ಸೌದಿ ರಕ್ಷಣಾ ಅಗತ್ಯಗಳನ್ನು ಪೂರೈಸಲು ಸಿದ್ಧ ಎಂದ ತುರ್ಕಿಯೆ ವಿದೇಶಾಂಗ ಸಚಿವರು; ಏನಿದರ ಅರ್ಥ?

ಯೆಮೆನ್ ನ ಹೌದಿಗಳಿಂದ ಹೆಚ್ಚುತ್ತಿರುವ ದಾಳಿಗಳನ್ನು ಸೌದಿ ಅರೇಬಿಯಾ ಎದುರಿಸುತ್ತಿರುವ ಹಿನ್ನೆಲೆಯಲ್ಲಿ, ರಿಯಾದ್ ನ ಮಿಲಿಟರಿ ಅಗತ್ಯಗಳನ್ನು ಪೂರೈಸಲು ಸಹಾಯ ಮಾಡಲು ಸಿದ್ಧವಿರುವುದಾಗಿ ತುರ್ಕಿಯೆ ತಿಳಿಸಿದೆ. ಇದು ಹೊಸದಾಗಿ ಸಹಿ ಮಾಡಲಾದ ಮಕ್ಕಾ ರಕ್ಷಣಾ ಒಪ್ಪಂದವನ್ನು ಮೊದಲ ಬೃಹತ್ ಪರೀಕ್ಷೆಗೆ ಒಳಪಡಿಸುವ ಸಾಧ್ಯತೆಯಿದೆ.

ಹೆಚ್ಚುತ್ತಿರುವ ಪ್ರಾದೇಶಿಕ ಉದ್ವಿಗ್ನತೆಯ ನಡುವೆ ಕಳೆದ ತಿಂಗಳು ಸೌದಿ ಅರೇಬಿಯಾ, ತುರ್ಕಿಯೆ ಮತ್ತು ಪಾಕಿಸ್ತಾನಗಳು 'ಮಕ್ಕಾ ಜಂಟಿ ರಕ್ಷಣಾ ಒಪ್ಪಂದ'ಕ್ಕೆ ಸಹಿ ಹಾಕಿದ್ದವು. ಈ ಒಪ್ಪಂದದ ಪ್ರಕಾರ, ಮೂರು ಸದಸ್ಯ ದೇಶಗಳಲ್ಲಿ ಯಾವುದರ ಮೇಲೆ ಸಶಸ್ತ್ರ ದಾಳಿ ನಡೆದರೂ ಅದನ್ನು ಮೂರು ದೇಶಗಳ ಮೇಲೆ ನಡೆದ ದಾಳಿಯೆಂದೇ ಪರಿಗಣಿಸಲಾಗುತ್ತದೆ.

ಸೌದಿ ಅರೇಬಿಯಾಕ್ಕೆ, ನಿರ್ದಿಷ್ಟವಾಗಿ "ತಾಂತ್ರಿಕ ವಿಷಯಗಳಲ್ಲಿ" ಮಿಲಿಟರಿ ನೆರವಿನ ಅಗತ್ಯವಿರಬಹುದು ಮತ್ತು ಅದನ್ನು ಒದಗಿಸಲು ಅಂಕಾರಾಗೆ (ತುರ್ಕಿಯೆಗೆ) ಯಾವುದೇ ಸಮಸ್ಯೆಯಿಲ್ಲ ಎಂದು ಅಲ್ಲಿನ ವಿದೇಶಾಂಗ ಸಚಿವ ಹಕನ್ ಫಿದಾನ್ ಹೇಳಿದ್ದಾರೆ.

ಈ ಬಗ್ಗೆ Aljazeera ಜೊತೆ ಮಾತನಾಡಿದ ತುರ್ಕಿಯೆಯ ಇಬ್ನ್ ಹಲ್ದುನ್ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಇಸ್ಮಾಯಿಲ್ ನುಮಾನ್ ಟೆಲ್ಸಿ, "ವಾಯು ರಕ್ಷಣಾ ವ್ಯವಸ್ಥೆಗಳು, ಡ್ರೋನ್ ನಿಗ್ರಹ ಮತ್ತು ಎಲೆಕ್ಟ್ರಾನಿಕ್ ಯುದ್ಧ ಸಾಮರ್ಥ್ಯಗಳು, ರಾಡಾರ್ ಹಾಗೂ ಕಣ್ಗಾವಲು ಮತ್ತು ಸಮುದ್ರಯಾನ ಭದ್ರತೆ ಸೇರಿದಂತೆ ರಕ್ಷಣಾ ರಂಗದಲ್ಲಿ ಅಂಕಾರಾದ ಬಲವನ್ನು ಫಿದಾನ್ ಪರೋಕ್ಷವಾಗಿ ಸೂಚಿಸಿರಬಹುದು. ಇದು ತುರ್ಕಿಯೆಯ ಧೋರಣೆಯನ್ನು ಸುಳಿವು ನೀಡುತ್ತದೆ" ಎಂದಿದ್ದಾರೆ.

"ಈ ಸಂಘರ್ಷದಲ್ಲಿ ತುರ್ಕಿಯೆ ನೇರವಾಗಿ ಸಶಸ್ತ್ರ ಹೋರಾಟದ ಪಾತ್ರವನ್ನು ಹೊಂದಿರುವುದನ್ನು ಕೆಲವು ಮಿತಿಗಳು ತಡೆಯುತ್ತವೆ" ಎಂದು ಟೆಲ್ಸಿ ತಿಳಿಸಿದ್ದಾರೆ.

ಫೆಬ್ರವರಿಯಲ್ಲಿ ಇರಾನ್ ವಿರುದ್ಧ ಅಮೆರಿಕ–ಇಸ್ರೇಲ್ ಯುದ್ಧದೊಂದಿಗೆ ಪ್ರಾರಂಭವಾದ ವಿಶಾಲ ಪ್ರಾದೇಶಿಕ ಸಂಘರ್ಷದಲ್ಲಿ ಮತ್ತೊಂದು ರಂಗವನ್ನು ತೆರೆದಿರುವ ಹೌದಿಗಳ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳು ಸೌದಿ ಅರೇಬಿಯಾದ ನಗರಗಳು, ಇಂಧನ ಮೂಲಸೌಕರ್ಯಗಳು ಮತ್ತು ಸರಕು ಸಾಗಣೆ ನೌಕೆಗಳನ್ನು ಹೆಚ್ಚು ಹೆಚ್ಚು ಗುರಿಯಾಗಿಸುತ್ತಿರುವ ಸಮಯದಲ್ಲಿ ಅವರ ಈ ಹೇಳಿಕೆ ಬಂದಿದೆ.

ಹಾರ್ಮುಝ್ ಜಲಸಂಧಿಯ ದಿಗ್ಬಂಧನದ ನಡುವೆ ಸೌದಿ ತೈಲ ರಫ್ತಿಗೆ ಪರ್ಯಾಯ ಮಾರ್ಗವಾಗಿ ಬಳಸಲಾಗುತ್ತಿರುವ ಕೆಂಪು ಸಮುದ್ರದ ಮೇಲೆ ಇರಾನ್ ಬೆಂಬಲಿತ ಹೌದಿಗಳು ತಮ್ಮ ಹಿಡಿತವನ್ನು ಬಿಗಿಗೊಳಿಸುತ್ತಿದ್ದಂತೆ, ಈ ಉಲ್ಬಣವು ಜಾಗತಿಕ ಇಂಧನ ಪೂರೈಕೆಗೂ ಹೆಚ್ಚಿನ ಅಪಾಯವನ್ನುಂಟುಮಾಡಿದೆ.

►ತುರ್ಕಿಯೆ ಹೇಳಿದ್ದೇನು?

ಶನಿವಾರದಂದು ತುರ್ಕಿಯೆ ಮಾಧ್ಯಮಗಳೊಂದಿಗೆ ಮಾತನಾಡಿದ ವಿದೇಶಾಂಗ ಸಚಿವ ಹಕನ್ ಫಿದಾನ್, ಮುಂದುವರಿದಿರುವ ಹೌದಿಗಳ ದಾಳಿಯಿಂದಾಗಿ ಸೌದಿ ಅರೇಬಿಯಾವು ಮಿಲಿಟರಿ ಅವಶ್ಯಕತೆಗಳನ್ನು ಹೊಂದಿರಬಹುದು ಮತ್ತು ರಿಯಾದ್ ಹಾಗೂ ಇಸ್ಲಾಮಾಬಾದ್ ಜೊತೆಗಿನ ರಕ್ಷಣಾ ಒಪ್ಪಂದದ ಅಡಿಯಲ್ಲಿ ಸಹಾಯ ಒದಗಿಸಲು ಅಂಕಾರಾ ಸಿದ್ಧವಿದೆ ಎಂದು ಹೇಳಿದರು.

"ಸೌದಿ ಅರೇಬಿಯಾದ ಪ್ರಾದೇಶಿಕ ಸಮಗ್ರತೆ ಮತ್ತು ಸಾರ್ವಭೌಮತೆಯ ಮೇಲೆ ಬಹಳ ಗಂಭೀರವಾದ ದಾಳಿಗಳು ನಡೆಯುತ್ತಿರುವುದನ್ನು ನಾವು ಕಾಣುತ್ತಿದ್ದೇವೆ" ಎಂದು ತುರ್ಕಿಯೆಯ ಎನ್ಟಿವಿ ಪ್ರಸಾರ ಸಂಸ್ಥೆಗೆ ಫಿದಾನ್ ಹೇಳಿದ್ದಾರೆ.

ಸೌದಿ ಅರೇಬಿಯಾಕ್ಕೆ "ಕೆಲವು ಮಿಲಿಟರಿ ಅಗತ್ಯಗಳು ಇರಬಹುದು, ವಿಶೇಷವಾಗಿ ಕೆಲವು ತಾಂತ್ರಿಕ ವಿಷಯಗಳಲ್ಲಿ ನೆರವಿನ ಅಗತ್ಯವಿರಬಹುದು. ತುರ್ಕಿಯೆಗೆ ಇವುಗಳನ್ನು ಪೂರೈಸುವಲ್ಲಿ ಯಾವುದೇ ಸಮಸ್ಯೆಯಿಲ್ಲ" ಎಂದಿದ್ದಾರೆ ಅವರು. ತುರ್ಕಿಯೆ ಯಾವ ರೀತಿಯ ಸಹಾಯವನ್ನು ನೀಡಬಹುದು ಎಂಬುದನ್ನು ಫಿದಾನ್ ನಿರ್ದಿಷ್ಟವಾಗಿ ತಿಳಿಸಿಲ್ಲ.

NATOದ ಎರಡನೇ ಅತಿ ದೊಡ್ಡ ಮಿಲಿಟರಿಯನ್ನು ಹೊಂದಿರುವ ತುರ್ಕಿಯೆ, ಹೌದಿಗಳ ದಾಳಿಯನ್ನು ಖಂಡಿಸಿದೆ ಮತ್ತು ಅವು ತಕ್ಷಣವೇ ನಿಲ್ಲಬೇಕು ಎಂದು ಒತ್ತಾಯಿಸಿದೆ.

ತುರ್ಕಿಯೆಯು ರಕ್ಷಣಾತ್ಮಕ ಮತ್ತು ಆಕ್ರಮಣಕಾರಿ ಬೆಂಬಲ ಎರಡನ್ನೂ ಹಾಗೂ ಗುಪ್ತಚರ ನೆರವನ್ನು ನೀಡಬಹುದು ಎಂದು ರಕ್ಷಣಾ ವಿಶ್ಲೇಷಕ ಅಲೆಕ್ಸ್ ಅಫಿರಾಜ್ ಶೀರ್ಸ್ ಹೇಳಿದ್ದಾರೆ.

ಅಲ್ ಜಝೀರಾ ಜೊತೆ ಮಾತನಾಡಿದ ಶೀರ್ಸ್, "ರಕ್ಷಣೆಯ ವಿಚಾರದಲ್ಲಿ, ಮುಖ್ಯವಾಗಿ ಪ್ಯಾಟ್ರಿಯಾಟ್ ಬ್ಯಾಟರಿಗಳು ಮತ್ತು ಟಿಎಚ್ಎಎಡಿ (THAAD) ಸುತ್ತಲೂ ನಿರ್ಮಿಸಲಾಗಿರುವ ರಿಯಾದ್ ನ ಬಹುಪದರಿನ ವಾಯು ರಕ್ಷಣಾ ಜಾಲವು, ಹೌದಿಗಳ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳ ಪ್ರಮಾಣ ಹಾಗೂ ವೇಗದಿಂದಾಗಿ ತೀವ್ರ ಒತ್ತಡಕ್ಕೆ ಒಳಗಾಗಿದೆ" ಎಂದಿದ್ದಾರೆ.

"ಆಕ್ರಮಣಕಾರಿ ಮುಖಂಡತ್ವದ ವಿಷಯಕ್ಕೆ ಬಂದರೆ, ಹೌದಿಗಳ ಲಾಂಚ್ ಪ್ಯಾಡ್ ಗಳ ವಿರುದ್ಧ ಅಸಿಮೆಟ್ರಿಕ್ ದಾಳಿಯ ಆಯ್ಕೆಯನ್ನು ಪಡೆಯಲು ರಿಯಾದ್ ಯುದ್ಧದಲ್ಲಿ ಸಾಬೀತಾಗಿರುವ ತುರ್ಕಿಯೆಯ ಡ್ರೋನ್ ಮತ್ತು ಕ್ಷಿಪಣಿ ಸಾಮರ್ಥ್ಯಗಳನ್ನು ಕೋರಬಹುದು. ನೇರ ಬೆಂಬಲಕ್ಕಾಗಿ ವಾಷಿಂಗ್ಟನ್ ಮಾಡಿದ ಮನವಿಗಳನ್ನು ತಿರಸ್ಕರಿಸಿದಾಗಿನಿಂದ ರಿಯಾದ್ ನಲ್ಲಿ ಈ ಕೊರತೆ ಸ್ಪಷ್ಟವಾಗಿತ್ತು" ಎಂದು ಶೀರ್ಸ್ ಹೇಳಿದ್ದಾರೆ.

ಕಿಂಗ್ಸ್ ಕಾಲೇಜ್ ಲಂಡನ್ ನ ಹಿರಿಯ ಸಂಶೋಧನಾ ಸಹೋದ್ಯೋಗಿ ನವಾಫ್ ಒಬೈದ್ ಮಾತನಾಡಿ, ಸೌದಿ ಅರೇಬಿಯಾ ಮತ್ತು ಅದರ ಮಿತ್ರರಾಷ್ಟ್ರಗಳು ಇತ್ತೀಚಿನ ಹೌದಿ ದಾಳಿಗಳಿಗೆ ತಕ್ಕುದಾದ ಸಮನ್ವಯದ ಮಿಲಿಟರಿ ಪ್ರತಿಕ್ರಿಯೆಯನ್ನು ಸಿದ್ಧಪಡಿಸುತ್ತಿವೆ ಎಂದು ಹೇಳಿದರು. ಅಲ್ಲದೆ, ರಿಯಾದ್ ಕಾಣಿಸಿಕೊಳ್ಳುತ್ತಿರುವಷ್ಟು ಏಕಾಂಗಿಯಾಗಿಲ್ಲ ಎಂದು ಅವರು ವಾದಿಸಿದರು.

ಅಲ್ ಜಝೀರಾ ಜೊತೆ ಮಾತನಾಡಿದ ಅವರು, "ಹೌದಿಗಳ ದಾಳಿಗೆ ತಕ್ಕ ಉತ್ತರ ನೀಡಲು ದೇಶಗಳೆಲ್ಲ ಒಗ್ಗೂಡಿ ಮೈತ್ರಿಕೂಟವೊಂದನ್ನು ರಚಿಸುತ್ತಿವೆ" ಎಂದಿದ್ದಾರೆ.

ಪ್ರತಿಕ್ರಿಯೆಯು "ಖಂಡಿತ ಬರಲಿದೆ" ಎಂದು ಹೇಳಿದ ಒಬೈದ್, "ಇದು ಹಂತ ಹಂತವಾಗಿ ಇರಲಿದೆ. ಇದು ದೊಡ್ಡ ಮಟ್ಟದಲ್ಲಿರಲಿದೆ. ಎಲ್ಲವೂ ಒಟ್ಟಾಗಿ ಸೇರಿಕೊಂಡು ನೆಲ, ಸಮುದ್ರ ಮತ್ತು ವಾಯು ಮಾರ್ಗದ ಮೂಲಕ ನಡೆಯಲಿದೆ" ಎಂದು ತಿಳಿಸಿದರು.

ಈ ಒಕ್ಕೂಟದ ದೇಶಗಳು ಈಗಾಗಲೇ ಶಸ್ತ್ರಾಸ್ತ್ರ ವ್ಯವಸ್ಥೆಗಳನ್ನು ಸೌದಿ ಅರೇಬಿಯಾಕ್ಕೆ ಸ್ಥಳಾಂತರಿಸಲು ಮತ್ತು ಯುದ್ಧವಿಮಾನಗಳನ್ನು ಕೆಂಪು ಸಮುದ್ರಕ್ಕೆ ನಿಯೋಜಿಸಲು ಪ್ರಾರಂಭಿಸಿವೆ ಎಂದು ವಿಶ್ಲೇಷಕರು ತಿಳಿಸಿದ್ದಾರೆ. ಇದರಲ್ಲಿ ತುರ್ಕಿಯೆಯು ಪ್ರಮುಖ ಪಾತ್ರಧಾರಿಯಾಗಿದೆ ಮತ್ತು ಈಜಿಪ್ಟ್ ಸೀಮಿತ ಕಾರ್ಯಾಚರಣೆಯ ಪಾತ್ರದಲ್ಲಿ ಸಂಭಾವ್ಯ ಪಾಲುದಾರನಾಗಬಹುದು ಎಂದು ಅವರು ಗುರುತಿಸಿದ್ದಾರೆ.

ಒಬೈದ್ ಅವರ ಈ ಹೇಳಿಕೆಗಳನ್ನು ಸ್ವತಂತ್ರವಾಗಿ ಪರಿಶೀಲಿಸಲು ಸಾಧ್ಯವಾಗಿಲ್ಲ ಎಂದು ಅಲ್ ಜಝೀರಾ ವರದಿ ಹೇಳಿದೆ.

ಅಲ್ ಜಝೀರಾ ಜತೆ ಮಾತನಾಡಿದ ದೋಹಾ ಇನ್ಸ್ಟಿಟ್ಯೂಟ್ ಫಾರ್ ಗ್ರಾಜುಯೇಟ್ ಸ್ಟಡೀಸ್ ನ ಪ್ರಾಧ್ಯಾಪಕ ಮೊಹಮದ್ ಎಲ್ಮಾಸ್ರಿ, "ಸೌದಿಗಳು ಒಂದು ರೀತಿಯಲ್ಲಿ ಇಕ್ಕಟ್ಟಿಗೆ ಸಿಲುಕಿದ್ದಾರೆ" ಎಂದರು.

"ಅವರು ಹಲವಾರು ಮಿತ್ರರಾಷ್ಟ್ರಗಳನ್ನು ಸಂಪರ್ಕಿಸಿದ್ದಾರೆ. ಮಿತ್ರರಾಷ್ಟ್ರಗಳು ಲಾಜಿಸ್ಟಿಕ್ಸ್ ಬೆಂಬಲ, ಗುಪ್ತಚರ ಮಾಹಿತಿ ಮತ್ತು ಶಸ್ತ್ರಾಸ್ತ್ರಗಳ ರೂಪದಲ್ಲಿ ಕೆಲವು ರೀತಿಯ ಬೆಂಬಲವನ್ನು ನೀಡುತ್ತಿವೆ. ಆದರೆ ಪಾಕಿಸ್ತಾನಿಯರು, ತುರ್ಕಿಯರು, ಈಜಿಪ್ಟಿನವರು, ಅಮೆರಿಕನ್ನರು ಅಥವಾ ಬೇರೆ ಯಾರೂ ಕೂಡ ನೇರವಾದ ಸಶಸ್ತ್ರ ಮಿಲಿಟರಿ ಕಾರ್ಯಾಚರಣೆಯಲ್ಲಿ ನೇರವಾಗಿ ತೊಡಗಿಸಿಕೊಳ್ಳಲು ಬಯಸುತ್ತಿರುವಂತೆ ಕಾಣುತ್ತಿಲ್ಲ" ಎಂದಿದ್ದಾರೆ.

►ಮಕ್ಕಾ ರಕ್ಷಣಾ ಒಪ್ಪಂದ ಎಂದರೇನು?

ಇಸ್ತಾಂಬುಲ್ ನಲ್ಲಿ ನಡೆದ ಸಭೆಯ ಬಳಿಕ ರಿಯಾದ್ ನಲ್ಲಿ ಸಚಿವಾಲಯವನ್ನು ಸ್ಥಾಪಿಸಲು ಅಧಿಕಾರಿಗಳು ಒಪ್ಪಿಗೆ ಸೂಚಿಸಿದ ನಂತರ, ಸೌದಿ ಅರೇಬಿಯಾ, ತುರ್ಕಿಯೆ ಮತ್ತು ಪಾಕಿಸ್ತಾನಗಳು ಆಗಸ್ಟ್ 31ರಂದು ಈ ಒಪ್ಪಂದಕ್ಕೆ ಔಪಚಾರಿಕವಾಗಿ 'ಮಕ್ಕಾ ರಕ್ಷಣಾ ಒಕ್ಕೂಟ' (Mecca Defence Alliance) ಎಂದು ಹೆಸರಿಸಿದವು. ಆರಂಭದಲ್ಲಿ ಪಾಕಿಸ್ತಾನದ ಪ್ರಧಾನ ಕಾರ್ಯದರ್ಶಿಯೊಬ್ಬರು ಇದರ ನೇತೃತ್ವ ವಹಿಸಲಿದ್ದಾರೆ.

NATO ದ ಸಾಮೂಹಿಕ ರಕ್ಷಣಾ ಒಪ್ಪಂದದಂತೆ, ಮೂರು ದೇಶಗಳಲ್ಲಿ ಯಾವುದಾದರೂ ಒಂದು ದೇಶದ ಮೇಲೆ ಸಶಸ್ತ್ರ ದಾಳಿ ನಡೆದರೆ ಅದನ್ನು ಮೂರರ ಮೇಲೂ ನಡೆದ ದಾಳಿಯೆಂದೇ ಪರಿಗಣಿಸುವುದು ಇದರ ಮೂಲ ತತ್ವವಾಗಿದೆ.

"ಇತರ ರಾಜ್ಯಗಳ ಸಾರ್ವಭೌಮತೆ, ಪ್ರಾದೇಶಿಕ ಸಮಗ್ರತೆ ಮತ್ತು ಆಂತರಿಕ ವ್ಯವಹಾರಗಳಲ್ಲಿ ಹಸ್ತಕ್ಷೇಪ ಮಾಡದಿರುವುದನ್ನು ಗೌರವಿಸುವುದರ" ಮೇಲೆ ಈ ಒಕ್ಕೂಟವು ರೂಪುಗೊಂಡಿದೆ ಎಂದು ಫಿದಾನ್ ಆಗ ಹೇಳಿದ್ದರು. ಅಲ್ಲದೆ, ಇತರ ದೇಶಗಳು ಕೂಡ ಇದರಲ್ಲಿ ಸೇರಲು ಮುಕ್ತ ಅವಕಾಶವಿದೆ ಎಂದಿದ್ದರು.

ಫೆಬ್ರವರಿಯಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಮೊದಲು ಇರಾನ್ ಮೇಲೆ ದಾಳಿ ಮಾಡಿದಾಗಿನಿಂದ ಆರು ತಿಂಗಳಿಗೂ ಹೆಚ್ಚು ಕಾಲ ಮುಂದುವರಿದಿರುವ ಅಮೆರಿಕ–ಇರಾನ್ ಯುದ್ಧಕ್ಕೆ ಸೆಳೆಯಲ್ಪಡುವ ಬಗ್ಗೆ ಗಲ್ಫ್ ದೇಶಗಳಲ್ಲಿ ಹೆಚ್ಚುತ್ತಿರುವ ಕಳವಳದ ನಡುವೆ ಈ ತ್ರಿಪಕ್ಷೀಯ ಒಪ್ಪಂದ ಮಾಡಿಕೊಳ್ಳಲಾಗಿದೆ.

2023 ಅಕ್ಟೋಬರ್ 7ರಂದು ಗಾಝಾ ಮೇಲೆ ತನ್ನ ನರಮೇಧ ಪ್ರಾರಂಭಿಸಿದಾಗಿನಿಂದ ಖತರ್ ಸೇರಿದಂತೆ ಹಲವಾರು ಪ್ರಾದೇಶಿಕ ದೇಶಗಳ ಮೇಲೆ ಇಸ್ರೇಲ್ ಬಾಂಬ್ ದಾಳಿ ನಡೆಸಿದೆ. ಮಧ್ಯಪ್ರಾಚ್ಯದಲ್ಲಿ ಇಸ್ರೇಲ್ನ ವಿಸ್ತರಿಸುತ್ತಿರುವ ಮಿಲಿಟರಿ ವ್ಯಾಪ್ತಿಯ ಬಗ್ಗೆಯೂ ಕಳವಳಗಳು ವ್ಯಕ್ತವಾಗಿರುವ ಹಿನ್ನೆಲೆಯಲ್ಲಿ ಈ ಒಪ್ಪಂದ ಏರ್ಪಟ್ಟಿದೆ.

ಶಿಕ್ಷಣ ತಜ್ಞರಾದ ಟೆಲ್ಸಿ ಅವರ ಪ್ರಕಾರ, ತತ್ವಬದ್ಧವಾಗಿ, ರಾಜಕೀಯವಾಗಿ ಮತ್ತು ಕಾನೂನುಬದ್ಧವಾಗಿ ಇದನ್ನು ಸಕ್ರಿಯಗೊಳಿಸುವುದು ಸಾಧ್ಯ, ಆದರೆ "ಅನುಷ್ಠಾನದಲ್ಲಿ ಇದು ಜಟಿಲವಾಗಿದೆ".

ಒಬ್ಬ ಸದಸ್ಯರ ಮೇಲೆ ನಡೆದ ಸಶಸ್ತ್ರ ದಾಳಿಯನ್ನು ಎಲ್ಲರ ಮೇಲಿನ ದಾಳಿಯೆಂದು ಒಪ್ಪಂದವು ಪರಿಗಣಿಸುತ್ತದೆ, ಮತ್ತು ಸೌದಿ ಭೂಪ್ರದೇಶದ ಮೇಲೆ ಹೌದಿಗಳ ದಾಳಿಗಳು ಆ ವಿವರಣೆಗೆ ಹೊಂದಿಕೊಳ್ಳುತ್ತವೆ. ಈ ಒಪ್ಪಂದವನ್ನು ಇನ್ನೂ ತುರ್ಕಿಯೆ ಮತ್ತು ಪಾಕಿಸ್ತಾನದ ಸಂಸತ್ತುಗಳು ಅನುಮೋದಿಸಿಲ್ಲ ಎಂದು ಹೇಳಿದ್ದಾರೆ ಅವರು.

ಈ ಒಪ್ಪಂದವನ್ನು ಸಕ್ರಿಯಗೊಳಿಸುವುದು "ತುಂಬಾ ಮುಂಚಿತವಾದ ಕ್ರಮ" ಆಗುತ್ತದೆ ಎಂದು ರಕ್ಷಣಾ ವಿಶ್ಲೇಷಕ ಅಲ್ಫಿರಾಜ್ ಶೀರ್ಸ್ ಹೇಳಿದ್ದಾರೆ.

"ಮಕ್ಕಾ ಒಪ್ಪಂದಕ್ಕೆ ಇನ್ನೂ ಸಾಂಸ್ಥಿಕ ಸ್ವರೂಪ ಸಿಕ್ಕಿಲ್ಲ, ಇದು ಸಕ್ರಿಯಗೊಳಿಸುವಿಕೆಯನ್ನು ಅರ್ಥಪೂರ್ಣ ಕಾನೂನು ಘಟನೆಯನ್ನಾಗಿ ಮಾಡುತ್ತದೆ. ಇಲ್ಲಿಯವರೆಗೆ ಯಾವುದೇ ಪ್ರಕಟಿತ ಕಾರ್ಯತಂತ್ರದ ಪರಿಕಲ್ಪನೆ ಇಲ್ಲ, ನಿರ್ದಿಷ್ಟಪಡಿಸಿದ ಪ್ರಚೋದಕ ಮಿತಿಯಿಲ್ಲ, ಅಥವಾ ಸಕ್ರಿಯಗೊಳಿಸುವ ಪ್ರೋಟೋಕಾಲ್ ಇಲ್ಲ. ಈ ಹಂತದಲ್ಲಿ, ಇದು ಕಾರ್ಯನಿರ್ವಹಿಸುತ್ತಿರುವ ಒಕ್ಕೂಟಕ್ಕಿಂತ ರಾಜಕೀಯ ಘೋಷಣೆಯಂತಿದೆ" ಎಂದು ಹೇಳಿದ್ದಾರೆ ಶೀರ್ಸ್.

►ಪಾಕಿಸ್ತಾನ ಹೇಳಿದ್ದೇನು?

ಪಾಕಿಸ್ತಾನದ ಮಿಲಿಟರಿಯ ಮಾಧ್ಯಮ ವಿಭಾಗದ ಮಹಾನಿರ್ದೇಶಕ ಲೆಫ್ಟಿನೆಂಟ್ ಜನರಲ್ ಅಹ್ಮದ್ ಶರೀಫ್ ಚೌಧರಿ ಅವರು ಗುರುವಾರ ಸೌದಿ ಅರೇಬಿಯಾದ 'ಅರಬ್ ನ್ಯೂಸ್' ಪತ್ರಿಕೆಯೊಂದಿಗೆ ಮಾತನಾಡಿ, ಇಸ್ಲಾಮಾಬಾದ್ ರಾಜತಾಂತ್ರಿಕವಾಗಿ ಮತ್ತು ಭೌತಿಕವಾಗಿ ಸೌದಿ ಅರೇಬಿಯಾದ ಬೆಂಬಲಕ್ಕೆ ನಿಲ್ಲುತ್ತದೆ ಎಂದು ಹೇಳಿದರು.

"ನಾನು ಇಲ್ಲಿ 'ಭೌತಿಕವಾಗಿ' (ಫಿಸಿಕಲ್ ಆಗಿ) ಎಂಬ ಪದವನ್ನು ವಿಶೇಷವಾಗಿ ಒತ್ತಿಹೇಳಲು ಬಯಸುತ್ತೇನೆ. ನಾವು ಯಾವುದೇ ಹಂತಕ್ಕೂ ಹೋಗಲು ಸಿದ್ಧರಿದ್ದೇವೆ" ಎಂದು ಚೌಧರಿ ಹೇಳಿದ್ದಾರೆ.

ಕಳೆದ ವಾರ, ಸೌದಿ ಅರೇಬಿಯಾದ ಮೇಲೆ ಹೌದಿಗಳ ದಾಳಿಯ ನಂತರ ಮಕ್ಕಾ ಒಪ್ಪಂದದ ಅಡಿಯಲ್ಲಿ ಯಾವುದೇ ಮಿಲಿಟರಿ ಪ್ರತಿಕ್ರಿಯೆಯನ್ನು ಪ್ರಾರಂಭಿಸುವ ಕುರಿತು ಯಾವುದೇ ಚರ್ಚೆ ನಡೆದಿಲ್ಲ ಎಂದು ಪಾಕಿಸ್ತಾನದ ವಿದೇಶಾಂಗ ಸಚಿವಾಲಯ ತಿಳಿಸಿತ್ತು.

ಹಾಗಿದ್ದರೂ, ಇಸ್ಲಾಮಾಬಾದ್ ಈ ಒಪ್ಪಂದಕ್ಕೆ ತನ್ನ ಬದ್ಧತೆಯನ್ನು ಪುನರುಚ್ಚರಿಸಿದೆ. "ಸರಿಯಾದ ಸಮಯ ಬಂದಾಗ" ತಾವು ಕಾರ್ಯಪ್ರವೃತ್ತರಾಗುವುದಾಗಿ ಪಾಕಿಸ್ತಾನ ಹೇಳಿದೆ, ಆದರೆ ಅಂತಹ ಕ್ರಮಕ್ಕೆ ಯಾವ ಪರಿಸ್ಥಿತಿಗಳು ಕಾರಣವಾಗುತ್ತವೆ ಎಂಬುದನ್ನು ನಿರ್ದಿಷ್ಟಪಡಿಸಿಲ್ಲ.

ಸೌದಿ ಅರೇಬಿಯಾದ ಮೇಲಿನ ಯಾವುದೇ ದಾಳಿಯು ಮಕ್ಕಾ ಜಂಟಿ ರಕ್ಷಣಾ ಒಪ್ಪಂದವನ್ನು ಸಕ್ರಿಯಗೊಳಿಸಬಹುದು ಎಂದು ಪಾಕಿಸ್ತಾನದ ರಕ್ಷಣಾ ಸಚಿವ ಖಾವಾಜಾ ಆಸಿಫ್ ಈ ತಿಂಗಳ ಆರಂಭದಲ್ಲಿ ಹೇಳಿದ್ದರು.

ಸೆಪ್ಟೆಂಬರ್ 8ರಂದು ನೀಡಿದ ಸಂದರ್ಶನದಲ್ಲಿ ಅವರು, "ನಾವು ಈ ಒಪ್ಪಂದದ ನಿಯಮಗಳು ಮತ್ತು ನಿಬಂಧನೆಗಳಿಗೆ ಬದ್ಧರಾಗಿದ್ದೇವೆ ಮತ್ತು ಅಗತ್ಯವಿದ್ದಲ್ಲಿ ನಾವು ಅವುಗಳನ್ನು ಗೌರವಿಸುತ್ತೇವೆ" ಎಂದು ತಿಳಿಸಿದ್ದರು.

►ಇತ್ತೀಚಿನ ಸೌದಿ–ಹೌದಿ ಸಂಘರ್ಷ

ರಿಯಾದ್ ಮೇಲೆ ಹೌದಿಗಳು ಮುಂಜಾನೆ ಬ್ಯಾಲಿಸ್ಟಿಕ್ ಕ್ಷಿಪಣಿಯೊಂದನ್ನು ಹಾರಿಸಿದ್ದು, ಅದನ್ನು ಹೊಡೆದುರುಳಿಸಿ ನಾಶಪಡಿಸಲಾಗಿದೆ ಎಂದು ಸೌದಿ ನೇತೃತ್ವದ ಒಕ್ಕೂಟದ ಪಡೆಗಳು ಶನಿವಾರ ತಿಳಿಸಿವೆ.

"ಹೌದಿಗಳು ಬಿಷಾ, ತಾಯಿಫ್, ಫರಾಸನ್ ಮತ್ತು ಯನ್ಬು ನಗರಗಳಲ್ಲಿನ ನಾಗರಿಕರು ಹಾಗೂ ನಾಗರಿಕ ಮೂಲಸೌಕರ್ಯಗಳ ಮೇಲೆ ದಾಳಿ ಮಾಡಲು ಯತ್ನಿಸಿದರು" ಎಂದು ಒಕ್ಕೂಟದ ಪಡೆಗಳ ವಕ್ತಾರ ಮೇಜರ್ ಜನರಲ್ ತುರ್ಕಿ ಅಲ್-ಮಾಲಿಕಿ 'ಎಕ್ಸ್'ನಲ್ಲಿ ಬರೆದುಕೊಂಡಿದ್ದು, ಸೌದಿ ವಾಯು ರಕ್ಷಣಾ ಪಡೆಗಳು ಈ ದಾಳಿಗಳನ್ನು ವಿಫಲಗೊಳಿಸಿವೆ ಎಂದು ತಿಳಿಸಿದ್ದಾರೆ.

ಯೆಮೆನ್ ನಲ್ಲಿನ ಪರಿಸ್ಥಿತಿಯನ್ನು ನೋಡುವುದಾದರೆ, ಸೌದಿ ಬೆಂಬಲಿತ ಹಾಗೂ ಅಂತಾರಾಷ್ಟ್ರೀಯವಾಗಿ ಮಾನ್ಯತೆ ಪಡೆದ ಸರ್ಕಾರದ ಸಶಸ್ತ್ರ ಪಡೆಗಳು, ದಕ್ಷಿಣ ಮಾರಿಬ್ ನ ಅಲ್-ಫುಲಿಯಾನ್ ವಲಯದಲ್ಲಿ ಹೌದಿಗಳು ನುಸುಳುವ ಯತ್ನವನ್ನು ಶನಿವಾರ ವಿಫಲಗೊಳಿಸಿವೆ. ಈ ವೇಳೆ 12 ಹೌದಿ ಹೋರಾಟಗಾರರು ಹತರಾಗಿದ್ದು, ಇತರೆ ಕೆಲವರು ಗಾಯಗೊಂಡಿದ್ದಾರೆ.

ಕೆಂಪು ಸಮುದ್ರದ ಬಂದರು ನಗರವಾದ ಮೊಚಾವನ್ನು ವಶಪಡಿಸಿಕೊಂಡ ಬಳಿಕ, ಹೌದಿಗಳು ಸೌದಿ ಬೆಂಬಲಿತ ಸರ್ಕಾರದ ನಿಯಂತ್ರಣದಲ್ಲಿರುವ ತೈಲ ಸಮೃದ್ಧ ಮಾರಿಬ್ ಪ್ರಾಂತ್ಯದತ್ತ ಮುನ್ನಡೆಯುತ್ತಿದ್ದಾರೆ.

ಹೌದಿಗಳು ಮಿಲಿಟರಿ ಮುನ್ನಡೆ ಸಾಧಿಸುತ್ತಿರುವಂತೆಯೇ, ಅಮೆರಿಕವು ಸೌದಿ ಅರೇಬಿಯಾದೊಂದಿಗೆ ನಿರಂತರ ಸಂಪರ್ಕದಲ್ಲಿದೆ ಮತ್ತು ಹೌದಿಗಳೊಂದಿಗೆ ನೇರ ಮಾತುಕತೆ ನಡೆಸಿದೆ ಎಂದು ಸೋಮವಾರ ಉಪಾಧ್ಯಕ್ಷ ಜೆ.ಡಿ. ವಾನ್ಸ್ ತಿಳಿಸಿದ್ದಾರೆ.

2022ರಲ್ಲಿ ವಿಶ್ವಸಂಸ್ಥೆಯ ಮಧ್ಯಸ್ಥಿಕೆಯ ಕದನ ವಿರಾಮವು ಯೆಮೆನ್ ನಲ್ಲಿ ದೊಡ್ಡ ಮಟ್ಟದ ಶಸ್ತ್ರಸಜ್ಜಿತ ಸಂಘರ್ಷವನ್ನು ತಡೆಗಟ್ಟಿದ ಬಳಿಕ, ಹೌದಿಗಳು ಮತ್ತು ಸೌದಿ ಬೆಂಬಲಿತ ಪಡೆಗಳ ನಡುವೆ ನಡೆದಿರುವ ಅತ್ಯಂತ ಗಂಭೀರವಾದ ಹೋರಾಟ ಇದಾಗಿದೆ. ಹೌದಿಗಳು ಯೆಮೆನ್ ನ ಕೆಂಪು ಸಮುದ್ರದ ಕರಾವಳಿಯ ಉದ್ದಕ್ಕೂ, ವಿಶೇಷವಾಗಿ ಮಹತ್ವದ ಬಾಬ್ ಅಲ್-ಮಂಡೆಬ್ ಜಲಸಂಧಿಯ ಸುತ್ತಮುತ್ತ ಪ್ರದೇಶಗಳನ್ನು ವಶಪಡಿಸಿಕೊಂಡಿದ್ದಾರೆ.

ಇದು ಸುಯೆಜ್ ಕಾಲುವೆಗೆ ಮತ್ತು ಅಲ್ಲಿಂದ ಸಂಚರಿಸಲು ಪ್ರಮುಖ ನೌಕಾ ಮಾರ್ಗವಾಗಿದ್ದು, ಇದು ಕೆಂಪು ಸಮುದ್ರವನ್ನು ಏಡನ್ ಕೊಲ್ಲಿಯೊಂದಿಗೆ ಸಂಪರ್ಕಿಸುತ್ತದೆ. ಹಾರ್ಮುಝ್ ಜಲಸಂಧಿಯ ಮೂಲಕ ತೈಲ ಮತ್ತು ಅನಿಲ ರಫ್ತಿಗೆ ಅಡ್ಡಿಯಾಗಿರುವ ಈ ಸಮಯದಲ್ಲಿ ಈ ಮಾರ್ಗದ ಮಹತ್ವವು ಮತ್ತಷ್ಟು ಹೆಚ್ಚಾಗಿದೆ.

ಈ ಗುಂಪು ಸೌದಿ ಅರೇಬಿಯಾದ ನಗರಗಳು ಮತ್ತು ಇಂಧನ ಮೂಲಸೌಕರ್ಯಗಳನ್ನು ಗುರಿಯಾಗಿಸಿ ಕ್ಷಿಪಣಿ ಹಾಗೂ ಡ್ರೋನ್ ದಾಳಿಗಳನ್ನು ತೀವ್ರಗೊಳಿಸಿದೆ.

►ಅಮೆರಿಕದ ನಿಲುವೇನು?

ಹೌದಿಗಳ ವಿರುದ್ಧ ನೇರ ಅಮೆರಿಕದ ಮಿಲಿಟರಿ ಕಾರ್ಯಾಚರಣೆ ನಡೆಸುವುದರಿಂದ ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇದುವರೆಗೆ ದೂರ ಉಳಿದಿದ್ದಾರೆ. ಹೌದಿಗಳ ವಿರುದ್ಧ ಹೋರಾಡಲು ಸೌದಿ ಯುವರಾಜ ಮೊಹಮ್ಮದ್ ಬಿನ್ ಸಲ್ಮಾನ್ ಅವರು ಅಮೆರಿಕದ ಅಧ್ಯಕ್ಷರಿಂದ ಮಿಲಿಟರಿ ನೆರವನ್ನು ಕೋರಿದ್ದಾರೆ ಎಂದು ಮೂಲಗಳನ್ನು ಉಲ್ಲೇಖಿಸಿ ರಾಯಿಟರ್ಸ್ ಸುದ್ದಿ ಸಂಸ್ಥೆ ಕಳೆದ ವಾರ ವರದಿ ಮಾಡಿದೆ.

ಹೌದಿಗಳ ಮೇಲೆ ಯುಎಸ್ ದಾಳಿ ನಡೆಸಲು ಟ್ರಂಪ್ ಒಪ್ಪಿಗೆ ನೀಡಿಲ್ಲ, ಆದರೆ ಗುಪ್ತಚರ ಮಾಹಿತಿ ಹಂಚಿಕೆ ಮತ್ತು ಗುರಿಯಿಡುವ ಕುರಿತು ನೆರವು ನೀಡುವುದಾಗಿ ವಾಷಿಂಗ್ಟನ್ ರಿಯಾದ್‌ ಗೆ ತಿಳಿಸಿದೆ ಎಂದು ಮೂಲಗಳು ಹೇಳಿರುವುದಾಗಿ Aljazeera ವರದಿ ಮಾಡಿದೆ.

ಕಳೆದ ವರ್ಷ ಹೌದಿಗಳ ವಿರುದ್ಧ ವಾಷಿಂಗ್ಟನ್ ನಡೆಸಿದ್ದ ಸ್ವಂತ ಕಾರ್ಯಾಚರಣೆಗೆ ಇದು ಭಿನ್ನವಾಗಿದೆ. ಆ ಸಂದರ್ಭದಲ್ಲಿ ಎರಡೂ ಪಕ್ಷಗಳು ಕದನ ವಿರಾಮಕ್ಕೆ ಒಪ್ಪಿಕೊಳ್ಳುವ ಮೊದಲು ಯುಎಸ್ ಪಡೆಗಳು ಎರಡು ತಿಂಗಳ ಕಾಲ ಹೌದಿಗಳ ಮೇಲೆ ಬಾಂಬ್ ದಾಳಿ ನಡೆಸಿದ್ದವು.

ಹಾಗಿದ್ದರೂ, ಟ್ರಂಪ್ ಆಡಳಿತವು ರಿಯಾದ್ನೊಂದಿಗೆ ತನ್ನ ವಿಶಾಲ ರಕ್ಷಣಾ ಸಂಬಂಧವನ್ನು ಮುಂದುವರೆಸಿದೆ. ಗುರುವಾರ, ಯುಎಸ್ ವಿದೇಶಾಂಗ ಇಲಾಖೆಯು 24.3 ಶತಕೋಟಿ ಡಾಲರ್ ಮೌಲ್ಯದ ಒಪ್ಪಂದದಡಿ ಸೌದಿ ಅರೇಬಿಯಾಕ್ಕೆ 48 F-35 ಯುದ್ಧವಿಮಾನಗಳ ಸಂಭಾವ್ಯ ಮಾರಾಟಕ್ಕೆ ಅನುಮೋದನೆ ನೀಡಿದೆ, ಆದರೂ ಈ ಮಾರಾಟಕ್ಕೆ ಇನ್ನೂ ಕಾಂಗ್ರೆಸ್ ನ ಅನುಮೋದನೆ ಬೇಕಾಗುತ್ತದೆ.

ಅಮೆರಿಕವು ಈ ಸಂಘರ್ಷದಲ್ಲಿ ಭಾಗಿಯಾಗುವ ಸಾಧ್ಯತೆಯಿದೆ ಎಂದು ಮಾಜಿ ಯುಎಸ್ ರಾಜತಾಂತ್ರಿಕ ವಿಲಿಯಂ ಲಾರೆನ್ಸ್ ಹೇಳಿದ್ದಾರೆ.

ಅಮೆರಿಕನ್ ವಿಶ್ವವಿದ್ಯಾಲಯದ ಅಂತಾರಾಷ್ಟ್ರೀಯ ಸಂಬಂಧಗಳ ಪ್ರಾಧ್ಯಾಪಕರಾದ ಲಾರೆನ್ಸ್ ಅಲ್ ಜಝೀರಾ ಜೊತೆ ಮಾತನಾಡಿ, "ಅವು ಯಾವುದೇ ಹಂತದಲ್ಲಿ ಯುದ್ಧದಲ್ಲಿ ಭಾಗಿಯಾಗಲಿವೆ ಎಂದು ನಾನು ಭಾವಿಸುತ್ತೇನೆ" ಎಂದರು.

ಯೆಮೆನ್ ನಲ್ಲಿನ ಪರಿಸ್ಥಿತಿಯು ತಮ್ಮದೇ ಆದ ಹಿತಾಸಕ್ತಿಗಳ ಮೇಲೆ ಪರಿಣಾಮ ಬೀರಿದಾಗ ಅಲ್ಲಿ ತೊಡಗಿಸಿಕೊಳ್ಳಲು ತಾವು ಸಿದ್ಧವಿರುವುದನ್ನು ಅವರು ಹಿಂದೆ ತೋರಿಸಿಕೊಟ್ಟಿದ್ದಾರೆ ಎಂದು ಅವರು ಹೇಳಿದರು.

ಹಾರ್ಮುಝ್ ಮತ್ತು ಬಾಬ್ ಅಲ್-ಮಂಡೆಬ್ ಜಲಸಂಧಿಗಳಲ್ಲಿನ ಸಂಘರ್ಷಗಳಿಗೂ ಹಾಗೂ ಜಾಗತಿಕ ಆರ್ಥಿಕತೆಗೂ ಇರುವ ಸಂಬಂಧವನ್ನು ಮತ್ತು ಸೌದಿ ಅರೇಬಿಯಾಕ್ಕೆ ಅಮೆರಿಕ ನೀಡಿದ ಭದ್ರತಾ ಬದ್ಧತೆಗಳನ್ನು ಅವರು ಉಲ್ಲೇಖಿಸಿದರು.

ಸೌದಿ ಅರೇಬಿಯಾವನ್ನು ರಕ್ಷಿಸಲು ಮತ್ತು ಹೌದಿಗಳು ತಮ್ಮ ಪ್ರಭಾವವನ್ನು ವಿಸ್ತರಿಸುವುದನ್ನು ತಡೆಯಲು ಅಮೆರಿಕವು "ಏನಾದರೂ ಮಾಡಬೇಕು" ಎಂಬ ಅಭಿಪ್ರಾಯವು ಕಳೆದ ಕೆಲವು ದಿನಗಳಿಂದ ಅಮೆರಿಕದಲ್ಲಿ ಹೆಚ್ಚಾಗುತ್ತಿದೆ ಎಂದು ಲಾರೆನ್ಸ್ ತಿಳಿಸಿದರು.

"ಅದು ಯಾವ ರೂಪದಲ್ಲಿರುತ್ತದೆ ಎಂಬುದು ಸ್ಪಷ್ಟವಾಗಿಲ್ಲ" ಎಂದು ಅವರು ಹೇಳಿದರು.

ಆದರೆ, ಸೌದಿ ಅರೇಬಿಯಾದಲ್ಲಿ ಸುಮಾರು 100 ಯುಎಸ್ ಮಿಲಿಟರಿ ಸಲಹೆಗಾರರಿದ್ದಾರೆ ಮತ್ತು ವ್ಯಾಪಕವಾದ ಗುಪ್ತಚರ, ಕಣ್ಗಾವಲು ಹಾಗೂ ಮರುಪರಿಶೀಲನಾ ಬೆಂಬಲದೊಂದಿಗೆ ವಾಷಿಂಗ್ಟನ್ ಈಗಾಗಲೇ ಆಳವಾಗಿ ತೊಡಗಿಸಿಕೊಂಡಿದೆ. ಹಾಗಾಗಿ, ಅಮೆರಿಕನ್ನರು ಮತ್ತಷ್ಟು ತೊಡಗಿಸಿಕೊಳ್ಳುವುದು ದೊಡ್ಡ ಮಟ್ಟದ ಹೆಜ್ಜೆಯಾಗಲಾರದು" ಎಂದು ಲಾರೆನ್ಸ್ ಹೇಳಿದ್ದಾರೆ.

ಸೌಜನ್ಯ: Aljazeera.com