ವಿದ್ಯಾರ್ಥಿಗಳ ಬೇಡಿಕೆಗಳನ್ನು ಈಡೇರಿಸಲು ಫ್ರಾನ್ಸ್ ವಿಫಲವಾಗುತ್ತಿರುವುದೇಕೆ?

ದೇಶದಲ್ಲಿ ದಿನೇ ದಿನೇ ಏರುತ್ತಿರುವ ಜೀವನ ವೆಚ್ಚದ ನಡುವೆ, ಉತ್ತಮ ಶಿಕ್ಷಣ ಸೌಲಭ್ಯಗಳು ಹಾಗೂ ಸುಭದ್ರ ಭವಿಷ್ಯಕ್ಕಾಗಿ ಆಗ್ರಹಿಸಿ ಫ್ರಾನ್ಸ್ ದೇಶಾದ್ಯಂತ ಯುವಜನರು ವಾರಾಂತ್ಯದಲ್ಲೂ ತಮ್ಮ ಪ್ರತಿಭಟನೆಯನ್ನು ಮುಂದುವರಿಸಿದ್ದಾರೆ.

ವಿದ್ಯಾರ್ಥಿಗಳ ನೇತೃತ್ವದಲ್ಲಿ ನಡೆಯುತ್ತಿರುವ ಈ ಪ್ರತಿಭಟನೆಗಳು ಎತ್ತಿರುವ ಸಮಸ್ಯೆಗಳನ್ನು ಬಗೆಹರಿಸಲು ಸರ್ಕಾರ ಹೆಣಗಾಡುತ್ತಿದೆ. ಶನಿವಾರ ಪ್ಯಾರಿಸ್ ನಲ್ಲಿ 1.10 ಲಕ್ಷ ಜನರು ಸೇರಿದಂತೆ ದೇಶಾದ್ಯಂತ ಒಟ್ಟು 4.10 ಲಕ್ಷ ಜನರು ಪ್ರತಿಭಟನೆ ನಡೆಸಿದ್ದಾರೆ ಎಂದು ಫ್ರಾನ್ಸ್ ನ ಗೃಹ ಸಚಿವಾಲಯ ತಿಳಿಸಿದೆ.

2018ರಲ್ಲಿ ಆರಂಭವಾಗಿ ಸುಮಾರು ಎರಡು ವರ್ಷಗಳ ಕಾಲ ಫ್ರಾನ್ಸ್ ನಲ್ಲಿ ಜೀವನ ವೆಚ್ಚದ ಏರಿಕೆ ಮತ್ತು ಫ್ರಾನ್ಸ್ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಅವರ ಆರ್ಥಿಕ ನೀತಿಗಳ ವಿರುದ್ಧ ಭಾರಿ ಪ್ರತಿಭಟನೆಗಳು ನಡೆದಿದ್ದವು. 'ಯೆಲ್ಲೊ ವೆಸ್ಟ್ಸ್' (Yellow Vests) ಚಳವಳಿಯ ನೇತೃತ್ವದಲ್ಲಿ ನಡೆದ ಆ ಪ್ರತಿಭಟನೆಗಳು, ಹೆಚ್ಚುತ್ತಿರುವ ಆರ್ಥಿಕ ಅಸಮಾನತೆಯನ್ನು ತಡೆಯಲು, ಕಲ್ಯಾಣ ಯೋಜನೆಗಳು ಹಾಗೂ ಸಾರ್ವಜನಿಕ ಸೇವೆಗಳನ್ನು ಹೆಚ್ಚಿಸಲು ಮತ್ತು ಶ್ರೀಮಂತರ ಮೇಲೆ ತೆರಿಗೆ ವಿಧಿಸಲು ಸರ್ಕಾರವನ್ನು ಆಗ್ರಹಿಸಿದ್ದವು.

ಈಗ ಯುವ ಪ್ರತಿಭಟನಾಕಾರರು ಬೀದಿಗಿಳಿದಿದ್ದರೂ, ಆ ಹಳೆಯ ಅನೇಕ ಬೇಡಿಕೆಗಳು ಇಂದಿಗೂ ಈಡೇರದೆ ಉಳಿದಿವೆ. ಹಾಗಿದ್ದರೆ, ದೇಶವು ಎದುರಿಸುತ್ತಿರುವ ಈ ಸಮಸ್ಯೆಗಳನ್ನು ಪರಿಹರಿಸಲು ಫ್ರಾನ್ಸ್ ನ ರಾಜಕಾರಣಿಗಳಿಗೆ ಏಕೆ ಸಾಧ್ಯವಾಗುತ್ತಿಲ್ಲ?

ಫ್ರಾನ್ಸ್ ನಲ್ಲಿ ಯುವಜನರು ಈಗ ಪ್ರತಿಭಟನೆ ನಡೆಸುತ್ತಿರುವುದೇಕೆ?

ಶಾಲಾ-ಕಾಲೇಜುಗಳ ಹದಗೆಡುತ್ತಿರುವ ಸ್ಥಿತಿ, ಆರ್ಥಿಕ ಆತಂಕಗಳು ಮತ್ತು ಸರ್ಕಾರದ ಬಜೆಟ್ ಕಡಿತದ ವಿರುದ್ಧ ಕಳೆದ ಎರಡು ತಿಂಗಳಿನಿಂದ ಫ್ರಾನ್ಸ್ ನಲ್ಲಿ ಯುವಕರು ಬೀದಿಗಿಳಿದಿದ್ದಾರೆ.

ಸೆಪ್ಟೆಂಬರ್ ಮಧ್ಯಭಾಗದಲ್ಲಿ ಪ್ರೌಢಶಾಲಾ ವಿದ್ಯಾರ್ಥಿಗಳು ತರಗತಿಗಳನ್ನು ಬಹಿಷ್ಕರಿಸುವ ಮೂಲಕ ಪ್ರತಿಭಟನೆ ಆರಂಭಿಸಿದರು. ತರಗತಿಗಳಲ್ಲಿ ಮಿತಿಮೀರಿದ ವಿದ್ಯಾರ್ಥಿಗಳ ಸಂಖ್ಯೆ (ಸಾಮಾನ್ಯವಾಗಿ ಪ್ರತಿ ತರಗತಿಯಲ್ಲಿ 32ರಿಂದ 35 ವಿದ್ಯಾರ್ಥಿಗಳು), ಗೈರುಹಾಜರಾದ ಶಿಕ್ಷಕರ ಬದಲಿಗೆ ಪರ್ಯಾಯ ಶಿಕ್ಷಕರನ್ನು ನೇಮಿಸದಿರುವುದು ಹಾಗೂ ಶಿಥಿಲಗೊಂಡ ಶಾಲಾ ಕಟ್ಟಡಗಳ ಸೌಲಭ್ಯಗಳ ವಿರುದ್ಧ ಈ ಚಳವಳಿ ಶುರುವಾಯಿತು.

'ನಾವು ಭವಿಷ್ಯವನ್ನು ನಿರ್ಮಿಸಿಕೊಳ್ಳಬೇಕಿದೆ, ಸಹಿಸಿಕೊಳ್ಳುವುದಲ್ಲ' ಎಂಬ ಫಲಕಗಳನ್ನು ಹಿಡಿದ ಪ್ರತಿಭಟನಾಕಾರರು, ಸಾರ್ವಜನಿಕ ಸಂಪನ್ಮೂಲಗಳು ಮತ್ತು ಸರ್ಕಾರಿ ಹೂಡಿಕೆಗಳು ಕ್ಷೀಣಿಸುತ್ತಿರುವುದಕ್ಕೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಕಡಿಮೆ ವೇತನದ ವಿರುದ್ಧ ಪ್ರತಿಭಟಿಸುತ್ತಿರುವ ಶಿಕ್ಷಕರೂ ವಿದ್ಯಾರ್ಥಿಗಳ ಹೋರಾಟಕ್ಕೆ ಕೈಜೋಡಿಸಿದ್ದಾರೆ. ಆರ್ಥಿಕ ಸಹಕಾರ ಮತ್ತು ಅಭಿವೃದ್ಧಿ ಸಂಸ್ಥೆಯ (OECD) 'ಎಜುಕೇಶನ್ ಅಟ್ ಎ ಗ್ಲಾನ್ಸ್ 2026' ವರದಿಯ ಪ್ರಕಾರ, ಜರ್ಮನಿಯಂತಹ ಇತರ ಯುರೋಪಿಯನ್ ದೇಶಗಳ ಶಿಕ್ಷಕರಿಗೆ ಹೋಲಿಸಿದರೆ ಫ್ರಾನ್ಸ್ ನ ಶಿಕ್ಷಕರಿಗೆ ಕಡಿಮೆ ವೇತನ ನೀಡಲಾಗುತ್ತದೆ.

ಫ್ರಾನ್ಸ್ ನ ಶಾಲಾ ಶಿಕ್ಷಕರು ವರ್ಷಕ್ಕೆ ಒಟ್ಟು 41,968 ಯುರೊ (ಸುಮಾರು 46,900 ಡಾಲರ್) ಗಳಿಸಿದರೆ, ಜರ್ಮನಿಯ ಶಿಕ್ಷಕರು 69,453 ಯುರೊ (ಸುಮಾರು 77,700 ಡಾಲರ್) ಗಳಿಸುತ್ತಾರೆ. ಸಾಮಾಜಿಕ ತೆರಿಗೆಗಳು, ಹೆಚ್ಚಿನ ಪಿಂಚಣಿ ವಂತಿಕೆಗಳು ಮತ್ತು ಏರುತ್ತಿರುವ ಜೀವನ ವೆಚ್ಚವು ಅವರ ಮಾಸಿಕ ಆದಾಯವನ್ನು ಕಡಿಮೆಗೊಳಿಸುತ್ತಿದೆ.

ಶಾಲಾ ಸೌಲಭ್ಯಗಳಿಗಾಗಿ ಆರಂಭವಾದ ಈ ಸ್ಥಳೀಯ ಮುಷ್ಕರವು ಬಳಿಕ ಕಾರ್ಮಿಕ ಸಂಘಟನೆಗಳು ಮತ್ತು ಸರ್ಕಾರಿ ನೌಕರರನ್ನು ತನ್ನತ್ತ ಸೆಳೆದಿದ್ದು, ಪ್ರತಿಭಟನೆಯು ಬೃಹತ್ ಆರ್ಥಿಕ ಮತ್ತು ರಾಜಕೀಯ ಬಿಕ್ಕಟ್ಟಾಗಿ ಮಾರ್ಪಟ್ಟಿದೆ.

2027ರ ಬಜೆಟ್ಗಾಗಿ ಸರ್ಕಾರವು 54 ಬಿಲಿಯನ್ ಯುರೊ (ಸುಮಾರು 60 ಬಿಲಿಯನ್ ಡಾಲರ್) ವೆಚ್ಚ ಕಡಿತ ಮತ್ತು ತೆರಿಗೆ ಕ್ರಮಗಳನ್ನು ಪ್ರಸ್ತಾಪಿಸಿದ್ದು, ಸರ್ಕಾರಿ ನೌಕರರ ವೇತನ ಹೆಚ್ಚಳಕ್ಕೆ ತಡೆ ನೀಡಿರುವುದು ಈ ಅಸಮಾಧಾನಕ್ಕೆ ಕಾರಣವಾಗಿದೆ.

ಅಮೆರಿಕ–ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧದಿಂದಾಗಿ ಜೀವನ ವೆಚ್ಚ ಏರಿಕೆಯಾಗಿದ್ದು, ಬಡತನದ ಪ್ರಮಾಣವೂ ಹೆಚ್ಚುತ್ತಿದೆ. ಈ ನಡುವೆ ಸಾರ್ವಜನಿಕ ವೆಚ್ಚದ ಕಡಿತದ ಬಿಸಿ ತಮ್ಮ ಮೇಲೆ ತಟ್ಟಬಹುದು ಎಂದು ವಿದ್ಯಾರ್ಥಿಗಳು ಮತ್ತು ಯುವಜನರು ಆತಂಕಗೊಂಡಿದ್ದಾರೆ.

'ಲೆ ಮೀಡಿಯಾ ಟಿವಿ' ಪತ್ರಕರ್ತ ಹಾಗೂ ಫ್ರಾನ್ಸ್ ನ ನ್ಯಾಷನಲ್ ಅಸೆಂಬ್ಲಿಯ ಮಾಜಿ ಸಂಸದೀಯ ಸಹಾಯಕ ಅಮೈನ್ ಸ್ನೌಸಿ ಅವರ ಪ್ರಕಾರ, ಸರ್ಕಾರದ ಹಣವನ್ನು ಬೇರೆಡೆಗೆ ಖರ್ಚು ಮಾಡುತ್ತಿರುವುದರಿಂದ ಸರ್ಕಾರಿ ಪ್ರೌಢಶಾಲೆಗಳ ಸ್ಥಿತಿ ಶೋಚನೀಯವಾಗಿದೆ.

"ವಿದ್ಯಾರ್ಥಿಗಳು ಕೊಳಕು, ಶೀತ ವಾತಾವರಣದ ಹಾಗೂ ಇಲಿಗಳ ಕಾಟವಿರುವ ಕಟ್ಟಡಗಳಲ್ಲಿ ಕಲಿಯುತ್ತಿದ್ದಾರೆ. ಕೆಲವು ಶಾಲೆಗಳಲ್ಲಿ ಗೈರಾದ ಶಿಕ್ಷಕರ ಜಾಗಕ್ಕೆ ಆರು ತಿಂಗಳಿನಿಂದ ಯಾರನ್ನೂ ನೇಮಿಸಿಲ್ಲ. ಸಾವಿರಾರು ಶಿಕ್ಷಕರ ಹುದ್ದೆಗಳನ್ನು ಕಡಿತಗೊಳಿಸುತ್ತಿದ್ದರೂ, ಸರ್ಕಾರಿ ಹಣ ಖಾಸಗಿ ಶಾಲೆಗಳಿಗೆ ಹರಿಯುತ್ತಲೇ ಇದೆ. ಇದೇ ಪ್ರತಿಭಟನೆಯ ಕಿಚ್ಚಿಗೆ ಕಾರಣವಾಯಿತು" ಎಂದು ಅವರು ಅಲ್ ಜಝೀರಾಗೆ ತಿಳಿಸಿದ್ದಾರೆ.

►ಸರ್ಕಾರದ ಪ್ರತಿಕ್ರಿಯೆ ಹೇಗಿದೆ?

ಬೃಹತ್ ಪ್ರತಿಭಟನೆಗಳನ್ನು ಹತೋಟಿಗೆ ತರಲು ಫ್ರಾನ್ಸ್ ಸರ್ಕಾರವು ರಾತ್ರಿ ಕರ್ಫ್ಯೂ ವಿಧಿಸಿದ್ದು, ದೇಶಾದ್ಯಂತ ಪ್ರತಿಭಟನಾಕಾರರನ್ನು ಹದ್ದುಬಸ್ತಿನಲ್ಲಿಡಲು ಪೊಲೀಸರನ್ನು ನಿಯೋಜಿಸಿದೆ.

ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್, "ರಿಪಬ್ಲಿಕ್ ಅನ್ನು ಪತನಗೊಳಿಸಲು" ತೀವ್ರ ಎಡಪಂಥೀಯ ಗುಂಪುಗಳು ಯತ್ನಿಸುತ್ತಿವೆ ಎಂದು ಆರೋಪಿಸಿದ್ದು, ಹಿಂಸಾಚಾರದಲ್ಲಿ ಭಾಗಿಯಾದವರ ವಿರುದ್ಧ ಕಠಿಣ ಕ್ರಮ ಜರುಗಿಸುವುದಾಗಿ ಎಚ್ಚರಿಸಿದ್ದಾರೆ.

ಪ್ರತಿಭಟನೆಗಳು ಆರಂಭವಾದ ಬಳಿಕ ಫ್ರಾನ್ಸ್ ಅಧ್ಯಕ್ಷರು ಶುಕ್ರವಾರ ಮೊದಲ ಬಾರಿಗೆ ವಿದ್ಯಾರ್ಥಿ ಚಳವಳಿಯ ಪ್ರತಿನಿಧಿಗಳೊಂದಿಗೆ ಸಭೆ ನಡೆಸಿದರು.

ಆದರೆ, ಈ ಸಭೆಯು ಉದ್ವಿಗ್ನತೆಯನ್ನು ಶಮನಗೊಳಿಸುವಲ್ಲಿ ವಿಫಲವಾಗಿದೆ. ಸರ್ಕಾರವು ನಿರ್ದಿಷ್ಟ ಮತ್ತು ಪ್ರಾಯೋಗಿಕ ಕ್ರಮಗಳನ್ನು ಕೈಗೊಳ್ಳುವವರೆಗೆ ತಮ್ಮ ಹೋರಾಟವನ್ನು ಮತ್ತಷ್ಟು ತೀವ್ರಗೊಳಿಸುವುದಾಗಿ ವಿದ್ಯಾರ್ಥಿ ಪ್ರತಿನಿಧಿಗಳು ಕರೆ ನೀಡಿದ್ದಾರೆ.

ಸೋಮವಾರ ಮಾರ್ಸೆಲ್ ನಗರಕ್ಕೆ ಭೇಟಿ ನೀಡಿದ್ದ ಮ್ಯಾಕ್ರನ್, "ಈ ಪ್ರತಿಭಟನಾ ಚಳವಳಿಗೆ ಕಾರಣವಾಗಿರುವ ನ್ಯಾಯಯುತ ಬೇಡಿಕೆಗಳನ್ನು ಈಡೇರಿಸುವಂತೆ ನಾನು ಸರ್ಕಾರಕ್ಕೆ ಸೂಚಿಸಿದ್ದೇನೆ" ಎಂದು ತಿಳಿಸಿದ್ದಾರೆ.

ಫ್ರಾನ್ಸ್ ನ ಮಾಧ್ಯಮಗಳ ವರದಿಗಳ ಪ್ರಕಾರ, ರಾಷ್ಟ್ರೀಯ ವಿಶ್ವವಿದ್ಯಾಲಯ ಪ್ರವೇಶ ಪೋರ್ಟಲ್ 'ಪಾರ್ಕರ್ಸಪ್' (Parcoursup) ವ್ಯವಸ್ಥೆಯಲ್ಲಿ ಸೂಕ್ತ ಬದಲಾವಣೆಗಳನ್ನು ಸರ್ಕಾರ ಘೋಷಿಸುವ ನಿರೀಕ್ಷೆಯಿದೆ.

►ಪ್ರತಿಭಟನಾಕಾರರ ಬೇಡಿಕೆಗಳನ್ನು ಈಡೇರಿಸಲು ಫ್ರಾನ್ಸ್ ಸರ್ಕಾರಕ್ಕೆ ಸಾಧ್ಯವಾಗುತ್ತಿಲ್ಲವೇಕೆ?

ಹಣಕಾಸಿನ ಬಿಕ್ಕಟ್ಟು ಮತ್ತು ಯೋಜಿತ ಬಜೆಟ್ ಕಡಿತದ ಕಾರಣದಿಂದಾಗಿ ದೇಶದ ಶಿಕ್ಷಣ ಬಜೆಟ್ ಕುಸಿತ ಕಂಡಿರುವುದೇ ವಿದ್ಯಾರ್ಥಿಗಳ ಬೇಡಿಕೆಗಳನ್ನು ಈಡೇರಿಸಲು ಸರ್ಕಾರಕ್ಕೆ ತೊಡಕಾಗಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

'ವರ್ಲ್ಡ್ ಇನ್ಈಕ್ವಾಲಿಟಿ ಲ್ಯಾಬ್'ನ ಸಹನಿರ್ದೇಶಕ ಹಾಗೂ ಫ್ರಾನ್ಸ್ ನ ಅರ್ಥಶಾಸ್ತ್ರಜ್ಞ ಲ್ಯೂಕಾಸ್ ಚಾನ್ಸೆಲ್ ಅವರು ಪ್ರಕಟಿಸಿದ ದತ್ತಾಂಶಗಳ ಪ್ರಕಾರ, "ಹಣದುಬ್ಬರವನ್ನು ಲೆಕ್ಕಕ್ಕೆ ತೆಗೆದುಕೊಂಡರೆ, 2017ರಿಂದೀಚೆಗೆ ಫ್ರಾನ್ಸ್ ನಲ್ಲಿ ಒಟ್ಟು ವಿದ್ಯಾರ್ಥಿಗಳ ಸಂಖ್ಯೆಗೆ ಹೋಲಿಸಿದಾಗ ಉನ್ನತ ಶಿಕ್ಷಣ, ವಿದ್ಯಾರ್ಥಿ ಜೀವನ ಮತ್ತು ಸಂಶೋಧನೆಗಾಗಿ ಮೀಸಲಿಟ್ಟ ಸಾರ್ವಜನಿಕ ಬಜೆಟ್ ಶೇಕಡಾ 20ರಷ್ಟು ಕಡಿಮೆಯಾಗಿದೆ."

ಆದರೆ, ಫ್ರಾನ್ಸ್ ಸರ್ಕಾರವು ಈ ಬಜೆಟ್ ಕಡಿತವನ್ನು ಸಮರ್ಥಿಸಿಕೊಂಡಿದೆ.

ಅಕ್ಟೋಬರ್ 7ರಂದು ದೇಶವನ್ನುದ್ದೇಶಿಸಿ ಮಾತನಾಡಿದ್ದ ಫ್ರಾನ್ಸ್ ಪ್ರಧಾನಿ ಸೆಬಾಸ್ಟಿಯನ್ ಲೆಕೋರ್ನು, "ಯುವಜನರ ಆಕ್ರೋಶ ಸುಮ್ಮನೆ ಬಂದಿದ್ದಲ್ಲ" ಎಂಬುದನ್ನು ಒಪ್ಪಿಕೊಂಡಿದ್ದು, ಅಕ್ಟೋಬರ್ ಅಂತ್ಯದ ವೇಳೆಗೆ ಈ ಬಿಕ್ಕಟ್ಟನ್ನು ಶಮನಗೊಳಿಸಲು ಸರ್ಕಾರವು ಯೋಜನೆಯೊಂದನ್ನು ಮಂಡಿಸಲಿದೆ ಎಂದು ಭರವಸೆ ನೀಡಿದ್ದರು.

ಫ್ರಾನ್ಸ್ ನ ರಾಷ್ಟ್ರೀಯ ಸಾಲವು ಸುಮಾರು 3.6 ಟ್ರಿಲಿಯನ್ ಯುರೊಗಳಿಗೆ (ಸುಮಾರು 4 ಟ್ರಿಲಿಯನ್ ಡಾಲರ್) ತಲುಪಿದ್ದು, ಇದು ದೇಶದ ಒಟ್ಟು ಆಂತರಿಕ ಉತ್ಪನ್ನದ (GDP) ಶೇಕಡಾ 119ರಷ್ಟಿದೆ. ಈ ಹಿನ್ನೆಲೆಯಲ್ಲಿ ಪ್ರಧಾನಿಯವರು ತಮ್ಮ ಸಚಿವರಿಗೆ ಸರ್ಕಾರಿ ವೆಚ್ಚವನ್ನು ಕಡಿತಗೊಳಿಸುವಂತೆ ಸೂಚಿಸಿದ್ದಾರೆ.

ಆದರೆ, ಒಟ್ಟು ಸಾಲಕ್ಕಿಂತ ಮಾರುಕಟ್ಟೆಗೆ ಹೆಚ್ಚಿನ ಆತಂಕ ತಂದಿರುವುದು ಫ್ರಾನ್ಸ್ ನ ಹೆಚ್ಚುತ್ತಿರುವ ವಿತ್ತೀಯ ಕೊರತೆ. 2026ರಲ್ಲಿ ಈ ಕೊರತೆಯು GDPಯ ಶೇಕಡಾ 5.4ಕ್ಕೆ ತಲುಪುವ ನಿರೀಕ್ಷೆಯಿದೆ. ಇದು ಯುರೋಪಿಯನ್ ಒಕ್ಕೂಟದ ಸರಾಸರಿ ಶೇಕಡಾ 3ಕ್ಕಿಂತಲೂ ಹೆಚ್ಚಾಗಿದೆ. ಅಂದರೆ, ಸರ್ಕಾರದ ಆದಾಯಕ್ಕಿಂತ ಅದರ ವೆಚ್ಚವು ಈ ಪ್ರಮಾಣದಲ್ಲಿ ಮೀರಿದೆ.

ಆದರೆ, ವರದಿಯೊಂದರಲ್ಲಿ ಫ್ರಾನ್ಸ್ ನ ಅರ್ಥಶಾಸ್ತ್ರಜ್ಞ ಹಾಗೂ ಪ್ರಾಧ್ಯಾಪಕ ಥಾಮಸ್ ಪಿಕೆಟಿ, "ಸಾರ್ವಜನಿಕ ಸಾಲವು ಹೆಚ್ಚಾಗಿದ್ದರೂ, ದೇಶದ ಖಾಸಗಿ ಸಂಪತ್ತು GDPಯ ಶೇಕಡಾ 300ರಿಂದ 600ರಷ್ಟು ಬೆಳೆದಿದೆ. ಈ ಸಂಪತ್ತು ಶ್ರೀಮಂತ ನಾಯಕರ ಕೈಯಲ್ಲೇ ಹೆಚ್ಚು ಕೇಂದ್ರೀಕೃತಗೊಂಡಿದೆ" ಎಂದು ಉಲ್ಲೇಖಿಸಿದ್ದಾರೆ.

"ಅಂದರೆ, ಫ್ರಾನ್ಸ್ ಎಂದಿಗೂ ಇಷ್ಟೊಂದು ಶ್ರೀಮಂತವಾಗಿರಲಿಲ್ಲ. ಈಗ ಬಗೆಹರಿಸಬೇಕಾದ ಏಕೈಕ ಸಮಸ್ಯೆ ಎಂದರೆ ಆ ಸಂಪತ್ತಿನ ಸರಿಯಾದ ಹಂಚಿಕೆ ಅಷ್ಟೇ" ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಫ್ರಾನ್ಸ್ ನಲ್ಲಿ ಸಂಪತ್ತಿನ ಹಂಚಿಕೆಯ ಸಮಸ್ಯೆ ಇದೆಯೇ?

ಫ್ರಾನ್ಸ್ ನಲ್ಲಿ ಆದಾಯದ ಅಸಮಾನತೆಯು ತುಲನಾತ್ಮಕವಾಗಿ ಕಡಿಮೆ ಅಥವಾ ಮಿತ ಮಟ್ಟದಲ್ಲಿದೆ. ಆದರೆ, ಸಂಪತ್ತಿನ ಮರುಹಂಚಿಕೆಯು ನಿರ್ದಿಷ್ಟವಾಗಿ ಎಡಪಂಥೀಯ ರಾಜಕೀಯ ಗುಂಪುಗಳಲ್ಲಿ ನಿರಂತರ ಚರ್ಚೆಯ ವಿಷಯವಾಗಿದೆ.

ಫ್ರಾನ್ಸ್ ನ ಆರ್ಥಿಕ ನೀತಿಯ ಪ್ರಮುಖ ಚಿಂತಕರ ಚಾವಡಿಯಾದ 'ಒಎಫ್ಸಿಇ' (OFCE) ಜನವರಿ 2026ರಲ್ಲಿ ನಡೆಸಿದ ಪರಿಶೀಲನೆಯ ಪ್ರಕಾರ, ದೇಶದ ಒಟ್ಟು ಜನಸಂಖ್ಯೆಯ ನಾಲ್ಕನೇ ಒಂದು ಭಾಗದಷ್ಟಿರುವ 60 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನವರು ದೇಶದ ಶೇಕಡಾ 60ರಷ್ಟು ಸಂಪತ್ತನ್ನು ಹೊಂದಿದ್ದಾರೆ.

ಸರ್ಕಾರದ ನಿಧಿಯ ಬಹುಪಾಲು ಸಾಮಾಜಿಕ ಭದ್ರತಾ ಸೇವೆಗಳಿಗೆ ವಿನಿಯೋಗವಾಗುತ್ತಿದೆ.

ಈ ತಿಂಗಳ ಆರಂಭದಲ್ಲಿ ರಾಯಿಟರ್ಸ್ ಸುದ್ದಿ ಸಂಸ್ಥೆಗೆ ಲಭ್ಯವಾದ ಸರ್ಕಾರಿ ವರದಿಯೊಂದು, ಕೆಲವು ಫ್ರೆಂಚ್ ಸಚಿವಾಲಯಗಳ ಬಜೆಟ್ನ ಸುಮಾರು ಮೂರನೇ ಒಂದು ಭಾಗವು ನಿವೃತ್ತ ಸರ್ಕಾರಿ ನೌಕರರ ಪಿಂಚಣಿಗಾಗಿಯೇ ಖರ್ಚಾಗುತ್ತಿದೆ ಎಂದು ಹೇಳಿದೆ. ಇದರಿಂದಾಗಿ ಶಿಕ್ಷಣ ಮತ್ತು ಇತರ ಆದ್ಯತೆಯ ವಲಯಗಳ ಮೇಲಿನ ವೆಚ್ಚ ಕಡಿತಗೊಳ್ಳುತ್ತಿದೆ.

ಅಮೈನ್ ಸ್ನೌಸಿ ಅವರು ಅಲ್ ಜಝೀರಾಗೆ ನೀಡಿದ ಹೇಳಿಕೆಯಲ್ಲಿ, ಸಂಪತ್ತಿನ ಹಂಚಿಕೆಯ ಪ್ರಶ್ನೆಯು ಪ್ರಸ್ತುತ ಫ್ರಾನ್ಸ್ ನ ರಾಜಕೀಯದಲ್ಲಿ ಯಾವಾಗಲೂ ಕೇಂದ್ರಬಿಂದುವಾಗಿದೆ ಎಂದು ತಿಳಿಸಿದ್ದಾರೆ.

"ಮ್ಯಾಕ್ರನ್ ಅವರನ್ನು ಶ್ರೀಮಂತರ ಅಧ್ಯಕ್ಷ ಎಂದು ಕರೆಯುವುದಕ್ಕೆ ಸೂಕ್ತ ಕಾರಣವಿದೆ. ಅವರು ಯಾವಾಗಲೂ ಶ್ರೀಮಂತರನ್ನೇ ಬೆಂಬಲಿಸುತ್ತಾರೆ ಮತ್ತು ವರ್ಗಗಳ ನಡುವೆ ಸಮಾನತೆಯನ್ನು ತರಲು ಅವರಿಗೆ ಎಂದಿಗೂ ಸಾಧ್ಯವಾಗಿಲ್ಲ" ಎಂದು ಅವರು ಹೇಳಿದ್ದಾರೆ.

ಸಂಪತ್ತಿನ ಮೇಲಿನ ತೆರಿಗೆಯನ್ನು ಕಡಿತಗೊಳಿಸಿದ್ದಕ್ಕಾಗಿ ಮ್ಯಾಕ್ರನ್ ಅವರನ್ನು "ಶ್ರೀಮಂತರ ಅಧ್ಯಕ್ಷ" ಎಂದು ಬಿಂಬಿಸಲಾಗಿದೆ. ಆರ್ಥಿಕತೆಯನ್ನು ಆಧುನೀಕರಿಸುವ ಮತ್ತು ಉದ್ಯೋಗಗಳನ್ನು ಸೃಷ್ಟಿಸುವ ಉದ್ದೇಶದಿಂದ ಅವರು ರೂಪಿಸಿದ ಆರ್ಥಿಕ ನೀತಿಗಳು ತೀವ್ರ ಟೀಕೆಗೆ ಒಳಗಾಗಿವೆ. ಇಂಧನ ತೆರಿಗೆಯನ್ನು ಹೆಚ್ಚಿಸುವ ಅವರ ನಿರ್ಧಾರವು 2018ರಲ್ಲಿ 'ಯೆಲ್ಲೊ ವೆಸ್ಟ್ಸ್' ಪ್ರತಿಭಟನೆಗೆ ಕಾರಣವಾಗಿತ್ತು. ಅದು ಅಸಮಾನತೆಯನ್ನು ತಡೆಯಲು ಸರ್ಕಾರದ ಹಸ್ತಕ್ಷೇಪವನ್ನು ಕೋರಿದ ತಳಮಟ್ಟದ ಚಳವಳಿಯಾಗಿತ್ತು.

ಮ್ಯಾಕ್ರನ್ ಅವರ ನೀತಿಗಳು ಸಂಪತ್ತನ್ನು ಉನ್ನತ ವರ್ಗಕ್ಕೆ ಮರುಹಂಚಿಕೆ ಮಾಡಲು ಕಾರಣವಾದವು ಮತ್ತು ಶ್ರಮಿಕ ವರ್ಗದ ಜನರ ಮೇಲೆ ತೀವ್ರ ಪರಿಣಾಮ ಬೀರಿದವು ಎಂದು ವಿಮರ್ಶಕರು ಹೇಳುತ್ತಾರೆ. ಆದರೆ, ಮ್ಯಾಕ್ರನ್ ತಮ್ಮ ನೀತಿಗಳನ್ನು, ಅದರಲ್ಲೂ ವಿಶೇಷವಾಗಿ ಸಂಪತ್ತು ತೆರಿಗೆಗೆ ಸಂಬಂಧಿಸಿದ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ. ಶ್ರೀಮಂತರನ್ನು ದೇಶದಿಂದ ಹೊರಹಾಕುವುದರಿಂದ ಬಡವರಿಗೆ ಯಾವುದೇ ಸಹಾಯವಾಗುವುದಿಲ್ಲ ಎಂದು ಅವರು ಹೇಳಿದ್ದಾರೆ.

2017ರಲ್ಲಿ 'ದಿ ನ್ಯೂಯಾರ್ಕ್ ಟೈಮ್ಸ್'ಗೆ ನೀಡಿದ ಸಂದರ್ಶನದಲ್ಲಿ ಅವರು, "'ಶ್ರೀಮಂತರಿದ್ದಾರೆ, ಅವರ ಮೇಲೆ ತೆರಿಗೆ ಹಾಕೋಣ, ಆಗ ನಾವೆಲ್ಲರೂ ಚೆನ್ನಾಗಿರುತ್ತೇವೆ' ಎಂದು ಹೇಳುವ ಫ್ರೆಂಚ್ ಅಸೂಯೆಯ ಸಿದ್ಧಾಂತವನ್ನು ನಾನು ನಂಬುವುದಿಲ್ಲ" ಎಂದು ತಿಳಿಸಿದ್ದರು.

ಫ್ರಾನ್ಸ್ ನ ಫಾಂಟೈನ್ಬ್ಲೊದಲ್ಲಿರುವ ಇನ್ಸೀಡ್ ಸಂಸ್ಥೆಯ ಅರ್ಥಶಾಸ್ತ್ರ ಪ್ರಾಧ್ಯಾಪಕ ಆಂಟೋನಿಯೊ ಫಟಾಸ್ ಅಲ್ ಜಝೀರಾ ಜೊತೆ ಮಾತನಾಡಿ, "ಫ್ರಾನ್ಸ್ ಇತರ ಯುರೋಪಿಯನ್ ದೇಶಗಳಿಗಿಂತ ಹೆಚ್ಚು ಅಥವಾ ಕನಿಷ್ಠ ಪಕ್ಷ ಅವುಗಳಿಗೆ ಸಮನಾದ ಮರುಹಂಚಿಕೆ ವ್ಯವಸ್ಥೆಯನ್ನು ಹೊಂದಿದೆ" ಎಂದು ಹೇಳಿದ್ದಾರೆ.

ಮರುಹಂಚಿಕೆ ಎಂಬುದು ತೆರಿಗೆಗಳು ಮತ್ತು ಸೌಲಭ್ಯಗಳ ವರ್ಗಾವಣೆಯ ವ್ಯವಸ್ಥೆಯಾಗಿದ್ದು, ಇದು ಹೆಚ್ಚಿನ ಆದಾಯ ಹೊಂದಿರುವ ವ್ಯಕ್ತಿಗಳಿಂದ ಕಡಿಮೆ ಆದಾಯ ಹೊಂದಿರುವ ವ್ಯಕ್ತಿಗಳಿಗೆ ಆದಾಯವನ್ನು ಮರುಹಂಚಿಕೆ ಮಾಡುತ್ತದೆ ಎಂದು ಅವರು ವಿವರಿಸಿದ್ದಾರೆ.

ಆದರೆ, ನೈಜ ಸಮಸ್ಯೆ ಇದಕ್ಕಿಂತ ಆಳವಾಗಿದೆ ಎಂದು ಫಟಾಸ್ ಅಭಿಪ್ರಾಯಪಟ್ಟಿದ್ದಾರೆ.

"ಫ್ರಾನ್ಸ್ ನ ಅಭಿವೃದ್ಧಿ ವರ್ಷಗಳಿಂದ ಸೀಮಿತವಾಗಿದೆ. ಆರ್ಥಿಕ ಪ್ರಗತಿ ಕಡಿಮೆಯಿದ್ದಾಗ, ತಮಗೆ ಸಿಗುತ್ತಿರುವ ಪ್ರಗತಿಯಿಂದ ಅಸಂತೃಪ್ತರಾದ ಜನಸಂಖ್ಯೆಯ ಒಂದು ಭಾಗವನ್ನು ಊಹಿಸುವುದು ಕಷ್ಟವೇನಲ್ಲ. ಇದು ಸರ್ಕಾರದಿಂದ ಬೆಂಬಲ ಅಥವಾ ಸಂಪತ್ತಿನ ಮರುಹಂಚಿಕೆಯ ರೂಪದಲ್ಲಿ ಪರಿಹಾರಕ್ಕಾಗಿ ಬೇಡಿಕೆಗಳಿಗೆ ಕಾರಣವಾಗುತ್ತದೆ" ಎಂದು ಅವರು ತಿಳಿಸಿದ್ದಾರೆ.

ಫ್ರಾನ್ಸ್ ಪ್ರಸ್ತುತ ಗಂಭೀರ ವಿತ್ತೀಯ ಒತ್ತಡವನ್ನು ಎದುರಿಸುತ್ತಿದ್ದು, ಅದರ ವಾರ್ಷಿಕ ಬಜೆಟ್ ಕೊರತೆಯು GDPಯ ಶೇಕಡಾ 5.4ರಷ್ಟಾಗಲಿದೆ ಎಂದು ಅಂದಾಜಿಸಲಾಗಿದೆ. ಇದು ಯುರೋಪಿಯನ್ ಒಕ್ಕೂಟದ ಪ್ರಮಾಣಿತ ಮಿತಿಯಾದ ಶೇಕಡಾ 3ಕ್ಕಿಂತಲೂ ಹೆಚ್ಚಾಗಿದೆ. ದೇಶದ ಒಟ್ಟು GDPಯ ಸುಮಾರು ಶೇಕಡಾ 57ರಷ್ಟು ಸಾರ್ವಜನಿಕ ವಲಯದ ವೆಚ್ಚಗಳಿಗೆ ವಿನಿಯೋಗವಾಗುತ್ತಿದ್ದು, ಅದರಲ್ಲಿ ಶೇಕಡಾ 14ರಷ್ಟು ಭಾಗ ಕೇವಲ ನೌಕರರ ಪಿಂಚಣಿಗಾಗಿಯೇ ಮೀಸಲಾಗಿದೆ.

"ಹೊರಗೆ ಯಾರೋ ಅತ್ಯಂತ ಶ್ರೀಮಂತರು ಇದ್ದಾರೆ, ಅವರ ಮೇಲೆ ತೆರಿಗೆ ಹಾಕಬಹುದು ಎಂಬ ಭಾವನೆ ಜನರಲ್ಲಿದೆ. ಫ್ರಾನ್ಸ್ ನಲ್ಲಿ ಮತ್ತಷ್ಟು ಪ್ರಗತಿಪರ ವ್ಯವಸ್ಥೆಯನ್ನು ಊಹಿಸಬಹುದಾದರೂ, ಇಂತಹ ಮೇಲ್ನೋಟದ ಪರಿಹಾರಗಳ ಮಿತಿಗಳ ಬಗ್ಗೆ ಎಚ್ಚರಿಕೆಯಿಂದಿರಬೇಕು" ಎಂದು ಫಟಾಸ್ ಹೇಳಿದ್ದಾರೆ.

►ಹಾಗಿದ್ದರೆ ಸರ್ಕಾರ ಹೇಗೆ ಸ್ಪಂದಿಸಬೇಕು?

ಫ್ರಾನ್ಸ್ ನ ದಿನಪತ್ರಿಕೆ 'ಲೆ ಮೋಂಡೆ'ಯಲ್ಲಿ ಬರೆದಿರುವ ತಮ್ಮ ಅಭಿಪ್ರಾಯ ಅಂಕಣದಲ್ಲಿ ಪಿಕೆಟಿ, ಶಿಕ್ಷಣ ಮತ್ತು ಆರೋಗ್ಯದಂತಹ ವಲಯಗಳಲ್ಲಿ ಮರುಹೂಡಿಕೆ ಮಾಡುವುದಕ್ಕೆ ಸರ್ಕಾರ ಮೊದಲ ಆದ್ಯತೆ ನೀಡಬೇಕು ಎಂದು ಉಲ್ಲೇಖಿಸಿದ್ದಾರೆ.

"ಈ ವಲಯಗಳಲ್ಲಿ ಇಂದು ಮರುಹೂಡಿಕೆ ಮಾಡುವುದು ಕೇವಲ ಪ್ರದೇಶಗಳು ಅಥವಾ ಸಾಮಾಜಿಕ ವರ್ಗಗಳ ನಡುವಿನ ಸಮಾನತೆಯ ವಿಷಯವಲ್ಲ" ಎಂದು ಬರೆದಿರುವ ಅವರು, ಇಂತಹ ಮರುಹೂಡಿಕೆಯು ಕಡಿಮೆ ಸಂಪನ್ಮೂಲಗಳನ್ನು ಬಳಸಿಕೊಂಡು ಆರ್ಥಿಕತೆಯು ಹೆಚ್ಚಿನ ಉತ್ಪಾದಕತೆ ಸಾಧಿಸಲು ನೆರವಾಗುತ್ತದೆ ಎಂಬುದನ್ನು ಎತ್ತಿ ತೋರಿಸಿದ್ದಾರೆ.

ಸ್ನೌಸಿ ಕೂಡ ಇದೇ ರೀತಿಯ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ.

"ಸರ್ಕಾರದ ಮುಂದೆ ಒಂದು ಸರಳ ಆಯ್ಕೆಯಿದೆ. ಹೂಡಿಕೆ ಮಾಡುವುದು, ಇಲ್ಲವೇ ಪಕ್ಕಕ್ಕೆ ಸರಿಯುವುದು" ಎಂದು ಅವರು ಹೇಳಿದ್ದಾರೆ.

"ಆದರೆ ನಿಜವಾದ ಪ್ರಶ್ನೆಯೆಂದರೆ, ಮ್ಯಾಕ್ರನ್ ಅವರಿಗೆ ಬಿಕ್ಕಟ್ಟಿನಿಂದ ಹೊರಬರುವ ದಾರಿ ಬೇಕಿದೆಯೇ ಎಂಬುದು ಅಥವಾ ಪರಿಸ್ಥಿತಿ ಇನ್ನಷ್ಟು ಹದಗೆಟ್ಟು, ಪೊಲೀಸ್ ಹಾಗೂ ನ್ಯಾಯಾಂಗದ ಹದ್ದುಬಸ್ತಿನ ಮೂಲಕ ಈ ಚಳವಳಿಯನ್ನು ಹತೋಟಿಗೆ ತರಬಹುದು ಎಂದು ಅವರು ಕಾಯುತ್ತಿದ್ದಾರೆಯೇ?" ಎಂದು ಅವರು ಪ್ರಶ್ನಿಸಿದ್ದಾರೆ.

ಫ್ರಾನ್ಸ್ ನಲ್ಲಿ ಸರ್ಕಾರ ಮಾಡಬೇಕೆಂದು ಜನರು ಬಯಸುವ ಹಲವು ಉತ್ತಮ ಕೆಲಸಗಳಿವೆ. ಆದರೆ, ಯಾವ ವಲಯಕ್ಕೆ ಹೆಚ್ಚಿನ ಹಣಕಾಸಿನ ಅಗತ್ಯವಿದೆ ಎಂಬುದನ್ನು ಆದ್ಯತೆಯ ಮೇರೆಗೆ ನಿರ್ಧರಿಸುವುದು ಮುಖ್ಯ ಎಂದು ಫಟಾಸ್ ಹೇಳಿದ್ದಾರೆ.

"ಅಭಿವೃದ್ಧಿ ಹೊಂದಿದ ಆರ್ಥಿಕತೆಗಳಲ್ಲಿ ಫ್ರಾನ್ಸ್ ನ ಸರ್ಕಾರಿ ವೆಚ್ಚವೇ ಅತ್ಯಂತ ಹೆಚ್ಚಾಗಿದೆ. ಹಾಗಾಗಿ, ಬರೀ ಹಣ ಖರ್ಚು ಮಾಡುವ ಮೂಲಕವೇ ಈ ಸಮಸ್ಯೆಯಿಂದ ಹೊರಬರಲು ಹೆಚ್ಚಿನ ಅವಕಾಶವಿಲ್ಲ.

"ಸುಧಾರಣಾ ನಿರ್ಧಾರಗಳನ್ನು ಕೈಗೊಳ್ಳುವ ವಿಷಯ ಬಂದಾಗ ಫ್ರಾನ್ಸ್ ರಾಜಕೀಯ ಸ್ತಬ್ಧತೆಯನ್ನು ಎದುರಿಸುತ್ತದೆ. ಇತರ ದೇಶಗಳಿಗಿಂತ ಫ್ರಾನ್ಸ್ ಹೆಚ್ಚು ಕಠಿಣ ಪರಿಸ್ಥಿತಿಯಲ್ಲಿರುವುದಕ್ಕೆ ಇದೇ ಮುಖ್ಯ ಕಾರಣ" ಎಂದು ಅವರು ಹೇಳಿದ್ದಾರೆ.

ಸೌಜನ್ಯ: Aljazeera.com