ಮಹಿಳಾ ಟೆಕ್ಕಿಯ ಅತ್ಯಾಚಾರಗೈದು ಕೊಲೆ : ಇಬ್ಬರು ಸ್ನೇಹಿತರ ಬಂಧನ

ನಾಗ್‌ಪುರ, ಸೆ.7: ಮಹಿಳೆಯ ಅತ್ಯಾಚಾರಗೈದು ಕೊಲೆ ಮಾಡಿರುವ ಆರೋಪದಲ್ಲಿ ಆಕೆಯ ಇಬ್ಬರು ಸ್ನೇಹಿತರನ್ನು ಬಂಧಿಸಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಮಹಾರಾಷ್ಟ್ರದ ಅಂಬರ್‌ನಾಥ್ ಎಂಬಲ್ಲಿ ಈ ಘಟನೆ ನಡೆದಿದೆ. 22ರ ಹರೆಯದ ಮಹಿಳೆಯನ್ನು ಕೊಲೆಗೈದ ಬಳಿಕ ಶವವನ್ನು ಸೂಟ್‌ಕೇಸ್‌ನಲ್ಲಿ ತುಂಬಿಸಿ, ಕರ್ನಾಟಕ ರಾಜ್ಯದ ಬೆಳಗಾವಿಯಲ್ಲಿ ಎಸೆಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ನಿಖಿಲೇಶ್ ಪಾಟೀಲ್ (24 ವರ್ಷ) ಹಾಗೂ ಅಕ್ಷಯ್ ವಲೊದೆ(25 ವರ್ಷ) ಆರೋಪಿಗಳೆಂದು ಗುರುತಿಸಲಾಗಿದೆ. ಫೋನ್‌ನಲ್ಲಿ ಮಹಿಳೆಯ ಜೊತೆ ಸಂಪರ್ಕ ಸಾಧಿಸಿದ್ದ ಆರೋಪಿಗಳು ಕಳೆದ ರವಿವಾರ ಪುಣೆಯಲ್ಲಿ ಭೇಟಿಮಾಡುವುದಾಗಿ ತಿಳಿಸಿದ್ದರು. ಇನ್ನೊಬ್ಬ ಸ್ನೇಹಿತ ನೀಲೇಶ್ ಖೋಬ್ರಗಡೆ ಇವರ ಜೊತೆ ಸೇರಿದ್ದು ಮೂವರೂ ಆ ಮಹಿಳೆಯನ್ನು ಭೇಟಿಯಾಗಿ ಬಳಿಕ ಅಂಬರ್‌ನಾಥ್‌ನಲ್ಲಿರುವ ಅಕ್ಷಯ್ ವಲೊದೆಯ ಮನೆಗೆ ತೆರಳಿದ್ದರು. ಕೆಲ ಸಮಯದ ಬಳಿಕ ಯಾವುದೋ ಕೆಲಸದ ಮೇಲೆ ನೀಲೇಶ್ ಅಲ್ಲಿಂದ ತೆರಳಿದ್ದ ಎನ್ನಲಾಗಿದೆ.

 ನಂತರ ಮಹಿಳೆಯನ್ನು ಅತ್ಯಾಚಾರ ಮಾಡಿದ್ದು ಆಗ ಮಹಿಳೆ ಪೊಲೀಸರಿಗೆ ದೂರು ನೀಡುವುದಾಗಿ ಹೇಳಿದ್ದಾಳೆ. ಈ ಸಂದರ್ಭ ಕೆರಳಿದ ಆರೋಪಿಗಳು ಆಕೆಯನ್ನು ಹತ್ಯೆ ಮಾಡಿ ಸೂಟ್‌ಕೇಸ್‌ನಲ್ಲಿ ಶವವನ್ನು ತುಂಬಿಸಿಟ್ಟಿದ್ದಾರೆ. ಈ ವೇಳೆ ಮನೆಗೆ ಮರಳಿದ ನೀಲೇಶ್‌ಗೆ, ತಾವು ಗೋವ ಪ್ರವಾಸಕ್ಕೆ ಹೋಗುತ್ತಿರುವುದಾಗಿ ತಿಳಿಸಿ ಅವನನ್ನೂ ಕರೆದುಕೊಂಡು ಸೂಟ್‌ಕೇಸ್‌ನೊಂದಿಗೆ ಅಲ್ಲಿಂದ ತೆರಳಿದ್ದಾರೆ.

ಕರ್ನಾಟಕದ ಬೆಳಗಾವಿ ಬಳಿ ನಿರ್ಜನ ಪ್ರದೇಶದಲ್ಲಿ ಸೂಟ್‌ಕೇಸನ್ನು ಬಿಸಾಡಿದ್ದು ಈ ವೇಳೆ ಅನುಮಾನಗೊಂಡ ನೀಲೇಶ್ ಅವರಲ್ಲಿ ಮಹಿಳೆಯ ಬಗ್ಗೆ ವಿಚಾರಿಸಿದ್ದಾನೆ. ಆಗ ಆರೋಪಿಗಳು ಘಟನೆಯನ್ನು ವಿವರಿಸಿದ್ದಾರೆ. ಬಳಿಕ ಆರೋಪಿಗಳು ರತ್ನಗಿರಿ ಪೊಲೀಸ್ ಠಾಣೆಗೆ ಹೋಗಿ ಶರಣಾಗತರಾಗಿದ್ದಾರೆ ಎಂದು ಶಿವಾಜಿನಗರ ಪೊಲೀಸ್ ಠಾಣೆಯ ಹಿರಿಯ ಅಧಿಕಾರಿ ಡಿ.ಗೋಡ್‌ಬೋಲೆ ತಿಳಿಸಿದ್ದಾರೆ.

ಮಹಿಳೆಯ ಶವವನ್ನು ಪತ್ತೆಹಚ್ಚಲಾಗಿದ್ದು ಮರಣೋತ್ತರ ಪರೀಕ್ಷೆ ನಡೆಸಿ ಕುಟುಂಬದವರಿಗೆ ಒಪ್ಪಿಸಲಾಗಿದೆ. ಮಹಿಳೆ ಮುಂಬೈಯಲ್ಲಿರುವ ಐಟಿ ಸಂಸ್ಥೆಯೊಂದರಲ್ಲಿ ಇಂಜಿನಿಯರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.