ರಿಲೀಸ್‌ಗೆ ಮೊದಲೇ ವಿವೇಗಂ ಹಿಟ್!

ಅಜಿತ್ ನಾಯಕನಾಗಿರುವ ಸೂಪರ್ ಆ್ಯಕ್ಷನ್ ಥ್ರಿಲ್ಲರ್ ಚಿತ್ರ ‘ವಿವೇಗಂ’ ಕುರಿತು ಒಂದಲ್ಲ ಒಂದು ಅಚ್ಚರಿಯ ಸುದ್ದಿಗಳು ಹೊರಬೀಳುತ್ತಲೇ ಇದೆ. ಇದೀಗ ಚಿತ್ರವು ಬಿಡುಗಡೆಯಾಗುವ ಮೊದಲೇ 120 ಕೋಟಿ ರೂ. ಬಾಚುವ ಮೂಲಕ ಹೊಸ ದಾಖಲೆಯನ್ನು ಸ್ಥಾಪಿಸಿದೆ.

ರಜನಿಕಾಂತ್ ಚಿತ್ರಗಳ ಹೊರತಾಗಿ ತಮಿಳು ನಟರೊಬ್ಬರ ಚಿತ್ರವು ರಿಲೀಸ್ ಆಗುವ ಮುನ್ನವೇ ಇಷ್ಟೊಂದು ದಾಖಲೆ ಹಣವನ್ನು ಸಂಪಾದಿಸಿರುವುದು ಇದೇ ಮೊದಲು ಎಂದು ಕಾಲಿವುಡ್ ಪಂಡಿತರು ಅಭಿಪ್ರಾಯಿಸಿದ್ದಾರೆ. ಬರೋಬ್ಬರಿ 100 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿರುವ ಈ ಚಿತ್ರಕ್ಕೆ ಈಗಾಗಲೇ ಹೂಡಿದ ಹಣ ಹಿಂದೆ ಬಂದಿರುವುದರಿಂದ ನಿರ್ಮಾಪಕರೀಗ ಸೇಫ್ ಆಗಿದ್ದಾರೆ.

ಇದಕ್ಕೂ ಈ ಚಿತ್ರದ ಹಾಡುಗಳ ಟಿವಿ ಪ್ರಸಾರದ ಹಕ್ಕುಗಳನ್ನು ಸನ್‌ಟಿವಿ ಸಂಸ್ಥೆ ಭಾರೀ ದೊಡ್ಡ ಬೆಲೆಗೆ ಖರೀದಿಸಿರುವುದಾಗಿ ಸುದ್ದಿಯಾಗಿತ್ತು. ಆಗಸ್ಟ್ 24ಕ್ಕೆ ಬಿಡುಗಡೆಗೊಳ್ಳಲಿರುವ ಈ ಚಿತ್ರದ ಬಗ್ಗೆ ಪ್ರೇಕ್ಷಕರ ನಿರೀಕ್ಷೆ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದೆ. ಅನಿರುದ್ಧ ರವಿಚಂದರ್ ಚಿತ್ರಕ್ಕೆ ಸಂಗೀತ ನೀಡಿದ್ದು, ಹಾಡುಗಳು ಈಗಾಗಲೇ ಭಾರೀ ಹಿಟ್ ಆಗಿವೆ.

ಯುರೋಪ್‌ನ ವಿವಿಧೆಡೆ ಏಳು ತಿಂಗಳುಗಳ ಕಾಲ ಚಿತ್ರೀಕರಣಗೊಂಡಿರುವ ‘ವಿವೇಗಂ’ನಲ್ಲಿ ಬಾಲಿವುಡ್ ನಟ ವಿವೇಕ್ ಒಬೆರಾಯ್ ಮೊದಲ ಬಾರಿಗೆ ತಮಿಳು ಚಿತ್ರರಂಗಕ್ಕೆ ಎಂಟ್ರಿಕೊಟ್ಟಿದ್ದಾರೆ. ಖ್ಯಾತ ನಟ ಕಮಲಹಾಸನ್‌ರ ಕಿರಿಯ ಪುತ್ರಿ ಅಕ್ಷರಾ ಹಾಸನ್‌ಗೂ ಇದು ಮೊದಲ ತಮಿಳು ಚಿತ್ರವೂ ಹೌದು. ಅಜಿತ್‌ಗೆ ನಾಯಕಿಯಾಗಿ ಕಾಜಲ್ ಅಗರ್ವಾಲ್ ಕಾಣಿಸಿಕೊಂಡಿದ್ದಾರೆ.