ರೋಶನ್ ಅಬ್ದುಲ್ ರಹೂಫ್ ಯಾರೆಂದು ನಿಮಗೆ ಗೊತ್ತೇ ?

ಹೊಸದಿಲ್ಲಿ, ಫೆ.14: ತನ್ನ ಒಂದೇ ಕಣ್ಮಿಟುಕಿನ ಮೂಲಕ ನೆಟ್ಟಿಗರ ಮನಸೂರೆಗೊಂಡು ಇಂಟರ್ನೆಟ್ ಸೆನ್ಸೇಶನ್ ಆಗಿ 18 ವರ್ಷದ ಪ್ರಿಯಾ ಪ್ರಕಾಶ್ ವಾರಿಯರ್ ರಾತ್ರಿ ಬೆಳಗಾಗುವುದರೊಳಗೆ ಸೆಲೆಬ್ರಿಟಿಯಾಗಿ ಬಿಟ್ಟಿದ್ದಾರೆ. ಆದರೆ ಈ ಅಬ್ಬರದಲ್ಲಿ ‘ಒರು ಅಡಾರ್ ಲವ್’ ಮಲಯಾಳಂ ಚಿತ್ರದ ''ಮಾಣಿಕ್ಯ ಮಳರಾಯ...'' ಹಾಡಿನ ದೃಶ್ಯದಲ್ಲಿ ಕಾಣಿಸಿಕೊಂಡು ಪ್ರಿಯಾ ನಗು ಹಾಗೂ ಕಣ್ಣ ಮಿಟುಕಿಗೆ ಬೌಲ್ಡ್ ಆಗಿ ಬಿಟ್ಟಿದ್ದ ಯುವಕ ಹೆಚ್ಚು ಸುದ್ದಿಯಾಗಲೇ ಇಲ್ಲ.

ಈತನ ಹೆಸರು ರೋಶನ್ ಅಬ್ದುಲ್ ರಹೂಫ್. ಪ್ರಿಯಾಳಂತೆಯೇ ಆ ದೃಶ್ಯದಲ್ಲಿ ಆತನ ಅಭಿನಯವೂ ಕಣ್ಮನ ಸೆಳೆಯುವಂತಹುದ್ದೇ.

ತನ್ನ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಾಡಿನ ದೃಶ್ಯವೊಂದನ್ನು ಪೋಸ್ಟ್ ಮಾಡಿರುವ ರಹೂಫ್, ತನ್ನನ್ನು ಬೆಂಬಲಿಸಿದ ಎಲ್ಲರಿಗೂ ಕೃತಜ್ಞತೆ ಸಲ್ಲಿಸಿದ್ದಾನೆ. ‘‘ನನ್ನ ಮೇಲೆ ತೋರಿಸಿದ ಪ್ರೀತಿಗೆ ನಿಮಗೆಲ್ಲರಿಗೂ ಧನ್ಯವಾದಗಳು. ಎಲ್ಲರೂ ತಮ್ಮ ಹೃದಯಾಳದಿಂದ ನನ್ನನ್ನು ಅಭಿನಂದಿಸಿರುವುದರಿಂದ ಇನ್ನಷ್ಟು ಸಂತೋಷವಾಗುತ್ತಿದೆ. ‘ಒರು ಅಡಾರ್ ಲವ್’ ಈ ಹೆಸರೇ ಸೂಚಿಸುವಂತೆ ರೊಮಾನ್ಸ್ ಬಗ್ಗೆ ಹೇಳುತ್ತದೆ. ನಮ್ಮನ್ನು ಬೆಂಬಲಿಸುತ್ತಾ ಪ್ರೀತಿ ಹಂಚುತ್ತಾ ಇರಿ’’ ಎಂದು ಆತ ಬರೆದಿದ್ದಾನೆ.

ತನ್ನನ್ನೊಬ್ಬ ನಟ, ನೃತ್ಯಪಟು ಹಾಗೂ ಕನಸುಗಾರ ಎಂದು ತನ್ನ ಇನ್‌ಸ್ಟಾ ಬಯೋದಲ್ಲಿ ರಹೂಫ್ ತನ್ನನ್ನು ಬಣ್ಣಿಸುತ್ತಾನೆ. ತನ್ನ ಹಲವಾರು ಫೋಟೋಗಳನ್ನೂ ಆತ ಇಲ್ಲಿ ಶೇರ್ ಮಾಡಿದ್ದಾನೆ.