ಬಗೆ ಹರಿದ ಶಾರೂಖ್ ಚಿತ್ರದ ಟೈಟಲ್ ಗೊಂದಲ

ಅನುಷ್ಕಾ ಶರ್ಮಾ ಹಾಗೂ ಶಾರುಖ್ ಖಾನ್ ಅಭಿನಯದ ನೂತನ ಚಿತ್ರದ ಟೈಟಲ್ ಕುರಿತ ಗೊಂದಲ ಇದೀಗ ಬಗೆಹರಿದಂತೆ ಕಾಣುತ್ತದೆ. ನಿರ್ದೇಶಕ ಇಮ್ತಿಯಾಝ್ ಅಲಿ ಆ್ಯಕ್ಷನ್ ಕಟ್ ಹೇಳಿರುವ ಈ ಚಿತ್ರಕ್ಕೆ ಆರಂಭದಲ್ಲಿ ‘ ದಿ ರಿಂಗ್’ ಎಂದು ಹೆಸರಿಡಲಾಗಿತ್ತು.

ಆ ಬಳಿಕ ಅದ್ಯಾಕೋ ಮನಸ್ಸು ಬದಲಾಯಿಸಿ, ‘ರೆಹ್‌ನುಮಾ’ ಎಂಬ ಟೈಟಲ್ ನೀಡಿದರು. ಆನಂತರ ಎಲ್ಲಾ ಊಹಾಪೋಹಗಳಿಗೆ ತೆರೆಎಳೆದ ಅವರು ಚಿತ್ರದ ಹೆಸರನ್ನು ‘ರೌಲಾ’ ಎಂದು ಬದಲಾಯಿಸಿದರು. ರೌಲಾ ಎಂದರೆ ಪಂಜಾಬಿಯಲ್ಲಿ ‘ಗದ್ದಲ’ ಎಂಬ ಅರ್ಥವಿದೆ. ಈಗ ಶಾರುಖ್-ಅನುಷ್ಕಾ ಜೋಡಿಯ ಚಿತ್ರಕ್ಕೆ ಈ ಟೈಟಲ್ ಪಕ್ಕಾ ಆಗಿದೆ. ಆದಾಗ್ಯೂ, ಈ ಬಗ್ಗೆ ಚಿತ್ರತಂಡದಿಂದ ಇನ್ನಷ್ಟೇ ಅಧಿಕೃತ ಹೇಳಿಕೆ ಹೊರಬೀಳಬೇಕಿದೆ.

ರೌಲಾ ಚಿತ್ರದ ಶೂಟಿಂಗ್ ಪೂರ್ಣಗೊಂಡಿದ್ದು, ಸ್ವಾತಂತ್ರ ದಿನಾಚರಣೆಯಂದು ಬಿಡುಗಡೆಯಾಗಲಿದೆ. ಬಾಕ್ಸ್ ಆಫೀಸ್ ಗ್ಯಾರಂಟಿ ನಿರ್ದೇಶಕನೆನಿಸಿರುವ ಇಮ್ತಿಯಾಝ್ ಅಲಿಯ ಈ ಚಿತ್ರವು ಅತ್ಯಂತ ವಿನೂತನವಾದ ಕಥಾವಸ್ತುವನ್ನು ಹೊಂದಿದೆಯಂತೆ. ಶಾರುಖ್-ಅನುಷ್ಕಾ ಜೋಡಿ, ಇದಕ್ಕೂ ಮೊದಲು ‘ರಬ್ ನೆ ಬನಾ ದಿ ಜೋಡಿ’ ಹಾಗೂ ‘ಜಬ್ ತಕ್ ಹೈ ಜಾನ್’ ಚಿತ್ರಗಳಲ್ಲಿ ನಟಿಸಿದ್ದರು. ಬಿಡುಗಡೆಗೂ ಮೊದಲೇ ರೌಲಾಗೆ ಬಾಲಿವುಡ್‌ನಲ್ಲಿ ಉತ್ತಮ ಪ್ರತಿಕ್ರಿಯೆ ದೊರೆತಿದೆ.

ಭಾರತ ಹಾಗೂ ಸಾಗರೋತ್ತರ ದೇಶಗಳ ವಿತರಣಾ ಹಕ್ಕುಗಳು ಈಗಾಗಲೇ 100 ಕೋಟಿ ರೂ.ಗೆ ಮಾರಾಟವಾಗಿರುವುದರಿಂದ ನಿರ್ಮಾಪಕರು ಈಗಲೇ ಸೇಫ್ ಆಗಿದ್ದಾರೆ.