ಪಶ್ಚಿಮ ಬಂಗಾಳ ಉಪಚುನಾವಣೆಯಲ್ಲಿ ಬಿಜೆಪಿಗೆ ಗೆಲುವು: ಚುನಾವಣಾ ಅಕ್ರಮ ಆರೋಪದ ಪೋಸ್ಟ್‌ಗಳು, ಪೇಜ್‌ಗಳನ್ನು ನಿರ್ಬಂಧಿಸಿದ ಫೇಸ್‌ಬುಕ್; altnews ವರದಿ
Photo Credit : PTI
ಪಶ್ಚಿಮ ಬಂಗಾಳದ ರೇಜಿನಗರ ಮತ್ತು ನಂದಿಗ್ರಾಮ ವಿಧಾನಸಭಾ ಕ್ಷೇತ್ರಗಳ ಉಪಚುನಾವಣೆಯು ಶುಕ್ರವಾರ (ಅ.9) ಮುಕ್ತಾಯಗೊಂಡಿದ್ದು, ಎರಡೂ ಕ್ಷೇತ್ರಗಳಲ್ಲಿ ಬಿಜೆಪಿ ಜಯಗಳಿಸಿದೆ. ರೇಜಿನಗರದಲ್ಲಿ ಬಿಜೆಪಿಯ ಶಂಖರವ್ ಸರ್ಕಾರ ಮತ್ತು ನಂದಿಗ್ರಾಮದಲ್ಲಿ ಹಾಸಿರಾಣಿ ರಥ್ ಜಯಭೇರಿ ಬಾರಿಸಿದ್ದಾರೆ.
ಆದರೆ, ಎರಡೂ ಕ್ಷೇತ್ರಗಳ ಮತದಾನದ ವೇಳೆ ಅಕ್ರಮಗಳು ನಡೆದಿವೆ ಎಂಬ ಆರೋಪಗಳು ಕೇಳಿಬಂದಿದ್ದು, ಮರುಮತದಾನ ನಡೆಸುವಂತೆ ಕಾಂಗ್ರೆಸ್ ಒತ್ತಾಯಿಸಿದೆ.
ಈ ಆರೋಪಗಳ ನಡುವೆಯೇ ಡಿಜಿಟಲ್ ಸೆನ್ಸಾರ್‌ಶಿಪ್ ಹೊಸ ವಿವಾದಕ್ಕೆ ಕಾರಣವಾಗಿದ್ದು, ಚುನಾವಣಾ ಅಕ್ರಮಗಳು ಮತ್ತು ಮತ ಕಳ್ಳತನದ ಆರೋಪಗಳನ್ನು ಬಿಂಬಿಸುವ ಸಾಮಾಜಿಕ ಮಾಧ್ಯಮದ ಕಂಟೆಂಟ್‌ಗಳನ್ನು ಭಾರತದಲ್ಲಿ ನಿರ್ಬಂಧಿಸಲಾಗಿದೆ. ಆಡಳಿತರೂಢ ಪಕ್ಷದ ವಿರುದ್ಧದ ಆನ್‌ಲೈನ್ ಟೀಕೆಗಳನ್ನು ಹತ್ತಿಕ್ಕಲಾಗುತ್ತಿದೆ ಎಂಬ ಕಳವಳಗಳೂ ಈ ನಿರ್ಬಂಧಗಳಿಂದ ಹೆಚ್ಚಾಗಿವೆ. ಕಳೆದ ಕೆಲವು ತಿಂಗಳಿಂದ ಭಾರತದಲ್ಲಿ ನಡೆಯುತ್ತಿರುವ ಈ ಸಾಮಾಜಿಕ ಮಾಧ್ಯಮ ಸೆನ್ಸಾರ್‌ಶಿಪ್ ಬಗ್ಗೆ 'ಆಲ್ ನ್ಯೂಸ್' ವಿಸ್ತೃತವಾಗಿ ವರದಿ ಮಾಡಿದೆ.
ಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮಾಧ್ಯಮ ನೀತಿ ಸಂಹಿತೆ) ನಿಯಮಗಳ ಅಡಿಯಲ್ಲಿ, ಅಕ್ಟೋಬರ್ 7 ರಂದು ಪಶ್ಚಿಮ ಬಂಗಾಳ ಪ್ರದೇಶ ಕಾಂಗ್ರೆಸ್‌ನ ಮುರ್ಷಿದಾಬಾದ್ ಜಿಲ್ಲಾ ಘಟಕದ ಫೇಸ್‌ಬುಕ್ ಪೇಜ್ ಅನ್ನು (@DCCMurshidabad) ನಿರ್ಬಂಧಿಸಲಾಗಿದೆ.
ಅದೇ ದಿನ, ಪ್ರಮುಖ ಸ್ಥಳೀಯ ಸುದ್ದಿ ಸಂಸ್ಥೆಯಾದ 'ಎನ್‌ಬಿಟಿವಿ ಬಂಗಾಳ'ದ (@nbtvbngla) ಫೇಸ್‌ಬುಕ್ ಪೇಜ್‌ಗೂ ಅದೇ ಅಧಿಸೂಚನೆ ನೀಡಿ ಭಾರತದಲ್ಲಿ ಏಳು ದಿನಗಳ ಕಾಲ ನಿರ್ಬಂಧ ವಿಧಿಸಲಾಗಿದೆ. ಐದು ಲಕ್ಷಕ್ಕೂ ಅಧಿಕ ಫಾಲೋವರ್‌ಗಳನ್ನು ಹೊಂದಿರುವ ಈ ಸುದ್ದಿ ಸಂಸ್ಥೆಯು, ನಂದಿಗ್ರಾಮ ಮತ್ತು ರೇಜಿನಗರ ಉಪಚುನಾವಣೆಗಳ ಸಂದರ್ಭದಲ್ಲಿ ಸರ್ಕಾರ ಅಥವಾ ಕಾನೂನು ಸುವ್ಯವಸ್ಥೆಯ ವೈಫಲ್ಯಗಳ ಬಗ್ಗೆ ವಿಮರ್ಶಾತ್ಮಕವಾಗಿ ವರದಿ ಮಾಡಿತ್ತು.
ಎನ್‌ಬಿಟಿವಿ ಸಂಸ್ಥೆಯು ಫೇಸ್‌ಬುಕ್‌ನಲ್ಲಿ ಅಪ್‌ಲೋಡ್ ಮಾಡಿದ್ದ ಹಾಗೂ ಭಾರತದಲ್ಲಿ ನಿರ್ಬಂಧಕ್ಕೊಳಗಾಗಿದ್ದ ಎರಡು ವಿಡಿಯೊಗಳು, ರೇಜಿನಗರ ಉಪಚುನಾವಣೆಯಲ್ಲಿ ನಡೆದ ಮತದಾನದ ಅಕ್ರಮಗಳ ಆರೋಪಗಳಿಗೆ ನೇರವಾಗಿ ಸಂಬಂಧಿಸಿದ್ದವು ಎಂಬುದು 'ಆಲ್ಟ್ ನ್ಯೂಸ್'ಗೆ ತಿಳಿದುಬಂದಿದೆ.
ಇನ್‌ಸ್ಟಾಗ್ರಾಮ್‌ನಲ್ಲಿ ಇಂದಿಗೂ ಲಭ್ಯವಿರುವ ಈ ಎರಡು ವಿಡಿಯೊಗಳಲ್ಲಿ, ಮೊದಲನೆಯ ವಿಡಿಯೊದಲ್ಲಿನ ಮಹಿಳೆಯೊಬ್ಬರು ರೇಜಿನಗರದ ಮತದಾರರಿಗೆ ಬೆದರಿಕೆ ಹಾಕಿ ಮತಗಟ್ಟೆಯಿಂದ ವಾಪಸ್ ಕಳುಹಿಸಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ. ಅದೇ ವಿಡಿಯೊದಲ್ಲಿ ಕಾಣಿಸಿಕೊಂಡಿರುವ ವ್ಯಕ್ತಿಯೊಬ್ಬರು, 10 ಮತದಾರರು ಸಹ ತಮ್ಮ ಹಕ್ಕು ಚಲಾಯಿಸಲು ಸಾಧ್ಯವಾಗಿಲ್ಲ ಎಂದು ಹೇಳಿದ್ದಾರೆ.
ಮತ್ತೊಂದು ವಿಡಿಯೊದಲ್ಲಿ ರೇಜಿನಗರದ ಮಿರ್ಜಾಪುರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಮತದಾರರು ಆರೋಪಗಳನ್ನು ಮಾಡಿದ್ದಾರೆ. ವಿಡಿಯೊದಲ್ಲಿರುವ ವ್ಯಕ್ತಿಯೊಬ್ಬರು, "ನಾನು ಯಾರಿಗೆ ಮತ ಹಾಕಬೇಕು ಎಂಬುದು ನನ್ನ ಸ್ವಂತ ನಿರ್ಧಾರ. ನಾವು ಇನ್ನು ಮತವನ್ನೇ ಚಲಾಯಿಸಿರಲಿಲ್ಲ, ಅಷ್ಟರಲ್ಲಾಗಲೇ ನಮ್ಮ ಬೆರಳಿಗೆ ಶಾಯಿ ಹಾಕಿ ಮನೆಗೆ ಕಳುಹಿಸಿದರು" ಎಂದು ದೂರಿದ್ದಾರೆ.
"ಈ ರೀತಿ ನಡೆಯುತ್ತಿರುವುದು ಇದೇ ಮೊದಲೇನಲ್ಲ. ಹಿಂದೆ ಕೂಡ ನಮ್ಮ ಹಲವು ಸಾಮಾಜಿಕ ಮಾಧ್ಯಮ ಪೋಸ್ಟ್‌ಗಳನ್ನು ನಿರ್ಬಂಧಿಸಲಾಗಿತ್ತು" ಎಂದು ಎನ್‌ಬಿಟಿವಿ ವರದಿಗಾರ್ತಿ ಝೇಬಾ ನೋಶಿನ್ ಆಲ್ಟ್ ನ್ಯೂಸ್‌ಗೆ ತಿಳಿಸಿದ್ದಾರೆ.
ಕಾಂಗ್ರೆಸ್‌ನ ಮುರ್ಷಿದಾಬಾದ್ ಜಿಲ್ಲಾ ಪೇಜ್ ಮತ್ತು ಎನ್‌ಬಿಟಿವಿ ಬಂಗಾಳ ಸಂಸ್ಥೆಗಳಿಗೆ ಬಂದಿರುವ ನೋಟಿಸ್‌ಗಳಲ್ಲಿ, ಕಾನೂನು ಅಗತ್ಯತೆಗಳಿಗೆ ಅನುಗುಣವಾಗಿ ಖಾತೆಯನ್ನು ನಿರ್ಬಂಧಿಸಲಾಗಿದೆ ಎಂದು ಉಲ್ಲೇಖಿಸಲಾಗಿದೆ. ಅಂದರೆ, ಮೆಟಾ ಸಂಸ್ಥೆಯ ಸ್ವಂತ ಕಂಟೆಂಟ್ ನಿಯಂತ್ರಣ ಪ್ರಕ್ರಿಯೆಯ ಬದಲಿಗೆ, ಈ ಪೇಜ್‌ಗಳಲ್ಲಿನ ವಿಷಯಗಳಿಗೆ ಸಂಬಂಧಿಸಿದಂತೆ ಬಂದಿರುವ ಕಾನೂನುಬದ್ಧ ಮನವಿ ಅಥವಾ ಅಧಿಕೃತ ದೂರಿನ ಆಧಾರದ ಮೇಲೆ ಈ ಕ್ರಮ ಕೈಗೊಳ್ಳಲಾಗಿದೆ ಎಂಬುದನ್ನು ಇದು ತೋರಿಸುತ್ತದೆ.
ಬಂಗಾಳಿ ಡಿಜಿಟಲ್ ಮಾಧ್ಯಮ ಸಂಸ್ಥೆ Inscript.me ಫೇಸ್‌ಬುಕ್‌ನಲ್ಲಿ ಅಪ್‌ಲೋಡ್ ಮಾಡಿದ್ದ ವಿಡಿಯೊ ಒಂದನ್ನು, ಮತದಾನದ ದಿನವಾದ ಅಕ್ಟೋಬರ್ 6 ರಂದು ಮಾಹಿತಿ ತಂತ್ರಜ್ಞಾನ (ಐಟಿ) ಕಾಯ್ದೆ 2000ರ ಸೆಕ್ಷನ್ 79(3)(b) ಅಡಿಯಲ್ಲಿ ಭಾರತದಲ್ಲಿ ನಿರ್ಬಂಧಿಸಲಾಗಿತ್ತು. ರೇಜಿನಗರದಲ್ಲಿ ನಡೆದ ಮತದಾನದ ಅಕ್ರಮದ ಆರೋಪಗಳಿಗೆ ಸಂಬಂಧಿಸಿದ ವಿಡಿಯೊ ಇದಾಗಿತ್ತು ಎಂದು ಆ ಸಂಸ್ಥೆಯ ಪ್ರತಿನಿಧಿಯೊಬ್ಬರು ಆಲ್ಟ್ ನ್ಯೂಸ್‌ಗೆ ತಿಳಿಸಿದ್ದಾರೆ.
ಮೆಟಾ ಕಳುಹಿಸಿದ ನೋಟಿಸ್‌ನಲ್ಲಿ ಕಾಣಿಸುವ ವಿಡಿಯೊದ ಶೀರ್ಷಿಕೆಯು, "ಉಪಚುನಾವಣೆಯಲ್ಲಿ ಅಕ್ರಮ ನಡೆದಿದೆ ಎಂದು ಆರೋಪಿಸಿದ ರೇಜಿನಗರದ ಜನತೆ" ಎಂದಿದೆ.
ಅಕ್ಟೋಬರ್ 9 ರಂದು,ಜ್ಞಾನೇಶ್ ಕುಮಾರ್ ಅವರ ರಾಜೀನಾಮೆಗೆ ಆಗ್ರಹಿಸಿ ನಡೆದ ಪ್ರತಿಭಟನೆಯ ವೇಳೆ ದಿಲ್ಲಿ ಪೊಲೀಸರು ರಾಹುಲ್ ಗಾಂಧಿ ಅವರನ್ನು ವಶಕ್ಕೆ ಪಡೆದ ವರದಿಗೆ ಸಂಬಂಧಿಸಿದ 'Inscript.me' ಸಂಸ್ಥೆಯ ಮತ್ತೊಂದು ಫೇಸ್‌ಬುಕ್ ಪೋಸ್ಟ್ ಅನ್ನು ಸಹ ನಿರ್ಬಂಧಿಸಲಾಗಿದೆ.
ಸುಮಾರು 2.5 ಲಕ್ಷ ಫಾಲೋವರ್‌ಗಳನ್ನು ಹೊಂದಿರುವ ತಮ್ಮ ಫೇಸ್‌ಬುಕ್ ಪೇಜ್ ಅನ್ನು ಏಳು ದಿನಗಳ ಕಾಲ ನಿರ್ಬಂಧಿಸಲಾಗಿದೆ ಎಂದು ದಿಯಾ ಮೈತಿ ಎಂಬ ಬಳಕೆದಾರರು ಆರೋಪಿಸಿದ್ದಾರೆ. ಇವರು ಕೂಡ ರೇಜಿನಗರ ಕ್ಷೇತ್ರದಲ್ಲಿ ನಡೆದ ಮತದಾನದ ಅಕ್ರಮಗಳ ಕುರಿತು ಪೋಸ್ಟ್‌ಗಳನ್ನು ಹಂಚಿಕೊಳ್ಳುತ್ತಿದ್ದರು.
ಅಕ್ರಮ, ಅವ್ಯವಹಾರ ಮತ್ತು ಬೆದರಿಕೆ: ವಿಪಕ್ಷಗಳ ಆರೋಪ
ಎಜೆ ಯುಪಿ (AJUP) ಮುಖ್ಯಸ್ಥ ಹುಮಾಯೂನ್ ಕಬೀರ್ ಮತ್ತು ಬಂಗಾಳದ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ತಲಾ ಎರಡು ಕ್ಷೇತ್ರಗಳಲ್ಲಿ ಜಯಗಳಿಸಿದ ನಂತರ, ತಮ್ಮ ಒಂದೊಂದು ಸ್ಥಾನಗಳಿಗೆ ರಾಜೀನಾಮೆ ನೀಡಿದ್ದರಿಂದ ಮುರ್ಷಿದಾಬಾದ್‌ನ ರೇಜಿನಗರ ಮತ್ತು ಪೂರ್ವ ಮೇದಿನಿಪುರದ ನಂದಿಗ್ರಾಮ ಕ್ಷೇತ್ರಗಳಲ್ಲಿ ಅಕ್ಟೋಬರ್ 6 ರಂದು ಉಪಚುನಾವಣೆ ನಡೆದಿತ್ತು.
ಸುವೇಂದು ಅಧಿಕಾರಿ ಅವರ ಸ್ವಕ್ಷೇತ್ರವಾದ ನಂದಿಗ್ರಾಮದಲ್ಲಿ ಶೇಕಡಾ 27 ರಷ್ಟು ಮುಸ್ಲಿಂ ಜನಸಂಖ್ಯೆಯಿದೆ. ಅವರು ಈ ಸ್ಥಾನವನ್ನು ತೆರವುಗೊಳಿಸಿ, ಮಾಜಿ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರನ್ನು ಸೋಲಿಸಿದ್ದ ಭವಾನಿಪುರ ಕ್ಷೇತ್ರವನ್ನು ಉಳಿಸಿಕೊಂಡರು.
ರೇಜಿನಗರ ಕ್ಷೇತ್ರದ ಪರಿಸ್ಥಿತಿ ಸಂಪೂರ್ಣ ವಿಭಿನ್ನವಾಗಿದ್ದು, ಇಲ್ಲಿ ಶೇಕಡಾ 69 ರಷ್ಟು ಮುಸ್ಲಿಂ ಮತದಾರರಿದ್ದಾರೆ. ಹುಮಾಯೂನ್ ಕಬೀರ್ ಅವರು ನೌದಾ ಮತ್ತು ರೇಜಿನಗರ ಎರಡೂ ಕ್ಷೇತ್ರಗಳಲ್ಲಿ ಗೆದ್ದಿದ್ದರು. 58,000ಕ್ಕೂ ಹೆಚ್ಚು ಮತಗಳ ಅಂತರದಿಂದ ಗೆದ್ದಿದ್ದ ರೇಜಿನಗರ ಕ್ಷೇತ್ರಕ್ಕೆ ಅವರು ರಾಜೀನಾಮೆ ನೀಡಿದ್ದರು. ಅವರು ತೆರವುಗೊಳಿಸಿದ ಈ ಕ್ಷೇತ್ರದಲ್ಲಿ ಅವರ ಪುತ್ರ ಗುಲಾಂ ನಬಿ ಆಜಾದ್ ಸ್ಪರ್ಧಿಸಿದ್ದರು.
ಚುನಾವಣೆಯ ಪೂರ್ವಭಾವಿಯಾಗಿ ಬಿಜೆಪಿ ಮತಗಳನ್ನು ಅಕ್ರಮವಾಗಿ ತಿದ್ದುತ್ತಿದೆ ಮತ್ತು ಒತ್ತಡದ ತಂತ್ರಗಳನ್ನು ಬಳಸುತ್ತಿದೆ ಎಂದು ವಿಪಕ್ಷ ಮುಖಂಡರು ಪದೇ ಪದೇ ಆರೋಪಿಸಿದ್ದರು. ಮತದಾನದ ದಿನದಂದು, ಎಜೆ ಯುಪಿ ಮುಖ್ಯಸ್ಥರನ್ನು ವಾಗ್ವಾದದ ನಂತರ ಪೊಲೀಸರು ವಶಕ್ಕೆ ಪಡೆದರು. ರೇಜಿನಗರ ಪೊಲೀಸ್ ಠಾಣೆಯಲ್ಲಿ 12 ಗಂಟೆಗಳ ಕಾಲ ವಶದಲ್ಲಿದ್ದ ನಂತರ ಅವರನ್ನು ಬಿಡುಗಡೆ ಮಾಡಲಾಯಿತು.
ರೇಜಿನಗರದ ಕಾಂಗ್ರೆಸ್ ಅಭ್ಯರ್ಥಿ ಅಬ್ದುಲ್ಲಾಹಿಲ್ ಕಾಫಿ, ಮತದಾನದ ದಿನದಂದು ರೇಜಿನಗರ ಪೊಲೀಸ್ ಠಾಣೆಯ ಮುಂದೆ ಧರಣಿ ನಡೆಸಿ, "ಬಿಜೆಪಿಯ ಕೇಸರಿ ಪಡೆಗಳು" ಮತಗಳನ್ನು ಲೂಟಿ ಮಾಡಿವೆ ಎಂದು ಆರೋಪಿಸಿದರು.
ಪಶ್ಚಿಮ ಬಂಗಾಳ ಪ್ರದೇಶ ಕಾಂಗ್ರೆಸ್ ಸಮಿತಿಯ (WBPCC) ರಾಜ್ಯ ಅಧ್ಯಕ್ಷ ಶುಭಂಕರ್ ಸರ್ಕಾರ್, ಉಪಚುನಾವಣೆಗಳು ಅನ್ಯಾಯವಾಗಿ ನಡೆದಿವೆ ಎಂದು ಆರೋಪಿಸಿ ಎರಡೂ ಕ್ಷೇತ್ರಗಳಲ್ಲಿ ಮರುಮತದಾನಕ್ಕೆ ಆಗ್ರಹಿಸಿದರು.
"ಇದು ಅಸಂಬದ್ಧ ಉಪಚುನಾವಣೆಯಾಗಿದೆ" ಎಂದು ಡಬ್ಲ್ಯೂಬಿಪಿಸಿಸಿಯ ಸಾಮಾಜಿಕ ಮಾಧ್ಯಮ ತಂಡದ ಸದಸ್ಯರೊಬ್ಬರು ತಿಳಿಸಿದ್ದಾರೆ. ಆದರೆ, ಇದು ಹೊಸ ಬೆಳವಣಿಗೆಯಲ್ಲ. ಹಿಂದೆ ರಾಹುಲ್ ಗಾಂಧಿಯವರಿಗೆ ಹುಟ್ಟುಹಬ್ಬದ ಶುಭಾಶಯ ಕೋರಿದ ಸಾಮಾಜಿಕ ಮಾಧ್ಯಮ ಪೋಸ್ಟ್‌ಗಳನ್ನು ಸಹ ಕಾನೂನಾತ್ಮಕ ಮನವಿಗಳ ನಂತರ ನಿರ್ಬಂಧಿಸಿದ ಉದಾಹರಣೆಗಳಿವೆ ಎಂದು ಅವರು ಹೇಳಿದ್ದಾರೆ.
ರೇಜಿನಗರ ಕ್ಷೇತ್ರದ ತೃಣಮೂಲ ಕಾಂಗ್ರೆಸ್ (TMC) ಅಭ್ಯರ್ಥಿ ರಬಿಯುಲ್ ಆಲಂ ಚೌಧರಿ, ಕ್ಷೇತ್ರದ 14 ಗ್ರಾಮ ಪಂಚಾಯಿತಿಗಳ ಪೈಕಿ ಒಟ್ಟು 264 ಬೂತ್‌ಗಳಲ್ಲಿ ಅಕ್ರಮ ನಡೆದಿದೆ ಎಂದು ಆರೋಪಿಸಿದ್ದಾರೆ. "ಪೊಲೀಸರು ಸುತ್ತಾಡಿ ದಾಳಿ ನಡೆಸಿದ್ದಲ್ಲದೆ, ಅವರೇ ಮತದಾನದ ಬಟನ್ ಒತ್ತಿದ್ದಾರೆ. ಜನರಿಗೆ ಮತ ಚಲಾಯಿಸಲು ಅವಕಾಶ ಸಿಗಲಿಲ್ಲ, ಅವರ ಆಧಾರ್ ಕಾರ್ಡ್ ಕಸಿದುಕೊಳ್ಳಲಾಯಿತು" ಎಂದು ಮಾಜಿ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಆರೋಪಿಸಿದ್ದಾರೆ.
ಹೆಚ್ಚುವರಿಯಾಗಿ, ಫೇಸ್‌ಬುಕ್‌ನಲ್ಲಿ ಪೋಸ್ಟ್ ಮಾಡಲಾದ ವಿಡಿಯೊ ಒಂದರಲ್ಲಿ, ಮತದಾರರೊಬ್ಬರು ಹಲವು ಬೆರಳುಗಳಲ್ಲಿ ಶಾಯಿಯ ಗುರುತಿನೊಂದಿಗೆ ಮತಗಟ್ಟೆಯಿಂದ ಹೊರಬರುತ್ತಿರುವುದು ಕಂಡುಬಂದಿದ್ದು, ಇದು ಕೂಡ ಮತದಾನದ ಅಕ್ರಮದ ಆರೋಪಗಳಿಗೆ ಕಾರಣವಾಗಿದೆ. ರೇಜಿನಗರದ ಮರಾಡಿಘಿಯಲ್ಲಿ ತಮ್ಮ ಮೇಲೆ ಹೂಡೆದು ಮತಗಟ್ಟೆಯಿಂದ ಹೊರಹಾಕಲಾಗಿದೆ ಎಂದು ವಿಪಕ್ಷಗಳ ಏಜೆಂಟರು ಮತ್ತೊಂದು ವಿಡಿಯೊದಲ್ಲಿ ದೂರಿದ್ದಾರೆ.
ವಿರೋಧ ಪಕ್ಷಗಳ ಪ್ರಚಾರ ಪ್ರಕ್ರಿಯೆಯನ್ನು ವರದಿ ಮಾಡಿದ ಹಾಗೂ ಬಿಜೆಪಿಯ ಅಕ್ರಮಗಳ ಕುರಿತು ಮಾತನಾಡಿದ ರೇಜಿನಗರದ ಸ್ಥಳೀಯ ಪತ್ರಕರ್ತರು ಎದುರಿಸಿದ ಸೆನ್ಸಾರ್‌ಶಿಪ್‌ನ ಹಲವು ಪ್ರಕರಣಗಳ ಕುರಿತು 'ಆಲ್ಟ್ ನ್ಯೂಸ್' ಹಿಂದೆ ವರದಿ ಮಾಡಿತ್ತು. ಚುನಾವಣೆಗೂ ಕೆಲವೇ ದಿನಗಳ ಮುಂಚಿತವಾಗಿ ಇವರಲ್ಲಿ ಹಲವರು ತಮ್ಮ ಫೇಸ್‌ಬುಕ್ ಪೇಜ್‌ಗಳ ಪ್ರವೇಶವನ್ನು ಕಳೆದುಕೊಂಡಿದ್ದರು.
ಆಲ್ಟ್ ನ್ಯೂಸ್ ಅಂತಹ ಕನಿಷ್ಠ 12 ಪೇಜ್‌ಗಳನ್ನು ಗುರುತಿಸಿದ್ದೇವೆ: ಆಸಿಫ್ ರೋನಿ ನಡೆಸುತ್ತಿದ್ದ ಮುರ್ಷಿದಾಬಾದ್ ಗ್ಲೋಬಲ್ ಟೈಮ್ಸ್; ಜಬ್ಬಾರ್ ಶೇಖ್ ನಡೆಸುತ್ತಿದ್ದ ಹರಿಹರಪಾರಾ ಟೈಮ್ಸ್ ಬಂಗಾಳ; ಸ್ವಪನ್ ಕಾರಿಗರ್ ನಡೆಸುತ್ತಿದ್ದ ಮುರ್ಷಿದಾಬಾದ್ ಟುಡೇ; ರಿಂಕು ನಡೆಸುತ್ತಿದ್ದ ಮುರ್ಷಿದಾಬಾದ್ ಶಿರೋನಾಮ್; ಬಕ್ತರ್ ಶೇಖ್ ನಡೆಸುತ್ತಿದ್ದ ಮುರ್ಷಿದಾಬಾದ್ ನ್ಯೂಸ್ ಟೈಮ್; ರಾಜೀಬ್ ಶೇಖ್ ನಡೆಸುತ್ತಿದ್ದ ರಿಪೋರ್ಟರ್ ಪ್ರೆಸ್; ಮುಹೈಮೆನುಲ್ ಹಕ್ ನಡೆಸುತ್ತಿದ್ದ ಎಮ್ ನ್ಯೂಸ್ ಟಿವಿ; ಅಮೀನುಲ್ ಇಸ್ಲಾಂ ನಡೆಸುತ್ತಿದ್ದ ವಾರ್ತಾಬಾಹಿ ನ್ಯೂಸ್; ಸೈದೂರ್ ರಹಮಾನ್ ನಡೆಸುತ್ತಿದ್ದ ಹೈ ನ್ಯೂಸ್; ಬಿಎನ್‌ಎಸ್ ನ್ಯೂಸ್ ಬಂಗಾಳ; ಅಬ್ದುಸ್ ಸಮದ್ ನಡೆಸುತ್ತಿದ್ದ ಎಎನ್ ಬಂಗಾಳ ನ್ಯೂಸ್; ಮತ್ತು ಅಬ್ದುಲ್ ಹಲೀಮ್ ನಡೆಸುತ್ತಿದ್ದ ನ್ಯೂಸ್ ಫ್ರಂಟ್ ಡಿಜಿಟಲ್.
ಕೃಪೆ: altnews.in