ಸಲ್ಮಾನ್ ಚಿತ್ರಕ್ಕೆ ಪ್ರಿಯಾಂಕಾ ಹೀರೋಯಿನ್

ಸಲ್ಮಾನ್ ಖಾನ್ ಹಾಗೂ ಪ್ರಿಯಾಂಕಾ ಚೋಪ್ರಾ ಇಬ್ಬರೂ ಬಾಲಿವುಡ್‌ನ ಬಾಕ್ಸ್ ಆಫೀಸ್ ಗ್ಯಾರಂಟಿ ತಾರೆಯರೆಂಬುದರಲ್ಲಿ ಎರಡು ಮಾತಿಲ್ಲ. ಈ ಜೋಡಿ ಜೊತೆಯಾಗಿ ನಟಿಸಿದ್ದ ಕೊನೆಯ ಚಿತ್ರ ‘ಗಾಡ್ ತುಸ್ಸಿ ಗ್ರೇಟ್ ಹೋ’ 2008ರಲ್ಲಿ ತೆರೆಕಂಡಿತ್ತು. ಸಾಕಷ್ಟು ಹಿಟ್ ಕೂಡಾ ಆಗಿತ್ತು. ಆದ್ಯಾಕೋ ಆನಂತರ ಇವರಿಬ್ಬರೂ ಜೊತೆಯಾಗಿ ನಟಿಸಲೇ ಇಲ್ಲ. ಈ ಹತ್ತು ವರ್ಷಗಳ ಅವಧಿಯಲ್ಲಿ ಸಲ್ಮಾನ್ ಖಾನ್, ಬಾಕ್ಸ್ ಆಫೀಸ್‌ನ ಅನಭಿಷಿಕ್ತ ದೊರೆಯೆನಿಸಿಕೊಂಡರೆ, ಪ್ರಿಯಾಂಕಾ ಹಾಲಿವುಡ್‌ಗೂ ಹಾರಿ, ಹೆಸರು ಮಾಡಿದ್ದಾರೆ. ಇದೀಗ 10 ವರ್ಷಗಳ ಸುದೀರ್ಘ ಗ್ಯಾಪ್ ಬಳಿಕ ಸಲ್ಮಾನ್ ಹಾಗೂ ಪ್ರಿಯಾಂಕಾ, ಮತ್ತೊಮ್ಮೆ ಜೊತೆಯಾಗಿ ಪ್ರೇಕ್ಷಕರನ್ನು ರಂಜಿಸಲಿದ್ದಾರೆ.

ಅಲಿ ಅಬ್ಬಾಸ್ ಜಫರ್ ನಿರ್ದೇಶನದ ಭಾರತ್ ಚಿತ್ರದಲ್ಲಿ ಪ್ರಿಯಾಂಕಾ, ಸಲ್ಮಾನ್‌ಗೆ ನಾಯಕಿಯಾಗಿ ನಟಿಸಲಿರುವುದು ಬಹುತೇಕ ಪಕ್ಕಾ ಆಗಿದೆ. 70 ವರ್ಷಗಳ ಅವಧಿಯಲ್ಲಿ ಓರ್ವ ವ್ಯಕ್ತಿಯ ಬದುಕಿನ ಸುತ್ತ ನಡೆಯುವ ಕಥೆಯನ್ನು ಈ ಚಿತ್ರ ಒಳಗೊಂಡಿದೆ. ಚಿತ್ರದ ನಾಯಕ ಭಾರತದ ಇತಿಹಾಸದಲ್ಲಿ ನಡೆಯುವ ಪ್ರಮುಖ ಘಟನಾವಳಿಗಳಿಗೆ ಸಾಕ್ಷಿಯಾಗಿರುತ್ತಾನೆ. ಭಾರತದ ಜನಪ್ರಿಯ ಕೊರಿಯನ್ ಚಿತ್ರ ‘ಒಡೆ ಮೈ ಫಾದರ್’ನಿಂದ ಸ್ಫೂರ್ತಿ ಪಡೆದಿದೆಯಾದರೂ, ಭಾರತದ ನೇಟಿವಿಟಿಗೆ ತಕ್ಕಂತೆ ಕಥೆಯಲ್ಲಿ ಹಲವಾರು ಬದಲಾವಣೆಗಳನ್ನು ಮಾಡಲಾಗಿದೆಯಂತೆ.

ಈ ಚಿತ್ರದ ಬಗ್ಗೆ ಚರ್ಚಿಸಲೆಂದೇ ಪ್ರಿಯಾಂಕಾ, ಹಾಲಿವುಡ್‌ನಿಂದ ಮುಂಬೈಗೆ ಬಂದಿದ್ದು, ಬಾಲಿವುಡ್‌ನಲ್ಲಿ ತಾನು ನಟಿಸಲಿರುವ ಚಿತ್ರಗಳ ಆಯ್ಕೆಯಲ್ಲಿ ತೊಡಗಿದ್ದಾರೆ. ಈವರೆಗೆ ಸಲ್ಮಾನ್ ಹಾಗೂ ಪ್ರಿಯಾಂಕಾ ಅವರು, ‘ಮುಜ್‌ಸೆ ಶಾದಿ ಕರೋಂಗೆ’, ‘ಸಲಾಮೆ ಇಶ್ಕ್’ ಹಾಗೂ ‘ಗಾಡ್ ತುಸ್ಸಿ ಗ್ರೇಟ್ ಹೋ’ ಚಿತ್ರಗಳಲ್ಲಿ ಜೊತೆಯಾಗಿ ನಟಿಸಿದ್ದರು. ಅಂದಹಾಗೆ ಪ್ರಿಯಾಂಕಾ, ಈ ಮೊದಲು ಅಲಿ ಜಫರ್ ನಿರ್ದೇಶನದ ‘ಗೂಂಡೆ’ ಚಿತ್ರದಲ್ಲಿ ನಟಿಸಿದ್ದರು. ಈ ಎಲ್ಲಾ ಕಾರಣಗಳಿಗಾಗಿ ಸಲ್ಮಾನ್, ಪ್ರಿಯಾಂಕಾ ಹಾಗೂ ಅಲಿ ಜಫರ್ ಅವರ ಭರ್ಜರಿ ಕಾಂಬಿನೇಶನ್‌ನ ಭಾರತ್ ಬಗ್ಗೆ ಬಾಲಿವುಡ್‌ನಲ್ಲಿ ಭಾರೀ ಕುತೂಹಲವನ್ನು ಕೆರಳಿಸಿದೆ.