ಮುಂದೆಂದೂ ಪಾಕ್ ನಟರ ಜೊತೆ ಕೆಲಸ ಮಾಡೆನು: ಕರಣ್ ಜೋಹರ್

ಮುಂಬೈ, ಅ.18: ತಮ್ಮ ‘ಎ ದಿಲ್ ಹೈ ಮುಷ್ಕಿಲ್’ ಸಿನಿಮಾ ಬಿಡುಗಡೆಗೆ ಎಂಎನ್‌ಎಸ್ ವಿರೋಧ ವ್ಯಕ್ತಪಡಿಸಿರುವ ಬಗ್ಗೆ ಕಡೆಗೂ ವೌನ ಮುರಿದಿರುವ ನಿರ್ಮಾಪಕ, ನಿರ್ದೇಶಕ ಕರಣ್ ಜೋಹರ್, ಪ್ರಸಕ್ತ ಸನ್ನಿವೇಶ ಮುಂದುವರಿದರೆ ಭವಿಷ್ಯದಲ್ಲಿ ಎಂದಿಗೂ ಪಾಕ್ ನಟರ ಜೊತೆ ಕೆಲಸ ಮಾಡುವುದಿಲ್ಲ ಎಂದು ತಿಳಿಸಿದ್ದಾರೆ.
 ವೀಡಿಯೋ ಸಂದೇಶ ಮೂಲಕ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿರುವ ಕರಣ್, ಸ್ವಹಿತಕ್ಕಿಂತ ರಾಷ್ಟ್ರದ ಹಿತರಕ್ಷಣೆಗೆ ಪ್ರಮುಖ ಆದ್ಯತೆ ಎಂದಿದ್ದಾರೆ. ಭಾರತೀಯ ಸೇನೆಯ ಶೌರ್ಯವನ್ನು ಅಭಿನಂದಿಸಿರುವ ಕರಣ್, ದೇಶದಲ್ಲಿ ಈಗಿರುವ ಪರಿಸ್ಥಿತಿಯೇ ಮುಂದುವರಿದರೆ ಭವಿಷ್ಯದಲ್ಲಿ ಪಾಕ್ ಪ್ರತಿಭೆಗಳ ಜೊತೆ ಕೆಲಸ ಮಾಡುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಈ ಹೇಳಿಕೆಯುದ್ದಕ್ಕೂ ಕರಣ್ ಎಲ್ಲಿಯೂ ಪಾಕ್ ಹೆಸರೆತ್ತದೆ. ನೆರೆಯ ರಾಷ್ಟ್ರ ಎಂದು ಉಲ್ಲೇಖಿಸಿರುವುದು ಗಮನಾರ್ಹವಾಗಿದೆ. ಸಿನಿಮಾದಲ್ಲಿ ನಟಿಸಿರುವ ಭಾರತೀಯ ಕಲಾವಿದರ ಶ್ರಮವನ್ನು ವ್ಯರ್ಥಗೊಳಿಸಬೇಡಿ ಎಂದು ವಿನಂತಿಸಿರುವ ಕರಣ್, ಜನತೆ ಯಾವುದೇ ರೀತಿಯ ಗಲಭೆ, ಗೊಂದಲಕ್ಕೆ ಆಸ್ಪದ ನೀಡಲಾರರು ಎಂಬ ನಿರೀಕ್ಷೆ ವ್ಯಕ್ತಪಡಿಸಿದ್ದಾರೆ.
   ಕಳೆದ ಎರಡು ವಾರ ನಾನು ವೌನವಾಗಿದ್ದ ಬಗ್ಗೆ ಹಲವು ಟೀಕೆಗಳು ವ್ಯಕ್ತವಾಗಿದ್ದವು. ಕೆಲವರಂತೂ ನಾನು ದೇಶ ವಿರೋಧಿ ಎಂದು ಕೂಡಾ ಟೀಕಿಸಿದ್ದು ಇದು ನನಗೆ ತುಂಬಾ ನೋವು ಉಂಟು ಮಾಡಿತ್ತು. ಪ್ರೀತಿಯ ಭಾವನೆ ಪಸರಿಸುವುದು ದೇಶಭಕ್ತಿಯನ್ನು ಪ್ರದರ್ಶಿಸುವ ಶ್ರೇಷ್ಟ ವಿಧಾನ ಎಂದು ನಂಬಿರುವ ನಾನು ನನ್ನ ಕಾರ್ಯ ಮತ್ತು ಸಿನೆಮಾಗಳ ಮೂಲಕ ಇದನ್ನು ಮಾಡಿದ್ದೇನೆ. ಕಳೆದ ವರ್ಷದ ಸೆಪ್ಟೆಂಬರ್‌ನಿಂದ ಡಿಸೆಂಬರ್‌ವರೆಗೆ ‘ಎ ದಿಲ್ ಹೈ ಮುಷ್ಕಿಲ್’ ಸಿನೆಮಾದ ಶೂಟಿಂಗ್ ನಡೆಯುತ್ತಿದ್ದಾಗ ಪರಿಸ್ಥಿತಿ ಸಂಪೂರ್ಣ ವಿಭಿನ್ನವಾಗಿತ್ತು. ನಮ್ಮ ನೆರೆಯ ರಾಷ್ಟ್ರದ ಜೊತೆ ಶಾಂತಿಯುತ ಸಂಬಂಧ ಬೆಳೆಸಲು ನಮ್ಮ ಸರಕಾರ ಪ್ರಯತ್ನ ನಡೆಸುತ್ತಿತ್ತು ಮತ್ತು ಈ ಯತ್ನಗಳನ್ನು ನಾನು ಗೌರವಿಸುತ್ತೇನೆ. ಇಂದು ದೇಶದಲ್ಲಿರುವ ಭಾವನೆಗಳನ್ನೂ ನಾನು ಗೌರವಿಸುತ್ತೇನೆ. ಈ ಪರಿಸ್ಥಿತಿ ಅಂದು ಇದ್ದಿದ್ದರೆ ನಾನು ನೆರೆರಾಷ್ಟ್ರದ ಕಲಾವಿದರನ್ನು ಸೇರಿಸಿಕೊಳ್ಳುತ್ತಿರಲಿಲ್ಲ. ಆದರೆ ಒಂದು ಮಾತಂತೂ ಹೇಳಲು ಬಯಸುತ್ತೇನೆ. ಈ ಸಿನೆಮಾಕ್ಕಾಗಿ 300ಕ್ಕೂ ಹೆಚ್ಚು ಭಾರತೀಯ ಜನರು ತಮ್ಮ ಬೆವರು, ರಕ್ತ ಮತ್ತು ಕಣ್ಣೀರು ಹರಿಸಿ ದುಡಿದಿದ್ದಾರೆ. ತಮ್ಮ ಒಡನಾಡಿಗಳಿಂದಲೇ ತಮ್ಮ ಶ್ರಮಕ್ಕೆ ವಿಘ್ನ ಬರುವುದನ್ನು ಅವರು ಬಯಸುವುದಿಲ್ಲ. ಭಾರತೀಯ ಸೇನೆಯನ್ನು ನಾನು ಸದಾ ಗೌರವಿಸುತ್ತೇನೆ. ಯಾವುದೇ ವಿಧದ ಭಯೋತ್ಪಾದಕತೆ, ಅದರಲ್ಲೂ ವಿಶೇಷವಾಗಿ ನನ್ನ ದೇಶ, ನನ್ನ ಜನರು ಮತ್ತು ನನಗೆ ತೊಂದರೆಯನ್ನುಂಟುಮಾಡುವ ಭಯೋತ್ಪಾದಕತೆಗೆ ನನ್ನ ವಿರೋಧವಿದೆ. ನಮ್ಮ ಈಗಿನ ಪರಿಸ್ಥಿತಿ ಅರ್ಥ ಮಾಡಿಕೊಂಡು , ನಾವು ನಮ್ಮ ದೇಶವನ್ನು ಪ್ರೀತಿಸುತ್ತೇವೆ ಮತ್ತು ಗೌರವಿಸುತ್ತೇವೆ ಎಂಬುದನ್ನು ಅರಿತುಕೊಳ್ಳಬೇಕು ಎಂದವರು ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

Full View