ʼಮುಖ ಬಾಡಿಗೆ ನೀಡಿ ಹಣ ಗಳಿಸಿʼ; ಚೀನಾದಲ್ಲಿ ಕ್ರೇಜ್ ಸೃಷ್ಟಿಸಿದ AI ತಂತ್ರಜ್ಞಾನ!

ಸಿನಿಮಾ ಮತ್ತು ಟೆಲಿವಿಜನ್ ಉದ್ಯಮದ ಚಾಟ್ ಗುಂಪುಗಳಲ್ಲಿ ಮಾತ್ರ ಈ ಮೊದಲು ಕಂಡುಬರುತ್ತಿದ್ದ ಅವಕಾಶಗಳು ಇದೀಗ ಸಾರ್ವಜನಿಕವಾಗಿ ತೆರೆದುಕೊಂಡಿದೆ

ಏನೂ ಕೆಲಸ ಮಾಡದೆಯೇ ಮುಖದ ಮೂಲಕ ಮಾತ್ರವೇ ಹಣ ಗಳಿಸಲು ಸಾಧ್ಯವಾದರೆ? ಚೀನಾದಲ್ಲಿ ಆ ಕಲ್ಪನೆ ವಾಸ್ತವವಾಗುತ್ತಿದೆ. ಚೀನಾ ಮಾಧ್ಯಮಗಳ ಪ್ರಕಾರ ಸಿನಿಮಾ ಮತ್ತು ಟೆಲಿವಿಜನ್ ಉದ್ಯಮದ ಚಾಟ್ ಗುಂಪುಗಳಲ್ಲಿ ಮಾತ್ರ ಈ ಮೊದಲು ಕಂಡುಬರುತ್ತಿದ್ದ ಅವಕಾಶಗಳು ಇದೀಗ ಸಾರ್ವಜನಿಕವಾಗಿ ತೆರೆದುಕೊಂಡಿದೆ. ಬಹುಶಃ ವೈಯಕ್ತಿಕ ಆಸ್ತಿಯಾಗಿರುವ ನಿಮ್ಮ ಮುಖ ಹೆಚ್ಚುವರಿ ಹಣ ಸಂಪಾದನೆಗೆ ಅನುವು ಮಾಡಿಕೊಡುತ್ತಿದೆ!

ಈ ಪ್ರಕ್ರಿಯೆ ಬಹಳ ಸರಳ. ಜನರು ಫೇಸ್-ಲೈಸೆನ್ಸಿಂಗ್ ಪ್ಲಾಟ್ಫಾರ್ಮ್ಗಳಲ್ಲಿ ನೋಂದಣಿ ಮಾಡಿಕೊಳ್ಳಬೇಕು. ನಂತರ ಗುರುತಿನ ಪರಿಶೀಲನೆ ಪೂರ್ಣಗೊಂಡ ಮೇಲೆ ಡಿಜಿಟಲ್ ನಟನೆಯ ಪ್ರೊಫೈಲ್ ರಚಿಸುತ್ತಾರೆ. ನಿರ್ಮಾಪಕರು ಮತ್ತು ನಿರ್ದೇಶಕರು ಈ ಪ್ರೊಫೈಲ್ಗಳನ್ನು ಬ್ರೌಸ್ ಮಾಡಬಹುದು ಮತ್ತು ತಮ್ಮ AI-ರಚಿತ ಪಾತ್ರಗಳಿಗೆ ಈ ಮುಖಗಳನ್ನು ಆಯ್ಕೆ ಮಾಡಬಹುದು. ಅಂತಹ ಒಂದು ವೇದಿಕೆ ಶೆನ್ಜೆನ್ ಮೂಲದ ಯುವಾನ್‌ಸಿಯಾಂಗ್ ಕ್ಸಿನ್‌ಶೆಂಗ್! ಈ ವೇದಿಕೆ ಕಳೆದ ಮೇಯಲ್ಲಿ ಪ್ರಾರಂಭವಾಗಿತ್ತು. ನೋಂದಣಿ ಮತ್ತು ಪರಿಶೀಲನೆಯ ನಂತರ ಬಳಕೆದಾರರಿಗೆ ಡಿಜಿಟಲ್ ಪ್ರೊಫೈಲ್ ರಚಿಸಲು ಅನುಮತಿಸುತ್ತದೆ.

ಈ ಕಲ್ಪನೆಯು ಚೀನಾದಲ್ಲಿ ಪ್ರವರ್ಧಮಾನಕ್ಕೆ ಬರುತ್ತಿರುವ AI ರಚಿತ ಮನರಂಜನಾ ಉದ್ಯಮಕ್ಕೆ ಸಂಬಂಧಿಸಿದೆ. ಕಿರು ನಾಟಕಗಳನ್ನು ವೇಗವಾಗಿ ಮತ್ತು ಅಗ್ಗವಾಗಿ ಮಾಡಲು AI ಅನ್ನು ಈಗಾಗಲೇ ಬಳಸಲಾಗುತ್ತಿದೆ. ನಿರ್ಮಾಪಕರು AI ರಚಿತ ಪಾತ್ರಗಳು, ಸ್ಕ್ರಿಪ್ಟ್ಗಳು ಮತ್ತು ವೀಡಿಯೋಗಳೊಂದಿಗೆ ಪ್ರಯೋಗ ನಡೆಸುತ್ತಿದ್ದಾರೆ. ಹೀಗಾಗಿ ಹೊಸ ಮುಖಗಳಿಗೆ ಅಸಾಮಾನ್ಯ ಬೇಡಿಕೆ ಇದೆ. ವರದಿಗಳ ಪ್ರಕಾರ ಒಬ್ಬ ಬ್ಯಾಂಕ್ ಉದ್ಯೋಗಿ ಕೇವಲ ಮೂರು ದಿನಗಳಲ್ಲಿ ಏಳು ಬಾರಿ ತಮ್ಮ ಭಾವಚಿತ್ರ ಬಳಸಿಕೊಂಡ ಕಾರಣಕ್ಕೆ 2500 ಯುವಾನ್ ಅಥವಾ ಸುಮಾರು 35,700 ರೂ. ಗಳಿಸಿದ್ದಾರೆ.

ಇತರ ಪ್ಲಾಟ್ಫಾರ್ಮ್ಗಳು ತೀರಾ ಕಡಿಮೆ ಪಾವತಿಗಳನ್ನು ವರದಿ ಮಾಡಿವೆ. ಶೆನ್ಜೆನ್ ಮೂಲದ ActID ಜನರಿಗೆ 99ರಿಂದ 500 ಯುವಾನ್ ಅಥವಾ ಪ್ರತಿ ಕಂತಿಗೆ 1500 ರೂ. ರಿಂದ 7000 ರೂ. ವರೆಗೆ ಪಾವತಿಸಿದೆ. ಕಂಪನಿಯು 800 ಬಳಕೆದಾರರನ್ನು ನೋಂದಾಯಿಸಿಕೊಂಡಿತ್ತು. ಅವರಲ್ಲಿ ಸುಮಾರು 300 ಮಂದಿ AI ನಿರ್ಮಾಣಗಳಿಗೆ ತಮ್ಮ ಹೋಲಿಕೆಗಳನ್ನು ಪರವಾನಗಿ ನೀಡಲು ಒಪ್ಪಿಕೊಂಡಿದ್ದರು.

ಸಾಮಾನ್ಯವಾಗಿ ಮಾರುಕಟ್ಟೆ ಶ್ರೇಣಿಯನ್ನು ಸುಮಾರು 100 ರೂ.ನಿಂದ 2 ಲಕ್ಷ ರೂ.ವರೆಗೆ ಇದೆ ಎಂದು ಹೇಳಲಾಗುತ್ತಿದೆ. ಇದನ್ನು ಜನಸಾಮಾನ್ಯರ ಸಾಮಾನ್ಯ ಗಳಿಕೆ ಎಂದು ತಿಳಿದುಕೊಳ್ಳಬಾರದು. ಮೊತ್ತವು ವೇದಿಕೆ, ಉತ್ಪಾದನೆ, ಅವಧಿ ಮತ್ತು ಪರವಾನಗಿ ನಿಯಮಗಳನ್ನು ಅವಲಂಬಿಸಿರುತ್ತದೆ. ಈ ವೇದಿಕೆಯಲ್ಲಿ ಸೆಲ್ಫಿ ಅಪ್ಲೋಡ್ ಮಾಡಿದಾಕ್ಷಣ 2 ಲಕ್ಷ ಸಂಪಾದಿಸಬಹುದು ಎಂದಲ್ಲ. ಆದರೆ ನಮ್ಮ ಡಿಜಿಟಲ್ ಹೋಲಿಕೆಗೆ ಹಣ ಪಡೆಯಬಹುದು ಎನ್ನುವುದು ಆಸಕ್ತಿದಾಯಕ ಭಾಗವಾಗಿರುತ್ತದೆ.

ನಿರ್ಮಾಪಕರು AI ಮೂಲಕ ಸಂಪೂರ್ಣ ಕಾಲ್ಪನಿಕ ಮುಖಗಳನ್ನು ರಚಿಸಬಹುದು. ಆದರೂ ಹೆಚ್ಚು ನಿರ್ದಿಷ್ಟವಾದುದನ್ನು ಬಯಸುತ್ತಾರೆ. ವಿಶಿಷ್ಟವಾದ, ಗುರುತಿಸಬಹುದಾದ ಅಥವಾ ಮನವೊಪ್ಪಿಸುವ ಮುಖ ಪಡೆಯಲು ಹಣ ಪಾವತಿಸುತ್ತಿದ್ದಾರೆ. ActID ಯ ಮುಖ್ಯ ಮಾರುಕಟ್ಟೆ ಅಧಿಕಾರಿ ಮಾಧ್ಯಮಗಳಿಗೆ ತಿಳಿಸಿರುವ ಪ್ರಕಾರ ನಿರ್ಮಾಪಕರು ಪ್ರಮುಖ ಪಾತ್ರಗಳಿಗೆ ಆಕರ್ಷಕ ಮುಖಗಳನ್ನು ಬಯಸುತ್ತಾರೆ. ವಯಸ್ಸಾದವರು ಸೇರಿದಂತೆ ವಿಶಿಷ್ಟ ಮುಖಗಳು ಬೇಕಾಗುತ್ತವೆ. AI ರಚಿತ ಡ್ರಾಮಗಳಲ್ಲಿ ಮುಖವು ವ್ಯಕ್ತಿ ನಟಿಸುವ ಅಗತ್ಯವಿಲ್ಲದೆ ಸೋರ್ಸ್ ಮೆಟೀರಿಯಲ್ ಆಗಿ ಮಾತ್ರ ಕಾರ್ಯನಿರ್ವಹಿಸುತ್ತದೆ.

ಆದರೆ ಕೆಲವು ನಿರ್ದೇಶಕರು ಸಾಮಾನ್ಯ ಮುಖಗಳು ಹೆಚ್ಚು ಕಮರ್ಶಿಯಲ್ ಮೌಲ್ಯವನ್ನು ಹೊಂದಿಲ್ಲ ಎಂದು ನಂಬುತ್ತಾರೆ. AI ಅವುಗಳನ್ನು ಸರಳವಾಗಿ ಉತ್ಪಾದಿಸುತ್ತದೆ. ಸೆಲೆಬ್ರಿಟಿಗಳ ಹೋಲಿಕೆಗಳು, ಇದಕ್ಕೆ ವಿರುದ್ಧವಾಗಿ ಗುರುತಿಸುವಿಕೆ ಮತ್ತು ಹೆಚ್ಚಿನ ಮೌಲ್ಯ ಹೊಂದಿರಬಹುದು. AI ಬೇಕಾದಷ್ಟು ಮುಖಗಳನ್ನು ರಚಿಸಬಹುದಾದಾಗ ನಿಜವಾದ ಮುಖಕ್ಕೆ ಎಷ್ಟು ದಿನ ಮೌಲ್ಯವಿರುತ್ತದೆ ಎನ್ನುವ ಪ್ರಶ್ನೆಯೂ ಏಳುತ್ತದೆ.

ಮತ್ತೊಂದೆಡೆ ಹಣ ಆಕರ್ಷಕವಾಗಿ ಕಾಣಬಹುದು. ಆದರೆ ಮುಖ ಬಳಕೆಗೆ ಲೈಸೆನ್ಸ್ ನೀಡಿದ ನಂತರ ಡಿಜಿಟಲ್ ಹೋಲಿಕೆಯನ್ನು ಹೇಗೆ ಮರುಬಳಕೆ ಮಾಡಬಹುದು, ಮಾರ್ಪಡಿಸಬಹುದು ಅಥವಾ ವಿತರಿಸಬಹುದು ಎಂಬ ಪ್ರಶ್ನೆಗಳು ಏಳುತ್ತವೆ. ಇಂತಹ ಲೈಸೆನ್ಸ್ ಇರುವ ಮುಖಗಳನ್ನು ಅವುಗಳ ಮೂಲ ಉದ್ದೇಶ ಮೀರಿ ಬಳಕೆಯಾಗುವ ಸಾಧ್ಯತೆಯಿದೆ. ಹೀಗಾಗಿ ಜನರು ತಮ್ಮ ಗುರುತಿನ ಮೇಲೆ ನಿಯಂತ್ರಣ ಉಳಿಸಿಕೊಳ್ಳಲು ಕಷ್ಟವಾಗಬಹುದು. ಡಿಜಿಟಲ್ ಪ್ರೊಫೈಲ್ ಮಾಡಿ AI ರಚನೆಗೆ ಅವಕಾಶ ನೀಡುವುದು ಎಂದರೆ ಮುಖದ ಡೇಟಾವನ್ನು AI ತರಬೇತಿಗಾಗಿ ಅನುಮತಿಸುವುದು ಆಗಬಾರದು.

ಭಾರತದಲ್ಲೂ ಇದು ಸಾಧ್ಯವೆ?

ಈಗಾಗಲೇ ಸಾರ್ವಜನಿಕ ವ್ಯಕ್ತಿಗಳ AI ಆವೃತ್ತಿಗಳನ್ನು ಬಳಸಲಾಗುತ್ತಿದೆ. ಆದರೆ ಈ ಬಳಕೆ ಚೀನಾದ ಫೇಸ್ ಲೈಸೆನ್ಸಿಂಗ್ ಮಾರುಕಟ್ಟೆಗಿಂತ ಭಿನ್ನವಾಗಿದೆ. 2026ರಲ್ಲಿ ರಿಯಾ ಚಕ್ರವರ್ತಿ ‘ಮಿಶ್ಟಿ” ಪ್ರಾರಂಭಿಸಿದ್ದಾರೆ. ಕಲೆಕ್ಟಿವ್ ಆರ್ಟಿಸ್ಟ್ ನೆಟ್ವರ್ಕ್ ಮತ್ತು ಗ್ಯಾಲರಿ 5 ಜೊತೆಗೂಡಿ ಅಭಿವೃದ್ಧಿಪಡಿಸಿದ AI ಚಾಲಿತ ಡಿಜಿಟಲ್ ಪಾತ್ರ.

ರಿಯಾ ಅವರ ಡಿಜಿಟಲ್ ಉಪಸ್ಥಿತಿಯನ್ನು ವಿಸ್ತರಿಸಲು, ಅಭಿಮಾನಿಗಳನ್ನು ತಲುಪಲು ಮತ್ತು ಹಣಗಳಿಕೆಯ ವಿವಿಧ ರೂಪಗಳನ್ನು ಅನ್ವೇಷಿಸಲು ವಿನ್ಯಾಸಗೊಳಿಸಲಾಗಿದೆ. ಅಂದರೆ ಒಬ್ಬ ನಟ/ನಟಿ ಅಥವಾ ಪ್ರಸಿದ್ಧ ವ್ಯಕ್ತಿ ಖುದ್ದಾಗಿ ಹೋಗದೆ ಇದ್ದರೂ, ಅವರ ತರಹವೇ ಕಾಣುವ AI ಅವತಾರವು ಇಂಟರ್ನೆಟ್ನಲ್ಲಿ ಸಕ್ರಿಯವಾಗಿರುತ್ತದೆ. ಇದು ಜಾಹೀರಾತು ಅಥವಾ ಕಾರ್ಯಕ್ರಮಗಳ ಮೂಲಕ ಹಣ ಗಳಿಸಲು ನೆರವಾಗುತ್ತದೆ.

ಆದರೆ ಚೀನಾದಲ್ಲಿ ಭಿನ್ನವಾಗಿ ಜನಸಾಮಾನ್ಯರೂ ಮುಖ ಬಳಕೆಗೆ ಪರವಾನಗಿ ನೀಡಬಹುದಾಗಿದೆ. ಇದು ಉದ್ಯಮದಲ್ಲಿ ವ್ಯಾಪಕವಾದ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ. ಕೆಲವು ಮೈಕ್ರೋಡ್ರಾಮಾ ಕಂಪನಿಗಳು ಉತ್ಪಾದನಾ ಸಮಯವನ್ನು ಮೂರು ತಿಂಗಳಿನಿಂದ ಒಂದು ತಿಂಗಳಿಗೆ ಕಡಿತಗೊಳಿಸಲು ಮತ್ತು ವೆಚ್ಚವನ್ನು ಐದನೇ ಒಂದು ಭಾಗಕ್ಕೆ ತಗ್ಗಿಸಲು ಈ ಕಲ್ಪನೆ ಸಹಾಯ ಮಾಡಿದೆ ಎಂದು ವರದಿಯಾಗಿದೆ.

ಕೃಪೆ: indiatoday.in