ನ್ಯೂಟನ್‌ ನಿಂದ ನೋಬೆಲ್ ವಿಜೇತರವರೆಗೆ; ಭವಿಷ್ಯದಲ್ಲಿ ಬಹುಮುಖಿ ಶಿಕ್ಷಣವೇ ಏಕೈಕ ದಾರಿ!

ವಿಷಯಗಳನ್ನು ಮೀರಿ ಕಲಿಯುವ ಕಲ್ಪನೆ ಹೊಸದಲ್ಲ. ಬದಲಾಗುತ್ತಿರುವುದು ಆ ವಿಷಯಗಳನ್ನು ಅಧಿಕೃತವಾಗಿ ಸಂಯೋಜಿಸುವ ಅವಕಾಶ. ಜಗತ್ತಿನಲ್ಲಿ ಸಮಸ್ಯೆಗಳು ಒಂದು ಕ್ಷೇತ್ರಕ್ಕೆ ಸೀಮಿತವಾಗಿರುವುದು ವಿರಳವಾಗಿರುವಾಗ, ಹಾಗೆ ಮಾಡುವ ಅಗತ್ಯವಿದೆ.

ಲಿಯನಾರ್ಡೊ ಡಾ ವಿನ್ಸಿ ಅವರನ್ನು ಒಬ್ಬ ಕಲಾವಿದನಿಗಿಂತ ಮಿಗಿಲಾದ ವ್ಯಕ್ತಿಯಾಗಿ ಸ್ಮರಿಸಿಕೊಳ್ಳಲು ಕಾರಣವಿದೆ. ಅವರು ಮೊನಾಲಿಸಾ ಚಿತ್ರವನ್ನು ರಚಿಸಿದ್ದರು. ಆದರೆ ಅವರಿಗೆ ಅಂಗರಚನಾಶಾಸ್ತ್ರ, ಎಂಜಿನಿಯರಿಂಗ್, ಗಣಿತ ಮತ್ತು ಪ್ರಕೃತಿಯ ಕಾರ್ಯವೈಖರಿಯ ಬಗ್ಗೆ ಅತೀವ ಆಸಕ್ತಿ ಇತ್ತು. ಐಸಾಕ್ ನ್ಯೂಟನ್ ಅವರನ್ನು ಭೌತವಿಜ್ಞಾನಿ ಮತ್ತು ಗಣಿತಜ್ಞರಾಗಿ ನೆನೆಯಲಾಗುತ್ತದೆ. ಆದರೆ ಅವರ ಆಸಕ್ತಿಗಳು ತಾತ್ವಿಕ ಸಿದ್ಧಾಂತ (theology) ಮತ್ತು ಜ್ಞಾನದ ಇತರ ಕ್ಷೇತ್ರಗಳಿಗೂ ವಿಸ್ತರಿಸಿದ್ದವು.

ಹೀಗಾಗಿ ವಿಷಯಗಳನ್ನು ಮೀರಿ ಕಲಿಯುವ ಕಲ್ಪನೆ ಹೊಸದಲ್ಲ. ಬದಲಾಗುತ್ತಿರುವುದು ಆ ವಿಷಯಗಳನ್ನು ಅಧಿಕೃತವಾಗಿ ಸಂಯೋಜಿಸುವ ಅವಕಾಶ. ಜಗತ್ತಿನಲ್ಲಿ ಸಮಸ್ಯೆಗಳು ಒಂದು ಕ್ಷೇತ್ರಕ್ಕೆ ಸೀಮಿತವಾಗಿರುವುದು ವಿರಳವಾಗಿರುವಾಗ, ಹಾಗೆ ಮಾಡುವ ಅಗತ್ಯವಿದೆ. ಭವಿಷ್ಯದಲ್ಲಿ ವಿದ್ಯಾರ್ಥಿಗಳು ಜೀವಶಾಸ್ತ್ರದ ಜೊತೆಗೆ ಎಂಜಿನಿಯರಿಂಗ್, ಗಣಿತದ ಜೊತೆಗೆ ಅರ್ಥಶಾಸ್ತ್ರ ಅಥವಾ ಕೃತಕ ಬುದ್ಧಿಮತ್ತೆಯ ಜೊತೆಗೆ ವೈದ್ಯಕೀಯವನ್ನು ಅಧ್ಯಯನ ಮಾಡಬಹುದೆ?

2026ರ ನೋಬೆಲ್ ವಿಜೇತರು ಇದಕ್ಕೆ ಸಕಾಲಿಕ ಉದಾಹರಣೆ. ಅವರ ಶೈಕ್ಷಣಿಕ ಅಧ್ಯಯನಗಳು ಮತ್ತು ಸಂಶೋಧನೆಗಳು ಜೀವಶಾಸ್ತ್ರ ಮತ್ತು ಜೈವಿಕ ಭೌತಶಾಸ್ತ್ರದಿಂದ ನರವಿಜ್ಞಾನದವರೆಗೆ, ಕಣ ಭೌತಶಾಸ್ತ್ರದಿಂದ ಖಗೋಳಶಾಸ್ತ್ರದವರೆಗೆ ಮತ್ತು ರಸಾಯನಶಾಸ್ತ್ರದಿಂದ ಜೀವಶಾಸ್ತ್ರ ಹಾಗೂ ಔಷಧಶಾಸ್ತ್ರದವರೆಗೆ ಸಾಗಿವೆ. ಪ್ರಶ್ನೆಯೆಂದರೆ, ಇನ್ನು ಮುಂದೆ ವಿದ್ಯಾರ್ಥಿಗಳು ಯಾವ ವಿಷಯವನ್ನು ಆಯ್ದುಕೊಳ್ಳಬೇಕು ಎನ್ನುವುದಕ್ಕಿಂತ, ಯಾವ ವಿಷಯದ ಜೊತೆಗೆ ಸಂಯೋಜಿಸಿ ಕಲಿಯಬೇಕು ಎನ್ನುವುದು ಮುಖ್ಯವಾಗುತ್ತದೆ.

ಈ ವರ್ಷದ ಶರೀರಶಾಸ್ತ್ರ ಅಥವಾ ವೈದ್ಯಕೀಯದ ನೋಬೆಲ್ ಪ್ರಶಸ್ತಿಯನ್ನು ಗಮನಿಸಿ. ಕಾರ್ಲ್ ಡೀಸೆರೋತ್, ಪೀಟರ್ ಹೆಗೆಮನ್ ಮತ್ತು ಜಾರ್ಜ್ ನಾಗೆಲ್ ಅವರು ನರಕೋಶಗಳನ್ನು ನಿಯಂತ್ರಿಸಲು ಬೆಳಕನ್ನು ಬಳಸುವ ತಂತ್ರಜ್ಞಾನವಾದ ಆಪ್ಟೊಜೆನೆಟಿಕ್ಸ್‌ಗೆ ಕಾರಣವಾದ ಸಂಶೋಧನೆಗಳಿಗಾಗಿ ಗುರುತಿಸಿಕೊಂಡಿದ್ದಾರೆ.

ಸಂಶೋಧನೆಯು ಬೆಳಕು-ಸೂಕ್ಷ್ಮ ಪ್ರೋಟೀನ್‌ಗಳು, ಜೀವಶಾಸ್ತ್ರ, ಜೈವಿಕ ಭೌತಶಾಸ್ತ್ರ ಮತ್ತು ನರ ವಿಜ್ಞಾನದ ಜ್ಞಾನವನ್ನು ಒಟ್ಟುಗೂಡಿಸಿದೆ. ಪಾಚಿಗಳಲ್ಲಿ ಕಂಡುಬರುವ ಪ್ರೋಟೀನ್‌ಗಳ ಮೇಲಿನ ಕೆಲಸವು ಅಂತಿಮವಾಗಿ ಸಂಶೋಧಕರಿಗೆ ಮೆದುಳಿನ ಕಾರ್ಯನಿರ್ವಹಣೆಯನ್ನು ತನಿಖೆ ಮಾಡಲು ಸಹಾಯ ಮಾಡಿದೆ.

ಭೌತಶಾಸ್ತ್ರ ಪ್ರಶಸ್ತಿ ವಿಜೇತ ಫ್ರಾನ್ಸಿಸ್ ಹಾಲ್ಜೆನ್ ಮತ್ತೊಂದು ಉದಾಹರಣೆಯನ್ನು ನೀಡಿದ್ದಾರೆ. ಐಸ್‌ಕ್ಯೂಬ್ ನ್ಯೂಟ್ರಿನೊ ವೀಕ್ಷಣಾಲಯದ ಮೇಲಿನ ಅವರ ಕೆಲಸವು ಕಣ ಭೌತಶಾಸ್ತ್ರವನ್ನು ಖಗೋಳ ಭೌತಶಾಸ್ತ್ರ, ಎಂಜಿನಿಯರಿಂಗ್ ಮತ್ತು ದತ್ತಾಂಶ ವಿಶ್ಲೇಷಣೆಯೊಂದಿಗೆ ಸಂಯೋಜಿಸಿ, ಬಾಹ್ಯಾಕಾಶದಿಂದ ಬರುವ ಹೆಚ್ಚಿನ ಶಕ್ತಿಯ ನ್ಯೂಟ್ರಿನೊಗಳನ್ನು ಅಧ್ಯಯನ ಮಾಡಿದೆ.

ರಸಾಯನಶಾಸ್ತ್ರದ ನೋಬೆಲ್ ವಿಜೇತರಾದ ಹೆನ್ರಿ ಕಗನ್ ಮತ್ತು ಕೆನ್ಸೊ ಸೋಯಿ ಅವರು ಜೈವಿಕ ರಸಾಯನಶಾಸ್ತ್ರ ಮತ್ತು ಔಷಧಗಳಿಗೆ ಸಂಬಂಧಿಸಿದ ಪ್ರಶ್ನೆಗಳೊಂದಿಗೆ ಸಂಪರ್ಕ ಹೊಂದಿರುವ ಅಸಮ್ಮಿತ ಸಾವಯವ ಸಂಶ್ಲೇಷಣೆ ಮತ್ತು ಸ್ವಯಂ ವೇಗವರ್ಧನೆಯ ಸಂಶೋಧನೆಗಾಗಿ ಗುರುತಿಸಿಕೊಂಡಿದ್ದಾರೆ.

ಈ ಶೈಕ್ಷಣಿಕ ಸಾಧನೆಗಳು ಪ್ರಮುಖ ಪ್ರಶ್ನೆಯೊಂದನ್ನು ಹುಟ್ಟುಹಾಕುತ್ತವೆ. ಸಂಶೋಧನೆ ಹೆಚ್ಚಾಗಿ ವಿಷಯಗಳ ಗಡಿಗಳನ್ನು ದಾಟಿದರೆ, ಪದವಿಪೂರ್ವ ಶಿಕ್ಷಣವು ವಿದ್ಯಾರ್ಥಿಗಳಿಗೆ ಅದೇ ರೀತಿ ಮಾಡಲು ಸುಲಭವಾಗಿಸಬೇಕೆ?

ಐಐಟಿ ಜಮ್ಮುವಿನ ರಾಸಾಯನಿಕ ಎಂಜಿನಿಯರಿಂಗ್ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಹಾಗೂ ಅಂತರಶಿಸ್ತೀಯ ಕಾರ್ಯಕ್ರಮಗಳು ಮತ್ತು ಜೈವಿಕ ವಿಜ್ಞಾನ ಹಾಗೂ ಜೈವಿಕ ಎಂಜಿನಿಯರಿಂಗ್ ವಿಭಾಗಗಳ ಸಹವರ್ತಿ ಪ್ರಾಧ್ಯಾಪಕರಾದ ಡಾ. ಗೌರವ್ ಎ. ಭಾದುರಿ ಅವರ ಪ್ರಕಾರ, ಅಂತರಶಿಸ್ತೀಯ ವಿಜ್ಞಾನದ ಸಂಪ್ರದಾಯವು ಇತ್ತೀಚಿನ ನೋಬೆಲ್ ಪ್ರಶಸ್ತಿಗಳಿಗಿಂತಲೂ ಬಹಳ ಹಿಂದಿನಿಂದಲೇ ಅಸ್ತಿತ್ವದಲ್ಲಿದೆ! “ಆದರೆ ಇಂದು ವಿವಿಧ ಕ್ಷೇತ್ರಗಳು ಪರಸ್ಪರ ಸೇರಿಕೊಳ್ಳುತ್ತಿರುವ ವೇಗ ಮತ್ತು ವ್ಯಾಪ್ತಿ ಹೆಚ್ಚಾಗಿದೆ. ಹೀಗಾಗಿ ಮೂಲ ವಿಷಯದ ಮೇಲೆ ಹಿಡಿತವಿರಲಿ, ಆದರೆ ಅದಕ್ಕೆ ಮಿತಿಯಾಗಿರಲು ಬಿಡಬೇಡಿ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಮತ್ತೊಂದೆಡೆ, ಐಐಟಿ ಭುವನೇಶ್ವರದ ನಿರ್ದೇಶಕರಾದ ಪ್ರೊಫೆಸರ್ ಶ್ರೀಪಾದ್ ಕರ್ಮಲ್ಕರ್ ಅವರು, ವಿದ್ಯಾರ್ಥಿಗಳು ಇತರ ಕ್ಷೇತ್ರಗಳತ್ತ ವಿಸ್ತರಿಸಿಕೊಳ್ಳುವ ಮೊದಲು ನಿರ್ದಿಷ್ಟ ವಿಷಯದಲ್ಲಿ ಆಳವಾದ ಜ್ಞಾನ ಬೆಳೆಸಿಕೊಳ್ಳಬೇಕು. ಏಕೆಂದರೆ, ಮೂಲ ವಿಷಯದಲ್ಲಿ ಬುನಾದಿ ಮಟ್ಟದ ಪರಿಣತಿಯಿಲ್ಲದೆ ಹೊಸ ಆಲೋಚನೆಗಳು ಸಾಧ್ಯವಿಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ವಿಶ್ವ ಆರ್ಥಿಕ ವೇದಿಕೆಯ 2025ರ ಉದ್ಯೋಗಗಳ ಭವಿಷ್ಯದ ವರದಿಯ ಪ್ರಕಾರ, 2030ರ ವೇಳೆಗೆ ಕಾರ್ಮಿಕರ ಪ್ರಮುಖ ಕೌಶಲ್ಯಗಳಲ್ಲಿ ಶೇ 39ರಷ್ಟು ಬದಲಾವಣೆಯಾಗಲಿದೆ. AI ಮತ್ತು ದೊಡ್ಡ ದತ್ತಾಂಶ ವ್ಯವಸ್ಥೆಗಳು ವೇಗವಾಗಿ ಬೆಳೆಯುತ್ತಿರುವ ಕೌಶಲ್ಯಗಳಲ್ಲಿ ಸೇರಿವೆ. ಜೊತೆಗೆ, ವಿಶ್ಲೇಷಣಾತ್ಮಕ ಮತ್ತು ಸೃಜನಶೀಲ ಚಿಂತನೆಗೆ ನಿರಂತರ ಬೇಡಿಕೆಯಿದೆ. ಹೀಗಾಗಿ ವಿದ್ಯಾರ್ಥಿಗಳು ಜೀವಶಾಸ್ತ್ರದ ಜೊತೆಗೆ ಕಂಪ್ಯೂಟಿಂಗ್ ಅಥವಾ AI ಜೊತೆಗೆ ಎಂಜಿನಿಯರಿಂಗ್‌ ನಂತಹ ಸಂಯೋಜನೆಗಳನ್ನು ಅನ್ವೇಷಿಸುವುದು ಯೋಗ್ಯವೆನಿಸುತ್ತದೆ.