ಭಾರತದ ಹೊಸ ಇಂಧನ ದಕ್ಷತೆ ನಿಯಮಗಳಿಂದ ಕಾರುಗಳ ಬೆಲೆ ಏರಿಕೆಯಾಗಲಿದೆಯೇ?; CAFE-III ನಿಯಮಗಳೇನು ಹೇಳುತ್ತವೆ?

ಪ್ರಯಾಣಿಕ ವಾಹನಗಳಿಗಾಗಿ ಕೇಂದ್ರ ಸರ್ಕಾರವು ಗುರುವಾರ (ಜುಲೈ 17) ಮೂರನೇ ಕರಡು ಕ್ಯಾಫೆ-III (CAFE-III) ನಿಯಮಗಳನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ ಎಥೆನಾಲ್, ಕಂಪ್ರೆಸ್ಡ್ ಬಯೋಗ್ಯಾಸ್ (CBG) ಮತ್ತು ಇತರ ಜೈವಿಕ ಇಂಧನಗಳನ್ನು ನಿಯಮಗಳ ಪಾಲನೆಯ ಲೆಕ್ಕಾಚಾರದಲ್ಲಿ ಪರಿಗಣಿಸಲು ಪ್ರಸ್ತಾಪಿಸಲಾಗಿದೆ.

ಪ್ರಯಾಣಿಕ ವಾಹನಗಳ ಇಂಧನ ದಕ್ಷತೆಯ ಮಾನದಂಡಗಳನ್ನು ಮತ್ತಷ್ಟು ಕಠಿಣಗೊಳಿಸಲು 'ಕಾರ್ಪೊರೇಟ್ ಅವರೇಜ್ ಫ್ಯುಯೆಲ್ ಎಫಿಷಿಯನ್ಸಿ' (CAFE-III) ನಿಯಮಗಳನ್ನು ಜಾರಿಗೆ ತರಲು ಸರ್ಕಾರ ಸಿದ್ಧತೆ ನಡೆಸುತ್ತಿದೆ. ಈ ಪ್ರಸ್ತಾವಿತ ನಿಯಮಗಳು 2027-28ರ ಹಣಕಾಸು ವರ್ಷದಿಂದ ಮಾರಾಟವಾಗುವ ವಾಹನಗಳಿಗೆ ಅನ್ವಯವಾಗುವ ಸಾಧ್ಯತೆಯಿದೆ. ಇದು ವಾಹನ ತಯಾರಕ ಕಂಪನಿಗಳಿಗೆ ಇಂಧನ ದಕ್ಷತೆ ಮತ್ತು ಕಾರ್ಬನ್ ಡೈಆಕ್ಸೈಡ್ ಹೊರಸೂಸುವಿಕೆಗೆ ಸಂಬಂಧಿಸಿದಂತೆ ಕಠಿಣ ಗುರಿಗಳನ್ನು ನಿಗದಿಪಡಿಸಲಿದೆ.

ಹೊಸ ಕರಡುCAFE-III ರಲ್ಲಿ ಏನನ್ನು ಪ್ರಸ್ತಾಪಿಸಲಾಗಿದೆ?

ಸಣ್ಣ ಮತ್ತು ದೊಡ್ಡ ಕಾರುಗಳ ತಯಾರಕರ ನಡುವೆ ನಿಯಮಗಳ ಸೂತ್ರದ ಕುರಿತು ಒಂದು ವರ್ಷದಿಂದ ನಡೆಯುತ್ತಿದ್ದ ಚರ್ಚೆಯ ನಂತರ ಈ ಹೊಸ ಕರಡು ಹೊರಬಂದಿದೆ. ಆಸಕ್ತರು ಈ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ತಿಳಿಸಲು ಆಗಸ್ಟ್ 6 ರವರೆಗೆ ಕಾಲಾವಕಾಶ ನೀಡಲಾಗಿದೆ.

ಇದು ಎರಡನೇ ಕರಡಿನಲ್ಲಿ ತರಲಾಗಿದ್ದ ಬದಲಾವಣೆಗಳನ್ನು ಬಹುಪಾಲು ಉಳಿಸಿಕೊಂಡಿದೆ. ಸೆಪ್ಟೆಂಬರ್ 2025ರ ಮೂಲ ಪ್ರಸ್ತಾವನೆಗೆ ಹೋಲಿಸಿದರೆ ತೂಕದ ಆಧಾರದ ಲೆಕ್ಕಾಚಾರದ ನಿಯಮವನ್ನು ಸರಳಗೊಳಿಸಲಾಗಿದೆ. ಇದರಿಂದಾಗಿ ಹೆಚ್ಚು ತೂಕವಿರುವ ಎಸ್‌ಯುವಿ ಕಾರುಗಳಿಗೆ ಸಿಗುತ್ತಿದ್ದ ಹೆಚ್ಚಿನ ಲಾಭ ಕಡಿಮೆಯಾಗಲಿದ್ದು, ಕಡಿಮೆ ತೂಕದ ವಾಹನಗಳ ಗುರಿಯನ್ನು ಸುಲಭಗೊಳಿಸಲಾಗಿದೆ. ಒಟ್ಟಾರೆಯಾಗಿ, ಮೂಲ ಪ್ರಸ್ತಾವನೆಗೆ ಹೋಲಿಸಿದರೆ ಕಂಪನಿಗಳ ಒಟ್ಟು ವಾಹನಗಳ ಹೊರಸೂಸುವಿಕೆಯ ಗುರಿಯನ್ನು ಸುಮಾರು ಶೇಕಡಾ 21 ರಷ್ಟು ಸಡಿಲಗೊಳಿಸಲಾಗಿದೆ.

ವಾಹನ ತಯಾರಕರು ತಮ್ಮ ಒಟ್ಟು ವಾಹನಗಳ ಇಂಧನ ದಕ್ಷತೆಯನ್ನು ಹಂತಹಂತವಾಗಿ ಸುಧಾರಿಸಬೇಕಾಗುತ್ತದೆ. 2027-28ರಲ್ಲಿ ಪ್ರತಿ 100 ಕಿಲೋಮೀಟರ್‌ಗೆ 3.996 ಲೀಟರ್ (94.76 ಗ್ರಾಂ CO₂/ಕಿಮೀ) ಇರಬೇಕಾದ ಗುರಿಯನ್ನು, 2031-32ರ ವೇಳೆಗೆ ಪ್ರತಿ 100 ಕಿಲೋಮೀಟರ್‌ಗೆ 3.327 ಲೀಟರ್‌ಗೆ (78.90 ಗ್ರಾಂ CO₂/ಕಿಮೀ) ಕಠಿಣಗೊಳಿಸಲಾಗುತ್ತದೆ. ಈ ನಿಯಮಗಳ ಪಾಲನೆಯನ್ನು ಪ್ರತಿ ವರ್ಷ ಲೆಕ್ಕ ಹಾಕುವ ಬದಲಿಗೆ, ಎರಡು ಹಂತಗಳಲ್ಲಿ (ಮೊದಲ ಮೂರು ವರ್ಷಗಳ ಅವಧಿ ಮತ್ತು ನಂತರದ ಎರಡು ವರ್ಷಗಳ ಅವಧಿ) ಪರಿಶೀಲಿಸಲಾಗುತ್ತದೆ.

ಈ ಕರಡಿನಲ್ಲಿ 'ಕಾರ್ಬನ್ ನ್ಯೂಟ್ರಾಲಿಟಿ ಫ್ಯಾಕ್ಟರ್ಸ್' (CNFs) ವ್ಯವಸ್ಥೆಯನ್ನು ಪರಿಚಯಿಸಲಾಗಿದೆ. ಇದರ ಅನ್ವಯ, ಎಥೆನಾಲ್, ಫ್ಲೆಕ್ಸ್-ಫ್ಯುಯೆಲ್ ಎಥೆನಾಲ್, ಸಿಬಿಜಿ ಮತ್ತು ಇತರ ಜೈವಿಕ ಇಂಧನಗಳ ಮೂಲಕ ಚಲಿಸುವ ವಾಹನಗಳ ಅಧಿಕೃತ ಕಾರ್ಬನ್ ಹೊರಸೂಸುವಿಕೆಯ ಪ್ರಮಾಣವನ್ನು ಲೆಕ್ಕಾಚಾರಕ್ಕೂ ಮುನ್ನ ನಿರ್ದಿಷ್ಟ ಮಟ್ಟಿಗೆ ಕಡಿತಗೊಳಿಸಲು ಅವಕಾಶ ನೀಡಲಾಗುತ್ತದೆ. ಅನುಮೋದಿತ ಇಂಧನ ಉಳಿತಾಯ ತಂತ್ರಜ್ಞಾನಗಳಿಗೆ ಪ್ರೋತ್ಸಾಹಕಗಳನ್ನು ನೀಡಲು ಪ್ರಸ್ತಾಪಿಸಲಾಗಿದ್ದು, ಎಲೆಕ್ಟ್ರಿಕ್, ಪ್ಲಗ್-ಇನ್ ಹೈಬ್ರಿಡ್, ಸ್ಟ್ರಾಂಗ್ ಹೈಬ್ರಿಡ್ ಮತ್ತು ಫ್ಲೆಕ್ಸ್-ಫ್ಯುಯೆಲ್ ವಾಹನಗಳಿಗೆ 'ಸೂಪರ್ ಕ್ರೆಡಿಟ್ಸ್' ನೀಡುವುದನ್ನು ಮುಂದುವರಿಸಲಾಗಿದೆ.

ನಿಗದಿತ ಗುರಿಗಿಂತ ಉತ್ತಮ ಸಾಧನೆ ಮಾಡುವ ಕಂಪನಿಗಳು ಮಾರಾಟ ಮಾಡಬಹುದಾದ 'ಕಾಂಪ್ಲೈಯನ್ಸ್ ಕ್ರೆಡಿಟ್ಸ್' ಗಳಿಸಲಿವೆ. ಗುರಿ ತಲುಪಲು ವಿಫಲವಾಗುವ ಕಂಪನಿಗಳು ತಮ್ಮ ನಿಯಮಗಳ ಪಾಲನೆಗಾಗಿ ಇತರ ತಯಾರಕರಿಂದ ಅಥವಾ ಬ್ಯೂರೋ ಆಫ್ ಎನರ್ಜಿ ಎಫಿಷಿಯನ್ಸಿ (BEE) ಸಂಸ್ಥೆಯಿಂದ ಈ ಕ್ರೆಡಿಟ್‌ಗಳನ್ನು ಖರೀದಿಸಬಹುದಾಗಿದೆ.

ಈ ಐದು ವರ್ಷಗಳ ಕ್ಯಾಫೆ III ನಿಯಮಗಳು 2031-32 ರವರೆಗೆ ಜಾರಿಯಲ್ಲಿರುತ್ತವೆ.

ಕ್ಯಾಫೆ-II ನಿಯಮಗಳಿಗಿಂತ ಇದರಲ್ಲಿ ಬೇರೇನು ಬದಲಾವಣೆಯಾಗಿದೆ?

2022ರಲ್ಲಿ ಜಾರಿಗೆ ಬಂದ ಕ್ಯಾಫೆ-II ನಿಯಮಗಳು, ಹಿಂದಿನ ನಿಯಮಗಳಿಗೆ ಹೋಲಿಸಿದರೆ ವಾಹನಗಳ ಸರಾಸರಿ ಕಾರ್ಬನ್ ಡೈಆಕ್ಸೈಡ್ ಹೊರಸೂಸುವಿಕೆಯನ್ನು ಕಡಿಮೆ ಮಾಡಲು ಕಂಪನಿಗಳಿಗೆ ಸೂಚಿಸಿದ್ದವು. ಪ್ರಸ್ತುತ ಬರಲಿರುವ ಕ್ಯಾಫೆ-III ನಿಯಮಗಳು ಇಂಧನ ದಕ್ಷತೆಯನ್ನು ಮತ್ತಷ್ಟು ಹೆಚ್ಚಿಸಲು ಮತ್ತು ಒಟ್ಟಾರೆ ವಾಹನಗಳ ಹೊರಸೂಸುವಿಕೆಯನ್ನು ಮತ್ತಷ್ಟು ತಗ್ಗಿಸಲು ಕಠಿಣ ಮಿತಿಗಳನ್ನು ವಿಧಿಸುವ ನಿರೀಕ್ಷೆಯಿದೆ.

ವಿವಿಧ ತಂತ್ರಜ್ಞಾನದ ವಾಹನಗಳನ್ನು ನಿಯಮಾವಳಿಗಳ ಅಡಿಯಲ್ಲಿ ಹೇಗೆ ಪರಿಗಣಿಸಬೇಕು ಎಂಬುದರ ಕುರಿತು ಸರ್ಕಾರ ಬದಲಾವಣೆಗಳನ್ನು ಪರಿಶೀಲಿಸುತ್ತಿದೆ. ಎಲೆಕ್ಟ್ರಿಕ್ ವಾಹನಗಳು ಯಾವುದೇ ಹೊಗೆಯನ್ನು ಹೊರಸೂಸದ ಕಾರಣ, ಅವುಗಳಿಗೆ ಸಿಗುತ್ತಿರುವ ಆದ್ಯತೆ ಮುಂದುವರಿಯುವ ಸಾಧ್ಯತೆಯಿದೆ. ಸಾಂಪ್ರದಾಯಿಕ ಪೆಟ್ರೋಲ್ ಮತ್ತು ಡೀಸೆಲ್ ಮಾದರಿಗಳಿಗೆ ಹೋಲಿಸಿದರೆ ಸ್ಟ್ರಾಂಗ್ ಹೈಬ್ರಿಡ್ ವಾಹನಗಳು ಕಡಿಮೆ ಇಂಧನ ಬಳಸುವುದನ್ನು ಅಂತಿಮ ನಿಯಮಗಳು ಮಾನ್ಯ ಮಾಡಿದರೆ, ಅವುಗಳಿಗೂ ಪ್ರೋತ್ಸಾಹಕಗಳು ಸಿಗಬಹುದು.

ಭಾರತದಲ್ಲಿ ಎಸ್‌ಯುವಿ ಕಾರುಗಳ ಮಾರಾಟ ದಿನೇದಿನೆ ಹೆಚ್ಚುತ್ತಿರುವುದನ್ನು ಗಮನದಲ್ಲಿಟ್ಟುಕೊಂಡು, ಬದಲಾಗುತ್ತಿರುವ ಮಾರುಕಟ್ಟೆಗೆ ತಕ್ಕಂತೆ ನಿಯಮಗಳ ಪಾಲನಾ ವ್ಯವಸ್ಥೆಯನ್ನು ಪರಿಷ್ಕರಿಸಲು ಚರ್ಚೆ ನಡೆಯುತ್ತಿದೆ.

ಹೊಸ ಕಾರುಗಳ ಬೆಲೆ ದುಬಾರಿಯಾಗಲಿದೆಯೇ?

ಕಠಿಣ ನಿಯಮಗಳಿಂದಾಗಿ ಹಲವು ವಾಹನ ತಯಾರಕ ಕಂಪನಿಗಳ ಉತ್ಪಾದನಾ ವೆಚ್ಚ ಹೆಚ್ಚಾಗುವ ಸಾಧ್ಯತೆಯಿದೆ. ಹೊಸ ನಿಯಮಗಳನ್ನು ಪಾಲಿಸಲು ಕಂಪನಿಗಳು ಹಗುರವಾದ ವಸ್ತುಗಳನ್ನು ಬಳಸುವುದು, ಇಂಜಿನ್ ದಕ್ಷತೆ ಸುಧಾರಿಸುವುದು, ಸುಧಾರಿತ ಗೇರ್ ತಂತ್ರಜ್ಞಾನ ಅಳವಡಿಸುವುದು ಅಥವಾ ಎಲೆಕ್ಟ್ರಿಕ್ ವಾಹನ ತಂತ್ರಜ್ಞಾನವನ್ನು ವಿಸ್ತರಿಸುವುದು ಅನಿವಾರ್ಯವಾಗಬಹುದು.

ವರದಿಗಳ ಪ್ರಕಾರ, ತಾಂತ್ರಿಕ ಬದಲಾವಣೆಗಳಿಗಾಗಿ ತಗಲುವ ಈ ಹೆಚ್ಚುವರಿ ವೆಚ್ಚದ ಒಂದು ಭಾಗವನ್ನು ಕಂಪನಿಗಳು ಗ್ರಾಹಕರಿಗೆ ವರ್ಗಾಯಿಸುವ ಸಾಧ್ಯತೆಯಿದೆ. ಆದರೆ, ಬೆಲೆ ಏರಿಕೆಯ ಪ್ರಮಾಣವು ಆಯಾ ಕಂಪನಿ, ವಾಹನದ ಮಾದರಿ ಮತ್ತು ಬಳಸುವ ತಂತ್ರಜ್ಞಾನದ ಮೇಲೆ ನಿರ್ಧಾರವಾಗುತ್ತದೆ.

ಇದೇ ಸಮಯದಲ್ಲಿ, ಕಾರುಗಳ ಇಂಧನ ದಕ್ಷತೆ ಉತ್ತಮಗೊಳ್ಳುವುದರಿಂದ ವಾಹನ ಚಾಲನೆಯ ವೆಚ್ಚ ಕಡಿಮೆಯಾಗಲಿದೆ. ಇದರಿಂದ ಗ್ರಾಹಕರು ಆರಂಭದಲ್ಲಿ ಕಾರಿಗೆ ಹಾಕಿದ ಹೆಚ್ಚಿನ ಹಣವನ್ನು ಇಂಧನದ ಉಳಿತಾಯದ ಮೂಲಕ ಹಿಂಪಡೆಯಬಹುದು.

ಯಾವ ಕಂಪನಿಗಳಿಗೆ ಇದು ದೊಡ್ಡ ಸವಾಲು?

ಹೆಚ್ಚು ಎಸ್‌ಯುವಿ ಮತ್ತು ಪೆಟ್ರೋಲ್-ಡೀಸೆಲ್ ವಾಹನಗಳನ್ನೇ ನೆಚ್ಚಿಕೊಂಡಿರುವ ಕಂಪನಿಗಳಿಗೆ ಈ ನಿಯಮಗಳನ್ನು ಪಾಲಿಸುವುದು ದೊಡ್ಡ ಸವಾಲಾಗಲಿದೆ. ಎಲೆಕ್ಟ್ರಿಕ್ ಅಥವಾ ಹೈಬ್ರಿಡ್ ವಾಹನಗಳ ಆಯ್ಕೆ ಕಡಿಮೆ ಇರುವ ಕಂಪನಿಗಳು ಪರಿಸರಸ್ನೇಹಿ ತಂತ್ರಜ್ಞಾನಗಳ ಮೇಲೆ ಹೆಚ್ಚಿನ ಹೂಡಿಕೆ ಮಾಡಬೇಕಾಗುತ್ತದೆ ಅಥವಾ ಈಗಿರುವ ಇಂಜಿನ್‌ಗಳ ದಕ್ಷತೆಯನ್ನು ಹೆಚ್ಚಿಸಬೇಕಾಗುತ್ತದೆ.

ಈಗಾಗಲೇ ಎಲೆಕ್ಟ್ರಿಕ್, ಹೈಬ್ರಿಡ್ ಮತ್ತು ಸಣ್ಣ ಇಂಧನ ದಕ್ಷತೆಯ ಕಾರುಗಳನ್ನು ಹೊಂದಿರುವ ಕಂಪನಿಗಳಿಗೆ ಈ ನಿಯಮಗಳ ಪಾಲನೆ ಸುಲಭವಾಗಲಿದೆ. ಈ ಬದಲಾವಣೆಯು ಮುಂಬರುವ ವರ್ಷಗಳಲ್ಲಿ ಕಂಪನಿಗಳು ತಮ್ಮ ವಾಹನಗಳ ಮಾದರಿಯನ್ನು ಬದಲಾಯಿಸಲು ಮತ್ತು ಕಡಿಮೆ ಹೊರಸೂಸುವಿಕೆಯ ಕಾರುಗಳನ್ನು ಮಾರುಕಟ್ಟೆಗೆ ತರಲು ಪ್ರೇರೇಪಿಸಲಿದೆ.

ಎಲೆಕ್ಟ್ರಿಕ್ ಮತ್ತು ಹೈಬ್ರಿಡ್ ವಾಹನಗಳಿಗೆ ಏನು ಲಾಭ?

ಕಂಪನಿಗಳ ಒಟ್ಟಾರೆ ವಾಹನಗಳ ಸರಾಸರಿ ಹೊರಸೂಸುವಿಕೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುವುದರಿಂದ ಎಲೆಕ್ಟ್ರಿಕ್ ವಾಹನಗಳಿಗೆ (EV) ಇದರಿಂದ ಅತಿ ಹೆಚ್ಚಿನ ಲಾಭವಾಗಲಿದೆ. ಇವಿ ಕಾರುಗಳ ಮಾರಾಟ ಹೆಚ್ಚಾದಷ್ಟೂ ಕಂಪನಿಗಳಿಗೆ ಕ್ಯಾಫೆ ನಿಯಮಗಳನ್ನು ಪಾಲಿಸುವುದು ಸುಲಭವಾಗುತ್ತದೆ. ಜೊತೆಗೆ ಇದು ಭಾರತದ ಎಲೆಕ್ಟ್ರಿಕ್ ವಾಹನ ಉತ್ತೇಜನದ ಗುರಿಗೂ ಬೆಂಬಲ ನೀಡುತ್ತದೆ.

ಹೈಬ್ರಿಡ್ ವಾಹನಗಳ ಕಡಿಮೆ ಹೊರಸೂಸುವಿಕೆಯನ್ನು ನಿಯಮಾವಳಿಗಳಲ್ಲಿ ಮಾನ್ಯ ಮಾಡಿದರೆ ಅವುಗಳಿಗೂ ಅನುಕೂಲವಾಗಲಿದೆ. ಎಲೆಕ್ಟ್ರಿಕ್ ವಾಹನಗಳ ಚಾರ್ಜಿಂಗ್ ವ್ಯವಸ್ಥೆಯು ಸಂಪೂರ್ಣವಾಗಿ ವಿಸ್ತರಣೆಯಾಗುವವರೆಗೆ, ಹೈಬ್ರಿಡ್ ಕಾರುಗಳು ಒಂದು ಉತ್ತಮ ಮಧ್ಯಂತರ ತಂತ್ರಜ್ಞಾನವಾಗಿ ಕೆಲಸ ಮಾಡಬಲ್ಲವು ಎಂದು ವಾಹನ ತಯಾರಕರು ವಾದಿಸುತ್ತಿದ್ದಾರೆ.

ವಿವಿಧ ವಾಹನ ತಯಾರಕರ ನಡುವೆ ಭಿನ್ನಾಭಿಪ್ರಾಯಗಳಿದ್ದದ್ದು ಏಕೆ?

ಕ್ಯಾಫೆ-III ಚರ್ಚೆಗಳಲ್ಲಿ ಅತ್ಯಂತ ವಿವಾದಾತ್ಮಕ ವಿಷಯವೆಂದರೆ, ಹೊರಸೂಸುವಿಕೆಯ ಗುರಿಯನ್ನು ತಲುಪಲು ಸಣ್ಣ ಕಾರುಗಳಿಗೆ ಪ್ರತಿ ಕಿಲೋಮೀಟರ್‌ಗೆ 3 ಗ್ರಾಂ ಕಾರ್ಬನ್ ಕಡಿತದ ಲಾಭವನ್ನು ನೀಡಿರುವುದು. ಇದನ್ನು ತೀವ್ರವಾಗಿ ವಿರೋಧಿಸಿದ ಟಾಟಾ ಮೋಟಾರ್ಸ್, ಸಣ್ಣ ಕಾರುಗಳಿಗೆ ಇಂತಹ ರಿಯಾಯಿತಿ ನೀಡುವುದಕ್ಕೆ ಯಾವುದೇ ಸಮರ್ಥನೆ ಇಲ್ಲ ಎಂದು ವಾದಿಸಿತ್ತು. ಭವಿಷ್ಯದ ನಿಯಮಗಳನ್ನು ಪಾಲಿಸಲು ದೊಡ್ಡ ವಾಹನಗಳ ತಯಾರಕರು ಎಲೆಕ್ಟ್ರಿಕ್ ತಂತ್ರಜ್ಞಾನದ ಮೇಲೆ ಭಾರಿ ಹೂಡಿಕೆ ಮಾಡುತ್ತಿರುವಾಗ, ಸಣ್ಣ ಕಾರುಗಳಿಗೆ ರಿಯಾಯಿತಿ ನೀಡುವುದು ಸರಿಯಲ್ಲ ಎನ್ನುವುದು ಅದರ ನಿಲುವಾಗಿತ್ತು.

ಮಾರುತಿ ಸುಝುಕಿ ಸಂಸ್ಥೆಯು ಈ ಟೀಕೆಯನ್ನು ತಿರಸ್ಕರಿಸಿತ್ತು. ಕಂಪನಿಯ ಕಾರ್ಪೊರೇಟ್ ವ್ಯವಹಾರಗಳ ಹಿರಿಯ ಕಾರ್ಯನಿರ್ವಾಹಕ ಅಧಿಕಾರಿ ರಾಹುಲ್ ಭಾರ್ತಿ ಅವರು ʼದಿ ಹಿಂದೂʼ ಜತೆ ಮಾತನಾಡಿದ್ದು, "ಹೆಚ್ಚು ಇಂಧನ ಬಳಸುವ ಕೆಲವು ದೊಡ್ಡ ಕಾರುಗಳ ತಯಾರಕರು, ತಮ್ಮದೇ ವಾಹನಗಳಿಂದ ಗಮನ ಬೇರೆಡೆ ಸೆಳೆಯಲು ಬೇಜವಾಬ್ದಾರಿಯುತವಾಗಿ ತಪ್ಪು ಮಾಹಿತಿ ಮತ್ತು ವಾದಗಳನ್ನು ಮುಂದಿಡುತ್ತಿದ್ದಾರೆ" ಎಂದಿದ್ದಾರೆ. ವಾಹನಗಳ ತೂಕ ಅಥವಾ ಗಾತ್ರದ ಆಧಾರದ ಮೇಲೆ ಇಂಧನ ದಕ್ಷತೆಯ ನಿಯಮಗಳನ್ನು ರೂಪಿಸುವುದು ಜಾಗತಿಕವಾಗಿ ಸಾಮಾನ್ಯವಾಗಿದೆ. ಯುರೋಪ್, ಅಮೆರಿಕ, ಚೀನಾ, ಜಪಾನ್ ಮತ್ತು ದಕ್ಷಿಣ ಕೊರಿಯಾಗಳಲ್ಲಿಯೂ ಸಣ್ಣ ವಾಹನಗಳಿಗೆ ತುಲನಾತ್ಮಕವಾಗಿ ಕಡಿಮೆ ಕಠಿಣ ಗುರಿಗಳನ್ನು ನೀಡಲಾಗಿದೆ ಎಂದು ಅವರು ವಾದಿಸಿದ್ದರು.

ಇದರೊಂದಿಗೆ, ಹಿಂದಿನ ಕರಡಿನಲ್ಲಿದ್ದ ತೂಕದ ಆಧಾರಿತ ನಿಯಮಾವಳಿಯ ಸೂತ್ರವೂ ವಿವಾದಕ್ಕೆ ಕಾರಣವಾಗಿತ್ತು. ಇದು ಭಾರೀ ವಾಹನಗಳಿಗೆ ಅನಗತ್ಯ ರಿಯಾಯಿತಿಗಳನ್ನು ನೀಡುತ್ತದೆ ಎಂದು ಹಲವು ತಯಾರಕರು ವಾದಿಸಿದ್ದರು. ಕ್ಯಾಫೆ ನಿಯಮಗಳ ಪ್ರಕಾರ, ಕಂಪನಿಯ ಒಟ್ಟು ವಾಹನಗಳ ಸರಾಸರಿ ತೂಕದ ಆಧಾರದ ಮೇಲೆ ಹೊರಸೂಸುವಿಕೆಯ ಗುರಿಯನ್ನು ನಿರ್ಧರಿಸಲಾಗುತ್ತದೆ. ವಾಹನದ ತೂಕ ಹೆಚ್ಚಾದಂತೆ ಪ್ರಸ್ತಾಪಿತ ಸೂತ್ರದ ಮಿತಿಗಳು ಸಡಿಲವಾಗುತ್ತಾ ಹೋಗುತ್ತಿದ್ದವು. ಇದು ದೊಡ್ಡ ವಾಹನಗಳಿಗೆ ನಿಯಮಗಳನ್ನು ಪಾಲಿಸಲು ಅಸಮಾನವಾದ ಮತ್ತು ಹೆಚ್ಚಿನ ಲಾಭವನ್ನು ನೀಡುತ್ತದೆ ಎಂದು ಉದ್ಯಮದ ವಲಯಗಳು ಆಕ್ಷೇಪಿಸಿದ್ದವು.

ಗ್ರಾಹಕರಿಗೆ ಏನು ಲಾಭ?

ಕ್ಯಾಫೆ-III ನಿಯಮಗಳಿಂದಾಗಿ ಗ್ರಾಹಕರಿಗೆ ಮಾರುಕಟ್ಟೆಯಲ್ಲಿ ಹೆಚ್ಚಿನ ಇಂಧನ ದಕ್ಷತೆಯ ಹಾಗೂ ಎಲೆಕ್ಟ್ರಿಕ್ ವಾಹನಗಳ ದೊಡ್ಡ ಮಟ್ಟದ ಆಯ್ಕೆ ಸಿಗಲಿದೆ. ತಂತ್ರಜ್ಞಾನದ ಮೇಲ್ದರ್ಜೆಯಿಂದಾಗಿ ಕೆಲವು ಮಾದರಿಯ ಕಾರುಗಳ ಬೆಲೆ ಹೆಚ್ಚಾಗಬಹುದಾದರೂ, ಕಡಿಮೆ ಇಂಧನ ವೆಚ್ಚ, ಪರಿಸರಸ್ನೇಹಿ ವಾಹನಗಳು ಮತ್ತು ಸುಧಾರಿತ ಸುರಕ್ಷತಾ ವೈಶಿಷ್ಟ್ಯಗಳ ಲಾಭ ಗ್ರಾಹಕರಿಗೆ ಸಿಗಲಿದೆ.

ದೀರ್ಘಾವಧಿಯಲ್ಲಿ, ಈ ಹೊಸ ನಿಯಮಗಳು ಪರಿಸರಸ್ನೇಹಿ ವಾಹನಗಳ ಬಳಕೆಯನ್ನು ವೇಗಗೊಳಿಸಲಿವೆ. ವಾಹನ ಉದ್ಯಮದಲ್ಲಿ ಹೊಸ ಆವಿಷ್ಕಾರಗಳಿಗೆ ಉತ್ತೇಜನ ನೀಡಲಿದ್ದು, ಭಾರತವು ಇಂಧನ ಆಮದಿನ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಮತ್ತು ತನ್ನ ಪರಿಸರ ಸಂರಕ್ಷಣೆಯ ಗುರಿಗಳನ್ನು ತಲುಪಲು ಸಹಾಯ ಮಾಡಲಿದೆ.