ಲೈಂಗಿಕ ಕಿರುಕುಳದ ಆರೋಪ ಹೊತ್ತ ಜೆಎನ್ ಯು ಪ್ರೊಫೆಸರ್ ಬಂಧನ, ಜಾಮೀನು

ಹೊಸದಿಲ್ಲಿ, ಮಾ.20: ಲೈಂಗಿಕ ಕಿರುಕುಳದ ಆರೋಪ ಹೊತ್ತಿರುವ ಜೆಎನ್ ಯು ಪ್ರೊಫೆಸರ್ ಅತುಲ್ ಜೋಹ್ರಿಯವರನ್ನು ಪೊಲೀಸರು ಬಂಧಿಸಿದ್ದು, ನಂತರ ಅವರಿಗೆ ಜಾಮೀನು ಲಭಿಸಿದೆ.

ಲೈಂಗಿಕ ಕಿರುಕುಳ ಆರೋಪದಲ್ಲಿ ಕನಿಷ್ಠ 9 ಮಹಿಳೆಯರು ಅತುಲ್ ವಿರುದ್ಧ ದೂರು ನೀಡಿದ್ದರು. ಪ್ರೊಫೆಸರ್ ನಮ್ಮ ಬಟ್ಟೆಯ ಬಗ್ಗೆ ಅಸಭ್ಯ ಭಾಷೆ ಬಳಸುತ್ತಿದ್ದಾರೆ ಹಾಗು ತರಗತಿ ನಡೆಸುವಾಗ ಅಸಭ್ಯವಾಗಿ ಸ್ಪರ್ಶಿಸುತ್ತಾರೆ ಎಂದು ವಸಂತ್ ಕುಂಜ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು, ಈ ಬಗ್ಗೆ ಪ್ರಕರಣ ಕೂಡ ದಾಖಲಾಗಿತ್ತು.

ಪ್ರೊಫೆಸರ್ ಬಂಧನಕ್ಕೆ ಆಗ್ರಹಿಸಿ ಜೆಎನ್ ಯು ವಿದ್ಯಾರ್ಥಿಗಳು ಪ್ರತಿಭಟನೆಗಳನ್ನು ನಡೆಸುತ್ತಿದ್ದರು. ನಿನ್ನೆ ಜೆಎನ್ ಯು ಸ್ಟೂಡೆಂಟ್ ಯುನಿಯನ್ ವಸಂತ್ ಕುಂಜ್ ಪೊಲೀಸ್ ಠಾಣೆಗೆ ಹಮ್ಮಿಕೊಂಡ ಜಾಥಾದ ಸಂದರ್ಭ ಪೊಲೀಸರು ಮತ್ತು ವಿದ್ಯಾರ್ಥಿಗಳ ನಡುವೆ ಘರ್ಷಣೆ ನಡೆದಿತ್ತು.