ಪರಮಾಣು ವರ್ಸಸ್ ಪರಿ

ಜನವರಿಯಲ್ಲಿ ‘ಪದ್ಮಾವತ್’ ಹಾಗೂ ಅಕ್ಷಯ್ ಅಭಿನಯದ ‘ಪ್ಯಾಡ್‌ಮ್ಯಾನ್’ ನಡುವೆ ಬಾಕ್ಸ್ ಆಫೀಸ್ ಸಮರ ನಡೆಯುವ ಸಾಧ್ಯತೆಯಿತ್ತಾದರೂ, ವಿವಾದಗಳಿಂದ ಬೆಂದುಹೋಗಿದ್ದ ಪದ್ಮಾವತ್‌ಗೆ ಬೆಂಬಲ ವ್ಯಕ್ತಪಡಿಸಿ ಕಡೆಗಳಿಗೆಯಲ್ಲಿ ‘ಪ್ಯಾಡ್‌ಮ್ಯಾನ್’ ಚಿತ್ರದ ಬಿಡುಗಡೆ ಮುಂದೂಲ್ಪಟ್ಟಿತ್ತು. ಹೀಗಾಗಿ ಈ ಎರಡು ಚಿತ್ರಗಳ ನಡುವೆ ಬಾಕ್ಸ್ ಆಫೀಸ್ ಕದನ ತಪ್ಪಿತ್ತು. ಆದರೆ ಮಾರ್ಚ್‌ನಲ್ಲಿ ಇನ್ನೆರಡು ಬಹುನಿರೀಕ್ಷಿತ ಬಾಲಿವುಡ್ ಚಿತ್ರಗಳು ಬಾಕ್ಸ್‌ಆಫೀಸ್‌ನಲ್ಲಿ ಮುಖಾಮುಖಿಯಾಗಲಿವೆ. ಅನುಷ್ಕಾ ಶರ್ಮಾ ಅಭಿನಯದ ‘ಪರಿ’ ಹಾಗೂ ಜಾನ್ ಅಬ್ರಹಾಂ ನಾಯಕನಾಗಿರುವ ‘ಪರಮಾಣು’ ಚಿತ್ರಗಳು ಮಾರ್ಚ್ 2ರಂದು ಬಿಡುಗಡೆಗೊಳ್ಳಲಿವೆ. ಸ್ವಾರಸ್ಯವೆಂದರೆ ಈ ಎರಡೂ ಚಿತ್ರಗಳಿಗೆ ಸಹನಿರ್ಮಾಪಕಿಯಾಗಿರುವ ಪ್ರೇರಣಾ ಆರೋರಾಗೆ ಆ ಬಗ್ಗೆ ಚಿಂತೆಯಿಲ್ಲವಂತೆ.

‘ಪರಿ’ ಹಾಗೂ ‘ಪರಮಾಣು’ ಎರಡೂ ವಿಭಿನ್ನ ಕಥಾವಸ್ತುವಿರುವ ಚಿತ್ರಗಳಾಗಿವೆ. ಪ್ರೇಕ್ಷಕರನ್ನು ಅವು ಚಿತ್ರಮಂದಿರಕ್ಕೆ ತಮ್ಮದೇ ಆದ ಸಾಮರ್ಥ್ಯದೊಂದಿಗೆ ಸೆಳೆಯಲು ಶಕ್ತವಾಗಿವೆಯೆಂದು ಆಕೆ ಭರವಸೆ ಹೊಂದಿ ದ್ದಾರೆ. ಅನುಷ್ಕಾ ಶರ್ಮಾ ಅಭಿನಯದ ‘ಪರಿ’ ಸೂಪರ್ ನ್ಯಾಚುರಲ್ ಥ್ರಿಲ್ಲರ್ ಆಗಿದ್ದರೆ, ಪರಮಾಣು ಚಿತ್ರವು 1998ರಲ್ಲಿ ಪೊಖ್ರಾನ್‌ನಲ್ಲಿ ಭಾರತ ನಡೆಸಿದ ಅಣ್ವಸ್ತ್ರ ಪರೀಕ್ಷೆಯ ಸುತ್ತಮುತ್ತಲಿನ ಘಟನಾವಳಿಗಳನ್ನು ಆಧರಿಸಿದೆ. ಈ ಎರಡು ಚಿತ್ರಗಳ ನಡುವೆ ಮಾರ್ಚ್‌ನಲ್ಲಿ ಇನ್ನೂ ಮೂರು ಬಿಗ್ ಬಜೆಟ್ ಚಿತ್ರಗಳು ಬಿಡುಗಡೆಗೆ ಸಾಲುನಿಂತಿವೆ. ಅಕ್ಷಯ್ ಅಭಿನಯದ ‘ಪ್ಯಾಡ್‌ಮ್ಯಾನ್’ ಅಲ್ಲದೆ, ಊರ್ವಶಿ ರೌಟೆಲಾ ಹಾಗೂ ಕರಣ್ ವಾಹಿ ಅಭಿನಯದ ಹೇಟ್ ಸ್ಟೋರಿ 4, ಸೋನಾಕ್ಷಿ ಸಿನ್ಹಾ ನಾಯಕಿಯಾಗಿರುವ ‘ಹ್ಯಾಪಿ ಬಾಗ್ ಜಾಯೇಗಿ ರಿಟರ್ನ್ಸ್’ ಕೂಡಾ ತೆರೆಗೆ ಬರಲಿದೆ.