ಮತ್ತೆ ಗೋರಕ್ಷಕರ ದಾಳಿ ? ಹೊಸ ವೀಡಿಯೊ ಬಹಿರಂಗ

ಜೈಪುರ್, ಜು.30: ಗೋಮಾಂಸ ವಿಚಾರದಲ್ಲಿ ಗುಜರಾತ್‌ನಲ್ಲಿ ದಲಿತ ಯುವಕರ ಮೇಲೆ ಹಲ್ಲೆ ಹಾಗೂ ಮಧ್ಯ ಪ್ರದೇಶದಲ್ಲಿ ಮುಸ್ಲಿಮ್ ಮಹಿಳೆಯರಿಬ್ಬರ ಮೇಲೆ ಸ್ವಯಂಘೋಷಿತ ಗೋ ರಕ್ಷಕರು ನಡೆಸಿದ ದಾಳಿ ಪ್ರಕರಣಗಳು ಇನ್ನೂ ಸಾರ್ವಜನಿಕರ ಮನಸ್ಸಿನಲ್ಲಿ ಹಸಿಯಾಗಿರುವಂತೆಯೇ, ವ್ಯಕ್ತಿಯೊಬ್ಬನನ್ನು ನಾಲ್ಕೈದು ಮಂದಿ ಗೋ ರಕ್ಷಕರು ಗೋಮಾಂಸ ಹೊಂದಿದ್ದಾನೆಂಬ ಒಂದೇ ಕಾರಣಕ್ಕೆ ಹಿಗ್ಗಾ ಮುಗ್ಗಾ ಥಳಿಸುವ ವೀಡಿಯೊವೊಂದು ಬಹಿರಂಗಗೊಂಡಿದೆ.

ಪ್ರತೀಕ್ ಸಿನ್ಹಾ ಎಂಬವರು ಈ ವೀಡಿಯೊವನ್ನು ಫೇಸ್‌ಬುಕ್‌ನಲ್ಲಿ ಅಪ್ ಲೋಡ್ ಮಾಡಿದ್ದು, ರಾಷ್ಟ್ರೀಯ ಹೆದ್ದಾರಿಯ ನಡುವೆ ವ್ಯಕ್ತಿಗೆ ಥಳಿಸುತ್ತಿರುವುದನ್ನು ವೀಡಿಯೊದಲ್ಲಿ ಕಾಣಬಹುದಾಗಿದೆ. ನೀನು ನನ್ನ ತಾಯಿಯನ್ನು (ಗೋವು) ಕೊಲ್ಲುತ್ತೀಯೇನು ? ಎಂದು ದಾಳಿಕೋರರು ಸ್ಥಳೀಯ ಭಾಷೆಯಲ್ಲಿ ಬೊಬ್ಬಿಡುತ್ತಿರುವುದು ಕೂಡ ಕೇಳಿಸುತ್ತದೆ. ಅತ್ತ ದಾಳಿಗೊಳಗಾದ ವ್ಯಕ್ತಿ ತನ್ನನ್ನು ಕ್ಷಮಿಸುವಂತೆ ವಿನಂತಿಸುತ್ತಿರುವುದೂ ವೀಡಿಯೊದಿಂದ ಸ್ಪಷ್ಟವಾಗಿದೆ. ಈ ಘಟನೆ ಎಲ್ಲಿ, ಯಾವಾಗ ನಡೆದಿದೆ ಹಾಗೂ ಆರೋಪಿಗಳ್ಯಾರು ಎಂದು ತಿಳಿದಿಲ್ಲ ಹಾಗೂ ಈ ವೀಡಿಯೊದ ಸತ್ಯಾಸತ್ಯತೆಯ ಬಗ್ಗೆಯೂ ಹೆಚ್ಚಿನ ಮಾಹಿತಿ ತನಗೆ ಸಿಕ್ಕಿಲ್ಲ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್ ಹೇಳಿಕೊಂಡಿದೆ.

ಮುಸ್ಲಿಮ್ ಮಹಿಳೆಯರಿಬ್ಬರು ಗೋಮಾಂಸ ಸಾಗಿಸುತ್ತಿದ್ದಾರೆಂದು ಆರೋಪಿಸಿ ಅವರ ಮೇಲೆ ಮಧ್ಯ ಪ್ರದೇಶದ ಮಂಡ್ ಸೌರ್ ರೈಲ್ವೆ ನಿಲ್ದಾಣದಲ್ಲಿ ಅಮಾನುಷ ಹಲ್ಲೆ ನಡೆಸಿದ ಘಟನೆಯ ವೀಡಿಯೊ ಬಹಿರಂಗಗೊಂಡ ಎರಡೇ ದಿನದಲ್ಲಿ ಈ ಹೊಸ ವೀಡಿಯೊ ಹೊರಜಗತ್ತಿನ ಗಮನಕ್ಕೆ ಬಂದಿದೆ.

"They shoot videos to spread terror", for #Cow politics. This from Rajasthan. How long before the Govt takes action? pic.twitter.com/37EsGGdGqQ

— Gaurav Pandhi (@GauravPandhi) July 30, 2016