ದಿಲ್ಲಿಯಲ್ಲಿ ಪ್ರತಿದಿನ 3 ಮಕ್ಕಳ ಅತ್ಯಾಚಾರ : ಸಮೀಕ್ಷಾ ವರದಿ

ಹೊಸದಿಲ್ಲಿ, ನ.3: ದೇಶದ ರಾಜಧಾನಿ ದಿಲ್ಲಿಯಲ್ಲಿ 2015ರಲ್ಲಿ 927 ಮಕ್ಕಳನ್ನು ಅತ್ಯಾಚಾರ ನಡೆಸಲಾಗಿದೆ ಎಂದು ರಾಷ್ಟ್ರೀಯ ಅಪರಾಧ ದಾಖಲೀಕರಣ ವಿಭಾಗ (ಎನ್‌ಸಿಆರ್‌ಬಿ)ಯ ಇತ್ತೀಚಿನ ವರದಿಯಲ್ಲಿ ತಿಳಿಸಲಾಗಿದೆ.

ಅಂದರೆ ರಾಷ್ಟ್ರದ ರಾಜಧಾನಿಯಲ್ಲಿ ಪ್ರತೀ ದಿನ ಸುಮಾರು 3 ಮಕ್ಕಳ ಮೇಲೆ ಅತ್ಯಾಚಾರ ನಡೆಯುತ್ತಿದೆ. ಇದಕ್ಕೆ ಕಾಮಪ್ರಚೋದಕ ಸಾಹಿತ್ಯ, ಸಿನೆಮಾ ಹಾಗೂ ಮನಸ್ಥಿತಿ ಕಾರಣ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

   ಎಳೆಯ ಮಕ್ಕಳ ಮೇಲೆ ನಡೆಯುವ ಲೈಂಗಿಕ ದೌರ್ಜನ್ಯಕ್ಕೆ ಪ್ರಮುಖ ಕಾರಣ ಜನರ ಮನಸ್ಥಿತಿ.ಈ ನಿಟ್ಟಿನಲ್ಲಿ ಜನರನ್ನು ತಿದ್ದಿ ಅವರ ಚಿಂತನೆಯನ್ನು ಬದಲಾಯಿಸುವ ಅಗತ್ಯವಿದೆ ಎಂದು ಮಕ್ಕಳ ಹಕ್ಕುಗಳ ಸಂಘಟನೆಯ ಕಾರ್ಯಕರ್ತೆ ಭಾರತಿ ಅಲಿ ಹೇಳುತ್ತಾರೆ.

      ಎಳೆಯ ಮಕ್ಕಳಿಗೆ ಸಂಬಂಧಿಸಿದ ಹಲವಾರು ಪ್ರಕರಣಗಳನ್ನು ನಿರ್ವಹಿಸಿರುವ ವಕೀಲ ಅನಂತ್ ಕುಮಾರ್ ಅಸ್ತಾನ ಅವರ ಪ್ರಕಾರ, ದಿಲ್ಲಿಗೆ ದೇಶದ ಇತರೆಡೆಯಿಂದ ಭಾರೀ ಸಂಖ್ಯೆಯಲ್ಲಿ ಜನರು ವಲಸೆ ಬರುತ್ತಾರೆ. ಗ್ರಾಮೀಣ ಪ್ರದೇಶದಲ್ಲಿ ಸಾಮಾನ್ಯವಾಗಿ ಒಂದು ಪ್ರದೇಶದಲ್ಲಿ ಒಂದೇ ಸಮುದಾಯದ ಜನತೆ ಹೆಚ್ಚಾಗಿ ವಾಸವಾಗಿರುವ ಕಾರಣ ಅಲ್ಲಿ ಮಗುವಿಗೆ ದ್ವಿತೀಯ ಸುರಕ್ಷತಾ ವಲಯ ಲಭ್ಯವಾಗುತ್ತದೆೆ(ಮನೆಯವರು ಪ್ರಥಮ ಸುರಕ್ಷತಾ ವಲಯ). ಆದರೆ ವಲಸಿಗರೇ ಹೆಚ್ಚಿರುವ ದಿಲ್ಲಿಯಲ್ಲಿ ಮಕ್ಕಳಿಗೆ ಈ ದ್ವಿತೀಯ ಸುರಕ್ಷಿತಾ ವಲಯದ ಕೊರತೆಯಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಇತ್ತೀಚೆಗೆ ಹೆಚ್ಚುತ್ತಿರುವ ಅತ್ಯಾಚಾರ ಪ್ರಕರಣದ ತನಿಖೆಯ ಸಂದರ್ಭ ಅಶ್ಲೀಲ ಸಾಹಿತ್ಯದ ಪ್ರಭಾವದಿಂದ ಅತ್ಯಾಚಾರಕ್ಕೆ ಪ್ರೇರಣೆ ದೊರಕಿರುವುದು ದೃಢಪಟ್ಟಿದೆ ಎಂದವರು ಹೇಳಿದ್ದಾರೆ. ಒಂದು ಪ್ರಕರಣದಲ್ಲಿ, ಅತ್ಯಾಚಾರ ನಡೆಸಿದ್ದ 18ರ ಹರೆಯದ ಅಪರಾಧಿಯೋರ್ವ, ಅಶ್ಲೀಲ ಚಿತ್ರಗಳನ್ನು ವೀಕ್ಷಿಸಿದ ಬಳಿಕ ತನಗೆ ತನ್ನನ್ನು ನಿಯಂತ್ರಿಸಲು ಸಾಧ್ಯವಾಗುತ್ತಿಲ್ಲ ಎಂದು ತಿಳಿಸಿದ್ದಾನೆ.

 ಅಲ್ಲದೆ ಬಹುತೇಕ ಪ್ರಕರಣಗಳಲ್ಲಿ ಸಂತ್ರಸ್ತ ಶಿಶುವಿನ ಪೋಷಕರಿಬ್ಬರೂ ದುಡಿಯಲು ತೆರಳುವ ಕಾರಣ ಮಗುವನ್ನು ನೆರೆಮನೆಯವರ ರಕ್ಷಣೆಗೆ ಒಪ್ಪಿಸುತ್ತಾರೆ. ಇದು ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯಕ್ಕೆ ಅವಕಾಶ ಮಾಡಿಕೊಡುತ್ತದೆ . ಈ ನಿಟ್ಟಿನಲ್ಲಿ ಜನರಲ್ಲಿ ಅರಿವು ಮೂಡಿಸಿ, ಇಂತಹ ಕೃತ್ಯಗಳಿಂದ ದೂರ ಇರುವಂತೆ ಅವರ ಮನಸ್ಥಿತಿಯನ್ನು ಬದಲಿಸಬೇಕು ಎಂದು ಅಸ್ತಾನ ತಿಳಿಸಿದ್ದಾರೆ.

 ಬುಧವಾರ ದಿಲ್ಲಿಯ ಅಮನ್ ವಿಹಾರ್ ಎಂಬಲ್ಲಿ ನಡೆದ ಘಟನೆಯಲ್ಲಿ 18 ತಿಂಗಳ ಶಿಶುವಿನ ಮೇಲೆ ನೆರೆಮನೆಯ 33 ವರ್ಷದ ವ್ಯಕ್ತಿ ಅತ್ಯಾಚಾರ ಎಸಗಿದ್ದ. ಸಮಾಜಸೇವಾ ಸಂಸ್ಥೆ , ಮಕ್ಕಳ ಹಕ್ಕುಗಳಿಗೆ ಹೋರಾಟ ನಡೆಸುವ ಸಂಸ್ಥೆಗಳ ನಿರಂತರ ಪ್ರಯತ್ನದ ಹೊರತಾಗಿಯೂ ಈ ರೀತಿಯ ಕೃತ್ಯಗಳು ಪುನರಾವರ್ತನೆಯಾಗುತ್ತಿರುವುದು ಕಳವಳಕಾರಿಯಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.