ಫವಾದ್ ಚಿತ್ರಕ್ಕೆ ಕತ್ರೀನಾ ನಾಯಕಿ

‘ಖೂಬ್‌ಸೂರತ್’, ‘ಕಪೂರ್ ಆ್ಯಂಡ್ ಸನ್ಸ್’ ಚಿತ್ರಗಳ ಮೂಲಕ ಬಾಲಿವುಡ್ ಪ್ರೇಕ್ಷಕರ ಹೃದಯಕ್ಕೆ ಲಗ್ಗೆ ಇಟ್ಟಿರುವ, ಪಾಕ್ ನಟ, ಫವಾದ್ ಖಾನ್ ಹಾಗೂ ಮೋಹಕ ನಟಿ ಕತ್ರೀನಾ ಕೈಫ್ ಇದೇ ಮೊದಲ ಬಾರಿಗೆ ಜೊತೆಯಾಗಿ ನಟಿಸಲಿದ್ದಾರೆ. ‘ಸೂಫಿ’ ಎಂದು ಹೆಸರಿಡಲಾದ ಈ ಬಿಗ್‌ಬಜೆಟ್ ಚಿತ್ರಕ್ಕೆ ಆದಿತ್ಯಧರ್ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ. ಬಾಲಿವುಡ್‌ನ ಖ್ಯಾತ ನಿರ್ಮಾಪಕ ಕರಣ್‌ಜೋಹರ್‌ರ ‘ಧರ್ಮಪ್ರೊಡಕ್ಷನ್’್ಸ ಈ ಚಿತ್ರವನ್ನು ನಿರ್ಮಿಸಲಿದೆ. ಆದಿತ್ಯಧರ್ ಈ ಮೊದಲು ಕೆಲವು ಬಾಲಿವುಡ್ ಚಿತ್ರಗಳಿಗೆ ಸಾಹಿತಿ ಹಾಗೂ ಗೀತರಚನೆಕಾರರಾಗಿ ಕೆಲಸ ಮಾಡಿದ್ದು, ಈ ಚಿತ್ರದ ಮೂಲಕ ಇದೇ ಮೊದಲ ಬಾರಿಗೆ ನಿರ್ದೇಶನದ ಹೊಣೆ ವಹಿಸಿದ್ದಾರೆ.

 ಕಳೆದ ವರ್ಷ ಚಿತ್ರಾಂಗದಾ ಸಿಂಗ್ ಹಾಗೂ ಪ್ರತೀಕ್ ಬಬ್ಬರ್ ಅವರನ್ನು ಮುಖ್ಯ ಪಾತ್ರಗಳಲ್ಲಿ ಹಾಕಿಕೊಂಡು ಈ ಸಿನೆಮಾವನ್ನು ನಿರ್ಮಿಸುವ ಯೋಜನೆಯನ್ನು ಆದಿತ್ಯ ಹೊಂದಿದ್ದರು. ಆದರೆ, ಕಾರಣಾಂತರಗಳಿಂದ ಅದನ್ನು ಕೈಬಿಡಲಾಗಿತ್ತು. ಅಂದಹಾಗೆ ದೀಪಾವಳಿಗೆ ತೆರೆಕಾಣಲಿರುವ ಕರಣ್ ಜೋಹರ್ ನಿರ್ದೇಶನದ ‘ಯೆ ದಿಲ್ ಮುಷ್ಕಿಲ್’ ಚಿತ್ರದಲ್ಲಿಯೂ ಫವಾದ್ ಪ್ರಮುಖ ಪಾತ್ರವೊಂದನ್ನು ನಿರ್ವಹಿಸಿದ್ದಾರೆ.

 ಪಂಜಾಬಿ ಸಮುದಾಯದ ಮದುವೆಯ ಹಿನ್ನೆಲೆಯಲ್ಲಿ ನಡೆಯುವ ಕಥೆಯನ್ನು ಒಳಗೊಂಡಿರುವ ಈ ಚಿತ್ರದ ಶೂಟಿಂಗ್ ದಿಲ್ಲಿ ಹಾಗೂ ವಿದೇಶಗಳಲ್ಲಿ ನಡೆಯಲಿದೆ. ಕತ್ರೀನಾ ಕೈಫ್ ಸದ್ಯಕ್ಕೆ ‘ಬಾರ್ ಬಾರ್ ದೇಖೋ’ ಚಿತ್ರದ ಬಿಡುಗಡೆಗೆ ಕಾಯುತ್ತಿದ್ದರೆ, ಫವಾದ್ ‘ಯೆ ದಿಲ್ ಮುಷ್ಕಿಲ್’ ಚಿತ್ರದ ಯಶಸ್ಸಿನ ಬಗ್ಗೆ ಆತ್ಮವಿಶ್ವಾಸವಿಟ್ಟುಕೊಂಡಿದ್ದಾರೆ. ಒಟ್ಟಿನಲ್ಲಿ ಈ ಜೋಡಿಯ ಅಭಿನಯದ ಚಿತ್ರವು ಮುಂದಿನ ವರ್ಷದ ವೇಳೆಗೆ ಶೂಟಿಂಗ್ ಆರಂಭಿಸುವ ನಿರೀಕ್ಷೆಯಿದೆ.