ಕಶ್ಯಪ್ ಚಿತ್ರದಲ್ಲಿ ದುಲ್ಖರ್

ಮಾಲಿವುಡ್‌ನ ಸೂಪರ್‌ಸ್ಟಾರ್ ದುಲ್ಖರ್ ಸಲ್ಮಾನ್‌ಗೆ ಬಾಲಿವುಡ್ ಮತ್ತೊಮ್ಮೆ ಕೈಬೀಸಿ ಕರೆದಿದೆ. ‘ಕ್ಯಾರವಾನ್’ ಮೂಲಕ ಬಾಲಿವುಡ್ ಪಾದಾರ್ಪಣೆ ಮಾಡಿರುವ ದುಲ್ಖರ್‌ಗೆ ಈಗ ಬಿಟೌನ್‌ನ ಖ್ಯಾತ ನಿರ್ಮಾಪಕ- ನಿರ್ದೇಶಕ ಅನುರಾಗ್ ಕಶ್ಯಪ್‌ರ ಚಿತ್ರದಲ್ಲಿ ನಟಿಸುವ ಅವಕಾಶ ದೊರೆತಿದೆ. ‘ಮನ್‌ಮರ್ಝಿಯಾನ್’ ಎಂದು ಹೆಸರಿಡಲಾದ ಈ ಚಿತ್ರವು ತ್ರಿಕೋನ ಪ್ರೇಮ ಕಥೆಯನ್ನು ಹೊಂದಿದೆ. ವಿಶಾಲ್ ಭಾರದ್ವಾಜ್ ಈಗಾಗಲೇ ಈ ಚಿತ್ರದ ಇನ್ನೆರಡು ಮುಖ್ಯಪಾತ್ರಗಳಿಗೆ ತಾಪಸಿ ಪನ್ನೂ ಹಾಗೂ ವಿಕಿ ಕೌಶಲ್‌ರನ್ನು ಆಯ್ಕೆ ಮಾಡಿದ್ದಾರೆ.

‘ಕ್ಯಾರವಾನ್’ ಬಿಡುಗಡೆಗೆ ಮುನ್ನವೇ ದುಲ್ಖರ್‌ಗೆ ಇನ್ನೊಂದು ಬಾಲಿವುಡ್ ಚಿತ್ರದಲ್ಲಿ ಅವಕಾಶ ದೊರೆತಿರುವುದು ಈ ಪ್ರತಿಭಾವಂತ ನಟ, ಅಲ್ಲಿಯೂ ಬೆಳೆಯುವ ಸೂಚನೆಯನ್ನು ನೀಡಿದೆ. ಅಂದ ಹಾಗೆ ‘ಮನ್‌ಮರ್ಝಿಯಾನ್’ ಚಿತ್ರವನ್ನು ಆನಂದ್ ರಾಯ್ ನಿರ್ಮಿಸುತ್ತಿದ್ದಾರೆ. ಮಲಯಾಳಂ ಚಿತ್ರ ಕಮ್ಮಾಟಿಪಡಂನಲ್ಲಿ ದುಲ್ಖರ್ ಅಭಿನಯಕ್ಕೆ ಮಾರುಹೋದ ಕಶ್ಯಪ್, ಆಗಲೇ ತನ್ನ ಚಿತ್ರಕ್ಕೆ ದುಲ್ಖರ್‌ರನ್ನು ಹಾಕಿಕೊಳ್ಳಲು ನಿರ್ಧರಿಸಿದ್ದರಂತೆ. ಮಲಯಾಳಂನಲ್ಲಿ ಸಾಲು ಸಾಲು ಹಿಟ್ ಚಿತ್ರಗಳನ್ನು ನೀಡಿರುವ ದುಲ್ಖರ್, ತಮಿಳು ತೆಲುಗು ಚಿತ್ರಗಳಲ್ಲೂ ನಟಿಸುತ್ತಿದ್ದಾರೆ. ಅವರ ಚೊಚ್ಚಲ ತಮಿಳು ಚಿತ್ರ ‘ಒ.ಕೆ. ಕಣ್ಮಣಿ’ ಕೂಡಾ ಭರ್ಜರಿ ಯಶಸ್ಸು ಕಂಡಿತ್ತು.

ದುಲ್ಖರ್ ಈಗಾಗಲೇ ತನ್ನ ಚೊಚ್ಚಲ ಹಿಂದಿ ಚಿತ್ರ ‘ಕ್ಯಾರವಾನ್’ ನ ಚಿತ್ರೀಕರಣವನ್ನು ಪೂರ್ತಿ ಗೊಳಿಸಿದ್ದಾರೆ.

ಸಂಪೂರ್ಣ ರೋಡ್‌ಜರ್ನಿಯ ಕಥೆಯಿರುವ ಈ ಚಿತ್ರದಲ್ಲಿ ಇರ್ಫಾನ್ ಖಾನ್ ಹಾಗೂ ಮಿಥಿಲಾ ಪಾಲ್ಕರ್ ಕೂಡಾ ನಟಿಸಿದ್ದಾರೆ.