ಸಂಸತ್ತಿನ ಗಮನಕ್ಕೆ ತರದೆ 'ಫಾರ್ಮ್ 6' ನಿಯಮ ಬದಲಿಸಿದ ಚುನಾವಣಾ ಆಯೋಗ

ಭಾರತೀಯರು ಮತದಾರರ ಪಟ್ಟಿಗೆ ಹೆಸರು ಸೇರಿಸಲು ಭರ್ತಿ ಮಾಡುವ 'ಫಾರ್ಮ್ 6'ನಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡಬೇಕಾದರೆ, ಅದನ್ನು ನಿರ್ಧರಿಸುವ ಏಕೈಕ ಅಧಿಕಾರ ಸರ್ಕಾರ ಮತ್ತು ಸಂಸತ್ತಿಗೆ ಮಾತ್ರ ಇದೆ. ಆದರೆ, ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯ ಸಮಯದಲ್ಲಿ ಚುನಾವಣಾ ಆಯೋಗವು ಈ ಪ್ರಮುಖ ಫಾರ್ಮ್ ಅನ್ನು ಯಾರಿಗೂ ತಿಳಿಯದಂತೆ ಹೇಗೆ ಬದಲಾಯಿಸಿತು ಎಂಬುದನ್ನು 'thewire.in' ವರದಿ ಪತ್ತೆ ಮಾಡಿದೆ.

ಬಿಹಾರ SIR ಸಮಯದಲ್ಲಿ ಚುನಾವಣಾ ಆಯೋಗವು ಮೊದಲು ಫಾರ್ಮ್ 6ನೊಂದಿಗೆ ಸಲ್ಲಿಸಬೇಕಾದ ಹೊಸ ಸ್ವಯಂ ಘೋಷಣಾಪತ್ರವನ್ನು ಸೇರಿಸಿತು. ಎರಡನೇ ಹಂತದ SIR ವೇಳೆ ಮತ್ತೊಂದು ಪುಟವನ್ನು ಸೇರಿಸಲಾಯಿತು. ಇನ್ನು ಪ್ರಸ್ತುತ ನಡೆಯುತ್ತಿರುವ SIR ಅವಧಿಯಲ್ಲಿ, ಆನ್‌ಲೈನ್ ಅರ್ಜಿಗಳಿಗಾಗಿ ಫಾರ್ಮ್ 6 ಅನ್ನು ಸಂಪೂರ್ಣವಾಗಿ ಬದಲಾಯಿಸಲಾಗಿದೆ.

ಆಯೋಗದ ಈ ಕ್ರಮದ ಕುರಿತು 'the wire' ಜೊತೆ ಮಾತನಾಡಿದ ಮಾಜಿ ಚುನಾವಣಾ ಆಯೋಗದ ಅಧಿಕಾರಿಗಳು, ನಿಯಮಗಳನ್ನು ಮತ್ತು ಫಾರ್ಮ್‌ಗಳನ್ನು ತಿದ್ದುಪಡಿ ಮಾಡುವ ಅಧಿಕಾರ ಸರ್ಕಾರಕ್ಕೆ ಮಾತ್ರ ಇದೆ ಹಾಗೂ ತಿದ್ದುಪಡಿಯ ನಂತರ ಅದನ್ನು ಸಂಸತ್ತು ಅನುಮೋದಿಸಬೇಕು ಎಂದು ಹೇಳಿದ್ದಾರೆ. ಈ ತಿದ್ದುಪಡಿ ಇಲ್ಲದೆ ಫಾರ್ಮ್ 6 ಅನ್ನು ಬದಲಾಯಿಸುವುದು ಚುನಾವಣಾ ಆಯೋಗದ ಸ್ವಯಂಸಿದ್ಧ ಕಾನೂನುಬಾಹಿರ ಕ್ರಮವಾಗುತ್ತದೆ. ಹೊಸ ಮತದಾರರಿಗೂ ಹಾಗೂ ಬಿಹಾರದಲ್ಲಿ ಗಣತಿ ಫಾರ್ಮ್ ಭರ್ತಿ ಮಾಡದವರಿಗೂ ಫಾರ್ಮ್ 6 ಅನ್ನು ಬಳಸಲಾಗುತ್ತಿದೆ. ಆದರೆ, ಇವರಲ್ಲಿ ಹೊಸಬರು ಎಷ್ಟು ಮತ್ತು ಗಣತಿ ಫಾರ್ಮ್ ಭರ್ತಿ ಮಾಡದವರು ಎಷ್ಟು ಎಂಬ ಪ್ರತ್ಯೇಕ ವಿವರವನ್ನು ಚುನಾವಣಾ ಆಯೋಗ ನೀಡುತ್ತಿಲ್ಲ. SIRನ ಭಾಗವಾಗಿ ಆಯೋಗವು ಏಕಾಏಕಿ ಇಂತಹ ಬದಲಾವಣೆಗಳನ್ನು ಮಾಡುತ್ತಿದೆ ಎಂದು ನಾಗರಿಕ ಹಕ್ಕು ಹೋರಾಟಗಾರರು ಆರೋಪಿಸಿದ್ದಾರೆ.

ಮತದಾರರ ಪಟ್ಟಿಯಿಂದ ಹೆಸರು ಕೈಬಿಡುವುದರಿಂದ ಸರ್ಕಾರದ ಕಲ್ಯಾಣ ಯೋಜನೆಗಳ ಸೌಲಭ್ಯಗಳು ಸ್ಥಗಿತಗೊಳ್ಳುತ್ತವೆ ಹಾಗೂ ಪಾಸ್‌ಪೋರ್ಟ್ ನಿರಾಕರಣೆಯಂತಹ ಸಮಸ್ಯೆಗಳೂ ಎದುರಾಗುತ್ತವೆ. ಚುನಾವಣಾ ಆಯೋಗವು ಪೌರತ್ವವನ್ನು ನಿರ್ಧರಿಸುವ ಪ್ರಾಧಿಕಾರವಲ್ಲ ಎಂದು ಸುಪ್ರೀಂ ಕೋರ್ಟ್ ಈ ವಾರವೂ ಪುನರುಚ್ಚರಿಸಿದೆ. ಹೀಗಾಗಿ, ಹೊಸ ಮತದಾರರನ್ನು ಪಟ್ಟಿಗೆ ಹೇಗೆ ಸೇರಿಸಿಕೊಳ್ಳಲಾಗುತ್ತಿದೆ ಎಂಬುದನ್ನು ಸೂಕ್ಷ್ಮವಾಗಿ ಪರಿಶೀಲಿಸುವುದು ಇನ್ನಷ್ಟು ಮುಖ್ಯವಾಗಿದೆ.

ಏನಿದು ಫಾರ್ಮ್ 6?

2025 ಜೂನ್ 24ಕ್ಕಿಂತ ಮುಂಚೆ, ಫಾರ್ಮ್ 6 ಎನ್ನುವುದು ಹೊಸ ಮತದಾರರು ತಮ್ಮ ಹೆಸರನ್ನು ಮತದಾರರ ಪಟ್ಟಿಗೆ ಸೇರಿಸಲು ಬಳಸುತ್ತಿದ್ದ ಒಂದು ಸಾಮಾನ್ಯ ಅರ್ಜಿಯಾಗಿತ್ತು. ಇದಕ್ಕೆ ಯಾವುದೇ ಪೌರತ್ವದ ಪುರಾವೆ ಅಗತ್ಯವಿರಲಿಲ್ಲ. ದಾಖಲೆಗಳ ದೃಢೀಕರಣಕ್ಕಾಗಿ ಆಧಾರ್ ವಿವರಗಳು ಹಾಗೂ ವಯಸ್ಸು ಮತ್ತು ವಾಸಸ್ಥಳದ ದೃಢೀಕರಣಕ್ಕಾಗಿ ಸ್ವಯಂ ದೃಢೀಕರಿಸಿದ ದಾಖಲೆಗಳನ್ನು ಮಾತ್ರ ನೀಡಬೇಕಿತ್ತು. ಫಾರ್ಮ್ 6ರ ನಿಯಮಗಳು ಎಷ್ಟೊಂದು ಸಡಿಲವಾಗಿದ್ದವೆಂದರೆ, ವಯಸ್ಸು ಮತ್ತು ವಾಸಸ್ಥಳದ ಪುರಾವೆಗೆ ಕೇಳಲಾದ ಯಾವುದೇ ದಾಖಲೆಗಳು ಲಭ್ಯವಿಲ್ಲದಿದ್ದರೆ, ಅರ್ಜಿದಾರರು ವಯಸ್ಸಿನ ಪುರಾವೆಯಾಗಿ ಬೇರೆ ಯಾವುದಾದರೂ ದಾಖಲೆಯನ್ನು ಲಗತ್ತಿಸಿ, ಅದರ ಹೆಸರನ್ನು ಫಾರ್ಮ್‌ನ ಸ್ವಯಂ ಘೋಷಣಾ ಭಾಗದಲ್ಲಿ ನಮೂದಿಸಬಹುದಿತ್ತು. ತದನಂತರ ಅರ್ಜಿದಾರರು ಪರಿಶೀಲನೆಗಾಗಿ ಚುನಾವಣಾ ನೋಂದಣಿ ಅಧಿಕಾರಿ ಅಥವಾ ಅವರು ನಿಗದಿಪಡಿಸಿದ ಅಧಿಕಾರಿಯ ಮುಂದೆ ಖುದ್ದಾಗಿ ಹಾಜರಾಗಬೇಕಿತ್ತು.

ಆದರೆ, 2025 ಜೂನ್ 24ರಂದು ಚುನಾವಣಾ ಆಯೋಗವು ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆಯನ್ನು ಘೋಷಿಸಿದಂದಿನಿಂದ, ಫಾರ್ಮ್ 6ರೊಂದಿಗೆ ಸಲ್ಲಿಸಬೇಕಾದ ಸ್ವಯಂ ಘೋಷಣಾಪತ್ರ ಮಾತ್ರವಲ್ಲದೆ, ಸ್ವತಃ ಫಾರ್ಮ್ 6 ಕೂಡ ಬದಲಾವಣೆಯಾಗಿದೆ. 1950ರ ಜನಪ್ರತಿನಿಧಿ ಕಾಯಿದೆಯ ಸೆಕ್ಷನ್ 28ಕ್ಕೆ ಒಳಪಡುವ 1960ರ ಮತದಾರರ ನೋಂದಣಿ ನಿಯಮಗಳ ಪ್ರಕಾರ ಯಾವುದೇ ಬದಲಾವಣೆ ಅಥವಾ ತಿದ್ದುಪಡಿಯನ್ನು ಸರ್ಕಾರ ಮಾತ್ರ ಮಾಡಬಹುದು ಮತ್ತು ಅದು ಸಂಸತ್ತಿನ ಪರಿಶೀಲನೆಗೆ ಒಳಪಟ್ಟಿರುತ್ತದೆ. ಹೀಗಿದ್ದೂ ಈ ಬದಲಾವಣೆಗಳನ್ನು ಮಾಡಲಾಗಿದೆ.

ಸಂಸತ್ತಿನ ಅನುಮೋದನೆ ಪಡೆಯದೆ, ಆಂತರಿಕ ಸೂಚನೆಗಳ ಮೂಲಕ ಚುನಾವಣಾ ಆಯೋಗವು 'ಫಾರ್ಮ್ 6'ನಲ್ಲಿ ತಂದಿರುವ ಕಾನೂನಾತ್ಮಕ ಬದಲಾವಣೆಗಳು SIR ಪ್ರಕ್ರಿಯೆಯ ಪಾರದರ್ಶಕತೆಯನ್ನು ಮತ್ತೆ ಪ್ರಶ್ನಿಸುವಂತೆ ಮಾಡಿವೆ. ಒಂದರ ಮೇಲೊಂದರಂತೆ ದಾಖಲೆಗಳನ್ನು ಕೇಳುವ ಮೂಲಕ ನಾಗರಿಕರನ್ನು ಪೌರತ್ವ ಸಾಬೀತುಪಡಿಸುವ ಪ್ರಕ್ರಿಯೆಗೆ ಒಳಪಡಿಸಲಾಗಿದೆ. 'the wire' ಜೊತೆ ಮಾತನಾಡಿದ ಮಾಜಿ ಚುನಾವಣಾ ಆಯೋಗದ ಅಧಿಕಾರಿಗಳು, ನಿಯಮಗಳು ಮತ್ತು ಫಾರ್ಮ್‌ಗಳನ್ನು ತಿದ್ದುಪಡಿ ಮಾಡುವ ಅಧಿಕಾರ ಸರ್ಕಾರಕ್ಕೆ ಮಾತ್ರ ಇದೆ ಹಾಗೂ ತಿದ್ದುಪಡಿಯ ನಂತರ ಅದನ್ನು ಸಂಸತ್ತಿನ ಮುಂದೆ ಮಂಡಿಸಬೇಕು ಎಂದು ಹೇಳಿದ್ದಾರೆ. ಈ ನಿಯಮವನ್ನು ಪಾಲಿಸದೆ ಫಾರ್ಮ್ 6 ಅನ್ನು ಬದಲಾಯಿಸಿರುವುದು ಚುನಾವಣಾ ಆಯೋಗದ ಸ್ವಯಂಸಿದ್ಧ ಕಾನೂನುಬಾಹಿರ ಕ್ರಮ ಎಂದು ಅವರು ಹೇಳಿದ್ದಾರೆ.

"ಫಾರ್ಮ್ 6ರಲ್ಲಿ ತಂದಿರುವ ಬದಲಾವಣೆಗಳು, ಹೊಸ ಮತದಾರರನ್ನು ಸೇರಿಸಿಕೊಳ್ಳುವುದು ಮತ್ತು ಬಿಹಾರದಲ್ಲಿ ಗಣತಿ ಫಾರ್ಮ್ ಭರ್ತಿ ಮಾಡದವರಿಗೂ ಇದನ್ನೇ ಬಳಸುವುದು SIRನ ಭಾಗವಾಗಿ ಏಕಾಏಕಿ ಮಾಡಿದ ನಿರ್ಧಾರಗಳಾಗಿವೆ. ಅಲ್ಲದೆ, ಇವರಲ್ಲಿ ಹೊಸಬರು ಎಷ್ಟು ಮತ್ತು ಗಣತಿ ಫಾರ್ಮ್ ಭರ್ತಿ ಮಾಡದವರು ಎಷ್ಟು ಎಂಬ ಪ್ರತ್ಯೇಕ ವಿವರವನ್ನು ಆಯೋಗ ನೀಡದೆ ಸಂಸತ್ತು ಹಾಗೂ ಸಾರ್ವಜನಿಕರ ಪರಿಶೀಲನೆಯಿಂದ ತಪ್ಪಿಸಿಕೊಳ್ಳುತ್ತಿದೆ" ಎಂದು ನಾಗರಿಕ ಹಕ್ಕು ಹೋರಾಟಗಾರರು ಆರೋಪಿಸಿದ್ದಾರೆ.

ಫಾರ್ಮ್ 6 ಹೇಗೆ ಬದಲಾಯಿತು?

2025 ಜೂನ್ 25ರಂದು ಬಿಹಾರದಲ್ಲಿ ಪ್ರಾರಂಭವಾದ SIR ಪ್ರಾಯೋಗಿಕ ಯೋಜನೆಯಲ್ಲಿ, ಹೊಸ ಮತದಾರರು ಮತ್ತು ನಿಗದಿತ ಸಮಯದಲ್ಲಿ ಗಣತಿ ಫಾರ್ಮ್ ಭರ್ತಿ ಮಾಡಲು ವಿಫಲರಾದ ಮತದಾರರು ಫಾರ್ಮ್ 6 ಅನ್ನು ಭರ್ತಿ ಮಾಡಬಹುದು ಎಂದು ಚುನಾವಣಾ ಆಯೋಗವು ಸೂಚಿಸಿತ್ತು. ಎರಡೂ ಸಂದರ್ಭಗಳಲ್ಲಿ ನಿಗದಿತ ಸ್ವಯಂ ಘೋಷಣಾಪತ್ರವನ್ನು ಲಗತ್ತಿಸುವುದನ್ನು ಕಡ್ಡಾಯಗೊಳಿಸಲಾಗಿತ್ತು. ಈ ಘೋಷಣಾಪತ್ರದಲ್ಲಿ, 1987ಕ್ಕಿಂತ ಮೊದಲು ಜನಿಸಿದವರು ತಮ್ಮ ಜನ್ಮಸ್ಥಳವನ್ನು ಸಾಬೀತುಪಡಿಸಲು ನಿಗದಿತ 11 ದಾಖಲೆಗಳಲ್ಲಿ ಒಂದನ್ನು ಒದಗಿಸಬೇಕಿತ್ತು. 1987ರ ನಂತರ ಆದರೆ 2004ಕ್ಕಿಂತ ಮೊದಲು ಜನಿಸಿದವರು ತಮ್ಮ ಜನ್ಮಸ್ಥಳದ ಜೊತೆಗೆ ತಂದೆ ಅಥವಾ ತಾಯಿಯ ಜನ್ಮದಿನಾಂಕ ಮತ್ತು ಜನ್ಮಸ್ಥಳವನ್ನು ಸಾಬೀತುಪಡಿಸಬೇಕಿತ್ತು. ಇನ್ನು 2004ರ ನಂತರ ಜನಿಸಿದವರು ತಮ್ಮ ತಂದೆ-ತಾಯಿ ಇಬ್ಬರ ದಾಖಲೆಗಳನ್ನು ಒದಗಿಸುವುದು ಕಡ್ಡಾಯವಾಗಿತ್ತು.

ಬಿಹಾರದಲ್ಲಿ SIR ಪ್ರಕ್ರಿಯೆ ಮುಗಿದ ನಂತರ ಹೊಸ ಮತದಾರರ ಪಟ್ಟಿಯ ವಿವರಗಳನ್ನು ನೀಡಿದ್ದ ಚುನಾವಣಾ ಆಯೋಗ, ಫಾರ್ಮ್ 6 ಮೂಲಕ ಎಷ್ಟು ಹೆಸರುಗಳನ್ನು ಸೇರಿಸಲಾಗಿದೆ ಎಂಬ ಒಟ್ಟು ಸಂಖ್ಯೆಯನ್ನು ಮಾತ್ರ ನೀಡಿತು. ಆದರೆ, ಇವರಲ್ಲಿ ಹೊಸ ಮತದಾರರು ಎಷ್ಟು ಹಾಗೂ ಗಣತಿ ಫಾರ್ಮ್ ಭರ್ತಿ ಮಾಡಲು ಸಾಧ್ಯವಾಗದೆ ಈ ಅರ್ಜಿಯನ್ನು ಬಳಸಿದವರು ಎಷ್ಟು ಎಂಬ ಪ್ರತ್ಯೇಕ ವಿವರಗಳನ್ನು ನೀಡಲಿಲ್ಲ.

ಅಕ್ಟೋಬರ್‌ನಲ್ಲಿ 12 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಈ ಪ್ರಕ್ರಿಯೆಯನ್ನು ಘೋಷಿಸಿದಾಗ, ಫಾರ್ಮ್ 6ರ ಜೊತೆಗೆ ಸಲ್ಲಿಸಬೇಕಾದ ಸ್ವಯಂ ಘೋಷಣಾಪತ್ರವನ್ನು ಬದಲಾಯಿಸಿ ಹೊಸ ಸೂಚನೆಗಳನ್ನು ಆಯೋಗವು ಯಾರಿಗೂ ತಿಳಿಯದಂತೆ ಜಾರಿಗೆ ತಂದಿತು. ಈ ಹೊಸ ಸ್ವಯಂ ಘೋಷಣಾಪತ್ರದಲ್ಲಿ, ಬಿಹಾರದಲ್ಲಿ ಕೇಳಲಾಗಿದ್ದ ವಿವರಗಳ ಜೊತೆಗೆ ಹಿಂದಿನ SIR ನಿಂದ ತಮ್ಮ ತಂದೆ-ತಾಯಿಯ ವಿವರಗಳನ್ನು ಒದಗಿಸುವುದನ್ನು ಕಡ್ಡಾಯಗೊಳಿಸಲಾಯಿತು.

ಪ್ರಸ್ತುತ 16 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ನಡೆಯುತ್ತಿರುವ SIR ಪ್ರಕ್ರಿಯೆಯನ್ನು ಮೇ ತಿಂಗಳಲ್ಲಿ ಘೋಷಿಸಿದಾಗ, ಅಕ್ಟೋಬರ್‌ ನಲ್ಲಿ ಬದಲಾಯಿಸಲಾಗಿದ್ದ ಅದೇ ಫಾರ್ಮ್ 6 ಅನ್ನು ಬಳಸಿದ್ದಲ್ಲದೆ, ಆನ್‌ಲೈನ್ ಅರ್ಜಿ ಪ್ರಕ್ರಿಯೆಯನ್ನೂ ಸಂಪೂರ್ಣವಾಗಿ ಬದಲಾಯಿಸಲಾಯಿತು. ಈ ಆನ್‌ಲೈನ್ ಫಾರ್ಮ್ 6ರಲ್ಲಿ, ಹಿಂದಿನ SIR ನಿಂದ ತಮ್ಮ ತಂದೆ-ತಾಯಿಯ ವಿವರಗಳನ್ನು ನೀಡದ ಹೊರತು ಅರ್ಜಿದಾರರು ಮುಂದಿನ ಹಂತಕ್ಕೆ ಹೋಗಲು ಹಾಗೂ ಅರ್ಜಿಯನ್ನು ಯಶಸ್ವಿಯಾಗಿ ಸಲ್ಲಿಸಲು ಸಾಧ್ಯವಾಗದಂತೆ ಮಾಡಲಾಗಿದೆ.

ಸಂಸತ್ತಿನ ಗಮನಕ್ಕೆ ತರದೆ ನಿಯಮ ಉಲ್ಲಂಘನೆ

ಚುನಾವಣಾ ಆಯೋಗವು ತಾನೇ ಸ್ವತಃ ಜಾರಿಗೆ ತಂದಿರುವ ಈ ಬದಲಾವಣೆಗಳನ್ನು ಬದಿಗೊತ್ತಿ ನೋಡುವುದಾದರೆ, ದೇಶದ ಚುನಾವಣಾ ಕಾಯಿದೆಗಳು ಯಾವುದೇ ನಿಯಮಗಳನ್ನು ಬದಲಾಯಿಸಲು ನಿರ್ದಿಷ್ಟ ಪ್ರಕ್ರಿಯೆಯನ್ನು ನಿಗದಿಪಡಿಸಿವೆ.

ಈ ಕುರಿತು 'the wire' ಜೊತೆ ಮಾತನಾಡಿದ ಮಾಜಿ ಮುಖ್ಯ ಚುನಾವಣಾ ಆಯುಕ್ತ ಓ.ಪಿ. ರಾವತ್, "ಫಾರ್ಮ್ 6ರಲ್ಲಿ ತರಲಾಗುವ ಯಾವುದೇ ಬದಲಾವಣೆಗಳು 1950ರ ಜನಪ್ರತಿನಿಧಿ ಕಾಯಿದೆ ಮತ್ತು 1960ರ ಮತದಾರರ ನೋಂದಣಿ ನಿಯಮಗಳಿಗೆ ಒಳಪಟ್ಟಿರುತ್ತವೆ. ಮತದಾರರ ನೋಂದಣಿ ನಿಯಮಗಳ 'ರೂಲ್ 13'ರ ಪ್ರಕಾರ, ಯಾರಾದರೂ ತಮ್ಮ ಹೆಸರನ್ನು ಮತದಾರರ ಪಟ್ಟಿಗೆ ಸೇರಿಸಲು ಬಯಸಿದರೆ ಅವರು ಫಾರ್ಮ್ 6 ಅನ್ನೇ ಬಳಸಬೇಕಾಗುತ್ತದೆ. ಈ ನಿಯಮಗಳಿಗೆ ಲಗತ್ತಿಸಲಾಗಿರುವ ಫಾರ್ಮ್ 6ರಲ್ಲಿ ಮತದಾರರ ತಂದೆ-ತಾಯಿಯ ವಿವರಗಳನ್ನು ಕೇಳುವ ಯಾವುದೇ ನಿಯಮ ಪ್ರಸ್ತುತ ಇಲ್ಲ. ಹೀಗಾಗಿ, ಆಫ್‌ಲೈನ್ ಫಾರ್ಮ್ ಅಥವಾ ವೆಬ್‌ಸೈಟ್‌ನಿಂದ ಡೌನ್‌ಲೋಡ್ ಮಾಡಿದ ಫಾರ್ಮ್‌ಗಳಲ್ಲಿ ಈ ವಿವರಗಳಿರುವುದಿಲ್ಲ" ಎಂದು ವಿವರಿಸಿದ್ದಾರೆ.

"ಅನರ್ಹರು ಫಾರ್ಮ್ 6 ಮೂಲಕ ಮತದಾರರ ಪಟ್ಟಿಗೆ ಸೇರಿಕೊಂಡು SIR ನ ಮುಖ್ಯ ಉದ್ದೇಶವನ್ನೇ ಹಾಳು ಮಾಡುವುದನ್ನು ತಡೆಯಲು ಆಯೋಗ ಹೀಗೆ ಯೋಚಿಸಿರಬಹುದು. ಆ ನಿಟ್ಟಿನಲ್ಲಿ ಅವರ ಉದ್ದೇಶವನ್ನು ನಾವು ಪ್ರಶ್ನಿಸಬೇಕಿಲ್ಲ. ಆದರೆ, ನಿಯಮಗಳನ್ನು ಮತ್ತು ಫಾರ್ಮ್‌ಗಳನ್ನು ತಿದ್ದುಪಡಿ ಮಾಡುವ ಅಧಿಕಾರ ಸರ್ಕಾರಕ್ಕೆ ಮಾತ್ರ ಇದೆ ಹಾಗೂ ತಿದ್ದುಪಡಿಯ ನಂತರ ಅದನ್ನು ಸಂಸತ್ತಿನ ಮುಂದೆ ಮಂಡಿಸಬೇಕು ಎಂಬ ನಿಯಮವಿದೆ" ಎಂದು ರಾವತ್ ತಿಳಿಸಿದ್ದಾರೆ.

1950ರ ಜನಪ್ರತಿನಿಧಿ ಕಾಯಿದೆಯ ಸೆಕ್ಷನ್ 28ಕ್ಕೆ ಒಳಪಡುವ 1960ರ ಮತದಾರರ ನೋಂದಣಿ ನಿಯಮಗಳು, ಮತದಾರರ ಪಟ್ಟಿಗೆ ಸಂಬಂಧಿಸಿದ ಪ್ರತಿಯೊಂದು ವಿಷಯವೂ ಸರ್ಕಾರದಿಂದ ಮಾತ್ರ ರೂಪಿಸಲ್ಪಡುವ ನಿಯಮಗಳಿಗೆ ಒಳಪಟ್ಟಿರುತ್ತವೆ ಹಾಗೂ ಅವು ಸಂಸತ್ತಿನ ಪರಿಶೀಲನೆಗೆ ಒಳಪಡುತ್ತವೆ ಎಂಬುದನ್ನು ಸ್ಪಷ್ಟಪಡಿಸುತ್ತವೆ.

"ಜನಪ್ರತಿನಿಧಿ ಕಾಯಿದೆಯ ಸೆಕ್ಷನ್ 28(2) ಅನ್ನು ಗಮನಿಸಿದರೆ, ಮತದಾರರ ಪಟ್ಟಿಗೆ ಸಂಬಂಧಿಸಿದ ಎಲ್ಲ ಪ್ರಕ್ರಿಯೆಗಳೂ ನಿಯಮಾವಳಿಗಳ ಪ್ರಕಾರವೇ ನಡೆಯಬೇಕು ಮತ್ತು ಅದರಲ್ಲಿ ಬದಲಾವಣೆ ತರುವ ಸಂಪೂರ್ಣ ಅಧಿಕಾರ ಸರ್ಕಾರಕ್ಕೆ ಮಾತ್ರ ಇದೆ ಎಂಬುದು ಸ್ಪಷ್ಟವಾಗುತ್ತದೆ. ಸರ್ಕಾರಕ್ಕೆ ಇರುವ ಈ ನಿಯಮ ರೂಪಿಸುವ ಅಧಿಕಾರವೂ ಪ್ರಶ್ನಾತೀತವಲ್ಲ" ಎಂದು ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಮತ್ತೊಬ್ಬ ಮಾಜಿ ಮುಖ್ಯ ಚುನಾವಣಾ ಆಯುಕ್ತರು ಹೇಳಿರುವುದಾಗಿ the wire ವರದಿ ಉಲ್ಲೇಖಿಸಿದೆ.

ಈ ಕಾಯಿದೆಯ ಸೆಕ್ಷನ್ 28(3)ರ ಪ್ರಕಾರ, ಸರ್ಕಾರವು ರೂಪಿಸುವ ಪ್ರತಿಯೊಂದು ನಿಯಮವನ್ನು ಸಂಸತ್ತಿನ ಸಭೆ ಪ್ರಾರಂಭವಾದ 30 ದಿನಗಳ ಒಳಗಾಗಿ ಉಭಯ ಸದನಗಳ ಮುಂದೆ ಮಂಡಿಸಬೇಕು. ಸಂಸತ್ತಿನ ಎರಡೂ ಸದನಗಳು ನಿಯಮದಲ್ಲಿ ಬದಲಾವಣೆಗಳನ್ನು ಮಾಡಲು ಒಪ್ಪಿಕೊಂಡರೆ ಅಥವಾ ಆ ನಿಯಮದ ಅಗತ್ಯವಿಲ್ಲ ಎಂದು ನಿರ್ಧರಿಸಿದರೆ, ಅದರಂತೆ ಬದಲಾಯಿಸಲಾದ ರೂಪದಲ್ಲಿ ಮಾತ್ರ ನಿಯಮ ಜಾರಿಗೆ ಬರುತ್ತದೆ ಅಥವಾ ರದ್ದಾಗುತ್ತದೆ. ಆದ್ದರಿಂದ, ನಿಯಮಗಳನ್ನು ತಿದ್ದುಪಡಿ ಮಾಡುವ ಅಧಿಕಾರ ಸರ್ಕಾರಕ್ಕೆ ಮಾತ್ರ ಇದೆ. ಫಾರ್ಮ್ 6 ಸೇರಿದಂತೆ ಇತರ ಫಾರ್ಮ್‌ಗಳು ಈ ನಿಯಮಗಳ ಭಾಗವಾಗಿದ್ದು, ನಿಯಮಗಳನ್ನು ತಿದ್ದುಪಡಿ ಮಾಡುವ ಸರ್ಕಾರದ ಅಧಿಕಾರವೂ ಸೆಕ್ಷನ್ 28(3)ರ ಅಡಿಯಲ್ಲಿ ಸಂಸತ್ತಿನ ಉಸ್ತುವಾರಿಗೆ ಒಳಪಟ್ಟಿರುತ್ತದೆ ಎಂಬುದು ಸ್ಪಷ್ಟವಾಗಿದೆ.

SIR ಅಡಿಯಲ್ಲಿ ಕಾನೂನಿನ ಚೌಕಟ್ಟಿನ ಹೊರಗೆ ಕಾರ್ಯನಿರ್ವಹಿಸುತ್ತಿರುವುದು ಚುನಾವಣಾ ಆಯೋಗಕ್ಕೆ ಸಂಪೂರ್ಣ ಹೊಸ ವಿಷಯವಾಗಿದೆ. ಏಕೆಂದರೆ, ಇತ್ತೀಚೆಗೆ ಅಂದರೆ 2021ರ ಡಿಸೆಂಬರ್‌ನಲ್ಲಿ ಜನಪ್ರತಿನಿಧಿ ಕಾಯಿದೆಗೆ ತಿದ್ದುಪಡಿ ತಂದ ನಂತರ, ಮತದಾರರ ಅರ್ಜಿಗಳಲ್ಲಿ ಮಾಡಲಾದ ಬದಲಾವಣೆಗಳನ್ನು ಆಯೋಗವು 2022ರಲ್ಲಿಯೇ ಅಧಿಕೃತವಾಗಿ ಆ ಆಧಾರದಲ್ಲಿ ಜಾರಿಗೆ ತಂದಿತ್ತು. ಮತದಾರರ ವಿವರಗಳ ಪರಿಶೀಲನೆಗೆ ಸಂಬಂಧಿಸಿದ ವ್ಯವಸ್ಥೆ ಸೇರಿದಂತೆ ಹಲವು ಬದಲಾವಣೆಗಳನ್ನು ಈ ಅರ್ಜಿಗಳಲ್ಲಿ ತರಲಾಗಿತ್ತು. ಇದಕ್ಕಾಗಿ 2022ರ ಜೂನ್‌ನಲ್ಲಿ ಗೆಜೆಟ್ ಅಧಿಸೂಚನೆ ಹೊರಡಿಸಲಾಯಿತು ಮತ್ತು ಆಗಸ್ಟ್‌ 2022ರಲ್ಲಿ ಈ ಬದಲಾವಣೆಗಳು ಜಾರಿಗೆ ಬಂದಿದ್ದವು.

SIR ನ ಸಾಂವಿಧಾನಿಕತೆಯನ್ನು ಎತ್ತಿಹಿಡಿದ ಉಚ್ಚ ನ್ಯಾಯಾಲಯವು, ಮೇ ತಿಂಗಳಲ್ಲಿ ತನ್ನ ತೀರ್ಪಿನಲ್ಲಿ ಫಾರ್ಮ್‌ 6 ಅನ್ನು ಉಲ್ಲೇಖಿಸುತ್ತಾ, 1960ರ ಮತದಾರರ ನೋಂದಣಿ ನಿಯಮಗಳು ದಾಖಲೆಗಳ ಒಂದು ಚೌಕಟ್ಟನ್ನು ರೂಪಿಸುತ್ತವೆ ನಿಜ. ಆದರೆ, ಅದು ಜನಪ್ರತಿನಿಧಿ ಕಾಯಿದೆಯ ಸೆಕ್ಷನ್‌ 21(2)ರ ಅಡಿಯಲ್ಲಿ ಯೋಜಿತ ಪರಿಷ್ಕರಣೆ ಪ್ರಕ್ರಿಯೆಗೆ ಅನುಗುಣವಾಗಿದೆ. ಎಲ್ಲಾ ಸಂದರ್ಭಗಳಲ್ಲೂ ಪ್ರಸ್ತುತದ ಪ್ರಕ್ರಿಯೆಗೆ ಅದನ್ನು ಅಕ್ಷರಶಃ ಅನ್ವಯಿಸಲು ಸಾಧ್ಯವಾಗದಿರಬಹುದು ಎಂದು ಹೇಳಿತ್ತು. ಆದರೆ, SIR ನ ತುರ್ತು ಅಗತ್ಯಗಳಿಗೆ ಸೂಕ್ತವಾದ ದಾಖಲಾತಿ ಚೌಕಟ್ಟನ್ನು ರೂಪಿಸುವ ಅಧಿಕಾರವನ್ನು ಚುನಾವಣಾ ಆಯೋಗವು ಹೊಂದಿದ್ದರೂ, ಅಂತಹ ಅಧಿಕಾರವು "ಅನಿಯಂತ್ರಿತವಾಗಿಲ್ಲ" ಮತ್ತು ಪ್ರಸ್ತುತ ಚಾಲ್ತಿಯಲ್ಲಿರುವ ಶಾಸನಬದ್ಧ ಚೌಕಟ್ಟಿನ ವ್ಯಾಪ್ತಿಯಲ್ಲೇ ಇರಬೇಕು ಎಂದು ತೀರ್ಪಿನಲ್ಲಿ ಹೇಳಿತ್ತು.

"ಅಂತಹ ಚೌಕಟ್ಟನ್ನು ರೂಪಿಸುವಾಗ, ಆಯೋಗವು ಚಾಲ್ತಿಯಲ್ಲಿರುವ ಶಾಸನಬದ್ಧ ನಿಯಮಗಳ ಬಗ್ಗೆ ಜಾಗರೂಕವಾಗಿರಬೇಕು ಮತ್ತು ಅದರಿಂದ ದೂರ ಸರಿಯುವ ಯಾವುದೇ ನಿರ್ಧಾರವು ಸಾಧಿಸಲು ಹೊರಟಿರುವ ಉದ್ದೇಶಕ್ಕೆ ತಾರ್ಕಿಕ ಸಂಬಂಧವನ್ನು ಹೊಂದಿರಬೇಕು" ಎಂದು ಆದೇಶದಲ್ಲಿ ತಿಳಿಸಲಾಗಿತ್ತು.

"ಹೀಗಾಗಿ, ದಾಖಲೆಗಳ ವ್ಯವಸ್ಥೆಯನ್ನು ರೂಪಿಸುವುದು ಶಾಸನಬದ್ಧ ಚೌಕಟ್ಟಿನಿಂದ ವಿಷಯಗಳನ್ನು ಪಡೆದುಕೊಳ್ಳುವಾಗ ಮತ್ತು ಅಗತ್ಯವಿದ್ದಲ್ಲಿ ಅದನ್ನು ಸೂಕ್ತವಾಗಿ ಅಳವಡಿಸಿಕೊಳ್ಳುವಾಗ ಸರಿಯಾದ ಸಮತೋಲನವನ್ನು ಪ್ರತಿಬಿಂಬಿಸಬೇಕು. ಇದು ಮತದಾರರ ಪಟ್ಟಿಯ ನಿಖರತೆ ಮತ್ತು ಪವಿತ್ರತೆಯನ್ನು ಕಾಯ್ದುಕೊಳ್ಳುವ ಉದ್ದೇಶವನ್ನು ಪರಿಣಾಮಕಾರಿಯಾಗಿ ಈಡೇರಿಸಬೇಕು."

ಚುನಾವಣಾ ಆಯೋಗವು ಫಾರ್ಮ್‌ 6 ಮತ್ತು ಅದರ ಸ್ವಯಂ ಘೋಷಣಾಪತ್ರವನ್ನು ಬದಲಾಯಿಸುವ ನಿರ್ಧಾರವನ್ನು ಎಸ್‌ಐಆರ್ ಅವಧಿಯಲ್ಲಿ ಯಾವುದೇ ಅಧಿಸೂಚನೆ ಇಲ್ಲದೆ ಜಾರಿಗೆ ತಂದಿರುವುದು ಮಾತ್ರವಲ್ಲದೆ, ಸಂಸತ್ತಿನ ಅನುಮೋದನೆ ಪಡೆಯದೆ ಕೇವಲ ಆಂತರಿಕ ಸೂಚನೆಗಳ ಮೂಲಕ ತಿದ್ದುಪಡಿ ತರಲು ಏಕೆ ನಿರ್ಧರಿಸಿತು ಎಂಬುದಕ್ಕೆ ಯಾವುದೇ ಸ್ಪಷ್ಟನೆಯನ್ನೂ ನೀಡಿಲ್ಲ.

"ಭಾರತ ಸರ್ಕಾರವು ತನ್ನ ಕಾರ್ಯಾಚರಣೆಯ ಕಾನೂನುಗಳಾದ ಜನಪ್ರತಿನಿಧಿ ಕಾಯಿದೆಯನ್ನು ನಿರ್ಧರಿಸುತ್ತದೆ ಮತ್ತು ಮತದಾರರ ನೋಂದಣಿ ನಿಯಮಗಳಂತಹ ಎಲ್ಲಾ ನಿಯಮಾವಳಿಗಳನ್ನು ರೂಪಿಸುತ್ತದೆ. ಇತ್ತೀಚೆಗೆ ಆಯೋಗವು ಹಲವು ವಿಷಯಗಳಲ್ಲಿ ನಿಯಮಗಳನ್ನು ಮೀರಿ ಕಾರ್ಯನಿರ್ವಹಿಸುತ್ತಿದೆ. ಆದರೆ, ಫಾರ್ಮ್‌ 6ರ ಈ ಪ್ರಸ್ತುತ ಪ್ರಕರಣದಲ್ಲಿ ಚುನಾವಣಾ ಆಯೋಗವು ಚಾಲ್ತಿಯಲ್ಲಿರುವ ಕಾನೂನು ಮತ್ತು ನಿಯಮಗಳಿಗೆ ಬದ್ಧವಾಗಿರಲೇಬೇಕು" ಎಂದು ಅಧಿಕಾರಿಯಾಗಿದ್ದಾಗ ಪಶ್ಚಿಮ ಬಂಗಾಳದ ಮುಖ್ಯ ಚುನಾವಣಾ ಅಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದ ಮಾಜಿ ತೃಣಮೂಲ ಕಾಂಗ್ರೆಸ್ ಸಂಸದ ಜವಾಹರ್ ಸಿರ್ಕಾರ್ ಹೇಳಿದ್ದಾರೆ.

"ಚುನಾವಣಾ ಆಯೋಗ ಮತ್ತು ಸರ್ಕಾರ ಇಂದಿಗೂ ಪ್ರತ್ಯೇಕವಾಗಿಯೇ ಇವೆ ಮತ್ತು ಒಂದಕ್ಕೊಂದು ವಿಲೀನಗೊಂಡಿಲ್ಲ. ಹೀಗಾಗಿ, ಆಯೋಗದ ಈ ಕ್ರಮವು ಆ ಕಾರಣದಿಂದಲೇ ಕಾನೂನುಬಾಹಿರವಾಗಿದೆ. ಸಂವಿಧಾನದ 142ನೇ ವಿಧಿಯಡಿ ಅಧಿಕಾರ ಚಲಾಯಿಸುವಾಗ ಉಚ್ಚ ನ್ಯಾಯಾಲಯವೂ ಸೇರಿದಂತೆ ಪ್ರತಿಯೊಂದು ಸಾಂವಿಧಾನಿಕ ಸಂಸ್ಥೆಯು ತನ್ನ ಅಧಿಕಾರ ಚಲಾವಣೆಯು ಮತ್ತೊಂದು ಸಂಸ್ಥೆಯ ಅಧಿಕಾರ ವ್ಯಾಪ್ತಿಗೆ ಏಕೆ ಪ್ರವೇಶಿಸುತ್ತಿದೆ ಎಂಬುದನ್ನು ಸ್ಪಷ್ಟಪಡಿಸಬೇಕಾಗುತ್ತದೆ. ಆಯೋಗವು ಏಕೆ ಹೀಗೆ ಮಾಡುತ್ತಿದೆ ಮತ್ತು ಇದು ಏಕೆ ಅಗತ್ಯವಾಗಿತ್ತು ಎಂಬುದಕ್ಕೆ ಸೂಕ್ತ ವಿವರಣೆಯನ್ನು ನೀಡಲೇಬೇಕು" ಎಂದು ಅವರು ಹೇಳಿದ್ದಾರೆ.

ಪರಿಶೀಲನೆಯಿಂದ ನುಣುಚಿಕೊಳ್ಳುವುದು, ಶೂನ್ಯ ಪಾರದರ್ಶಕತೆ

ಹೊಸ ಮತದಾರರ ನೋಂದಣಿಗೆ ಮತ್ತು ಬಿಹಾರದಲ್ಲಿ ನಿಗದಿತ ಅವಧಿಯಲ್ಲಿ ಗಣತಿ ಫಾರ್ಮ್‌ ಭರ್ತಿ ಮಾಡಲು ಸಾಧ್ಯವಾಗದವರಿಗಾಗಿ ಫಾರ್ಮ್‌ 6 ಅನ್ನು ಏಕೆ ಬಳಸಲಾಯಿತು ಹಾಗೂ ಇವೆರಡರ ಪ್ರತ್ಯೇಕ ಡೇಟಾವನ್ನು ಏಕೆ ನೀಡಲಿಲ್ಲ ಎಂಬುದಕ್ಕೆ ಯಾವುದೇ ಸ್ಪಷ್ಟನೆ ಸಿಕ್ಕಿಲ್ಲ.

ಇವೆಲ್ಲವೂ SIR ಪ್ರಕ್ರಿಯೆಯ ಜಾರಿಯ ಸುತ್ತಲಿರುವ ಅಪಾರದರ್ಶಕತೆಯನ್ನು ತೋರಿಸುತ್ತವೆ. ಕಳೆದ ವರ್ಷದ ನವೆಂಬರ್‌ನಲ್ಲಿ ಆರ್‌ಟಿಐ ಅರ್ಜಿಗೆ ನೀಡಿದ ಉತ್ತರದಲ್ಲಿ ಚುನಾವಣಾ ಆಯೋಗವು, ಎಸ್‌ಐಆರ್ ಆರಂಭಿಸುವ ನಿರ್ಧಾರದ ಪ್ರಕ್ರಿಯೆಗೆ ಸಂಬಂಧಿಸಿದ ಯಾವುದೇ ದಾಖಲೆಗಳು ತನ್ನ ಬಳಿ ಇಲ್ಲ ಎಂದು ಹೇಳಿತ್ತು. ಜೊತೆಗೆ, "2025ರಲ್ಲಿ ದೇಶಾದ್ಯಂತ ಎಸ್‌ಐಆರ್ ಜಾರಿಗೊಳಿಸುವ ಕುರಿತು ಇದುವರೆಗೆ ಯಾವುದೇ ನಿರ್ಧಾರ ತೆಗೆದುಕೊಂಡಿಲ್ಲ. ಹೀಗಾಗಿ, ಈ ಕುರಿತು ಯಾವುದೇ ಮಾಹಿತಿ ನೀಡಲು ಸಾಧ್ಯವಿಲ್ಲ" ಎಂದೂ ತಿಳಿಸಿತ್ತು.

ಆ ಹೊತ್ತಿಗೆ ಬಿಹಾರದಲ್ಲಿ SIR ಪೂರ್ಣಗೊಂಡು, ಇತರ 12 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಪ್ರಕ್ರಿಯೆ ನಡೆಯುತ್ತಿತ್ತು.

'ಸತರ್ಕ್ ನಾಗರಿಕ್ ಸಂಘಟನ್' ಸಂಸ್ಥೆಯ ನಾಗರಿಕ ಹಕ್ಕುಗಳ ಪರ ಹೋರಾಟಗಾರ್ತಿ ಅಮೃತಾ ಜೋಹ್ರಿ ಮಾತನಾಡಿ, "ಫಾರ್ಮ್‌ 6ರಲ್ಲಿ ಮಾಡಲಾದ ಬದಲಾವಣೆಗಳು ಎಸ್‌ಐಆರ್ ಪ್ರಕ್ರಿಯೆಯ ಪ್ರಮುಖ ಲಕ್ಷಣವಾಗಿರುವ ಅನಿಯಂತ್ರಿತ ಮತ್ತು ಹಠಾತ್ ಬದಲಾವಣೆಗಳ ಸರಣಿಯ ಹೊಸ ಸೇರ್ಪಡೆಯಷ್ಟೇ" ಎಂದು ಹೇಳಿದ್ದಾರೆ.

"SIR ನಡೆಸಲು ಮುಖ್ಯ ಕಾರಣ ಎನ್ನಲಾದ 'ನುಸುಳುಕೋರರು' (ಅಕ್ರಮ ವಲಸಿಗರು) ಎಷ್ಟು ಜನ ಪತ್ತೆಯಾಗಿದ್ದಾರೆ ಎಂಬ ಮಾಹಿತಿಯಾಗಲಿ, ಅಥವಾ ಎಷ್ಟು ಜನ ಹೊಸ ಮತದಾರರು ಸೇರ್ಪಡೆಯಾಗಿದ್ದಾರೆ ಎಂಬ ಮಾಹಿತಿಯಾಗಲಿ ನಮ್ಮ ಬಳಿ ಇಲ್ಲ. ಹೊಸದಾಗಿ ಸೇರ್ಪಡೆಯಾದವರಲ್ಲಿ ಇತ್ತೀಚೆಗೆ 18 ವರ್ಷ ತುಂಬಿದವರು ಎಷ್ಟು ಜನ ಮತ್ತು ತಪ್ಪು ನಿರ್ಧಾರದಿಂದ ಹೆಸರು ಕೈಬಿಟ್ಟು ನಂತರ ಮತ್ತೆ ಸೇರಿಸಲ್ಪಟ್ಟವರು ಎಷ್ಟು ಜನ ಎಂಬ ಪ್ರತ್ಯೇಕ ವಿವರವೂ ಇಲ್ಲ. ಬೃಹತ್ ಪ್ರಮಾಣದಲ್ಲಿ ಅರ್ಹ ಮತದಾರರ ಹೆಸರುಗಳನ್ನು ತಪ್ಪಾಗಿ ತೆಗೆದುಹಾಕಿದ್ದಕ್ಕೆ ಯಾವುದೇ ಹೊಣೆಗಾರಿಕೆ ಇರಲಿಲ್ಲ. ಪಶ್ಚಿಮ ಬಂಗಾಳದ ನ್ಯಾಯಾಧಿಕರಣಗಳು ಹೆಚ್ಚಿನ ಮತದಾರರ ಹೆಸರುಗಳನ್ನು ತಪ್ಪಾಗಿ ತೆಗೆದುಹಾಕಲಾಗಿದೆ ಎಂದು ಕಂಡುಕೊಂಡು, ಅವುಗಳನ್ನು ಮರು ಸೇರ್ಪಡೆ ಮಾಡಲು ಆದೇಶಿಸಿದ್ದವು" ಎಂದು ಅವರು ವಿವರಿಸಿದ್ದಾರೆ.

"ಕಾನೂನು ಮತ್ತು ನಿಯಮಗಳನ್ನು ತಿದ್ದುಪಡಿ ಮಾಡುವ ಮೂಲಕ ಅಧಿಕೃತ ಫಾರ್ಮ್‌ಗಳಲ್ಲಿ ಬದಲಾವಣೆ ತರುವ ಬದಲು, ಚುನಾವಣಾ ಆಯೋಗವು ಸೂಚನೆಗಳ ಮೂಲಕ ಫಾರ್ಮ್‌ 6ರ ಈ ಹೆಚ್ಚುವರಿ ಸ್ವಯಂ ಘೋಷಣಾಪತ್ರವನ್ನು ಸೇರಿಸಿ ಸಂಸತ್ತು ಮತ್ತು ಸಾರ್ವಜನಿಕರ ಪರಿಶೀಲನೆಯಿಂದ ನುಣುಚಿಕೊಂಡಿದೆ. 100 ಕೋಟಿ ಭಾರತೀಯರ ದಾಖಲೆಗಳನ್ನು ಆಯೋಗವು ಯಾವುದೇ ಸ್ಪಷ್ಟ ದಾಖಲೆಗಳಿಲ್ಲದ ಹಾಗೂ ಅನಿಯಂತ್ರಿತ ಪ್ರಕ್ರಿಯೆಯ ಮೂಲಕ ಕೇಳುತ್ತಿದೆ. ಒಂದೆಡೆ ನಿಯಮಗಳನ್ನು ಮತ್ತು ಗುರಿಗಳನ್ನು ಪದೇಪದೇ ಬದಲಾಯಿಸಲಾಗುತ್ತಿದ್ದರೆ, ಇನ್ನೊಂದೆಡೆ ಎಸ್‌ಐಆರ್ ಕುರಿತು ಸಂಪೂರ್ಣ ಪಾರದರ್ಶಕತೆಯ ಅಭಾವ ಎದ್ದು ಕಾಣುತ್ತಿರುವುದು ಒಂದು ವಿಪರ್ಯಾಸ" ಎಂದು ಅಮೃತಾ ಜೋಹ್ರಿ ಹೇಳಿದ್ದಾರೆ.

ಸೌಜನ್ಯ: thewire.in