ್ರವೇಶವು ಯಶಸ್ವಿಯಾಗುತ್ತದೆ. ಹೊಸ ಉತ್ಪನ್ನಗಳು ಅಥವಾ ಸೇವೆಗಳನ್ನು ಸೃಷ್ಟಿಸುವ ಮೂಲಕ ಮೌಲ್ಯವನ್ನು ಹೆಚ್ಚಿಸುವ ಬದಲು, ವ್ಯವಸ್ಥೆಯನ್ನು ತಿರುಚುವ ಮೂಲಕ ಲಾಭ ಗಳಿಸುವ ಆರ್ಥಿಕ ಪದ್ಧತಿಯನ್ನು ‘ಬಾಡಿಗೆ-ಆಧಾರಿತ ಲಾಭ ಗಳಿಕೆ’ ಎಂದು ಕರೆಯಲಾಗುತ್ತದೆ.

1990ರ ದಶಕದ ಮಧ್ಯಭಾಗದಲ್ಲಿ ಅಲ್ಪಾವಧಿಗೆ ಅಧಿಕಾರದಲ್ಲಿದ್ದ ಎಚ್.ಡಿ. ದೇವೇಗೌಡರ ನೇತೃತ್ವದ ಕೇಂದ್ರ ಸರ್ಕಾರವು, ಹತ್ತು ಲಕ್ಷಕ್ಕಿಂತ ಅಧಿಕ ಜನಸಂಖ್ಯೆ ಹೊಂದಿರುವ ನಗರಗಳಲ್ಲಿ ರಾಜ್ಯಗಳು ಸಮಾನಾಂತರ ವಿದ್ಯುತ್ ವಿತರಣಾ ಪರವಾನಗಿದಾರರನ್ನು ಪ್ರೋತ್ಸಾಹಿಸಲು ನಿರ್ಧರಿಸಿತ್ತು ಎಂಬುದು ಈಗ ಹೆಚ್ಚಿನವರಿಗೆ ತಿಳಿದಿಲ್ಲ.

ಅಂತಹ ಸಂಸ್ಥೆಗಳಿಗೆ ದೊಡ್ಡ ಪ್ರಮಾಣದ ಮೆಗಾ ಪವರ್ ಪ್ರಾಜೆಕ್ಟ್ಗಳಿಂದ (ರಾಷ್ಟ್ರೀಯ ವಿದ್ಯುತ್ ಕೊರತೆಯನ್ನು ನೀಗಿಸಲು 1,000 ಮೆಗಾವ್ಯಾಟ್ ಅಥವಾ ಅದಕ್ಕಿಂತ ಹೆಚ್ಚಿನ ಸಾಮರ್ಥ್ಯದೊಂದಿಗೆ ವಿನ್ಯಾಸಗೊಳಿಸಲಾದ ಬೃಹತ್ ವಿದ್ಯುತ್ ಸ್ಥಾವರಗಳು) ಅಗ್ಗದ ವಿದ್ಯುತ್ ಒದಗಿಸುವುದಾಗಿ ಭರವಸೆ ನೀಡಲಾಗಿತ್ತು. ಅಗ್ಗದ ವಿದ್ಯುತ್ ಪೂರೈಸಲು ಅನುಕೂಲವಾಗುವಂತೆ ಈ ಯೋಜನೆಗಳಿಗೆ ಆಮದು ಮತ್ತು ಅಬಕಾರಿ ಸುಂಕ ವಿನಾಯಿತಿಯನ್ನೂ ನೀಡಲಾಗುತ್ತಿತ್ತು.

ಗ್ರಾಮೀಣ ಪ್ರದೇಶಗಳು ಮತ್ತು ನೀರಾವರಿಗೆ ವಿದ್ಯುತ್ ಪೂರೈಸುವುದನ್ನು ಹೊರತುಪಡಿಸಿ, ಉದ್ಯಮಗಳಿಗೆ ನೀಡುವ ವಿದ್ಯುತ್ ಪೂರೈಕೆಯು ವಾಣಿಜ್ಯಿಕವಾಗಿ ಲಾಭದಾಯಕವಾಗಿರಬೇಕು ಎಂಬುದು ಇದರ ಹಿಂದಿನ ತರ್ಕವಾಗಿತ್ತು. ವಿದ್ಯುತ್ ವಿತರಣೆಯಲ್ಲಿ ಬೇರೂರಿರುವ ದಕ್ಷತೆಯ ಕೊರತೆ ಮತ್ತು ಬಾಡಿಗೆ-ಆಧಾರಿತ ಲಾಭ ಗಳಿಕೆಯ ಆಡಳಿತ ಸಂಸ್ಕೃತಿಯನ್ನು ಗಮನದಲ್ಲಿಟ್ಟುಕೊಂಡು, ಹೊಸ ಪರವಾನಗಿದಾರರ ಮೂಲಕ ಇದನ್ನು ಸಾಧಿಸಬಹುದು ಎಂದು ಭಾವಿಸಲಾಗಿತ್ತು.

ಖಾಸಗೀಕರಣಗೊಳಿಸುವುದಾಗಿ ರಾಜ್ಯಗಳು ಲಿಖಿತ ಮುಚ್ಚಳಿಕೆಗಳನ್ನು ನೀಡಿ ಮತ್ತು ಅಗ್ಗದ ವಿದ್ಯುತ್ ಅನ್ನು ಪಡೆದುಕೊಂಡವು. ಆದರೆ ರಾಜ್ಯ ಸರ್ಕಾರದ ಮಾಲೀಕತ್ವದ ರಾಜಕೀಯ ಹಿತಾಸಕ್ತಿಗಳಿಂದಾಗಿ ಅವು ಖಾಸಗೀಕರಣದ ಪ್ರಕ್ರಿಯೆಯನ್ನು ಮುಂದುವರಿಸಲಿಲ್ಲ. ಪರಿಣಾಮವಾಗಿ, ಒಂದು ದಶಕದ ಬಳಿಕ ತನ್ನ ಮೆಗಾ ಪವರ್ ನೀತಿಯ ವೈಫಲ್ಯವನ್ನು ಒಪ್ಪಿಕೊಳ್ಳಲು ಕೇಂದ್ರ ಸರ್ಕಾರವು ಅನಿವಾರ್ಯವಾಯಿತು ಮತ್ತು ಅದರ ನಿಬಂಧನೆಗಳನ್ನು ಔಪಚಾರಿಕವಾಗಿ ಕೈಬಿಟ್ಟಿತು.

► ಬೇಸಿಗೆ ಕಾಲದಲ್ಲಿ ವಿದ್ಯುತ್ ಕಡಿತ

ಬೇಸಿಗೆಯಲ್ಲಿ ಪದೇ ಪದೇ ವಿದ್ಯುತ್ ಕಡಿತಗಳು ಯಾಕೆ ಸಂಭವಿಸುತ್ತವೆ? ಎಂಬುದಕ್ಕೆ ನಿರ್ದಿಷ್ಟವಾಗಿ ಹೇಳುವುದಾದರೆ, ಬೇಸಿಗೆಯ ಬಿಸಿಲಿನಲ್ಲಿ ಏರ್ ಕಂಡೀಷನರ್ ಗಳ (AC) ಬಳಕೆಯಿಂದ ಉಂಟಾಗುವ ತೀವ್ರ ಬೇಡಿಕೆಗೆ ತಕ್ಕಂತೆ ವಿದ್ಯುತ್ ವಿತರಣಾ ಜಾಲದ ಸಾಮರ್ಥ್ಯವನ್ನು ಸಮರ್ಪಕವಾಗಿ ಹೆಚ್ಚಿಸದೇ ಇರುವುದು ಇದಕ್ಕೆ ಒಂದು ಕಾರಣವಾಗಿರಬಹುದು. ಇಂತಹ ಸಂದರ್ಭಗಳಲ್ಲಿ, ರಾಷ್ಟ್ರೀಯ ಮಟ್ಟದಲ್ಲಿ ಸಾಕಷ್ಟು ವಿದ್ಯುತ್ ಲಭ್ಯವಿದ್ದರೂ ಸಹ, ಗ್ರಿಡ್ ಸ್ಥಿರತೆಯನ್ನು ಕಾಪಾಡಿಕೊಳ್ಳಲು ವಿತರಣಾ ಕಂಪೆನಿಯು (ಡಿಸ್ಕಾಮ್) ತಾಂತ್ರಿಕ ಅನಿವಾರ್ಯತೆಯಿಂದಾಗಿ ವಿದ್ಯುತ್ ಕಡಿತವನ್ನು ಹೇರಲೇಬೇಕಾದ ಅನಿವಾರ್ಯತೆಗೆ ಸಿಲುಕುತ್ತದೆ. ನಿರೀಕ್ಷಿತ ಬೇಡಿಕೆಗಿಂತ ಯಾವಾಗಲೂ ಅಧಿಕವಾಗಿರುವಂತೆ ವಿದ್ಯುತ್ ವಿತರಣಾ ಜಾಲದ ಸಾಮರ್ಥ್ಯವನ್ನು ನಿರಂತರವಾಗಿ ಹೆಚ್ಚಿಸುತ್ತಿರಬೇಕು.

ಮುಂದಿನ ಬೇಸಿಗೆಯ ಆರಂಭದೊಳಗೆ ಈ ಕೆಲಸವನ್ನು ಖಚಿತಪಡಿಸಿಕೊಳ್ಳುವುದು ರಾಜ್ಯ ಸರ್ಕಾರಗಳು ಮತ್ತು ನಿಯಂತ್ರಕರ ಜವಾಬ್ದಾರಿಯಾಗಿದೆ. ಸಮಾನಾಂತರ ಪರವಾನಗಿ ನೀತಿಯು ಸ್ಪರ್ಧೆಯನ್ನು ಪರಿಚಯಿಸುವುದರಿಂದ, ಹೊಸ ಹೂಡಿಕೆಗೆ ಅವಕಾಶ ಕಲ್ಪಿಸುವುದರಿಂದ ಮತ್ತು ಗ್ರಾಹಕರ ದೂರುಗಳನ್ನು ತ್ವರಿತವಾಗಿ ಬಗೆಹರಿಸುವುದರ ಮೇಲೆ ಗಮನಹರಿಸುವುದರಿಂದ ಇದು ಒಂದು ಉತ್ತಮ ಪರಿಹಾರವಾಗಿದೆ.

► ಹೊರೆ ಹಂಚಿಕೆ

ಮುಂದಿನ ದಿನಗಳಲ್ಲಿ, ಆಕರ್ಷಕ ಫೀಡ್-ಇನ್ ಸುಂಕದೊಂದಿಗೆ ಸಾರ್ವಜನಿಕ ಸ್ಥಳಗಳಲ್ಲಿ ಮತ್ತು ಕಟ್ಟಡಗಳ ಮೇಲೆ ಸೌರ ಫಲಕಗಳನ್ನು ತ್ವರಿತವಾಗಿ ಅಳವಡಿಸುವುದನ್ನು ಪ್ರೋತ್ಸಾಹಿಸುವುದು ಡಿಸ್ಕಾಮ್ಗಳಿಗೆ ವಿವೇಚನಾಪೂರ್ಣವಾಗಿರುತ್ತದೆ. ಸೌರ ವಿದ್ಯುತ್ ಥರ್ಮಲ್ ವಿದ್ಯುತ್ ಗಿಂತ ಗಮನಾರ್ಹವಾಗಿ ಅಗ್ಗವಾಗಿದೆ ಮತ್ತು ಯಾವುದೇ ಪ್ರಸರಣ ವೆಚ್ಚವನ್ನು ಹೊಂದಿರುವುದಿಲ್ಲವಾದ್ದರಿಂದ, ವಿಕೇಂದ್ರೀಕೃತ ಸೌರ ವಿದ್ಯುತ್ ಉತ್ಪಾದನೆಯು ಡಿಸ್ಕಾಮ್ಗಳ ವೆಚ್ಚವನ್ನು ಕಡಿಮೆ ಮಾಡುತ್ತದೆ.

ಇದಲ್ಲದೆ, ಡಿಸ್ಕಾಮ್ಗಳು ಆದಷ್ಟು ಬೇಗ ಲೋಡ್ ಕೇಂದ್ರಗಳಲ್ಲಿ ಬ್ಯಾಟರಿ ಶೇಖರಣಾ ವ್ಯವಸ್ಥೆಗಳನ್ನು ಅಳವಡಿಸಬೇಕು. ಇದು ಸ್ಥಳೀಯವಾಗಿ ಉತ್ಪತ್ತಿಯಾಗುವ ಅಗ್ಗದ ಸೌರ ವಿದ್ಯುತ್ ಅನ್ನು ಸಂಜೆ ವೇಳೆಯ ಗರಿಷ್ಠ ಬೇಡಿಕೆಯನ್ನು ಪೂರೈಸಲು ಸಂಗ್ರಹಿಸಿಡಲು ಅನುವು ಮಾಡಿಕೊಡುತ್ತದೆ.

ಶೇಖರಣಾ ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳುವುದರಿಂದ, ವಿಶೇಷವಾಗಿ ಬೇಸಿಗೆಯ ತಿಂಗಳುಗಳಲ್ಲಿ ಥರ್ಮಲ್ ಸ್ಥಾವರಗಳಿಂದ ವಿದ್ಯುತ್ ಉತ್ಪಾದನೆಯನ್ನು ಹೆಚ್ಚಿಸಬಹುದು. ರಾಷ್ಟ್ರೀಯ ಮತ್ತು ಡಿಸ್ಕಾಮ್ ಮಟ್ಟದಲ್ಲಿ, ಬಳಕೆಯಾಗದೆ ಉಳಿದಿರುವ ಆಸ್ತಿಗಳನ್ನು ಒಟ್ಟುಗೂಡಿಸಿ ಗರಿಷ್ಠ ಬೇಡಿಕೆಯ ವಿದ್ಯುತ್ ಅವಶ್ಯಕತೆಗಳನ್ನು ಪೂರೈಸಲು ಬಳಸಿಕೊಳ್ಳಬೇಕು. ಈ ಆಸ್ತಿಗಳು ಗ್ಯಾಸ್ ಆಧಾರಿತ ಸ್ಥಾವರಗಳಾಗಿದ್ದು, ಆಮದು ಮಾಡಿಕೊಂಡ ಗ್ಯಾಸ್ ನಿಂದ ಉತ್ಪತ್ತಿಯಾಗುವ ಇವುಗಳ ವಿದ್ಯುತ್ ಸಾಮಾನ್ಯ ಕಾರ್ಯಾಚರಣೆಗೆ ತುಂಬಾ ವೆಚ್ಚದಾಯಕವಾಗಿದೆ. ಆದರೆ ಬೇಸಿಗೆಯಲ್ಲಿ ಕೆಲವು ಗಂಟೆಗಳ ಕಾಲ ಗರಿಷ್ಠ ಬೇಡಿಕೆಯನ್ನು ಪೂರೈಸಲು ಇದು ಕೈಗೆಟುಕುವ ದರದಲ್ಲಿದೆ.

ವಸತಿ ಪ್ರದೇಶಗಳು ತಮ್ಮ ಬ್ಯಾಕಪ್ ಡೀಸೆಲ್ ಜನರೇಟರ್ ಗಳನ್ನು ಚಲಾಯಿಸುವ ಅಗತ್ಯವಿಲ್ಲದಂತೆ ನೋಡಿಕೊಳ್ಳುವುದು ಇದರ ಗುರಿಯಾಗಬೇಕು. ಗುರುಗ್ರಾಮ್ ನಂತಹ ವೇಗವಾಗಿ ಬೆಳೆಯುತ್ತಿರುವ ವಲಯಗಳಾಗಿರಲಿ ಅಥವಾ ದೂರದ ಮೂಲೆಗಳೇ ಆಗಿರಲಿ, ಈ ಎಲ್ಲಾ ಕ್ರಮಗಳ ಸಂಯೋಜನೆಯು ಆಗಾಗ್ಗೆ ಮತ್ತು ದೀರ್ಘಕಾಲದ ವಿದ್ಯುತ್ ಕಡಿತಗಳು ಭೂತಕಾಲದ ವಿಷಯವಾಗುವಂತೆ ಖಚಿತಪಡಿಸುತ್ತದೆ. ಈ ಸುಧಾರಣೆಗಳಿಗೆ ಎರಡರಿಂದ ಮೂರು ವರ್ಷಗಳ ಕಾಲಾವಕಾಶ ನೀಡುವುದು ಸೂಕ್ತವಾಗಿರುತ್ತದೆ.

(ಲೇಖಕ ಅಜಯ್ ಶಂಕರ್ ನಿವೃತ್ತ IAS ಅಧಿಕಾರಿಯಾಗಿದ್ದಾರೆ. ಅವರು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಕೈಗಾರಿಕಾ ನೀತಿ ಮತ್ತು ಉತ್ತೇಜನ ಇಲಾಖೆಯ ಮಾಜಿ ಕಾರ್ಯದರ್ಶಿಯಾಗಿದ್ದು, ವಿದ್ಯುತ್ ಸಚಿವಾಲಯದಲ್ಲಿ ಜಂಟಿ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿದ್ದಾರೆ.)