ಇಂಡಿಯನ್ 2 ಬಳಿಕ ಚಿತ್ರ ರಂಗಕ್ಕೆ ಕಮಲ್ ಗುಡ್‌ಬೈ?

ಸಕ್ರಿಯ ರಾಜಕಾರಣವನ್ನು ಪ್ರವೇಶಿಸುವ ಸನ್ನಾಹದಲ್ಲಿರುವ ಉಲಗನಾಯಕನ್ ಕಮಲಹಾಸನ್ ಚಿತ್ರರಂಗಕ್ಕೆ ವಿದಾಯ ಹೇಳಲಿದ್ದಾರೆ ಎಂಬ ವದಂತಿಗಳು ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ. ಶಂಕರ್ ನಿರ್ದೇಶನದ ‘ಇಂಡಿಯನ್ 2’ ಚಿತ್ರದಲ್ಲಿ ಅಭಿನಯಿಸಿದ ಬಳಿಕ ಕಮಲ್ ಸಿನೆಮಾರಂಗಕ್ಕೆ ಗುಡ್‌ಬೈ ಹೇಳಲಿದ್ದಾರಂತೆ. ಬರೋಬ್ಬರಿ 180 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಳ್ಳಲಿರುವ ಈ ಚಿತ್ರವನ್ನು ದಿನಿಲ್ ರಾಜು ನಿರ್ಮಿಸುತ್ತಿದ್ದಾರೆ. ತಮಿಳು, ತೆಲುಗು ಭಾಷೆಗಳಲ್ಲಿ ಈ ಚಿತ್ರ ಏಕಕಾಲದಲ್ಲಿ ಚಿತ್ರೀಕರಣಗೊಳ್ಳಲಿದೆ.

ರಾಜಕೀಯ ಪ್ರವೇಶಿಸಿದ ಬಳಿಕ ಚಿತ್ರರಂಗ ತೊರೆಯುವುದಾಗಿ ಕಮಲ್ ಈ ಮೊದಲೇ ಹೇಳಿಕೊಂಡಿದ್ದರು. ಅಂದಹಾಗೆ ಶಂಕರ್ ಕೂಡಾ ಅಜಿತ್ ಅಭಿನಯದಲ್ಲಿ ತಾನು ನಿರ್ದೇಶಿಸಲಿದ್ದ ಚಿತ್ರವನ್ನು ಕೈಬಿಟ್ಟು ಇಂಡಿಯನ್ 2 ಕೈಗೆತ್ತಿಕೊಂಡಿದ್ದಾರೆ. ‘ಯಂದಿರನ್ 2’ ಬಿಡುಗಡೆಯಾದ ಬೆನ್ನಲ್ಲೇ ಶಂಕರ್, ‘ಇಂಡಿಯನ್ 2’ ಚಿತ್ರಕ್ಕಾಗಿ ಸಿದ್ಧತೆ ನಡೆಸಲಿದ್ದಾರೆ. ಶಂಕರ್ ನಿರ್ದೇಶನದ ಇಂಡಿಯನ್ 1996ರಲ್ಲಿ ಬಿಡುಗಡೆಗೊಂಡು ಭರ್ಜರಿ ಹಿಟ್ ಆಗಿತ್ತು. ಚಿತ್ರದಲ್ಲಿ ಕಮಲ್‌ಹಾಸನ್ ಅವರ ದ್ವಿಪಾತ್ರ ಅಭಿನಯವು ಚಿತ್ರರಸಿಕರ ಮನಸೂರೆಗೊಂಡಿತ್ತು. ಇದೀಗ ಆ ಚಿತ್ರದ ಮುಂದಿನ ಭಾಗ ಕೂಡಾ ಶಂಕರ್-ಕಮಲ್ ಕಾಂಬಿನೇಶನ್‌ನಲ್ಲಿ ನಿರ್ಮಾಣಗೊಳ್ಳಲಿರುವುದು ಚಿತ್ರರಸಿಕರಿಗೆ ಸಂಭ್ರಮ ತಂದಿದೆ. ಕಮಲ್ ಹಾಸನ್ ಅವರ ರಾಜಕೀಯ ಪ್ರವೇಶಕ್ಕೆ ಒತ್ತಾಸೆಯಾಗುವ ರೀತಿಯಲ್ಲಿ ‘ಇಂಡಿಯನ್ 2’ ಮೂಡಿಬರಲಿದೆಯೆಂಬ ಮಾತುಗಳು ತಮಿಳು ಚಿತ್ರರಂಗದಲ್ಲಿ ಕೇಳಿಬರುತ್ತಿವೆ.