ಎರಡು ದಿನ ಪ್ರೇಮ ನಿವೇದನೆ; ಮೂರನೆ ದಿವಸ ವಿದ್ಯಾರ್ಥಿನಿಯ ಅಪಹರಣ ಯತ್ನ

ಪಾಲಕ್ಕಾಡ್, ಫೆ. 24: ನಗರದ ದಕ್ಷಿಣ ಪೊಲೀಸ್ ಠಾಣೆಯ ಸಮೀಪ ಪ್ರಥಮ ವರ್ಷ ಪದವಿ ವಿದ್ಯಾರ್ಥಿನಿಯೊಬ್ಬಳ ಅಪಹರಣ ಯತ್ನ ನಡೆದಿದೆ. ಎರಡು ದಿನ ಪ್ರೇಮ ನಿವೇದನೆ ಮಾಡಿದ ಯುವಕ ಮೂರನೆ ದಿವಸ ಬಲವಂತದಿಂದ ಕಾರಿನಲ್ಲಿ ಎತ್ತಿಹಾಕಿ ಅಪಹರಿಸಲು ಯತ್ನಿಸಿದ್ದಾನೆ. ಈತನ ತಾಯಿ ಎನ್ನಲಾದ ಮಹಿಳೆಯು ಕಾರಿನೊಳಗಿದ್ದಳು. ದೈಹಿಕವಾಗಿ ಗಟ್ಟಿಮುಟ್ಟಾಗಿದ್ದ ವಿದ್ಯಾರ್ಥಿನಿ ಅಪಹರಣಕಾರನನ್ನು ದೂಡಿಹಾಕಿ ತಪ್ಪಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾಳೆಂದು ವರದಿಯೊಂದು ತಿಳಿಸಿದೆ.

ಇತ್ತೀಚೆಗೆ ಪಾಲಕ್ಕಾಡ್ ನಗರದಿಂದ ವೇಶ್ಯಾವಾಟಿಕೆಗೆ ಸಂಬಂಧಿಸಿ ಮಹಿಳೆಯೊಬ್ಬಳನ್ನು ಪೊಲೀಸರು ಬಂಧಿಸಿದ್ದರು. ಅಪಹರಣ ಯತ್ನಕ್ಕೂ ಬಂಧಿಸಲಾದ ಮಹಿಳೆಗೂ ಸಂಬಂಧ ಇರಬಹುದೆಂದು ವಿದ್ಯಾರ್ಥಿನಿಯ ಮನೆಯವರು ಶಂಕಿಸಿದ್ದಾರೆ. : ಪೊಲೀಸರಿಗೆ ದೂರು ನೀಡಿದರೆ ನಿನ್ನನ್ನು ಕೊಂದು ಹಾಕುವೆ ಎಂದು ಅಪಹರಣಕಾರ ಬೆದರಿಕೆಯೊಡ್ಡಿದ್ದಾನೆಂದು ವಿದ್ಯಾರ್ಥಿನಿ ತಿಳಿಸಿದ್ದಾರೆ. ಈ ಹೆದರಿಕೆಯಿಂದ ವಿದ್ಯಾರ್ಥಿನಿಯ ಮನೆಯವರು ಪೊಲೀಸರಿಗೆ ದೂರು ನೀಡಿಲ್ಲ.

ಅಪಹರಣಕಾರರ ತಂಡದಿಂದ ಇನ್ನೂ ದಾಳಿಯಾಗಬಹುದೆಂದು ವಿದ್ಯಾರ್ಥಿನಿಯ ಮನೆಯವರು ಹೆದರಿದ್ದಾರೆ. ಅಪಹರಣಕ್ಕೆ ಯತ್ನಿಸಿದ ವ್ಯಕ್ತಿಗೆ ವಿದ್ಯಾರ್ಥಿನಿಯ ಮನೆ ಮತ್ತು ವಿವರಗಳುಗೊತ್ತಿದೆ ಎಂದು ಅವರು ಹೇಳುತ್ತಿದ್ದಾರೆ. ಈ ವ್ಯಕ್ತಿ ಎರಡು ವಾರ ಮೊದಲು ಮನೆಯ ಪರಿಸರದಲ್ಲಿ ಕಾಣಿಸಿಕೊಂಡಿದ್ದ. ವಿದ್ಯಾರ್ಥಿನಿಯೊಂದಿಗೆ ನಿನ್ನ ಮನೆ ಎಲ್ಲಿ ಎಂದು ಕೇಳಿದ್ದ ಎಂದು ವಿದ್ಯಾರ್ಥಿನಿ ತಿಳಿಸಿದ್ದಾಳೆ.

ಕಳೆದ ಶುಕ್ರವಾರ ವಿದ್ಯಾರ್ಥಿನಿ ಮನೆ ಹತ್ತಿರದ ಹೆಲ್ತ್ ಕ್ಲಬ್‌ಗೆ ನಡೆದು ಹೋಗುತ್ತಿದ್ದಾಗ ಕಾರಿನಲ್ಲಿ ಬಂದು ದಾರಿಯಲ್ಲಿ ಆತ ಕಾಯುತ್ತಿದ್ದ ಹಾಗೂ ಪ್ರೇಮಿಸುವುದಾಗಿ ಹೇಳಿಕೊಂಡಿದ್ದ ಎಂದು ಅವಳುತಿಳಿಸಿದ್ದಾಳೆ. ಶನಿವಾರವೂ ಆತ ಹೀಗೆಯೇ ಮಾಡಿದ್ದಾನೆ. ನಂತರ ಮಂಗಳವಾರ ಅದೇ ಸ್ಥಳದಲ್ಲಿ ಕಾದಿದ್ದ. ಆತನ ಕಾರಿನಲ್ಲಿ ಮಹಿಳೆಯೂ ಇದ್ದಳು. ಈವೇಳೆ ಆತ ತನ್ನನ್ನು ಬಲವಂತದಿಂದ ಕಾರಿನೊಳಗೆ ಹತ್ತಿಸಲು ಯತ್ನಿಸಿದ್ದಾನೆ. ಇಬ್ಬರನ್ನೂ ನೋಡಿದರೆ ಗುರುತಿಸಬಲ್ಲೆ ಎಂದು ವಿದ್ಯಾರ್ಥಿನಿ ತಿಳಿಸಿದ್ದಾಳೆ.

 ವೇಶ್ಯಾವಾಟಿಕೆಗೆ ಸಂಬಂಧಿಸಿ ಬಂಧಿಸಿದವರ ವಿವರಗಳನ್ನು ಬಹಿರಂಗಪಡಿಸಬಾರದೆಂದು ಪೊಲೀಸರಿಗೆ ಮೇಲಿನಿಂದ ಆದೇಶವಿದ್ದು ಅವರು ಮಹಿಳೆಯ ಫೋಟೊವನ್ನು ಪತ್ರಿಕೆಗೆ ಬಿಡುಗಡೆಗೊಳಿಸಿಲ್ಲ. ಈ ಕುರಿತು ಡಿಜಿಪಿಯ ಸರ್ಕ್ಯುಲರ್ ಇದೆಯೆಂದು ಹೇಳುತ್ತಿದ್ದಾರೆ ಎಂದು ವರದಿಯಾಗಿದೆ.