ದುಬೈ ವೈರಲ್ ವಿಡಿಯೋ: ವೀಕ್ಷಕರ ಕಿವಿಗೆ ಹೂವಿಟ್ಟ ಶಾರುಖ್ ಖಾನ್

ಮುಂಬೈ, ಜು.6: ಬಾಲಿವುಡ್ ನಟ ಶಾರುಖ್ ಖಾನ್ ಅವರ ಕಾರು ದುಬೈ ಹೊರವಲಯದ ಮರುಭೂಮಿಯ ಮರಳಿನಲ್ಲಿ ಹೂತು ಹೋಗುವುದು ಹಾಗೂ ನಂತರ ಕೊಮೊಡೊ ಡ್ರ್ಯಾಗನ್ ಒಂದು ನಟನನ್ನು ಬೆದರಿಸುವುದು - ಈ ಎರಡು ನಿಮಿಷ ಅವಧಿಯ ವೀಡಿಯೋ ವೈರಲ್ ಆಗಿದೆ ನಿಜ. ಆದರೆ ಈ ವಿಡಿಯೋ ಕೇವಲ ಒಂದು ನಾಟಕ ಎಂದು ತಿಳಿದು ಬಂದಿದ್ದು, ಶಾರುಖ್ ಖಾನ್ ವೀಕ್ಷಕರ ಕಿವಿಗೆ ಹೂವಿಟ್ಟಿದ್ದು ಸ್ಪಷ್ಟವಾಗಿದೆ..

ಈಜಿಪ್ಟ್ ದೇಶದ ಖ್ಯಾತ ಕಾಮಿಡಿಯನ್ ರಮೆಝ್ ಗಲಾಲ್ ಹಾಗೂ ಅರೆಬಿಕ್ ಟಿವಿ ಶೋ ರಮೆಝ್ ಅಂಡರ್ ಗ್ರೌಂಡ್ ಇದರ ಆಂಕರ್ ಈ ಸಂಪೂರ್ಣ ಚಿತ್ರಣವನ್ನು ತಯಾರಿಸಿದವರು. ರಮೆಝ್ ಅವರು ಸೆಲೆಬ್ರಿಟಿಗಳನ್ನು ಭಯಭೀತಗೊಳಿಸುತ್ತಾರೆ ಅದನ್ನು ಚಿತ್ರೀಕರಿಸಿ ಪ್ರದರ್ಶಿಸುತ್ತಾರೆ. ಒಂದೊಮ್ಮೆ ವಿಮಾನವೊಂದರಲ್ಲಿದ್ದ ನಟಿ ಪ್ಯಾರಿಸ್ ಹಿಲ್ಟನ್ ಗೆ ಆ ವಿಮಾನ ಪತನಗೊಳ್ಳಲಿದೆಯೆಂದು ಹೇಳಿ ಆಕೆ ಬೊಬ್ಬಿಡುವಂತೆ ಮಾಡಿದ್ದರಲ್ಲದೆ ನಂತರ ಈ ವೀಡಿಯೋ ಪ್ರಸಾರಗೊಂಡಾಗ ಹಿಲ್ಟನ್ ರಮೆಝ್ ವಿರುದ್ಧ ಮೊಕದ್ದಮೆ ಹೂಡಿದ್ದರು.

ಶಾರುಖ್ ವೀಡಿಯೋದಲ್ಲಿ ಅವರು ಮತ್ತೊಬ್ಬಾಕೆ ಮಹಿಳೆ ಮರಳಿನಲ್ಲಿ ಅರ್ಧಕ್ಕರ್ಧ ಹುದುಗಿ ಹೋದಾಗ ಅವರತ್ತ ಕೊಮೊಡೊ ಡ್ರ್ಯಾಗನ್ ಒಂದು ಬರುತ್ತದೆ. ಇದನ್ನು ನೋಡಿದ ಆ ಮಹಿಳೆ ಜೋರಾಗಿ ಅರಚಿದ್ದರೂ ಶಾರುಖ್ ಸಾವಧಾನತೆ ಪ್ರದರ್ಶಿಸಿದ್ದರು. ಅವರಿಬ್ಬರನ್ನು ಕಾಪಾಡಲಾಗಿತ್ತು ನಂತರ ಇದೊಂದು ಪ್ರ್ಯಾಂಕ್ ಎಂದು ಹೇಳಿದಾಗ ಶಾರುಖ್ ಕೆಂಡಾಮಂಡಲರಾಗಿ ರಮೆಝ್ ಅವರಿಗೆ ಹೊಡೆಯಲು ಸನ್ನಧ್ಧರಾಗಿದ್ದರು.

ಇದನ್ನು ನೋಡಿದ ವೀಕ್ಷಕರು ತಾವು ಶಾರುಖ್ ಇಷ್ಟೊಂದು ಕೋಪದಲ್ಲಿರುವುದನ್ನು ನೋಡಿಲ್ಲ ಎಂದು ಹೇಳಿದರೂ ಆ ಅಪಾಯಕಾರಿ ದೃಶ್ಯ, ಶಾರುಖ್ ಗೆ ಕೋಪ ಬಂದಿದ್ದು ಎಲ್ಲವೂ ಪ್ರ್ಯಾಂಕ್ ಎಂದು ಇದೀಗ ಹಲವರು ಹೇಳುತ್ತಿದ್ದಾರೆ.

ಸುದ್ದಿ ಸಂಸ್ಥೆಯೊಂದರ ಪ್ರಕಾರ ಈ ಶೋದಲ್ಲಿ ಕಾಣಿಸಿಕೊಳ್ಳಲು ಶಾರುಖ್ ಅವರಿಗೆ ಸುಮಾರು 2 ಕೋಟಿ ರೂ. ನೀಡಲಾಗಿತ್ತು. ನಂತರ ರಮೆಝ್ ಅವರು ಶಾರುಖ್ ಅವರ ಜತೆಗಿನ ಸೆಲ್ಫೀ ಒಂದನ್ನು ಟ್ವಿಟ್ಟರಿನಲ್ಲಿ ಪೋಸ್ಟ್ ಮಾಡಿ ಇದು ನಿಜವಾಗಿಯೂ ಒಂದು ನಾಟಕವೆಂಬುದನ್ನು ದೃಢೀಕರಿಸಿದ್ದರು. ಶಾರುಖ್ ಅವರ ಮ್ಯಾನೇಜರ್ ಪೂಜಾ ದಡ್ಲಾನಿ ಕೂಡ ಘಟನೆ ಒಂದು ನಾಟಕ ಎಂದು ಹೇಳಿದರೂ ಅದಕ್ಕಾಗಿ ನಟನಿಗೆ ಹಣ ನೀಡಲಾಗಿತ್ತೇ ಎಂಬುದನ್ನು ತಿಳಿಸಿಲ್ಲ.

Full View