ಮಣ್ಣು ಮಾತಾಡಿಸುವ ಕೈಗಳು ಕುಂಬಾರರ ಲೋಕದೊಳಗೊಂದು ಸುತ್ತು

ಕುಂಬಾರನ ಮಡಕೆ ಏಕಾಏಕಿ ಚಕ್ರದ ಮೇಲೆ ಹುಟ್ಟುವುದಿಲ್ಲ. ಮಣ್ಣನ್ನು ತಂದು ದಿನಗಟ್ಟಲೆ ನೀರಿನಲ್ಲಿ ನೆನೆಸಿಟ್ಟು, ಮುದ್ದೆಯಾಗಿ ಮಲಗಿಸಿದ ಮಣ್ಣೇ ಮಡಕೆಗಳು. ಚಕ್ರದ ಮೇಲೆ ಕುಂಬಾರನು ಆ ಮುದ್ದೆಯ ಮಣ್ಣಿಗೆ ಮೊದಲ ಸ್ಪರ್ಶ ನೀಡುವ ಕ್ಷಣವೇ ಅದ್ಭುತ. ಚಕ್ರ ಸುತ್ತಿಕೊಳ್ಳುತ್ತದೆ ಮಣ್ಣು ಮೇಲೇಳುತ್ತದೆ ಕುಂಬಾರನ ಬೆರಳುಗಳು ಮಣ್ಣಿನೊಳಗೇ ಮಾತನಾಡುವಂತಿರುತ್ತದೆ. ಈ ಸಂವಾದದ ಫಲವೇ ಮಡಕೆ. ಪ್ಲಾಸ್ಟಿಕ್ ಮತ್ತು ಲೋಹ ಪಾತ್ರೆಗಳ ನಡುವೆ ಮಡಕೆ ಕೆಲಕಾಲ ಮರೆವು ಕಂಡರೂ, ಇಂದಿನ ಪರಿಸರ ಜಾಗೃತಿ ಮತ್ತು ಆರೋಗ್ಯ ಅರಿವು ಮಡಕೆಯನ್ನು ಮತ್ತೆ ಮನೆಯೊಳಗೆ ತರುತ್ತಿದೆ. ನಗರಗಳಲ್ಲಿ ಮಡಕೆಯ ನೀರು ಮತ್ತೆ ಫ್ಯಾಷನ್. ಹೋಟೆಲ್ಗಳಲ್ಲಿ ಮಡಕೆಬಿರಿಯಾನಿ, ಮಡಕೆ ಚಹಾ ಜನಪ್ರಿಯ. ಮಡಕೆ ಮತ್ತೆ ತನ್ನ ಹಳೆಯ ಗಾಂಭೀರ್ಯವನ್ನು ಪಡೆಯುತ್ತಿದೆ. ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ತಾಲೂಕಿನ ಉಜಿರೆಯ ಕೊಪ್ಪದಲ್ಲಿ ಹಲವಾರು ಕುಂಬಾರರ ಕುಟುಂಬಗಳಿವೆ. ಅವರ ಪೈಕಿ ಹರೀಶ್ ಕುಂಬಾರ ಅವರು ಮಡಕೆ ಮಾಡುವ ಕ್ಷಣಗಳು ಕ್ಯಾಮೆರಾ ಕಣ್ಣಿಗೆ ಸೆರೆಯಾದವು.