ಸ್ವಾತಂತ್ರೋತ್ಸವಕ್ಕೆ ಶಾರುಖ್-ಅಕ್ಷಯ್ ಬಾಕ್ಸ್ ಆಫೀಸ್ ಫೈಟ್

ಈ ವರ್ಷದ ಗಣರಾಜ್ಯೋತ್ಸವದಂದು ಶಾರುಖ್ ಖಾನ್‌ರ ‘ರಾಯೀಸ್’ ಹಾಗೂ ಹೃತೀಕ್ ರೋಶನ್‌ರ ‘ಕಾಬಿಲ್’ ಒಂದೇ ದಿನ ತೆರೆಕಾಣುವ ಮೂಲಕ ಇಬ್ಬರು ಸೂಪರ್‌ಸ್ಟಾರ್‌ಗಳ ಬಾಕ್ಸ್‌ಆಫೀಸ್ ಹಣಾಹಣಿಗೆ ಸಾಕ್ಷಿಯಾಯಿತು. ಆದಾಗ್ಯೂ ಈ ಎರಡು ಚಿತ್ರಗಳು ಗಲ್ಲಾಪೆಟ್ಟಿಗೆಯಲ್ಲಿ ಭರ್ಜರಿ ಯಶಸ್ಸಿನ ಗೆಲುವಿನ ನಗೆ ಬೀರಿದವು. ಇದೀಗ ಈ ಸಲದ ಸ್ವಾತಂತ್ರ ದಿನಾಚರಣೆಯಂದೂ ಎರಡು ಭಾರೀ ವೆಚ್ಚದ ಬಾಲಿವುಡ್ ಚಿತ್ರಗಳು ಸ್ಪರ್ಧೆಗಿಳಿಯಲಿರುವುದು ಖಚಿತವಾಗಿದೆ. ಅಕ್ಷಯ್ ಕುಮಾರ್ ಅಭಿನಯದ ‘ಟಾಯ್ಲೆಟ್-ಏಕ್ ಪ್ರೇಮ್ ಕಥಾ’ ಚಿತ್ರವು ಇಮ್ತಿಯಾಝ್ ಅಲಿ ನಿರ್ದೇಶನದ ಶಾರುಖ್-ಅನುಷ್ಕಾ ಶರ್ಮಾ ನಟಿಸಿರುವ ಇನ್ನೂ ಹೆಸರಿಡದ ಚಿತ್ರದೊಂದಿಗೆ ಸ್ಪರ್ಧಿಸಲಿದೆ.

ಇಷ್ಟ್ಟಕ್ಕೂ ಮೊದಲಿಗೆ ಅಕ್ಷಯ್ ಅಭಿನಯದ ‘ಕ್ರಾಕ್’ ಚಿತ್ರವನ್ನು ಸ್ವಾತಂತ್ರ ದಿನಾಚರಣೆಯಂದು ಹಾಗೂ ‘‘ಟಾಯ್ಲೆಟ್: ಏಕ್ ಪ್ರೇಮ್ ಕಥಾ’’ವನ್ನು ಎರಡು ತಿಂಗಳು ಮುಂಚಿತವಾಗಿ ಅಂದರೆ ಜೂನ್ 2ರಂದು ರಿಲೀಸ್ ಮಾಡುವುದೆಂದು ನಿರ್ಧರಿಸಲಾಗಿತ್ತು. ಆದರೆ ನಿರ್ಮಾಣದಲ್ಲಿನ ವಿಳಂಬದಿಂದಾಗಿ, ‘‘ಕ್ರಾಕ್’’ ಚಿತ್ರದ ಬಿಡುಗಡೆಯು ಒಂದು ವರ್ಷದಷ್ಟು ಮುಂದೆ ಹೋಗಿದೆ. ಹೀಗಾಗಿ ‘‘ಟಾಯ್ಲೆಟ್ -ಏಕ್ ಪ್ರೇಮ್ ಕಥಾ’’ ಚಿತ್ರ ಸ್ವಾತಂತ್ರೋತ್ಸವದ ಬಿಡುಗಡೆಗೆ ಸನ್ನದ್ಧವಾಗುತ್ತಿದೆ. ಅಂದ ಹಾಗೆ ಕಳೆದ ವರ್ಷದ ಸ್ವಾತಂತ್ರೋತ್ಸವದಂದೂ ಅಕ್ಷಯ್ ಕುಮಾರ್‌ರ ‘‘ರುಸ್ತುಂ’’ ಹಾಗೂ ಹೃತಿಕ್ ಅಭಿನಯದ ‘‘ಮೊಹೆಂಜೊದಾರೊ’’ ಬಾಕ್ಸ್ ಆಫೀಸ್ ಸಂಗ್ರಾಮಕ್ಕಿಳಿದಿದ್ದವು. ಈ ಪೈಕಿ ‘‘ರುಸ್ತು’’ ಗೆದ್ದರೆ, ‘‘ಮೊಹೆಂಜೊದಾರೋ’’ ದಯನೀಯವಾಗಿ ಮುಗ್ಗರಿಸಿತ್ತು.