ದಾರಿ ಬಿಡಿ ... 55ರ ಯುವಕ ಸುನಿಲ್ ಶೆಟ್ಟಿ ಮತ್ತೆ ಬರುತ್ತಿದ್ದಾರೆ
ಹೊಸದಲ್ಲಿ, ಎ.24: ಸಾಲುಸಾಲಾಗಿ ತಮ್ಮ ಮೂರು ಚಿತ್ರಗಳು ಬಾಕ್ಸಾಫೀಸಿನಲ್ಲಿ ತೋಪೆದ್ದು, ಹೋದ ನಂತರ ಮೂರು ವರ್ಷ ಬ್ರೇಕ್ ಪಡೆದುಕೊಂಡಿದ್ದ ಬಾಲಿವುಡ್ ನಟ ಸುನೀಲ್ ಶೆಟ್ಟಿ ಹೊಸ ಹುಮ್ಮಸ್ಸಿನಿಂದ ಹಾಗೂ ನವೋಲ್ಲಾಸದಿಂದ ಹಿಂದಿರುಗಿದ್ದಾರೆ.
ಬೆಳ್ಳಿ ಪರದೆಯಲ್ಲಿ 'ಇಂಡಿಯಾಸ್ ಅಸ್ಲಿ ಚಾಂಪಿಯನ್ಸ್' ಕಾರ್ಯಕ್ರಮದ ಮೂಲಕ ಮೊದಲಾಗಿ ಕಾಣಿಸಿಕೊಳ್ಳಲಿರುವ ನಟ ಇದಕ್ಕಾಗಿ ನಡೆದ ಫೋಟೋ ಶೂಟ್ ನಲ್ಲಿ ತಮ್ಮ 55ರ ವಯಸ್ಸಿನಲ್ಲೂ ಹಾಟ್ ಆಗಿ ಕಾಣಿಸುತ್ತಿದ್ದಾರೆ. ಸುನೀಲ್ ದೈಹಿಕ ಕ್ಷಮತೆಯನ್ನು ನೋಡಿದರೆ ಯುವಕರೂ ನಾಚಬೇಕು ಎನ್ನುತ್ತಾರೆ ವಿಮರ್ಶಕರು.
ಮೂರು ವರ್ಷಗಳ ಬ್ರೇಕ್ ಪಡೆದುಕೊಂಡಿದ್ದರಿಂದ ಆದ ಪ್ರಯೋಜನಗಳನ್ನು ಸುನೀಲ್ ಪತ್ರಿಕೆಯೊಂದರ ಜತೆ ಹಂಚಿಕೊಂಡಿದ್ದು, ಇದೀಗ ಅವರು ಫಿಟ್ನೆಸ್ ವಿಚಾರದಲ್ಲಿ ತಮಗಿರುವ ಜ್ಞಾನವನ್ನು ತಮ್ಮ ಅಭಿಮಾನಿಗಳಲ್ಲಿ ಹಂಚಲು ಕಾತುರರಾಗಿದ್ದಾರೆ. ನಾನು ಟಿವಿ ಕಾರ್ಯಕ್ರಮದ ಮೂಲಕ ಈ ಕಾರ್ಯ ಮಾಡಬಲ್ಲೆನೆಂಬ ಆತ್ಮವಿಶ್ವಾಸ ಅವರಿಗಿದೆ.
'ಇಂಡಿಯಾಸ್ ಅಸ್ಲಿ ಚಾಂಪಿಯನ್ಸ್' ಕಾರ್ಯಕ್ರಮದಲ್ಲಿ ಸ್ಪರ್ಧಾಳುಗಳ ದೈಹಿಕ ಹಾಗೂ ಮಾನಸಿಕ ಕಾರ್ಯಕ್ಷಮತೆಯನ್ನು ಸುನೀಲ್ ಒರೆಗೆ ಹಚ್ಚಲಿದ್ದಾರೆ. ಅವರ ಜತೆ ಅಮಿತಾಭ್ ಬಚ್ಚನ್ ಅವರ ಫಿಟ್ನೆಸ್ ಟ್ರೈನರ್ ವೃಂದಾ ಮೆಹ್ತಾ ಕೂಡ ಕಾಣಿಸಿಕೊಳ್ಳಲಿದ್ದಾರೆ. ಪ್ರತಿಯೊಬ್ಬ ಸ್ಪರ್ಧಾಳು ಜತೆ ವೈಯಕ್ತಿಕವಾಗಿ ಆಕೆ ಕಾರ್ಯನಿರ್ವಹಿಸಿ ಅವರ ಫಿಟ್ನೆಸ್ ಹೆಚ್ಚಿಸಲು ಶ್ರಮ ವಹಿಸಲಿದ್ದಾರೆ.